ಯಾಕೋಬ 1
1
ನಂಬಿಕೆ ಪಿಂಞ ಜ್ಞಾನ
1ದೇವಡ ಪಿಂಞ ಒಡೆಯನಾನ ಯೇಸು ಕ್ರಿಸ್ತಂಡ ಸೇವಕನಾನ ಯಾಕೋಬ, ಬೋರೆ ಬೋರೆ ನಾಡ್‍ಲ್ ಚದ್‌ರಿ ಪೋಯಿತುಳ್ಳ ಪನ್ನೆರಂಡ್ ಕುಲತ್‍ರ#1.1 ಪನ್ನೆರಂಡ್ ಕುಲ ಎಣ್ಣ್‌ಚೇಂಗಿ, ಇಸ್ರಾಯೇಲ್ ಜನತ್‍ರ ಮುತ್ತಜ್ಜನಾನ ಯಾಕೋಬಂಡ ಪನ್ನೆರಂಡ್ ಮಕ್ಕಡ ಸಂತಾನಕಾರಂಗ, ಆಚೇಂಗಿ ಇದ್ ದೇವಡ ಎಲ್ಲಾ ಮಕ್ಕಕು ಆಪ. ಜನಕ್ ವಂದನೆ ಮಾಡಿತ್ ಒಳ್‍ದ್‍ವ ಕಾಗದ ಇದ್. 2ನಾಡ ಅಣ್ಣತಮ್ಮಣಂಗಳೇ, ನಿಂಗಕ್ ಬಪ್ಪ ನಾನಾತರ ಪರೀಕ್ಷೆನ ಸಂತೋಷವಾಯಿತ್ ಎಡ್‌ತೊಳಿ. 3ಎನ್ನಂಗೆಣ್ಣ್‌ಚೇಂಗಿ, ನಿಂಗಡ ನಂಬಿಕೇರ ಪರೀಕ್ಷೆ, ತಾಳ್ಮೆನ ಪಡಿಪ್‌ಚಿಡ್‌ವಾಂದ್ ನಿಂಗಕ್ ಗೊತ್ತುಂಡ್. 4ನಿಂಗ ಗುಣತ್‍ಲ್ ಬೊಳಿಯುವಕ, ನಿಂಗಡ ತಾಳ್ಮೆ ಪೂರ್ತಿ ಕೆಲಸ ಮಾಡಡ್, ಅಕ್ಕ ನಿಂಗ ಗುಣತ್‍ಲ್ ಶಕ್ತಿವಂತಯಿಂಗಳಾಯಿತ್, ನಿಂಗ ಒರ್ ವಿಷಯತ್‍ಲು ಕಮ್ಮಿ ಇಲ್ಲತಯಿಂಗಳಾಯಿತಿಪ್ಪಿರ. 5ದೇವ ಎಣ್ಣ್‌ನನೆಕೆ ನಿಂಗ ನಡ್‍ಕಂಡೂಂದ್ ಉಳ್ಳ ಜ್ಞಾನ ಬೋಂಡ್‌ಚೇಂಗಿ, ಅಂವೊಂಡ ಪಕ್ಕ ಕ್‍ೕಳಿ. ಅಕ್ಕ, ಅಂವೊ ನಿಂಗಳ ಜೋರ್ ಮಾಡುಲೆ, ಉದಾರ ಮನಸ್ಸ್‌ಲ್ ನಿಂಗಕ್ ಜ್ಞಾನತ್‍ನ ತಪ್ಪ. 6ಆಚೇಂಗಿಯು ನಿಂಗ ಅಪನಂಬಿಕೆಲ್ ಕ್‍ೕಕತೆ, ನಾನ್ ಕ್‍ೕಪದ್ ದೇವ ತಪ್ಪಾಂದ್ ನಂಬಿಕೇಲ್ ಕ್‍ೕಕಂಡು. 7ಅಪನಂಬಿಕೆಲ್ ನಿಂಗ ಕ್‍ೕಪದ್ ಎನ್ನನೆ ಎಣ್ಣ್‌ಚೇಂಗಿ: ಸಮುದ್ರತ್‍ರ ಅಲೆ ಬಪ್ಪಕ ಆ ಅಲೆ ಗಾಳಿಲ್ ಉರ್‌ಪಿತ್ ಪೋನನೆಕೆ. 8ಅನ್ನನೆ ಉಳ್ಳ ಮನುಷ್ಯ ನಾನ್ ಕ್‍ೕಪದ್, ದೇವಡ ಕೈಯಿಂಜ ಕ್‍ಟ್ಟ್‌ವಾಂದ್ ಗೇನ ಮಾಡ್‌ವಕ್ಕಾಗ. ದೇವಡ ವಿಷಯತ್‍ಲ್ ದಂಡ್ ಮನಸ್ಸ್ ಉಳ್ಳ ಮನುಷ್ಯ ತಾಂಡ ಬದ್‍ಕ್‍ಲ್ ಸ್ತಿರವಿಲ್ಲತಂವೊನಾಯಿತಿಪ್ಪ.
ಬಡತನ ಪಿಂಞ ಐಶ್ವರ್ಯ
9ಒರ್ ಗರೀಬನ, ದೇವ ಬಲ್ಯ ಸ್ತಾನತ್‍ಲ್ ಬೆಚ್ಚಿತುಳ್ಳಗುಂಡ್ ಅಂವೊ ಕುಶಿ ಪಡಂಡು. 10ಐಶ್ವರ್ಯವುಳ್ಳಂವೊ ಅಂವೊಂಡ ಕಮ್ಮಿ ಸ್ತಾನತ್‍ಲ್ ಕುಶಿ ಪಡಡ್; ಎನ್ನಂಗೆಣ್ಣ್‌ಚೇಂಗಿ ಅಂವೊ ಕಾಡ್ ಪೂರನೆಕೆ ಬಾಡಿ ಪೋಪ. 11ಸೂರ್ಯ ತಿತ್ತ್‌ರನೆಕೆ ಉದಿಚಿತ್, ಗಿಡ ಎಲ್ಲಾ ಬಾಡಿ ಪೋಯಿತ್, ಅದ್ಂಡ ಪೂ ಬುದ್ದಿತ್ ಅದ್ಂಡ ಚಾಯಿ ಪೋಯಿರುವ, ಅದ್ ಪಾಳಾಯಿ ಪೋಪ. ಅನ್ನನೆ ಐಶ್ವರ್ಯವುಳ್ಳಂವೊನು, ತಾಂಡ ಬದ್‍ಕ್‍ರ ಸ್ತಾನತ್‍ಲ್ ಬಾಡಿ ಪೋಪ.
ಪರೀಕ್ಷೆ ಪಿಂಞ ಸೋದನೆ
12ಸೋದನೆನ ಸಹಿಸುವ ಮನುಷ್ಯ ಆಶೀರ್ವಾದ ಪಡ್ಂದಂವೊ; ಎನ್ನಂಗೆಣ್ಣ್‌ಚೇಂಗಿ ಅಂವೊ ಚೋತ್‍ಪೋಯಿತಿಲ್ಲೇಂದ್ ಗೊತ್ತಾನ ಪಿಂಞ, ದೇವನ ಪ್ರೀತಿಚಿಡ್‌ವಯಿಂಗಕಾಯಿತ್ ದೇವ ವಾಗ್ದಾನ ಮಾಡ್ನ ನಿತ್ಯ ಜೀವತ್‍ರ ಕಿರೀಟ ಅಂವೊಂಗ್ ಕ್‍ಟ್ಟ್‌ವ. 13ನಿಂಗಕ್ ಸೋದನೆ ಬಪ್ಪಕ, ದೇವ ನನ್ನ ಪಾಪ ಮಾಡ್‌ವಕ್ ಸೋದನೆ ಮಾಡಿಯಂಡುಂಡ್‍ೕಂದ್ ಎಣ್ಣುವಕ್ಕಾಗ. ದೇವ ದುರಾಸೇಲ್ ಸೋದನೆ ಪಡ್‌ವಂವೊನು ಅಲ್ಲ, ನಿಂಗಳ ಅನ್ನನೆ ಮಾಡ್‌ವಂವೊನು ಅಲ್ಲ. 14ಆಚೇಂಗಿ ಒಬ್ಬೊಬ್ಬನು ತಾಂಡ ಸ್ವಂತ ಇಚ್ಛೆರಗುಂಡ್ ಬಲ್‍ಚಿಪೋಯಿತ್, ಬುದ್ದಿತ್ ಸೋದನೆ ಪಟ್ಟಂಡುಂಡ್. 15ಪಿಂಞ ಇಚ್ಛೆ ಕುಳಿಮೆಯಾಯಿತ್ ಪಾಪ ಪುಟ್ಟ್‌ವ, ಪಾಪ ಪೂರ್ತಿಯಪಕ ಚಾವ್ ಬಪ್ಪ. 16ನಾಡ ಅಣ್ಣತಮ್ಮಣಂಗಳೇ, ನಿಂಗ ಮೋಸ ಪೋಕತಿ. 17ಎಲ್ಲಾ ನಲ್ಲದು ಪಿಂಞ ಪೂರ್ತಿಯಾಯಿತುಳ್ಳ ಏದ್ ಇನಾಮು ಬಾನತ್‌ರ ಬೊಳಿನ ಸೃಷ್ಟಿ ಮಾಡ್ನ, ಪರಲೋಕತ್‌ಲ್‌ ಉಳ್ಳ ಅಪ್ಪನಾನ ದೇವಡಯಿಂಜ ಇಳಿಂಜಿ ಬಂದಂಡುಂಡ್. ನಳ ಅಪ್ಪರ ಇಪ್ಪರ ಪೋಪನೆಕೆ ಅಂವೊ ಬದ್‍ಲಾಪುಲೆ. 18ಅಂವೊಂಡ ಚಿತ್ತತ್‍ರನೆಕೆ, ತಾಂಡ ಎಲ್ಲಾ ಸೃಷ್ಟಿಲ್, ನಂಗಳ ಆದ್ಯ ಸ್ತಾನತ್‍ಲ್ ಇಕ್ಕಂಡೂಂದ್ ನಂಗಳ ಸತ್ಯ ವಾಕ್ಯತ್‍ರ ಮೂಲಕ ಪುಟ್ಟ್‌ವಕ್ ಮಾಡ್‍ಚಿ.
ಕ್‍ೕಪದ್ ಪಿಂಞ ಮಾಡ್‍ವದ್
19ನಾಡ ಅಣ್ಣತಮ್ಮಣಂಗಳೇ! ಎಲ್ಲಾರು ಕ್‍ೕಪಕ್ ಚುರ್‌ಕಾಯಿತು, ತಕ್ಕ್ ಪರಿಯುವಕ್ ನಿದಾನವಾಯಿತು, ಚೆಡಿ ಮಾಡ್‌ವಕ್ ತಾಳ್ಮೆಯಾಯಿತು ಇಕ್ಕಂಡು. 20ನಿಂಗಕ್ ಚೆಡಿ ಬಾತೇಂಗಿ, ದೇವ ನಿಂಗಳಗುಂಡ್ ಮಾಡಂಡೂಂದ್ ಉಳ್ಳ ನೀತಿ ಕೆಲಸತ್‍ನ, ನಿಂಗಡ ಮೂಲಕ ಮಾಡ್‌ವಕ್ ಕಯ್ಯತ ಪೋಪ. 21ಆನಗುಂಡ್ ಎಲ್ಲಾ ಹೇಸಿಗೆಯಾನ ಗುಣ ಪಿಂಞ ಪಾಳ್ ಗುಣತ್‍ನ ಬುಟ್ಟ್‌ರಿ. ನಿಂಗಡ ಮನಸ್ಸ್‌ಲ್ ನಟ್ಟಿತುಳ್ಳ ಪಿಂಞ ನಿಂಗಡ ಆತ್ಮತ್‌ನ ಕಾಪಾಡ್‌ವಕ್ ಶಕ್ತಿಯುಳ್ಳ ದೇವಡ ವಾಕ್ಯತ್‍ನ, ಸಮಾದಾನತ್‍ಲ್ ಸ್ವೀಕಾರ ಮಾಡಿಯೊಳಿ. 22ಅದಲ್ಲತೆ ನಿಂಗ ನಿಂಗಳ ಮೋಸ ಮಾಡತನೆಕೆ ದೇವಡ ವಾಕ್ಯತ್‍ನ ಕ್‍ೕಪಯಿಂಗಳಾಯಿತ್ ಮಾತ್ರ ಅಲ್ಲತೆ ಅದ್ಂಡ ಪ್ರಕಾರ ನಡ್‌ಪಯಿಂಗಳಾಯಿತು ಇಕ್ಕಂಡು. 23ಎನ್ನಂಗೆಣ್ಣ್‌ಚೇಂಗಿ, ಒಬ್ಬ ದೇವಡ ವಾಕ್ಯತ್‍ನ ಕ್‍ೕಟಿತ್ ಅದ್ಂಡ ಪ್ರಕಾರ ನಡ್‍ಕತೆ ಪೋನಕ, ಅಂವೊ ಕನ್ನಡಿಲ್ ಅಂವೊಂಡ ಮೂಡ್‍ನ ನೋಟ್‌ವಂವೊಂಡನೆಕೆ ಇಪ್ಪ. 24ಕನ್ನಡಿಲ್ ಅಂವೊನ ತಾನೆ ನೋಟಿತ್, ಆ ಜಾಗತ್‍ನ ಬುಟ್ಟಿತ್ ಪೋಪಕ, ಅಚ್ಚಕ್ ಬೆರಿಯ ಅಂವೊ ಎನ್ನನೆ ಇಂಜತ್‍ೕಂದ್ ಮರ್ಂದ್‌ರುವ. 25ಆಚೇಂಗಿ ಒರ್ ಮನುಷ್ಯ ಅಂವೊನ ಬುಡುಗಡೆ ಮಾಡ್‌ವ ದೇವಡ ಪೂರ್ತಿ ಪ್ರಮಾಣತ್‍ನ ಜಾಗ್ರತೆಲ್ ನೋಟಿತ್, ಕ್‍ೕಟದ್‍ನ ಮರ್ಂದ್ ಪೋಕತೆ, ಅದ್ಂಡ ಪ್ರಕಾರ ನಡ್ಂದತೇಂಗಿ, ತಾಂಡ ಬದ್‍ಕ್‍ಲ್ ಆಶೀರ್ವಾದ ಉಳ್ಳಂವೊನಾಯಿತ್‌ಪ್ಪ. 26ನಿಂಗಡಲ್ಲಿ ಒಬ್ಬ ತಾಂಡ ನಾವ್‌ಕ್ ಕಡಿವಾಣ ಇಡತೆ ನಾನ್ ದೇವಡ ಮೇಲೆ ಬಕ್ತಿ ಉಳ್ಳಂವೋಂದ್ ಗೇನ ಮಾಡ್‍ಚೇಂಗಿ ಅಂವೊ ತಾಂಗ್ ತಾನೆ ಮೋಸ ಮಾಡ್‌ವ, ಅಂವೊಂಡ ಬಕ್ತಿ ಪ್ರಯೋಜನ ಇಲ್ಲತ ಬಕ್ತಿಯಾಯಿತ್‌ಪ್ಪ. 27ತಬ್ಬಲಿ ಮಕ್ಕ ಪಿಂಞ ವಿದವೆಯಿಂಗಡ ಕಷ್ಟತ್‍ಲ್ ಸಹಾಯ ಮಾಡ್‍ವದ್ ಪಿಂಞ ಈ ಲೋಕತ್‍ರ ಪಾಪ ಅಂವೊನ ದೋಷ ಮಾಡತನೆಕೆ ಕಾಪಾಡಿಯಂಡ್ ಬದ್‍ಕ್‍ವದ್ ಇನ್ನತಾನ ವಿಷಯವೇ, ಅಪ್ಪನಾನ ದೇವಡ ಮಿಂಞತ್ ಶುದ್ದವಾನ ಕಳಂಗ ಇಲ್ಲತ ಬಕ್ತಿಯಾಯಿತ್‌ಪ್ಪ.
Currently Selected:
ಯಾಕೋಬ 1: ಕೊಡವ
Highlight
Share
Copy
Want to have your highlights saved across all your devices? Sign up or sign in
© 2017, New Life Literature (NLL)
