ಜ್ಞಾನತ್‌ರ ಪಡಿಮ 26
26
1ಬೇನಿ ಕಾಲತ್‌ ಬೂವ ಮಂಜು, ಕೊಯ್ಯಿಪಣಿರ ಕಾಲತ್‌ ಮಳೆಯು ಎನ್ನೆನೆ ಸೆರಿ ಆಪುಲೆಯೊ, ಅನ್ನನೆ ಮೂಡಂಗ್‌ ಗೌರವವು ಸೆರಿ ಆಪುಲೆ.
2ಮನೆಪಕ್ಷಿ ತಿರ್‌ಗಾಡುವನಕೆಯು, ಬೋರೆ ಪಕ್ಷಿಯ ಪಾರಿ ಪೋಯಿತ್‌ ನೆಲಕ್‌ ಮುಟ್ಟತನೆಕೆಯು, ಕಾರಣಯಿಲ್ಲತೆ ಕೊಡ್‌ತ ಶಾಪ ನಿಪ್ಪುಲೆ.
3ಕುದುರೆಕ್‌ ಕೋಲು, ಕತ್ತೆಕ್‌ ಕಡಿವಾಣವು, ಮೂಡಂಡ ಬೆನ್ನ್‌ಕ್ ಪೊಯ್ಯಿತ್‌ ಕ್‌ಟ್ಟುವದು ಸೆರಿ.
4ಮೂಡಂಗ್‌ ಅಂವೊಂಡ ದಡ್ಡತನಕ್‌ ಸೆರಿಯಾಯಿತ್‌ ಉತ್ತರ ಕೊಡ್‌ಕತೆ. ಇಲ್ಲತೆ ಪೋಚೇಂಗಿ ನೀನ್‌ ಸಹ ಅಂವೊಂಡನೆಕೆ ಆಪಿಯ.
5ದಡ್ಡಂಗ್‌ ಅಂವೊಂಡ ದಡ್ಡತನಕ್‌ ಸೆರಿಯಾಯಿತ್‌ ಉತ್ತರ ಕೊಡ್. ಉತ್ತರ ಕೊಡ್‌ಕತೆ ಪೋಚೇಂಗಿ ತನ್ನ ತಾನೇ ಜ್ಞಾನವುಳ್ಳಂವೊಂದ್‌ ಗೇನ ಮಾಡುವ.
6ಮೂಡಂಡ ಮೂಲಕ ಸುದ್ದಿ ಅಯಿಪಂವೊ ತಾಂಡ ಸ್ವಂತ ಕಾಲ್‌ನ ಕತ್ತರಿಚಿಟ್ಟಂಡ್‌ ನಷ್ಟಪಡುವನೆಕೆ ಇಪ್ಪ.
7ಕುಂಟಂಡ ಕಾಲ್‌ ಕುಂದಿಪೋಯಿತುಳ್ಳನೆಕೆ, ಮೂಡಂಡ ಬಾಯಿಯಿಂಜ ಬಪ್ಪ ಜ್ಞಾನತ್‌ರ ಪಡಿಮವು ಇಪ್ಪ.
8ಮೂಡಂಗ್‌ ಕಾಟುವ ಗೌರವ, ಕವಣೆಕ್‌ ಕೆಟ್ಟ್‌ನ ಕಲ್ಲ್‌ರನೆಕೆ.
9ಮೂಡಂಡ ಬಾಯಿಯಿಂಜ ಬಪ್ಪ ಪಡಿಮ, ಕುಡುಕಂಡ ಕೈಯಿಕ್‌ ಕ್‌ಟ್ಟ್‌ನ ಮುಳ್ಳ್‌ರನೆಕೆ ಇಪ್ಪ.
10ಮುಟ್ಟಾಳನ ಅಲ್ಲ ಕುಡ್‌ಕ್ಕನೆ ಕೂಲಿಕ್‌ ಮಾಡುವಂವೊ, ಬಟ್ಟೆಲ್‌ ಪೋಪಯಿಂಗಕೆಲ್ಲ ಗಾಯ ಮಾಡುವ ಬಿಲ್ಲ್‌ಗಾರಂಡನೆಕೆ ಆಪ.
11ನಾಯಿ ತಾನ್‌ ಕಕ್ಕ್‌ನನ ನೆಕ್ಕುವಕ್‌ ತಿರ್‌ಗ್‌ವನೆಕೆ, ಮೂಡ ಸಹ ತಾಂಡ ಮೂಡತನಕ್‌ ತಿರ್‌ಗುವ.
12ತನ್ನ ತಾನೆ ಜ್ಞಾನೀಂದ್‌ ಗೇನ ಮಾಡ್‌ವಂವೊನ ನೋಟ್, ಅನ್ನನೆ ಉಳ್ಳ ಮನುಷ್ಯಕಿಂಜಿ ಮೂಡಂಡ ಮೇಲೆ ನಿರೀಕ್ಷೆ ಬೆಕ್ಕಲು.
13ಬಟ್ಟೆಲ್‌ ಸಿಂಹ ಉಂಡ್, ಬೀದಿಲ್‌ ಸಿಂಹ ಇಪ್ಪಾಂದ್‌ ಸೋಮಾರಿಯಾನಂವೊ ಎಣ್ಣುವ.
14ಪಡಿ ತಿರ್‌ಗಣೆಲ್‌ ಜೂಂಗಾಡುವನಕೆ, ಸೋಮಾರಿಯು ತಾಂಡ ಮೆತ್ತೆರ ಮೇಲೆ ತಿರುವ.
15ಸೋಮಾರಿ ತಾಂಡ ಕೈಯಿನ ಪಾತ್‌ರೆಲ್‌ ಬೆಚ್ಚಿತ್, ಅದ್‌ನ ಪುನಃ ತಾಂಡ ಬಾಯಿಕ್‌ ಎಡ್‌ತಂಡ್‌ ಪೋಪಕ್‌ ಕಷ್ಟ ಪಡುವ.
16ವಿವೇಕತ್‌ಂಜ ಜವಾಬ್ ಕೊಡ್‌ಪಕಯ್ಯುವ ಏಳ್‌ ಜನಕಿಂಜಿ, ತನ್ನ ತಾನೆ ಜ್ಞಾನಿ ಎಣ್ಣಿಯಂಡ್‌ ಸೋಮಾರಿಯಾನಂವೊ ಗೇನ ಮಾಡಿಯೊವ.
17ಬಟ್ಟೆಲ್‌ ಪೋಯಂಡಿಪ್ಪಕ, ತಾಂಗ್‌ ಸಮ್ಮಂದಯಿಲ್ಲತ ಜಗಳತ್‌ ಮಂಡೆ ಇಡೋದ್, ಬಟ್ಟೆಲ್‌ ಪೋಯಂಡಿಪ್ಪ ನಾಯಿರ ಕೆಮಿನ ಪುಡ್‌ಚಿತ್‌ ಬಲಿಪಂವೊಂಡನೆಕೆ ಇಪ್ಪ.
18ಕೊಳ್ಳಿನ, ಅಂಬ್‌ನ ಪಿಂಞ ಚಾವನೆಕೆ ಮಾಡ್‌ವ ಎಲ್ಲಾ ಕಾರ್ಯತ್‌ನ ಮಾಡುವ ಪುಚ್ಚ ಎನ್ನನೆ ಇಪ್ಪೊ,
19ಅನ್ನನೆ ತಾಂಡ ಕೂಡೆ ಉಳ್ಳಂವೊನ ವಂಚನೆ ಮಾಡಿತ್: ನಾನ್‌ ಮುಂಡತೆ ಕಳಿಚಂಡಿಂಜ್ೕಂದ್‌ ಎಣ್ಣುವ ಮನುಷ್ಯನು ಇಪ್ಪ.
20ಪುಳ್ಳಿಯಿಲ್ಲತೆ ತಿತ್ತ್‌ ಆರಿ ಪೋಪ. ಅನ್ನನೆ ಚಾಡಿ ಎಣ್ಣ್‌ವಂವೊ ಇಲ್ಲತೆ ಜಗಳ ನಿಂದ್‌ ಪೋಪ.
21ಮಸಿಕಂಡೆ ಚುಳ್ಳ್‌ಕು, ಪುಳ್ಳಿ ತಿತ್ತ್‌ಕು ಎನ್ನನೆಯೊ, ಅನ್ನನೆ ಜಗಳಗಂಟ ಜಗಳತ್‌ನ ಸುರುಮಾಡುವಕ್‌ ಸೆರಿಯಾನಂವೊ.
22ಒಬ್ಬಂಡ ಮೇಲೆ ಎಣ್ಣುವ ಕುತ್ತತ್‌ನ ಕ್‍ೕಪಕ, ಅದ್‌ ರಸವುಳ್ಳ ಊಟತ್‌ರನಕೆ ಇಪ್ಪ. ಅದ್‌ ಮನಸ್ಸ್‌ರ ಆಳತ್‌ ಬೇರೂರಿತ್‌ ಪೋಪ.
23ಕೆಟ್ಟ ಆಲೋಚನೆನ ಹೃದಯತ್‌ಲ್‌ ಬೆಚ್ಚಂಡ್‌ ಪ್ರೀತಿಯಿಂಜ ತಕ್ಕ್‌ ಪರಿಯೊದ್‌ ಎನ್ನನೆ ಎಣ್ಣ್‌ಚೇಂಗಿ, ಮಣ್ಣ್‌ ಚಟ್ಟಿರ ಮೇಲೆ ಬೊಳ್ಳಿ ಗಿಲೀಟ್ ಇಟ್ಟನೆಕೆ.
24ವಿರೋದಿಯಾನಂವೊ ತಾಂಡ ಮನಸ್ಸ್‌ಲ್‌ ವಂಚನೆನ ಬೆಚ್ಚಂಡ್‌ ಪ್ರೀತಿರ ತಕ್ಕ್‌ನ ಪರಿಯುವ.
25ಅಂವೊ ಪರಿಯುವ ತಕ್ಕ್‌ ಚಾಯಿ ಇಂಜತೇಂಗಿಯು ಅಂವೊನ ನಂಬತೆ. ಅಂವೊಂಡ ಹೃದಯತ್‌ ಏಳ್‌ ಅಸಹ್ಯ ಉಂಡ್.
26ತಾಂಡ ವಿರೋದತ್‌ನ ವಂಚನೆಯಿಂಜ ಒಳ್‌ಪ್‌ಚಿಡ್‌ವಂವೊಂಡ ದುಷ್ಟತನ ಜನಡ ಸಬೆರ ಮಿಂಞತ್‌ ಕಾಂಬ್‌ಚಿಡುವ.
27ಕುಂಡ್‌ ತೋಡುವಂವೊ ತಾನೆ ಅದ್‌ಲ್‌ ಬೂವ. ಬಂಡೆನ ಉರುಳಿಚಿಡುವಂವೊ ಆ ಬಂಡೆಯಿಂಜಲೇ ಜಜ್ಜಿ ಪೋಪ.
28ಪೊಟ್ಟ್‌ ಪರಿಯುವಂವೊ, ಅಂವೊಂಡಗುಂಡ್‌ ಕಷ್ಟಪಟ್ಟಯಿಂಗಳ ದ್ವೇಶ ಮಾಡುವ. ಕೊಚ್ಚಿ ತಕ್ಕ್‌ ಪರಿಯುವ ಬಾಯಿ ನಾಶತ್‌ನ ಉಂಟ್ ಮಾಡುವ.
Currently Selected:
ಜ್ಞಾನತ್‌ರ ಪಡಿಮ 26: ಕೊಡವ
Highlight
Share
Copy
Want to have your highlights saved across all your devices? Sign up or sign in
© 2017, New Life Literature (NLL)
