ಇಬ್ರಿಯ 9
9
ಪಳೆಯ ಒಪ್ಪಂದತ್‍ರ ಆರಾದನೆ ವಿಷಯ
1ಆದ್ಯವಾಯಿತ್ ಕ್‍ಟ್ಟ್‌ನ ಒಪ್ಪಂದತ್‍ಲ್, ಆರಾದನೆ ಎನ್ನನೆ ಮಾಡಂಡೂಂದ್ ಉಳ್ಳ ಪದ್ದತಿ ಪಿಂಞ ಆರಾದನೆಕಾಯಿತ್ ಈ ಲೋಕತ್‍ಲ್ ಪವಿತ್ರವಾನ ಜಾಗ ಇಂಜತ್. 2ಒರ್ ಗುಡಾರ ಮಾಡಿತ್ಂಜತ್, ಆ ಗುಡಾರತ್‍ಲ್ ದಂಡ್ ಕೋಂಬರೆ ಇಂಜತ್. ಅದ್ಂಡ ಮೊದಲನೆ ಕೋಂಬರೆಲ್ ಕುತ್ತ್ ಬೊಳ್‍ಚ, ಮೇಜಿ ಪಿಂಞ ಪವಿತ್ರವಾನ ಒಟ್ಟಿಯು ಇಂಜತ್; ಈ ಜಾಗಕ್ ಪವಿತ್ರ ಸ್ತಳಾಂದ್ ಪೆದ. 3ಪಿಂಞ ಪಡಿರ ಬಟ್ಟೆ ಇಂಜತ್. ಅದ್ಂಡ ಬಯ್ಯ ದಂಡನೆ ಕೋಂಬರೆ ಇಂಜತ್. ಅದ್ಂಗ್ ಅತಿಪವಿತ್ರವಾನ ಸ್ತಳಾಂದ್ ಪೆದ. 4ಅಲ್ಲಿ, ಪೊನ್ನ್‌ರಗುಂಡ್ ಮಾಡ್‍ನ ದೂಪ ಇಡ್‌ವ ಪಾತ್ರವು, ಪೂರ್ತಿ ಪೊನ್ನ್‌ರಗುಂಡ್ ಮುಚ್ಚಿತ್‌ಂಜ ಒಪ್ಪಂದತ್‍ರ ಪೊಟ್ಟಿಯು ಇಂಜತ್. ಆ ಪೊಟ್ಟಿಲ್ ಮನ್ನಾ ಬೆಚ್ಚಿತ್ಂಜ ಪೊನ್ನ್‌ರ ಬರಣಿಯು, ಆರೋನಂಡ ಮೊಳೆಕೆ ಬಂದಿತ್ಂಜ ಕೋಲು, ಒಪ್ಪಂದತ್‍ರ ಕಲ್ಲ್‌ರ ದಂಡ್ ಅಟ್ಟೆಪಾರ್ ಇಂಜತ್. 5ಅದ್ಂಡ ಕೊಡಿಲ್ ಮಹಿಮೆ ದುಂಬ್‍ನ ದಂಡ್ ಕೆರೂಬಿಯಂಗಳ ನಿಪ್ಪ್‌ಚಿಟ್ಟಿತ್, ಕರುಣೆರ ಜಾಗಕ್ ನೆಳ ಕೊಡ್‍ತಂಡಿಂಜತ್; ಇದ್ಂಡ ವಿಷಯವೆಲ್ಲ ವಿವರಿಚಿಡ್‌ವಕ್ ಇಕ್ಕ ಕಯ್ಯುಲೆ. 6ಇನ್ನನೆ ಗುಡಾರ ತಯಾರಾಯಂಡಿಪ್ಪಕ, ಯಾಜಕಂಗ ಆರಾದನೆರ ನೇಮತ್‍ನ ನೆರೆವೇರಿಚಿಡುವಕಾಯಿತ್ ಆದ್ಯ ಕೋಂಬರೇಕ್ ದಿನಾಲು ಪೋಯಂಡ್ ಇಂಜತ್. 7ದಂಡನೆ ಕೋಂಬರೆರ ಒಳ್‍ಕ್ ಮಹಾ ಯಾಜಕ ಮಾತ್ರ, ಕಾಲಕ್ ಒಮ್ಮ ಚೋರೆನ ಕೈಯಿಲ್ ಎಡ್‍ತಂಡ್ ಒಳ್‍ಕ್ ಪೋಪ. ಆ ಚೋರೆನ ತಾಂಗಾಯಿತ್ ಪಿಂಞ ಜನ ಮಾಡ್‍ನ ಪಾಪಕಾಯಿತ್ ಅರ್ಪಿಚಿಡುವ. 8ಇದ್ಂಡ ಮೂಲಕ ಪವಿತ್ರಾತ್ಮ ಎಂತ ಕಾಂಬ್‌ಚಿಟ್ಟಂಡ್ ಉಂಡ್ ಎಣ್ಣ್‌ಚೇಂಗಿ: ಆದ್ಯ ಕೋಂಬರೆ ಇಪ್ಪಕತ್ತನೆ, ಪವಿತ್ರವಾನ ಜಾಗಕ್ ಪೋಪಕುಳ್ಳ ಬಟ್ಟೇನ ಇಂಞು ಎಲ್ಲಾರ್‌ಕು ಕಾಂಬ್‍ಚಿಟ್ಟಿತ್‌ಲ್ಲೇಂದ್ ಎಣ್ಣಿಯಂಡುಂಡ್.
9ಆ ಗುಡಾರ ಇಕ್ಕತ್‍ರ ಕಾಲಕ್ ಒರ್ ಗುರ್‌ತಾಯಿತ್ ಉಂಡ್; ಅದ್ಂಗ್ ತಕ್ಕಂತೆ, ಅರ್ಪಿಚಿಡ್‌ವ ಕಾಣಿಕೆಯು, ಬಲಿಯು ಆರಾದನೆ ಮಾಡ್‌ವಂವೊಂಡ ಮನಸಾಕ್ಷಿನ ಶುದ್ದ ಮಾಡ್‌ವಕ್ ಕಯ್ಯುಲೆ. 10ಇನ್ನನೆ ಮಾಡ್‌ವ ವಿಷಯವೆಲ್ಲ, ಪುದಿಯದಾಯಿತ್ ಬದ್‍ಲಾಪ ಕಾಲಕತ್ತನೆ ಮಾಡ್‌ವಕಾಯಿತ್ ಕ್‍ಟ್ಟ್‌ನ, ತಿಂಬಕ್ ಕುಡಿಪಕ್ ಉಳ್ಳ ಪದ್ದತಿರನೆಕೆ ಓರೋರ್ ವಿಷಯಕ್ ಕತ್ತ್‌ವಕು, ತಡೀರ ಪದ್ದತಿಯು ಅಲ್ಲತೆ ಬೋರೆ ಒಂದು ಇಲ್ಲೆ.
ಕ್ರಿಸ್ತನೇ ಒರ್ ಕುತ್ತವು ಇಲ್ಲತ ಪೂರ್ತಿಯಾನ ಬಲಿ
11 ಕ್ರಿಸ್ತ ಈ ಲೋಕತ್‍ಲ್ ಬಪ್ಪಕುಳ್ಳ#9.11 ಬಂದಿತುಳ್ಳ ನಲ್ಲ ವಿಷಯಕ್ ಮಹಾ ಯಾಜಕನಾಯಿತ್ ಬಾತ್. ಈ ಲೋಕತ್‍ರ ಒರ್ ಮನುಷ್ಯ ಮಾಡ್‍ನ ಗುಡಾರತ್‍ರ ಮೂಲಕ ಅಲ್ಲ, ಅದ್ಂಗಿಂಜ ಬಲ್ಯದು ಪೂರ್ಣವಾಯಿತುಳ್ಳದುವಾನ ಗುಡಾರತ್‍ರ ಬಟ್ಟೇಲ್ ಅಂವೊ ಬಾತ್. ಅದ್ ಈ ಸೃಷ್ಟಿರ ಕೂಡೆ ಉಳ್ಳದ್ ಅಲ್ಲ. 12ಒರ್ ಕೋಬಾಡ್‍ರ ಚೋರೆರಗುಂಡ್ ಅಥವ ಒರ್ ಕಡ್‍ಚಿರ ಚೋರೆರಗುಂಡ್ ಒಳ್‍ಕ್ ಪೋಯಿತ್‌ಲ್ಲೆ. ಆಚೇಂಗಿ, ತಾಂಡ ಸ್ವಂತ ಚೋರೆರ ಮೂಲಕ ಒರೇ ಕುರಿ ಅತಿಪವಿತ್ರವಾನ ಜಾಗತ್‍ರ ಒಳ್‍ಕ್ ಪೋಯಿತ್ ಎಕ್ಕಾಲು ಉಳ್ಳ ನಿತ್ಯವಾನ ವಿಮೋಚನತ್‍ನ ಉಂಟ್ ಮಾಡ್‍ಚಿ. 13ಪಳೆಯ ನೇಮತ್‌ಲ್, ಆಡ್ ಪಿಂಞ ಎತ್ತ್‌ರ ಚೋರೆನ ಪಿಂಞ ಒರ್ ಕಡ್‍ಚಿನ ಬಲಿ ಕೊಡ್‌ತಿತ್, ಅದ್‍ಯಿಂಜ ಕ್‍ಟ್ಟುವ ಬೂದಿನ ಎಡ್‍ತಿತ್ ಅಶುದ್ದ ಆನ ಒಬ್ಬಂಡ ಮೇಲೆ ತಳಿಪಗುಂಡ್, ಅಂವೊ ತಡೀಲ್ ಶುದ್ದ ಆಪಕಿಂಜತ್. 14ಅನ್ನನೆ ಆಚೇಂಗಿ, ನಿತ್ಯ ಆತ್ಮತ್‍ರಗುಂಡ್, ಅಂವೊನ ಅಂವೊನಾಯಿತೇ ಒರ್ ಕುತ್ತವು ಇಲ್ಲತ ಬಲಿಯಾಯಿತ್ ದೇವಕ್ ಅರ್ಪಿಚಿಟ್ಟ ಕ್ರಿಸ್ತಂಡ ಚೋರೆ, ಜೀವವಾಯಿತುಳ್ಳ ದೇವಕ್ ಸೇವೆ ಮಾಡ್‌ವಕ್ ನಿಂಗಡ ಮನಸಾಕ್ಷಿನ ಪಾಪತ್‍ರ ಕ್ರಿಯೇಯಿಂಜ ಶುದ್ದ ಮಾಡ್‍ವದ್ ಎಚ್ಚಕ್ ನಿಶ್ಚಯವಾಯಿತುಂಡ್.
15ಈ ಕಾರಣಕಾಯಿತ್, ಪಳೆಯ ಒಪ್ಪಂದತ್‍ರ ಕಾಲತ್‍ಲ್ ಆಯಂಡಿಂಜ ಅಕ್ರಮಕ್ ವಿಮೋಚನವಾಯಿತ್ ಅಂವೊ ಚತ್ತಿತ್, ವಾಗ್ದಾನ ಮಾಡ್‍ನ ನಿತ್ಯ ಬಾದ್ಯತೇನ ಅಂವೊ ಕಾಕ್‌ನಯಿಂಗ ಪಡೆಯಂಡೂಂದ್, ಪುದಿಯ ಒಪ್ಪಂದತ್‍ರ ಮದ್ಯಸ್ತನಾಯಿತ್ ಅಂವೊ ಆಚಿ.
16ಒಬ್ಬ ಅಂವೊಂಡ ಸೊತ್ತ್‌ಕ್ ಮರಣ ಶಾಸನತ್ನ ಒಳ್‍ದಿ ಬೆಚ್ಚಿತ್ಂಜತೇಂಗಿ, ಅದ್ಂಡ ಪ್ರಕಾರ ಮಾಡ್‌ವಕ್ ಅದ್‍ನ ಒಳ್‌ದ್‌ನಂವೊ ಚತ್ತ್ ಪೋಯಿತಿರಂಡು. 17ಮರಣ ಶಾಸನತ್ನ ಒಳ್‌ದ್‌ನಂವೊ ಚತ್ತ್ ಪೋಯಿತ್ಂಜತೇಂಗಿ ಮಾತ್ರ ಅದ್‍ಲ್ ಉಳ್ಳನೆಕೆ ಮಾಡ್‌ವಕ್ ಕಯ್ಯು; ಅದ್‍ನ ಒಳ್‌ದ್‌ನಂವೊ ಬದ್‍ಕಿಯಂಡ್ ಇಪ್ಪಕ ಆ ಮರಣ ಶಾಸನತ್‍ರಗುಂಡ್ ಒರ್ ಪ್ರಯೋಜನವು ಇಲ್ಲೆ.
18ಅನ್ನನೆ, ಪಳೆಯ ಒಪ್ಪಂದತ್‍ನ, ಒರ್ ಮೃಗತ್‍ರ ಚೋರೆರ ಮೂಲಕ ಅರ್ಪಣೆ ಮಾಡ್‍ಚಿ. 19ಎನ್ನನೆ ಎಣ್ಣ್‌ಚೇಂಗಿ, ಮೋಶೆ ನ್ಯಾಯಪ್ರಮಾಣತ್‍ಲ್ ಎಣ್ಣ್‌ನನೆಕೆ ಎಲ್ಲಾ ಜನಕು, ಎಲ್ಲಾ ಆಜ್ಞೆನ ಎಣ್ಣಿತಾನ ಪಿಂಞ, ಕಡ್‍ಚಿ ಪಿಂಞ ಕೋಬಾಡ್‍ರ ಚೋರೆನ ನೀರ್‌ಲ್ ಬೆರಕಿತ್, ಆಡ್‍ರ ತಲ್‍ಮಿರಗುಂಡ್ ಮಾಡ್‍ನ ಚೋಂದ ನಾರ್ ಬಟ್ಟೆ ಪಿಂಞ ಹಿಸ್ಸೋಪ್ ಗಿಡತ್‌ರ ಕೊಂಬ್‌ಲ್ ಎಡ್‍ತಿತ್, ನ್ಯಾಯಪ್ರಮಾಣ ಪುಸ್ತಕತ್‍ರ ಮೇಲೆ ಪಿಂಞ ಜನತ್‍ರ ಮೇಲೆ ತಳಿಚತ್. 20ಪಿಂಞ ಅಂವೊ ಜನಳ ನೋಟಿತ್: ದೇವ ನಿಂಗಕ್ ಆಜ್ಞೆ ಮಾಡ್‍ನ ಒಪ್ಪಂದತ್‍ರ ಚೋರೆ ಇದ್‍ೕಂದ್ ಎಣ್ಣ್‌ಚಿ.#9.20 ಪ್ರಯಾಣ ಪುಸ್ತಕ 24.8 21ಇನ್ನನೆ ಗುಡಾರತ್‍ರ ಮೇಲೆ ಪಿಂಞ ಆರಾದನೆಕ್ ಉಪಯೋಗಿಚಿಡುವ ಎಲ್ಲಾ ಪಾತ್ರತ್‍ರ ಮೇಲೆಯು ಚೋರೆನ ತಳಿಚತ್. 22ನ್ಯಾಯಪ್ರಮಾಣತ್‍ರನೆಕೆ, ಚೆನ್ನ ಬುಟ್ಟಿತ್, ಚೋರೆ ಎಲ್ಲಾನ ಶುದ್ದ ಮಾಡಿರ್‌ವ; ಚೋರೆ ಬೂಕತೆ ಪಾಪಕ್ ಮನ್ನಿಪ್ಪ್ ಇಲ್ಲೆ.
ಕ್ರಿಸ್ತಂಡ ಬಲಿ ಎಲ್ಲಾ ಪಾಪತ್‍ನ ಕಳೆಯುವ
23ಆನಗುಂಡ್, ಪರಲೋಕತ್‍ಲ್ ಉಳ್ಳ ವಸ್ತುರ ರೂಪತ್‌ಲ್, ಈ ಲೋಕತ್‍ಲ್ ಉಳ್ಳ ವಸ್ತುವಳ ಮೃಗತ್‍ರ ಬಲೀರಗುಂಡ್ ಶುದ್ದ ಮಾಡ್‌ವಕಿಂಜತ್; ಅಕ್ಕ ಪರಲೋಕತ್‍ಲ್ ಉಳ್ಳ ವಸ್ತುವಳ ಮೃಗತ್‍ರ ಬಲಿಕಿಂಜ ಬಲ್ಯ ಬಲಿರ ಮೂಲಕ ಶುದ್ದ ಮಾಡ್‍ವದ್ ಎಚ್ಚಕ್ ಬೋಂಡಿಯದಾಯಿತ್ ಇಂಜತ್. 24ಅನ್ನನೆ ಕ್ರಿಸ್ತ, ನೇರಾನ ಪವಿತ್ರವಾಯಿತುಳ್ಳ ಜಾಗಕ್ ಗುರ್‌ತಾಯಿತುಳ್ಳ ಮನುಷ್ಯ ಮಾಡ್‍ನ ಗುಡಾರತ್‍ರ ಮೂಲಕ ಬಂದಿತ್‌ಲ್ಲೆ. ಆಚೇಂಗಿ, ಪರಲೋಕತ್‍ಲ್ ಇಕ್ಕ ನಂಗಕಾಯಿತ್ ದೇವಡ ಸನ್ನಿದಾನತ್‍ಲ್ ಪ್ರತ್ಯಕ್ಷ ಆಪನೆಕೆ ಅಂವೊ ಪೋಯಿತುಂಡ್. 25ಮಹಾ ಯಾಜಕ ಪವಿತ್ರವಾನ ಜಾಗಕ್ ಒರ್ ಮೃಗತ್‍ರ ಚೋರೆರ ಮೂಲಕ ಕಾಲಕೊಮ್ಮ ಪೋಪನೆಕೆ ಕ್ರಿಸ್ತ, ಪರಲೋಕಕ್ ತಾನ್ ಪುನಃ ಪುನಃ ಬಲಿಯಾಪಕಾಯಿತ್ ಪೋಯಿತ್‌ಲ್ಲೆ. 26ಅನ್ನನೆ ಇಂಜತೇಂಗಿ ಈ ಲೋಕ ಸೃಷ್ಟಿ ಆನ ಕಾಲತ್ಂಜ ಯೇಸು ದುಂಬ ಕುರಿ ಕಷ್ಟ ಅನುಬವಿಚಿಡುವಕಿಂಜತ್. ಆಚೇಂಗಿ, ಒರೇ ಕುರಿ ಪಾಪತ್‍ನ ಕಳೆಯುವಕಾಯಿತ್ ಅಂವೊನಾಯಿತೇ ಅಂವೊನ ಬಲಿ ಕೊಡ್‍ಪಕ್ ಈ ಆಕೀರ್ ಕಾಲತ್‍ಲ್ ಪ್ರತ್ಯಕ್ಷ ಆಚಿ. 27ಒರೇ ಕುರಿ ಚಾವದು, ಪಿಂಞ ನ್ಯಾಯತೀರ್ಪ್ ಕ್‍ಟ್ಟ್‌ವದು ಮನುಷ್ಯಂಗಕ್ ನೇಮಿಚಿಟ್ಟಿತುಂಡ್. 28ಅನ್ನನೆ ಕ್ರಿಸ್ತ ಸಹ, ದುಂಬ ಜನತ್‍ರ ಪಾಪತ್‍ನ ತಾಂಡ ಮೇಲೆ ಎಡ್‍ತಿತ್ ಕಳೆಯುವಕಾಯಿತ್ ಒರೇ ಕುರಿ ಬಲಿಯಾಚಿ. ತಾಂಗಾಯಿತ್ ಪಾರಕಾತಂಡ್ ಉಳ್ಳಯಿಂಗಕ್ ರಕ್ಷಣೆನ ದಾನ ಮಾಡ್‌ವಕಾಯಿತ್ ಪಾಪ ಇಲ್ಲತಂವೊನಾಯಿತ್ ದಂಡನೆ ಕುರಿ ಪ್ರತ್ಯಕ್ಷ ಆಪ.
Currently Selected:
ಇಬ್ರಿಯ 9: ಕೊಡವ
Highlight
Share
Copy
Want to have your highlights saved across all your devices? Sign up or sign in
© 2017, New Life Literature (NLL)
