ಇಬ್ರಿಯ 7
7
ಮೆಲ್ಕಿಜೆದೇಕ ಅಬ್ರಹಾಮಕಿಂಜ ಬಲ್ಯಂವೊ
1ಈ ಮೆಲ್ಕಿಜೆದೇಕ ಸಾಲೇಮ್ ಎಣ್ಣುವ ಪಟ್ಟಣಕ್ ರಾಜನಾಯಿತು, ದೇವಾದಿ ದೇವಡ ಯಾಜಕನಾಯಿತು ಇಂಜತ್. ರಾಜಂಗಳ ಚೋಪ್‍ಚಿಟ್ಟಿತ್ ಬಂದ ಅಬ್ರಹಾಮಂಗ್ ಇಂವೊ ವಂದನೆ ಮಾಡ್‌ವಕ್ ಪೋಯಿತ್ ಅಬ್ರಹಾಮನ ಆಶೀರ್ವಾದ ಮಾಡ್‍ಚಿ. 2ಮೆಲ್ಕಿಜೆದೇಕಂಗ್ ಅಬ್ರಹಾಮ ಅಂವೊಂಡ ಎಲ್ಲಾ ವಸ್ತುಯಿಂಜ ಪತ್ತ್‌ಲ್ ಒರ್ ಬಾಗತ್‍ನ ಕೊಡ್‍ತತ್. ಮೆಲ್ಕಿಜೆದೇಕ ಎಣ್ಣುವ ಅಂವೊಂಡ ಆದ್ಯ ಪೆದಕ್ ನೀತಿರ ರಾಜಾಂದು, ಪಿಂಞ ಸಾಲೇಮ್‍ರ ರಾಜ ಎಣ್ಣುವ ಪೆದಕ್ ಸಮಾದಾನತ್‍ರ ರಾಜಾಂದು ಅರ್ಥ ಆಪ.#7.2 ಆದ್ಯ ಪುಸ್ತಕ 14.17–20 3ಈ ಮೆಲ್ಕಿಜೆದೇಕಂಗ್ ಅಪ್ಪನು ಅವ್ವಳು, ವಂಶಾವಳಿಯು ಇಲ್ಲೆ, ಇಂವೊ ಜೀವತ್‍ರ ತೊಡಕ ಪಿಂಞ ಚಾವ್ ಇಲ್ಲತಂವೊನಾಯಿತ್ ಇಂಜತ್. ದೇವಡ ಮೋಂವೊಂಡನೆಕೆ ಎಕ್ಕಾಲು ಯಾಜಕನಾಯಿತ್ ನಿಂದಂಡುಂಡ್.
4ಇಂವೊ ಎಚ್ಚಕ್ ಬಲ್ಯಂವೋಂದ್ ನೋಟಿ; ನಂಗಡ ಗೋತ್ರತ್‍ರ ಮುತ್ತಜ್ಜನಾನ ಅಬ್ರಹಾಮ ಸಹ ಅಂವೊ ಯುದ್ದ ಮಾಡಿತ್ ಗೆಲ್ಲ್‌ವಕ ಎಡ್‌ತ ಬಂದ ಎಲ್ಲಾ ವಸ್ತುಯಿಂಜ ಪತ್ತ್‌ಲ್ ಒರ್ ಬಾಗತ್‍ನ ಮೆಲ್ಕಿಜೆದೇಕಂಗ್ ಕೊಡ್‍ತತ್. 5ಲೇವಿರ ಮಕ್ಕಡಲ್ಲಿ ಯಾಜಕನಾಪಯಿಂಗಳು, ಅಬ್ರಹಾಮಯಿಂಜ ಬಂದ ಸಂತಾನಕಾರಂಗಳಾನ ತಾಂಡ ಅಣ್ಣತಮ್ಮಣಂಗಡಲ್ಲಿಯು ನ್ಯಾಯಪ್ರಮಾಣತ್‍ರ ಪ್ರಕಾರ ಪತ್ತ್‌ಲ್ ಒರ್ ಬಾಗತ್‍ನ ಪಡೆಯುವಕ್ ಅಪ್ಪಣೆ ಕ್‍ಟ್ಟ್‌ಚಿ. 6ಆಚೇಂಗಿಯು, ಮೆಲ್ಕಿಜೆದೇಕ ಲೇವಿರ ವಂಶಾವಳಿಲ್ ಬರತೆ ಪೋಚೇಂಗಿಯು, ಅಬ್ರಹಾಮಯಿಂಜ ಪತ್ತ್‌ಲ್ ಒರ್ ಬಾಗತ್‍ನ ಎಡ್‍ತಿತ್ ವಾಗ್ದಾನ ಕ್‍ಟ್ಟ್‌ನಂವೊನ ಆಶೀರ್ವಾದ ಮಾಡ್‍ಚಿ. 7ಚೆರಿಯಯಿಂಗ ಬಲ್ಯಯಿಂಗಯಿಂಜ ಆಶೀರ್ವಾದತ್‍ನ ಪಡೆಯುವ, ಅದ್ಂಗ್ ಏದ್ ಅನುಮಾನವು ಇಲ್ಲೆ.
8ಈ ಲೋಕತ್‍ಲ್ ಚತ್ತ್ ಪೋಪ ಮನುಷ್ಯಂಗ ಪತ್ತ್‌ಲ್ ಒರ್ ಬಾಗತ್‍ನ ಎಡ್‍ತಂಡುಂಡ್, ಆಚೇಂಗಿ ಅಲ್ಲಿ ಚಾವ್ ಇಲ್ಲತಂವೋಂದ್ ಪೆದ ಕ್‍ಟ್ಟ್‌ನಂವೊ ಅನ್ನನೆ ಎಡ್‍ತತ್. 9ಪತ್ತ್‌ಲ್ ಒರ್ ಬಾಗತ್‍ನ ಎಡ್‌ಪ ಲೇವಿ ಸಹ ಅಂವೊಂಡ ಮುತ್ತಜ್ಜನಾನ ಅಬ್ರಹಾಮಂಡ ಮೂಲಕ ಪತ್ತ್‌ಲ್ ಒರ್ ಬಾಗತ್‍ನ ಕೊಡ್‌ತತ್‍ೕಂದ್ ಎಣ್ಣುವಕ್ ಆಪ. 10ಎನ್ನನೆ ಎಣ್ಣ್‌ಚೇಂಗಿ, ಮೆಲ್ಕಿಜೆದೇಕ ಅಬ್ರಹಾಮಂಗ್ ವಂದನೆ ಮಾಡಿತ್ ಅಂವೊಂಡ ಕೈಯಿಂಜ ಪತ್ತ್‌ಲ್ ಒರ್ ಬಾಗತ್‍ನ ಎಡ್‍ಪಕ, ಲೇವಿ, ಅಬ್ರಹಾಮಂಡ ಸಂತಾನವಾಯಿತ್ ಅಂವೊಂಡ ಒಳ್‍ಲ್ ಇಂಜತಲ್ಲಾ?
11ಆನಗುಂಡ್, ಲೇವಿಯರ ಯಾಜಕತ್‍ರ ಸೇವೇರ ಪ್ರಕಾರ ನ್ಯಾಯಪ್ರಮಾಣತ್‍ನ ಜನ ಪಡ್ಂದತ್. ಆ ಲೇವಿಯರ ಯಾಜಕತ್‍ರ ಸೇವೇರಗುಂಡ್ ಜನ, ಪೂರ್ತಿ ಪವಿತ್ರ ಆಪಕಿಂಜತೇಂಗಿ, ದೇವ ಎನ್ನಂಗ್ ಆರೋನಂಡ ಪದ್ದತಿರ ಪ್ರಕಾರ ಅಲ್ಲತೆ, ಮೆಲ್ಕಿಜೆದೇಕಂಡ ನೇಮ ಪ್ರಕಾರ ಬೋರೆ ಒರ್ ಯಾಜಕಂಡ ಸೇವೇನ ಎಪ್ಪ್‌ಚಿಡಂಡು? 12ಯಾಜಕ ಸೇವೆ ಬದ್‍ಲಾಯಿ ಪೋಪದಾಚೇಂಗಿ, ನ್ಯಾಯಪ್ರಮಾಣವು ಬದ್‍ಲಾಯಿ ಪೋಕಂಡು. 13ಇದೆಲ್ಲಾ ದಾಡ ವಿಷಯತ್‍ನ ಎಣ್ಣಿಯಂಡುಂಡೋ, ಅಂವೊ ಬೋರೆ ಕುಲತ್ಂಜ ಬಂದಿತುಂಡಲ್ಲಾ? ಆ ಕುಲತ್‍ಲ್ ಒಬ್ಬ ಸಹ ದೇವಕ್ ಬಲಿಪೀಠತ್‍ಲ್ ಸೇವೆ ಮಾಡಿತ್‌ಲ್ಲೆ. 14ನಂಗಡ ಒಡೆಯ ಯೆಹೂದ್ಯ ಕುಲತ್‍ಲ್ ಪುಟ್ಟ್‌ನಂವೋಂದ್ ಎಲ್ಲಾರ್‌ಕು ಗೊತ್ತುಂಡ್; ಯೆಹೂದ್ಯ ಕುಲತ್‍ರ ಜನ ಯಾಜಕ ಸೇವೆ ಮಾಡ್‌ವ ವಿಷಯತ್ ಮೋಶೆ ಒಂದು ಎಣ್ಣಿತ್‌ಲ್ಲೆ.
ಯೇಸು ಪಿಂಞ ಮೆಲ್ಕಿಜೆದೇಕ
15 ಮೆಲ್ಕಿಜೆದೇಕರನೆಕೆ ಬೋರೆ ಒಬ್ಬ ಯಾಜಕ ಬಪ್ಪಾಂದ್ ಎಣ್ಣಿತುಳ್ಳಾಂಗ್, ಇಲ್ಲಿಕತ್ತನೆ ಎಣ್ಣ್‌ನದ್ ಎಚ್ಚಕ್ ನೇರಾಯಿತುಂಡ್. 16ಯೇಸು ತಡೀರ ಮೂಲಕ ನ್ಯಾಯಪ್ರಮಾಣತ್‍ರಗುಂಡ್ ಯಾಜಕನಾಯಿತ್ ಆಯಿತ್‌ಲ್ಲೆ, ಆಚೇಂಗಿ, ನಾಶ ಆಕತ ಜೀವತ್‍ರ ಶಕ್ತಿರ ಪ್ರಕಾರ ಯಾಜಕನಾಚಿ.
17ನೀನ್ ಕಾಲಕಾಲಕು ಮೆಲ್ಕಿಜೆದೇಕಂಡ ನೇಮ ಪ್ರಕಾರ,
ಯಾಜಕನಾಯಿತ್ ಇಪ್ಪಿಯಾಂದ್ ಪ್ರವಾದನೆಯಾಯಿತ್ ಎಣ್ಣಿತುಂಡ್.#7.17 ದೇವಡ ಪಾಟ್ 110.4
18ಮಿಂಞತ್‍ರ ಆಜ್ಞೆ ಬಲಹೀನದಾಯಿತು ಪ್ರಯೋಜನ ಇಲ್ಲತದಾಯಿತು ಇಂಜಗುಂಡ್ ಅದ್‍ನ ಬದ್‍ಲ್ ಮಾಡ್‍ಚಿ. 19ನ್ಯಾಯಪ್ರಮಾಣ ಒರ್ ವಿಷಯತ್‍ನ ಕೂಡೆ ಪೂರ್ತಿ ಮಾಡ್‌ವಕಿಂಜಿಲೆ. ಆಚೇಂಗಿ, ಅದ್ಂಗಿಂಜ ಬಲ್ಯ ನಿರಿಕ್ಷೇರ ನಂಬಿಕೆ ಪೂರ್ತಿ ಮಾಡ್‌ವಕಾಯಿತ್ ಇಕ್ಕ ಕ್‍ಟ್ಟ್‌ಚಿ. ಅದ್ಂಡ ಮೂಲಕ ನಂಗ ದೇವಡ ಪಕ್ಕ ಪೋಯಂಡುಂಡ್.
20ಇದ್‍ನ ಆಣೆ ಇಡತೆ ದೇವ ಮಾಡಿತ್‌ಲ್ಲೆ. ಮಿಂಞ ಬೋರೆಯಿಂಗ ಯಾಜಕಂಗಳಾಪಕ ದೇವ ಏದ್ ಆಣೆಯು ಇಟ್ಟಿತ್‌ಲ್ಲೆ. 21ಆಚೇಂಗಿ,
ಯೇಸು ಆಣೆ ಇಟ್ಟಿತ್ ಯಾಜಕನಾಪಕ, ಒಡೆಯ ಸತ್ಯ ಮಾಡ್‍ಚಿ,
ಅಂವೊಂಡ ಮನಸ್ಸ್ ಬದ್‍ಲಾಪದು ಇಲ್ಲೆ.
ನೀನ್ ಎಕ್ಕಾಲು ಯಾಜಕನಾಯಿತ್ ಇಪ್ಪಿಯಾಂದ್ ದೇವ ಎಣ್ಣ್‌ಚಿ.#7.21 ದೇವಡ ಪಾಟ್ 110.4
22ಇನ್ನನೆ ಆಣೆ ಇಟ್ಟಗುಂಡ್, ಯೇಸು ವಿಶೇಷವಾಯಿತ್ ಎಲ್ಲಾಕಿಂಜ ಬಲ್ಯ ಒಪ್ಪಂದಕ್ ಜವಾಬ್ದಾರನಾಚಿ. 23ಅದಲ್ಲತೆ, ಪಳೆಯ ನೇಮತ್‍ರ ಪ್ರಕಾರ ದುಂಬ ಯಾಜಕಂಗ ಇಂಜತ್, ಎನ್ನಂಗೆಣ್ಣ್‌ಚೇಂಗಿ, ಒಬ್ಬ ಚಾವಕ, ಇಂಞೊಬ್ಬ ಬಾತ್. ಆನಗುಂಡ್, ಎಕ್ಕಾಲು ಬದ್‍ಕಿಯಂಡಿಪ್ಪಕ್ ಕಯಿಂಜಿತ್ತ್‌ಲ್ಲೆ. 24ಆಚೇಂಗಿ ಯೇಸು, ಎಕ್ಕಾಲು ಬದ್‍ಕಿಯಂಡಿಪ್ಪಗುಂಡ್ ಕಾಲಕಾಲಕು ನಿಪ್ಪ ಯಾಜಕ ಸೇವೇರ ಯಾಜಕನಾಯಿತುಂಡ್. 25ಆನಗುಂಡ್, ತಾಂಡ ಮೂಲಕ ದೇವಡ ಪಕ್ಕ ಬಪ್ಪಯಿಂಗಕಾಯಿತ್ ಎಕ್ಕಾಲು ದೇವಡ ಮಿಂಞತ್ ಬೋಡ್‌ವನೆಕೆ ಬದ್‍ಕಿಯಂಡಿಪ್ಪಗುಂಡ್, ಅಯಿಂಗಳ ಪೂರ್ತಿಯಾಯಿತ್ ರಕ್ಷಣೆ ಮಾಡ್‌ವಕ್ ಶಕ್ತಿ ಉಳ್ಳಂವೊನಾಯಿತುಂಡ್. 26ಇನ್ನನೆ ಉಳ್ಳ ಮಹಾ ಯಾಜಕನೇ ನಂಗಕ್ ಬೋಂಡಿಯತ್. ಇಂವೊ, ಪವಿತ್ರವಾನಂವೊನು, ಕುತ್ತ ಇಲ್ಲತಂವೊನು, ಒರ್ ತಪ್ಪ್ ಇಲ್ಲತಂವೊನಾಯಿತು ಉಂಡ್. ಅಂವೊ ಪಾಪಿಯಂಗಡ ಕೂಡೆ ಕೂಡತೆ, ಪರಲೋಕತ್‍ಲ್ ಎಲ್ಲಾಕಿಂಜ ಬಲ್ಯ ಸ್ತಾನತ್‍ನ ಪಡ್ಂದಂವೊನಾಯಿತುಂಡ್. 27ಯೇಸು, ಬೋರೆ ಮಹಾ ಯಾಜಕಂಗಡನೆಕೆ, ದಿನಾಲು ತಾಂಡ ಸ್ವಂತ ಪಾಪಕಾಯಿತ್ ಬಲಿ ಕೊಡ್‍ತ ಪಿಂಞ ಜನತ್‍ರ ಪಾಪಕಾಯಿತ್ ಬಲಿ ಕೊಡ್‍ಕಂಡೂಂದ್ ಇಲ್ಲೆ; ಎನ್ನಂಗೆಣ್ಣ್‌ಚೇಂಗಿ ಅಂವೊ ಜನಡ ಪಾಪಕಾಯಿತ್ ತಾನೆ ಬಲಿಯಾಪಕ, ಒರೇ ಕುರಿ ಅಂವೊನ ಅರ್ಪಿಚಿಟ್ಟತ್. 28ನ್ಯಾಯಪ್ರಮಾಣ, ಬಲ ಇಲ್ಲತ ಮನುಷ್ಯಂಗಳ ಯಾಜಕಂಗಳಾಯಿತ್ ನೇಮಿಚಿಟ್ಟತ್, ನ್ಯಾಯಪ್ರಮಾಣತ್‍ರ ಕಾಲಕ್ ಬಯ್ಯ ಬಂದಿತುಳ್ಳ ಆಣೆರ ತಕ್ಕ್, ಕಾಲಕಾಲಕು ಪೂರ್ತಿಯಾಯಿತ್ ಮಾಡಿತುಳ್ಳ ದೇವಡ ಮೋಂವೊನ ಯಾಜಕನಾಯಿತ್ ನೇಮಿಚಿಟ್ಟತ್.
Currently Selected:
ಇಬ್ರಿಯ 7: ಕೊಡವ
Highlight
Share
Copy
Want to have your highlights saved across all your devices? Sign up or sign in
© 2017, New Life Literature (NLL)
