ಯೋನ 3
3
ಯೋನ ನಿನೆವೆಕ್‌ ಪೋಪದ್‌
1ದಂಡನೆ ಕುರಿ ಯೆಹೋವಂಡ ವಾಕ್ಯ ಯೋನಂಗ್‌ ಉಂಟಾಯಿತ್, ಅಂವೊ: 2ನೀನ್‌ ಎದ್ದಿತ್ ಬಲ್ಯ ಪಟ್ಟಣವಾನ ನಿನೆವೆಕ್‌ ಪೋಯಿತ್, ನಾನ್‌ ನೀಕ್‌ ಎಣ್ಣ್‌ವ ಪ್ರಕಾರ ಅಲ್ಲಿ ಉಳ್ಳಯಿಂಗಕ್‌ ಎಚ್ಚರ ಕೊಡ್‌ಕೊಂಡೂಂದ್‌ ಎಣ್ಣ್‌ಚಿ.
3ಅಕ್ಕ ಯೋನ ಎದ್ದಿತ್, ಯೆಹೋವ ಆಜ್ಞೆ ಮಾಡ್‌ನ ಪ್ರಕಾರ ನಿನೆವೆಕ್‌ ಪೋಚಿ. ಆ ಪಟ್ಟಣ ಮೂಂದ್‌ ದಿನ ನಡ್‌ಪಚ್ಚಕ್‌ ದೂರ ವಿಸ್ತಾರವಾನ ಬಲ್ಯ ಪಟ್ಟಣವಾಯಿತ್‌ಂಜತ್. 4ಯೋನ ಆ ಬಲ್ಯ ಪಟ್ಟಣತ್‌ಲ್‌ ಪ್ರವೇಷ ಮಾಡಿತ್, ಒರ್‌ ದಿನ ಪ್ರಯಾಣ ಮಾಡಿತ್: ಇಂಞು ನಾಪ್ಪದ್‌ ದಿವಸತ್‌ಲ್‌ ನಿನೆವೆ ಪಟ್ಟಣ ನಾಶ ಆಪಾಂದ್‌ ಪ್ರಚಾರ ಮಾಡ್‌ಚಿ.
5ಇದನ ಕ್‍ೕಟ ನಿನೆವೆ ಜನ, ದೇವಡ ಮೇಲೆ ನಂಬಿಕೆ ಬೆಚ್ಚಿತ್, ಒಂದೂ ತಿಂಗತೆ ಪಟ್ಟಣಿ ನಿಕ್ಕಂಡೂಂದ್‌ ಎಣ್ಣ್‌ಚಿ. ಪೆರಿಯಯಿಂಗಯಿಂಜ ಸುರು ಮಾಡಿತ್ ಚೆರಿಯಯಿಂಗತ್ತನೆ ಎಲ್ಲಾರು ಗೋಣಿಚೀಲತ್‌ರ ಬಟ್ಟೇನ ಕೆಟ್ಟಿಯಂಡತ್.
6ಈ ಸುದ್ದಿ ನಿನೆವೆ ಪಟ್ಟಣತ್‌ರ ರಾಜಂಗ್‌ ಮುಟ್ಟ್‌ವಕ, ಅಂವೊ ತಾಂಡ ಸಿಂಹಾಸನತ್‌ಂಜ ಎದ್ದಿತ್, ಇಟ್ಟಂಡಿಂಜ ತಾಂಡ ರಾಜ ವಸ್ತ್ರತ್‌ನ ಉತ್ತಿತ್, ಗೋಣಿಚೀಲತ್‌ರ ಬಟ್ಟೇನ ಕೆಟ್ಟಿಯಂಡ್‌ ಬೂದಿರ ಮೇಲೆ ಅಳ್‌ತಂಡತ್. 7ಇದಲ್ಲತೆ ಅಂವೊನು ಅಂವೊಂಡ ಅದಿಕಾರಿಯಳು ತೀರ್ಮಾನ ಮಾಡ್‌ನ ಆಜ್ಞೆಯಾಯಿತ್‌ ಕೊಡ್‌ತ ಆಜ್ಞೆರ ವಿವರ ಎಂತ ಎಣ್ಣ್‌ಚೇಂಗಿ: ನಿನೆವೆರ ಜನ, ಪ್ರಾಣಿಯ, ಎತ್ತ್‌ಕಡ್‌ಚಿಯ, ಆಡ್‌ಕೊರಿಯ ಸಹ ಏದ್‌ ರಸವು ನೋಟ್‌ವಕ್ಕಾಗ, ತಿಂಬಕು ಕುಡಿಪಕು ಆಗ. 8ಅದಲ್ಲತೆ ಜನಳು ಪ್ರಾಣಿಯಳು ಗೋಣಿಚೀಲ ಬಟ್ಟೆನ ಕೆಟ್ಟಂಡು, ಎಲ್ಲರು ದೇವಕ್‌ ಜೋರಾಯಿತ್‌ ಮೊರೆಯಿಡಂಡು. ಒಬ್ಬೊಬ್ಬನು ತಾಂಡ ಪಾಳ್‌ ಬಟ್ಟೆನ ಪಿಂಞ ಹಿಂಸೆ ಮಾಡ್‌ವದ್‌ನ ಬುಡಂಡು. 9ದಾರ್‌ಕ್‌ ಗೊತ್ತುಂಡ್, ಒರ್‌ ಸಮಯ ದೇವ ಕನಿಕರಪಟ್ಟಿತ್‌ ತಾಂಡ ಬಯಂಕರ ಚೆಡಿನ ಬಯ್ಯಕ್‌ ಎಡ್‌ಕು, ನಂಗ ನಾಶ ಆಕತೆ ಬದ್‌ಕುವಾಂದ್‌ ಎಣ್ಣ್‌ವಕ್‌ ಎಣ್ಣ್‌ಚಿ.
10ದೇವ ನಿನೆವೆರ ಜನ ಮಾಡುವ ಕಾರ್ಯತ್‌ನೆಲ್ಲಾ ನೋಟಿತ್‌ ಅಯಿಂಗ ಪಾಳ್‌ ಬಟ್ಟೆಯಿಂಜ ತಿರ್‌ಗ್‌ಚೀಂದ್‌ ಅರ್‌ಂಜಂಡ್, ಅಂವೊಂಡ ಮನಸ್ಸ್‌ನ ಬದ್‌ಲಾಯಿಚಿಟ್ಟಿತ್, ಕಣಿಕಾರಪಟ್ಟಿತ್, ಅಂವೊ ಕೊಡ್‌ಕಂಡೂಂದ್‌ ಇಂಜ ದಂಡನೆನ ಕೊಡ್‌ಕತೆ ಬುಟ್ಟ್‌ರ್‌ತ್.
Currently Selected:
ಯೋನ 3: ಕೊಡವ
Highlight
Share
Copy
Want to have your highlights saved across all your devices? Sign up or sign in
© 2017, New Life Literature (NLL)
