ಆದ್ಯತ್‌ರ ಪುಸ್ತಕ 7
7
ಜಲಪ್ರವಾಹತ್‌ರ ಚರಿತ್‌ರ
1ಅಕ್ಕ ಯೆಹೋವ ನೋಹಂಗ್: ನೀನ್‌ ನೀಡ ಮನೆಕಾರಳ ಕೂಟಿಯಂಡ್‌ ಹಡಗ್‌ರ ಒಳಕ್‌ ಪೋ; ಇಕ್ಕ ಬೂಮಿಲ್‌ ಉಳ್ಳ ಜನತ್‌ಲ್‌ ನಿನ್ನ ಮಾತ್‌ರ ನೀತಿವಂತಂವೊನಾಯಿತ್‌ ನಾನ್‌ ಕಂಡಿಯೆ. 2ಈ ಬೂಮಿಲ್‌ ಎಲ್ಲಾ ಜಾಗತ್‌ಲ್‌ ಜೀವಂತವಾಯಿತ್‌ ಇಪ್ಪಕ್, ಶುದ್ದವಾನ ಎಲ್ಲಾ ಪ್ರಾಣಿಯಡತ್ಲ್ ಏಳ್‌ ಜೊತೆ ಆಣ್‍ ಪೊಣ್ಣಾಯಿತ್ ಪಿಂಞ ಶುದ್ದ ಇಲ್ಲಾತ ಪ್ರಾಣಿಯಡತ್ಲ್ ಆಣ್‍ ಪೊಣ್ಣಾಯಿತ್ ಓರೋರ್‌ ಜೊತೆಯಾಯಿತ್, 3ಪಿಂಞ ಪಕ್ಷಿಯಡತ್ಲ್ ಏಳ್‌ ಜೊತೆ ಆಣ್‍ ಪೊಣ್ಣಾಯಿತ್ ನೀಡ ಕೂಡೆ ಕೂಟಿಯ. 4ಇಂಞು ಏಳ್‌ ದಿವಸತ್‌ಲ್‌ ನಾನ್‌ ಈ ಬೂಮಿರ ಮೇಲೆ ನಾಪದ್‌ ಪೋಲ್ ಪಿಂಞ ನಾಪದ್‌ ಬಯಿಟ್ ಮಳೆನ ಅಯಿಪಿ. ಈ ಬೂಮಿರ ಮೇಲೆ ನಾನ್‌ ಸೃಷ್ಟಿ ಮಾಡ್‌ನ ಎಲ್ಲಾ ಜೀವಜಂತ್‌ವಳ ಪೂರ್ತಿಯಾಯಿತ್‌ ನಾಶಮಾಡುವೀಂದ್‌ ಎಣ್ಣ್‌ಚಿ. 5ಯೆಹೋವ ಆಜ್ಞೆ ಮಾಡ್‌ನನಕೆ ನೋಹ ಎಲ್ಲಾನ ಮಾಡ್‌ಚಿ.
6ಬೂಮಿರ ಮೇಲೆ ಜಲಪ್ರಳಯ ಬಪ್ಪಕ ನೋಹಂಗ್ ಆರ್‌ನೂರ್‌ ವಯಸಾಯಿತ್‌ಂಜತ್. 7ಪಿಂಞ ಜಲಪ್ರಳಯತ್‌ಂಜ ತಪ್ಪ್‌ಚಿಡ್‌ವಕ್‌ ನೋಹ, ಅಂವೊಂಡ ಪೊಣ್ಣ್, ಕ್‌ಣ್ಣ ಮಕ್ಕ ಪಿಂಞ ಮೈಮಕ್ಕ ಹಡಗ್‌ರ ಒಳ್‌ಕ್‌ ಪೋಚಿ. 8ದೇವ ನೋಹಂಗ್ ಅಪ್ಪಣೆ ಕೊಡ್‌ತನೆಕೆ ಶುದ್ದವುಳ್ಳ ಪಿಂಞ ಅಶುದ್ದವಾನ ಪ್ರಾಣಿಯಡತ್ಲ್, ಪಕ್ಷಿಯಡತ್ಲ್, ನೆಲತ್‌ಲ್‌ ಪರ್ಪ ಪ್ರಾಣಿಯಡತ್ಲ್, 9ಅಣ್‍ ಪೊಣ್ಣಾಯಿತ್ ಓರೋರ್‌ ಜೊತೆಯಾಯಿತ್ ನೋಹಂಡ ಪಕ್ಕ ಬಂತ್‌ ಹಡಗ್‌ರ ಒಳ್‌ಕ್‌ ಕೂಡ್‌ಚಿ. 10ಏಳ್‌ ದಿವಸ ಆನ ಪಿಂಞ ಜಲಪ್ರಳಯ ಬೂಮಿರ ಮೇಲೆ ಬಾತ್.
11ನೋಹಂಡ ಆರ್‌ನೂರ್‌ ವಯಸ್ಸ್‌ಲ್‌ ದಂಡನೆ ತಿಂಗತ್‌ರ ಪದಿನ್‍ೕಳನೆ ದಿವಸತ್‌ಲ್‌ ಬೂಮಿರ ಆಳತ್‌ಂಜ ನೀರ್‌ರ ಬುಗ್ಗೆ ಎದ್ದತ್‌ ಪಿಂಞ ಬಾನತ್‌ರ ಕ್‌ಡ್‌ಕೆ ತೊರ್‌ಂದನೆಕೆ ತೊರ್‌ಂದತ್. 12ನಾಪ್ಪದ್‌ ಪೋಲ್ ಪಿಂಞ ನಾಪ್ಪದ್‌ ಬಯಿಟ್ ಬೂಮಿರ ಮೇಲೆ ಬಲ್ಯ ಮಳೆ ಪೊಜ್ಜತ್. 13ಅದೇ ದಿವಸತ್‌ಲ್‌ ನೋಹ, ಶೇಮ್, ಹಾಮ್, ಯೆಫೆತ್‌ ಎಣ್ಣುವ ಅಂವೊಂಡ ಮೂಂದ್‌ ಕ್‌ಣ್ಣ ಮಕ್ಕಳು, ಅಂವೊಂಡ ಪೊಣ್ಣ್ ಪಿಂಞ ಮೂಂದ್‌ ಮೈಮಕ್ಕಳೆಲ್ಲಾರು ಹಡ್‌ಗ್‌ರ ಒಳ್‌ಕ್‌ ಪೋಚಿ. 14ಅಯಿಂಗಡ ಕೂಡೆ ಹಡಗ್‌ಲ್‌ ಎಲ್ಲಾ ತರತ್‌ರ ಕಾಡ್‌ ಪ್ರಾಣಿಯ ತಾಂಡ ಜಾತಿಕ್‌ ಸೆರಿಯಾಯಿತ್, ಎಲ್ಲಾ ತರತ್‌ರ ಚಾಕ್‌ ಪ್ರಾಣಿಯ ತಾಂಡ ಜಾತಿಕ್‌ ಸೆರಿಯಾಯಿತ್ ಪಿಂಞ ನೆಲತ್‌ಲ್‌ ಪರ್ಪ ಎಲ್ಲಾ ತರತ್‌ರ ಪ್ರಾಣಿಯ ತಂಡ ಜಾತಿಕ್‌ ಸೆರಿಯಾಯಿತ್ ಪಿಂಞ ಎಲ್ಲಾ ತರತ್‌ರ ಪಾರುವ ಪಕ್ಷಿಯ ತಂಡ ಜಾತಿಕ್‌ ಸೆರಿಯಾಯಿತ್ ಇಂಜತ್. 15ತಾಂಡ ತಾಂಡ ಜಾತಿಕ್‌ ಸೆರಿಯಾಯಿತ್ ಉಸ್‌ರ್‌ ಉಳ್ಳ ಎಲ್ಲಾ ಪ್ರಾಣಿಯ ನೋಹಂಡ ಕೂಡೆ ಹಡಗ್‌ರ ಒಳ್‌ಕ್‌ ಪೋಚಿ. 16ದೇವ ನೋಹಂಗ್ ಆಜ್ಞೆ ಮಾಡ್‌ನನೆಕೆ ಎಲ್ಲಾ ಪ್ರಾಣಿಯ, ಒರ್‌ ಅಣ್‍ ಒರ್‌ ಪೊಣ್ಣಾಯಿತ್ ಒಳ್‌ಕ್‌ ಪೋಚಿ. ಪಿಂಞ ಯೆಹೋವ ಅಯಿಂಗಳೆಲ್ಲಾರ್‌ನು ಒಳ್‌ಲ್‌ ಅಯಿಚ್ಚಿತ್‌ ಪಡಿ ಇಟ್ಟತ್.
17ಬೂಮಿರ ಮೇಲೆ ಜಲಪ್ರಳಯ ನಾಪ್ಪದ್‌ ದಿವಸ ಉಂಟಾಪಕ, ನೀರ್‌ ದುಂಬಿತ್‌ ಹಡಗ್‌ನ ಮೇಲೆ ನೇತ್‌ಚಿ. ಅದ್‌ ಹಡ್‌ಗ್‌ನ ಬೂಮಿರ ಮೇಲೆ ತೇಲುವಕ್‌ ಮಾಡ್‌ಚಿ. 18ನೀರ್‌ ಜಾಸ್ತಿಯಾಯಿತ್‌ ಬೂಮಿರ ಮೇಲೆ ದುಂಬಿಯಂಡ್‌ ಬಪ್ಪಕ, ಹಡಗ್‌ ನೀರ್‌ರ ಮೇಲೆ ತೇಲ್ವಕ್‌ ಸುರ್ ಮಾಡ್‌ಚಿ. 19ಬಯ್ಯ ನೀರ್‌ ಬೂಮಿರ ಮೇಲೆ ದುಂಬ ಏರಿತ್, ಬಾನತ್‌ರ ಅಡಿಲ್‌ ಎಲ್ಲಾ ಕುಂದ್‌ನ ಮುಚ್ಚಿರ್‌ತ್. 20ಮುಚ್ಚಿತ್‌ಂಜ ಕುಂದ್ರ ಮೇಲೆ ಇರ್ವದ್‌ ಅಡಿ ಎತ್ತರಕ್‌ ನೀರ್‌ ದುಂಬ್‌ಚಿ. 21ಅಕ್ಕ ಈ ಲೋಕತ್‌ಲ್‌ ಜೀವಂತವಾಯಿತ್‌ಂಜ ಎಲ್ಲಾ ತರತ್‌ರ ಪಕ್ಷಿಯ, ಚಾಕ್‌ ಪ್ರಾಣಿಯ, ಕಾಡ್‌ ಪ್ರಾಣಿಯ, ನೆಲತ್‌ರ ಮೇಲೆ ಪರ್ಪ ಎಲ್ಲಾ ತರತ್‌ರ ಪ್ರಾಣಿಯ ಪಿಂಞ ಎಲ್ಲಾ ಮನುಷ್ಯ ಜಾತಿಯ ಚತ್ತ್‌ ಪೋಚಿ. 22ಒಣಂಗ್‌ನ ನೆಲತ್‌ರ ಮೇಲೆ ಉಸಿರಾಡಿಯಂಡ್‌ ಜೀವಂತವಾಯಿತ್‌ಂಜದೆಲ್ಲಾ ಚತ್ತ್‌ ಪೋಚಿ. 23ಬೂಮಿರ ಮೇಲೆ ಜೀವಂತವಾಯಿತ್‌ಂಜ ಮನುಷ್ಯ ಜಾತಿಯ, ಪ್ರಾಣಿಯ, ನೆಲತ್‌ಲ್‌ ಪರ್ಪ ಚೆರಿಯ ಪ್ರಾಣಿಯ ಪಿಂಞ ಪಕ್ಷಿಯ ಎಲ್ಲವು ನಾಶ ಆಯಿಪೋಚಿ; ನೋಹ ಪಿಂಞ ಅಂವೊಂಡ ಕೂಡೆ ಇಂಜ ಜೀವಿಯ ಮಾತ್‌ರ ಬಾಕಿ ಉಳ್‌ಂಜತ್. 24ಜಲಪ್ರಳಯತ್‌ರ ನೀರ್‌ ನೂಟ್ಯ ಐಂಬದ್‌ ದಿವಸ ಬೂಮಿನ ಮುಚ್ಚಿತ್‌ಂಜತ್.
Currently Selected:
ಆದ್ಯತ್‌ರ ಪುಸ್ತಕ 7: ಕೊಡವ
Highlight
Share
Copy
Want to have your highlights saved across all your devices? Sign up or sign in
© 2017, New Life Literature (NLL)
