ಯೋಹಾನ 5
5
ಯೇಸು ಒರ್ ಕುಂಟನ ವಾಸಿ ಮಾಡ್‍ವದ್
1ಇದಾನ ಪಿಂಞ ಯೆಹೂದ್ಯಂಗಡ ಒರ್ ನಮ್ಮೆ ಬಪ್ಪಕ, ಯೇಸು ಯೆರೂಸಲೇಮ್‌ಕ್ ಪೋಚಿ. 2ಪಟ್ಟಣತ್‍ರ ಒಳ್‍ಲ್, ಕೊರಿಯಡ ಪಡಿ ಎಣ್ಣುವ ಒರ್ ಪಡಿ ಉಂಡ್. ಅದ್ಂಡ ಪಕ್ಕತ್‍ಲ್ ಅರಾಮಿಯ ತಕ್ಕ್‌ಲ್ ಬೇತ್ಸಥಾಂದ್ ಕಾಕ್‌ವಕಿಂಜ ಒರ್ ಗುಂಡಿ ಇಂಜತ್. ಅದ್ಂಡ ಸುತ್ತ್‌ಲ್ ಅಂಜ್ ಅಟ್ಟ ಇಂಜತ್. 3ಈ ಅಟ್ಟತ್‍ರ ಅಡಿಲ್, ಕುರ್‌ಡಂಗ, ಕುಂಟಂಗ, ಪಾರ್ಶ್ವವಾಯು ಕಾಯಿಲೆಲ್ ಉಳ್ಳಯಿಂಗಾಂದ್ ದುಂಬ ಕಾಯಿಲೆ ಉಳ್ಳಯಿಂಗ ಬುದ್ದಂಡ್ ನೀರ್ ಎಕ್ಕ ಕಲ್‌ಂಗ್‌ವಾಂದ್ ಪಾರಕಾತಂಡಿಪ್ಪ. 4ಓರೊಮ್ಮ, ದೇವದೂತ ಒಬ್ಬ ಬಂದಿತ್, ಆ ಗುಂಡಿಲ್ ಇಳಿಂಜಿತ್, ನೀರ್‌ನ ಕಲಕುವ; ಅನ್ನನೆ ನೀರ್ ಕಲ್‌ಂಗ್‍ನ ಪಿಂಞ, ದಾರ್ ಆದ್ಯವಾಯಿತ್ ಇಳಿಯುವ, ಅಯಿಂಗಕ್ ಏದ್ ತರ ಕಾಯಿಲೆ ಇಂಜತೇಂಗಿಯು ಅದ್ ವಾಸಿ ಆಪಕಿಂಜತ್#5.4 ಚೆನ್ನ ಮೂಲ ಪ್ರತಿಲ್ ಈ ವಾಕ್ಯ ಇಲ್ಲೆ.. 5ನುಪ್ಪತೆಟ್ಟ್ ಕಾಲ ಕಾಯಿಲೆಲ್ ಇಂಜ ಒಬ್ಬ ಅಲ್ಲಿ ಇಂಜತ್.
6ಆ ಮನುಷ್ಯನ ಯೇಸು ಕಾಂಬಕ: ಅಂವೊ, ದುಂಬ ಕಾಲ ಕಾಯಿಲೆಲ್ ನರಳಿಯಂಡ್ ಉಂಡ್‍ೕಂದ್ ಗೊತ್ತಾಚಿ. ಯೇಸು ಅಂವೊನ ನೋಟಿತ್: ನೀಕ್ ನೀಡ ಕಾಯಿಲೆ ವಾಸಿ ಆಂಡುವಾಂದ್ ಕ್‍ೕಟತ್.
7ಆ ಕಾಯಿಲೆಕಾರ ಯೇಸುಕ್: ಎಜಮಾನನೇ, ನೀರ್ ಕಲಂಗುವಕ, ನನ್ನ ಗುಂಡಿಲ್ ಕೊಂಡ್ ಪೋಪಕ್ ದಾರೂ ಇಲ್ಲೆ. ನಾನ್ ಅಲ್ಲಿ ಪೋಪಕ್ ಮಿಂಞ ಇಂಞೊಬ್ಬ ಬಂತ್ ಇಳಿಂಜಿರುವಾಂದ್ ಎಣ್ಣ್‌ಚಿ.
8ಅಕ್ಕ ಯೇಸು ಅಂವೊನ ನೋಟಿತ್: ಏಳ್, ನೀಡ ಪಲಂಬ್‌ನ ಎಡ್‍ತಂಡ್ ನಡೇಂದ್ ಎಣ್ಣ್‌ಚಿ. 9ಅಕ್ಕಲೆ ಅಂವೊ ವಾಸಿಯಾಯಿತ್, ಅಂವೊಂಡ ಪಲಂಬ್‌ನ ಎಡ್‍ತಂಡ್ ನಡ್‍ಪಕ್ ಸುರು ಮಾಡ್‍ಚಿ. ಆ ದಿವಸ ಸಬ್ಬತ್ ದಿವಸವಾಯಿತ್ಂಜತ್.
10ಆನಗುಂಡ್, ಯೆಹೂದ್ಯ ಅದಿಕಾರಿಯಂಗ: ಇಂದ್ ಸಬ್ಬತ್ ದಿನ, ನೀಡ ಪಲಂಬ್‌ನ ಎಡ್‍ತಂಡ್ ಪೋಪ ಕೆಲಸತ್‍ನ ಮಾಡ್‌ವಕ್ ನಂಗಡ ನ್ಯಾಯಪ್ರಮಾಣ ಅನುಮತಿ ತಂದಿತ್‌ಲ್ಲೇಂದ್ ವಾಸಿಯಾನ ಮನುಷ್ಯಂಗ್ ಎಣ್ಣ್‌ಚಿ.
11ಆಚೇಂಗಿ ಆ ಮನುಷ್ಯ ಅಯಿಂಗಕ್: ನನ್ನ ವಾಸಿ ಮಾಡ್‍ನಂವೊ ನೀಡ ಪಲಂಬ್‌ನ ಎಡ್‍ತಂಡ್ ನಡೇಂದ್ ಎಣ್ಣ್‌ಚೀಂದ್ ಎಣ್ಣ್‌ಚಿ.
12ಅದ್ಂಗ್ ಅಯಿಂಗ: ನೀಡ ಪಲಂಬ್‌ನ ಎಡ್‍ತಂಡ್ ನಡೇಂದ್ ನೀಕ್ ಎಣ್ಣ್‌ನ ಮನುಷ್ಯ ದಾರ್‍ೕಂದ್ ಕ್‍ೕಪಕ, 13ವಾಸಿ ಆನ ಮನುಷ್ಯಂಗ್ ಯೇಸು ದಾರ್‍ೕಂದ್ ಗೊತ್ತ್‌ಂಜಿತ್‌ಲ್ಲೆ. ಎನ್ನಂಗೆಣ್ಣ್‌ಚೇಂಗಿ, ಆ ಜಾಗತ್‍ಲ್ ಜನಡ ಗುಂಪ್ ದುಂಬ ಇಂಜಗುಂಡ್, ಯೇಸು ಅಲ್ಲಿಂಜ ದೂರ ಪೋಯಿತ್ಂಜತ್.
14ಚೆನ್ನ ಸಮಯ ಕಯಿಂಜ ಪಿಂಞ, ಯೇಸು ಆ ಮನುಷ್ಯನ ದೇವಾಲಯತ್‍ಲ್ ಕಂಡತ್: ನೋಟ್, ನೀನ್ ಇಕ್ಕ ವಾಸಿ ಆಯಿತುಳ್ಳಿಯ, ಇಂಞು ನೀನ್ ಪಾಪ ಮಾಡತನೆಕೆ ಇರ್, ಇಲ್ಲತಪೋಚೇಂಗಿ ಇದ್‌ಂಗಿಂಜ ಬಲ್ಯ ಕಾಯಿಲೆ ನೀಕ್ ಬಪ್ಪಾಂದ್ ಯೇಸು ಎಣ್ಣ್‌ಚಿ. 15ಅಕ್ಕ, ವಾಸಿಯಾನ ಆ ಮನುಷ್ಯ ಯೆಹೂದ್ಯಂಗಡ ಅದಿಕಾರಿಯಂಗಕ್ ಪೋಯಿತ್, ನನ್ನ ವಾಸಿ ಮಾಡ್‍ನಂವೊ ಯೇಸೂಂದ್ ಎಣ್ಣ್‌ಚಿ.
ಯೇಸು ದೇವಡ ಮೋಂವೋಂದ್ ಎಣ್ಣ್‌ನದ್
16ಯೇಸು ಸಬ್ಬತ್ ದಿವಸತ್‍ಲ್ ಇನ್ನನೆ ಮಾಡ್‍ನಗುಂಡ್, ಅಂವೊನ ಹಿಂಸೆಪಡ್‍ತ್‌ವಕ್ ಸುರು ಮಾಡಿತ್, ಅಂವೊನ ಕೊಲ್ಲಂಡೂಂದ್ ಯೆಹೂದ್ಯ ಅದಿಕಾರಿಯಂಗ ನೋಟಿಯಂಡಿಂಜತ್. 17ಯೇಸು ಅಯಿಂಗಕ್: ನಾಡ ಅಪ್ಪ ಇಲ್ಲಿಕತ್ತನೆ ಕ್ರಿಯೆ ಮಾಡಿಯಂಡುಂಡ್, ಅದ್ಂಗಾಯಿತ್ ನಾನ್ ಸಹ ಕ್ರಿಯೆ ಮಾಡಿಯಂಡ್ ಉಳ್ಳ್‌ಂದ್ ಎಣ್ಣ್‌ಚಿ. 18ಯೇಸು ಸಬ್ಬತ್ ದಿವಸತ್‍ಲ್ ಮಾಡ್‌ವಕಯ್ಯತದ್‍ನ ಮಾಡ್‍ನದ್ ಅಲ್ಲತೆ, ದೇವನ ತಾಂಡ ಸ್ವಂತ ಅಪ್ಪಾಂದ್ ಕಾಕಿತ್, ಅಂವೊನ ದೇವಕ್ ಸಮವಾಯಿತ್ ಮಾಡ್‍ನಗುಂಡ್, ಯೆಹೂದ್ಯ ಅದಿಕಾರಿಯಂಗ ಅಂವೊನ ಕೊಲ್ಲಂಡೂಂದ್ ಇಂಞು ದುಂಬ ಆಲೋಚನೆ ಮಾಡಿಯಂಡಿಂಜತ್.
19ಅಕ್ಕ ಯೇಸು ಅಯಿಂಗಕ್ ಇನ್ನನೆ ವಿವರಿಚಿಟ್ಟತ್: ನೇರಾಯಿತು ನೇರಾಯಿತು ನಾನ್ ನಿಂಗಕ್ ಎಣ್ಣ್‌ವಿ, ಅಪ್ಪನಾನ ದೇವ ಮಾಡ್‌ವಾನ ಕಾಂಬದ್‍ನ ಬುಟ್ಟಿತ್, ಮೋಂವೊ ಬೋರೆ ಏದು ತಾಂಡ ಸ್ವಂತವಾಯಿತ್ ಮಾಡುಲೆ. ಎನ್ನಂಗೆಣ್ಣ್‌ಚೇಂಗಿ, ಅಪ್ಪನಾನ ದೇವ ಎಂತ ಮಾಡ್‌ವೋ, ಅದ್‍ನ ಮೋಂವೊನು ಅನ್ನನೆ ಮಾಡ್‌ವ. 20ಅಪ್ಪ ಮೋಂವೊನ ದುಂಬ ಪ್ರೀತಿ ಮಾಡಿತ್, ಅಂವೊ ಮಾಡ್‌ವಾನೆಲ್ಲಾ ಮೋಂವೊಂಗ್ ಕಾಟಿ ಕೊಡ್‍ಪ; ನಿಂಗ ಆಶ್ಚರ್ಯ ಪಡುವನೆಕೆ ಇದ್‌ಂಗಿಂಜ ಬಲ್ಯ ಬಲ್ಯ ಕಾರ್ಯತ್‍ನ ಮೋಂವೊಂಗ್ ಕಾಟಿತಪ್ಪ. 21ಅಪ್ಪ, ಚತ್ತ್ ಪೋನಯಿಂಗಳ ಜೀವವಾಯಿತ್ ಎಪ್ಪಿತ್ ಬದ್‍ಕ್‍ಚಿಡ್‌ವನೆಕೆ, ಮೋಂವೊನು ಸಹ ಅಂವೊಂಗ್ ಕುಶಿಯುಳ್ಳಯಿಂಗಳ ಜೀವವಾಯಿತ್ ಎಪ್ಪಿತ್ ಬದ್‍ಕ್‍ಚಿಡ್‌ವ. 22ಇದ್‍ಲ್ಲತೆ, ಅಪ್ಪನ ಗನಪಡುತ್‌ವನೆಕೆ ಎಲ್ಲಾರು ಮೋಂವೊನ ಸಹ ಗನಪಡುತಂಡೂಂದ್, ಅಪ್ಪ ದಾರ್‌ನು ತೀರ್ಪ್ ಮಾಡತೆ, ತೀರ್ಪ್ ಮಾಡ್‌ವಕುಳ್ಳ ಪೂರ್ತಿ ಅದಿಕಾರತ್‍ನ ಮೋಂವೊಂಗ್ ಕೊಡ್‌ತಿತುಂಡ್. 23ಮೋಂವೊನ ಗನ ಪಡ್‍ತತಯಿಂಗ, ಅಂವೊನ ಅಯಿಚ ಅಪ್ಪನ ಸಹ ಗನ ಪಡ್‍ತತಯಿಂಗಳಾಯಿತುಂಡ್.
24ದಾರ್ ನಾಡ ತಕ್ಕ್‌ನ ಕ್‍ೕಟಿತ್, ನನ್ನ ಅಯಿಚಂವೊನ ನಂಬುವ, ಅಯಿಂಗಕ್ ನಿತ್ಯ ಜೀವ ಉಂಡ್, ಅಯಿಂಗಕ್ ಕ್‍ಟ್ಟುವ ಶಿಕ್ಷೇರ ತೀರ್ಪ್‌ಯಿಂಜ ಅಯಿಂಗ ಬಚಾವ್ ಆಪ. ಅನ್ನನೆ ಅಯಿಂಗಕ್ ಬಪ್ಪ ಚಾವ್‍ಯಿಂಜಲು, ಬದ್‌ಕಿತ್ ಜೀವವಾಯಿತ್ ಬಪ್ಪಾಂದ್ ನಿಂಗಕ್ ನೇರಾಯಿತು ನೇರಾಯಿತು ಎಣ್ಣ್‌ವಿ.
25ಚತ್ತಯಿಂಗ ದೇವಡ ಮೋಂವೊಂಡ ಸ್ವರ ಕ್‍ೕಪ ಕಾಲ ಬಪ್ಪ, ಆ ಸಮಯ ಇಕ್ಕಲೆ ಬಂದಿತುಂಡ್. ಸ್ವರತ್‍ನ ಕ್‍ೕಪಯಿಂಗ ಜೀವವಾಯಿತ್ ಬಪ್ಪಾಂದ್ ನೇರಾಯಿತು ನೇರಾಯಿತು ನಾನ್ ನಿಂಗಕ್ ಎಣ್ಣ್‌ವಿ. 26ಎನ್ನಂಗೆಣ್ಣ್‌ಚೇಂಗಿ, ಅಪ್ಪಂಗ್ ಎನ್ನನೆ ಸ್ವಂತವಾಯಿತ್ ಜೀವ ಉಂಡೋ, ಅನ್ನನೆ ಮೋಂವೊಂಗ್ ಸಹ ಸ್ವಂತವಾಯಿತ್ ಜೀವ ಉಳ್ಳನೆಕೆ ಅಂವೊ ಮಾಡಿರ್‌ತ್. 27ಅಂವೊ ಮನುಷ್ಯಕುಮಾರನಾಯಿತ್ ಉಳ್ಳಗುಂಡ್, ನ್ಯಾಯತೀರ್ಪ್ ಮಾಡ್‌ವ ಅದಿಕಾರತ್‍ನ ಸಹ ದೇವ ಕೊಡ್‌ತಿತುಂಡ್. 28ಇದ್ಂಗ್ ಆಶ್ಚರ್ಯ ಪಡಂಡ; ಎನ್ನಂಗೆಣ್ಣ್‌ಚೇಂಗಿ, ಚತ್ತಿತ್ ತೂಟ್‌ಂಗಳತ್‌ಲ್ ಉಳ್ಳಯಿಂಗ ಎಲ್ಲಾರು ಮೋಂವೊಂಡ ಸ್ವರತ್‍ನ ಕ್‍ೕಪ ಕಾಲ ಬಪ್ಪ. 29ಅಕ್ಕ, ನಲ್ಲದ್ ಮಾಡ್‍ನಯಿಂಗ ಎದ್ದಿತ್ ನಿತ್ಯ ಜೀವತ್‍ನ ಪಡೆಯುವಕಾಯಿತು, ಕೆಟ್ಟದ್ ಮಾಡ್‍ನಯಿಂಗ ಶಿಕ್ಷೇರ ತೀರ್ಪ್‍ಕಾಯಿತು ಎದ್ದಿತ್ ಬಪ್ಪ. 30ನಾನ್ ನಾನಾಯಿತೇ ಒಂದು ಮಾಡುಲೆ. ದೇವ ಎಣ್ಣುವನೆಕೆ ನಾನ್ ತೀರ್ಪ್ ಮಾಡ್‌ವಿ. ನಾನ್ ನಾಡ ಇಷ್ಟತ್‍ರ ಪ್ರಕಾರ ಮಾಡ್‌ವಕ್ ಕುಶಿ ಪಡತೆ, ನನ್ನ ಅಯಿಚಂವೊಂಡ ಚಿತ್ತತ್‍ರನೆಕೆ ಮಾಡ್‌ವಕ್ ಕುಶಿಪಟ್ಟಿತ್ ಮಾಡ್‌ವಗುಂಡ್ ನಾಡ ತೀರ್ಪ್ ನೀತಿವಂತದಾಯಿತುಂಡ್.
ಯೇಸುರ ಸಾಕ್ಷಿ
31ನಾಡ ವಿಷಯತ್‍ಲ್ ನಾನೇ ಸಾಕ್ಷಿ ಕೊಡ್‍ತತೇಂಗಿ ಅದ್ ಸತ್ಯ ಆಪುಲೆ. 32ನಾಡ ವಿಷಯತ್‍ಲ್ ಬೋರೆ ಒಬ್ಬ ಸಾಕ್ಷಿ ತಪ್ಪ, ಅಂವೊ ನಾಡ ವಿಷಯತ್ ತಪ್ಪ ಸಾಕ್ಷಿ ಸತ್ಯಾಂದ್ ನಾಕ್ ಗೊತ್ತುಂಡ್. 33ನಿಂಗ ಯೋಹಾನಂಡ ಪಕ್ಕ ಆಳ್‍ವಳ ಅಯಿಚಿರ; ಅಂವೊ ನಾಡ ವಿಷಯತ್ ಸತ್ಯ ತಕ್ಕ್ ಪರ್ಂದತ್. 34ನಾಕ್ ಮನುಷ್ಯಂಗಡಿಂಜ ಸಾಕ್ಷಿ ಬೋಂಡ. ಆಚೇಂಗಿ, ನಿಂಗಕ್ ರಕ್ಷಣೆ ಕ್‍ಟ್ಟುವಕಾಯಿತೇ ನಾನ್ ಈ ತಕ್ಕ್ ಪರ್ಂದಂಡುಂಡ್. 35ಯೋಹಾನ ಕತ್ತಿಯಂಡ್ ಮಿನ್ನುವ ಬೊಳ್‍ಕ್‍ರನೆಕೆ ಇಂಜತ್; ನಿಂಗ ಸಹ ಚೆನ್ನ ಕಾಲ ಆ ಬೊಳಿರ ಬೋದನೆಲ್ ಕುಶಿ ಪಟ್ಟಂಡಿಂಜಿರ. 36ಆಚೇಂಗಿ, ಅಂವೊಂಡ ಸಾಕ್ಷಿಕಿಂಜ ನಾಡ ಸಾಕ್ಷಿ ಬಲ್ಯದಾಯಿತುಂಡ್. ಅದ್ ಎಂತ ಎಣ್ಣ್‌ಚೇಂಗಿ, ನಾನ್ ನೆರೆವೇರಿಚಿಡಂಡೂಂದ್ ಅಪ್ಪನಾನ ದೇವ ನಾಕ್ ಎಣ್ಣಿ ಕೊಡ್‍ತ ವಿಷಯ ಪಿಂಞ ನಾನ್ ಮಾಡಿಯಂಡುಳ್ಳ ಕ್ರಿಯೆವೇ ಅಪ್ಪನಾನ ದೇವ ನನ್ನ ಅಯಿಚತ್‍ೕಂದ್ ನಾಡ ವಿಷಯತ್ ಸಾಕ್ಷಿ ಕೊಡ್‍ತಂಡುಂಡ್. 37ನನ್ನ ಅಯಿಚ ಅಪ್ಪನೇ ನಾಕ್ ಸಾಕ್ಷಿ ಕೊಡ್‌ತಿತುಂಡ್; ನಿಂಗ ದಾರೂ ಅಪ್ಪನಾನ ದೇವಡ ಸ್ವರತ್‍ನ ಕ್‍ೕಟಿತು ಇಲ್ಲೆ, ಅಂವೊಂಡ ರೂಪತ್‍ನ ಕಂಡಿತು ಇಲ್ಲೆ. 38ಅಂವೊ ಅಯಿಚಂವೊನ ನಿಂಗ ನಂಬತಗುಂಡ್, ಅಂವೊಂಡ ವಾಕ್ಯ ನಿಂಗಡಲ್ಲಿ ನಿಂದಂಡಿಲ್ಲೆ.
39ನಿಂಗ ದೇವಡ ವಾಕ್ಯತ್‍ನ ಚಾಯಿ ಪಡಿಚಿತ್ ನೋಟಿ; ಅದ್‍ನಗುಂಡ್ ನಿಂಗಕ್ ನಿತ್ಯ ಜೀವ ಉಂಡ್‍ೕಂದ್ ನಿಂಗ ಗೇನಮಾಡಿಯಂಡುಳ್ಳಿರಲ್ಲ! ಅದೇ ನಾಡ ವಿಷಯತ್ ಸಾಕ್ಷಿ ಕೊಡ್‍ತಂಡುಂಡ್. 40ಅನ್ನನೆ ಇಂಜತೇಂಗಿಯು, ನಿಂಗಕ್ ನಿತ್ಯ ಜೀವ ಉಂಟಾಪಕ್ ನಾಡ ಪಕ್ಕ ಬಪ್ಪಕ್ ನಿಂಗಕ್ ಮನಸ್ಸಿಲ್ಲೆ.
41ನಾನ್ ಮನುಷ್ಯಂಗ ಹೊಗಳುವದ್‍ನ ಸ್ವೀಕಾರ ಮಾಡುಲೆ. 42ಎನ್ನಂಗೆಣ್ಣ್‌ಚೇಂಗಿ, ನಿಂಗಡ ಹೃದಯತ್‍ಲ್ ದೇವಡ ಪ್ರೀತಿ ಇಲ್ಲೇಂದ್ ನಾಕ್ ಗೊತ್ತುಂಡ್. 43ನಾನ್ ನಾಡ ಅಪ್ಪನಾನ ದೇವಡ ಪೆದತ್‍ಲ್ ಬಂದಿತ್ಂಜತೇಂಗಿಯು, ನಿಂಗ ನನ್ನ ಸ್ವೀಕಾರ ಮಾಡಿತ್‌ಲ್ಲೆ, ಬೋರೆ ಒಬ್ಬ ಅಂವೊಂಡ ಇಷ್ಟ ಪ್ರಕಾರ ಬಪ್ಪಕ ಅಂವೊನ ಸ್ವೀಕಾರ ಮಾಡ್‌ವಿರ. 44ದೇವಡಯಿಂಜ ಮಾತ್ರ ಬಪ್ಪ ಮರ್ಯಾದೆನ ನಿಂಗ ತ್‍ೕಡತೆ, ಒಬ್ಬಂಗೊಬ್ಬ ಕೊಡ್‍ಪ ಮರ್ಯಾದೆನ ಸ್ವೀಕಾರ ಮಾಡ್‌ವ ನಿಂಗ, ನನ್ನ ಎನ್ನನೆ ನಂಬುವಕಯ್ಯು?
45ಅಪ್ಪನಾನ ದೇವಡ ಮಿಂಞತ್‍ಲ್ ನಿಂಗಡ ವಿಷಯತ್ ನಾನ್ ಕುತ್ತ ಪರಿಯುವೀಂದ್ ಗೇನ ಮಾಡತಿ; ನಿಂಗ ನಂಬುವ ಮೋಶೆನೇ ನಿಂಗಡ ಮೇಲೆ ಕುತ್ತ ಪರಿಯುವ. 46ನಿಂಗ ಮೋಶೇನ ನಂಬಿತ್ಂಜತೇಂಗಿ, ನನ್ನ ಸಹ ನಂಬುವಿರ; ಎನ್ನಂಗೆಣ್ಣ್‌ಚೇಂಗಿ, ಅಂವೊ ನಾಡ ವಿಷಯತ್‍ನ ಒಳ್‍ದಿತುಂಡಲ್ಲ! 47ಅಂವೊ ಒಳ್‌ದ್‍ನದ್‍ನ ನಿಂಗ ನಂಬತೆ ಪೋನಕ, ನಾನ್ ಎಣ್ಣುವಾನ ನಿಂಗ ಎನ್ನನೆ ನಂಬುವಿರಾಂದ್ ಯೇಸು ಎಣ್ಣ್‌ಚಿ.
Currently Selected:
ಯೋಹಾನ 5: ಕೊಡವ
Highlight
Share
Copy
Want to have your highlights saved across all your devices? Sign up or sign in
© 2017, New Life Literature (NLL)