ಆದ್ಯತ್‌ರ ಪುಸ್ತಕ 23
23
ಸಾರಳಂಡ ಚಾವ್‌
1ಸಾರಳ ನೂಟ್ಯ ಇರವತ್‍ೕಳ್‌ ಕಾಲ ಬದ್‌ಕ್‌ಚಿ. 2ಸಾರಳ ಕಾನಾನ್‌ ದೇಶತ್‌ಲ್‌ ಉಳ್ಳ ಹೆಬ್ರೋನ ಎಣ್ಣುವ ಕಿರ್ಯತರ್ಬತ್‌ಲ್‌ ಚತ್ತತ್. ಅಬ್ರಹಾಮ ಅವಕಾಯಿತ್‌ ಶೋಕ ಪಟ್ಟಿತ್‌ ಮೊರ್‌ಟತ್. 3ಅಂವೊ ಅವಡ ಚಾವ್‌ ತಡಿನ ಅಲ್ಲಿಯೇ ಬುಟ್ಟಿತ್, ಹಿತ್ತಿಯಡ ಪೆರಿಯಯಿಂಗಡ ಪಕ್ಕ ಪೋಯಿತ್: 4ನಾನ್‌ ಒರ್‌ ಪರದೇಶಿಯಾಯಿತ್‌ ಉಳ್ಳ, ಈ ನಾಡ್‌ಕಾರನು ಅಲ್ಲ. ಆನಗುಂಡ್‌ ಇಲ್ಲಿ ನಾಕಾಯಿತ್‌ ಒರ್‌ ಜಾಗವು ಇಲ್ಲೆ. ಆಂಗಾಯಿತ್‌ ನಾಡ ಪೊಣ್ಣ್‌ರ ಚಾವ್‌ ತಡಿನ ಪೂಪಕ್‌ ನಾಕ್‍ ಚೆನ್ನ ಜಾಗತ್‌ನ ಸ್ವಂತವಾಯಿತ್‌ ತಾರೀಂದ್‌ ಕ್‍ೕಟತ್. 5ಅದ್‌ಂಗ್‌ ಹಿತ್ತಿಯಂಡ ವಂಶಕ್‌ ಕೂಡ್‌ನಯಿಂಗ ಅಬ್ರಹಾಮಂಗ್: 6ಸ್ವಾಮಿ ನಂಗಡ ತಕ್ಕ್‌ನ ಕ್‍ೕಳ್. ನೀನ್‌ ನಂಗಡ ಮದ್ಯತ್‌ ಬಲ್ಯ ರಾಜಕುಮಾರನಾಯಿತುಳ್ಳಿಯ. ಚತ್ತ್‌ಪೋಯಿತುಳ್ಳ ನೀಡ ಪೊಣ್ಣ್‌ರ ಚಾವ್‌ ತಡಿನ ನಂಗಡಲ್ಲಿ ಉಳ್ಳ ಗೋರಿಲ್, ವಿಶೇಷವಾನ ಗೋರಿಲ್ ಬೆಯ್ಯಿ. ನೀಡ ಪೊಣ್ಣ್‌ರ ಚಾವ್‌ ತಡಿನ ಪೂಪಕ್‌ ನಂಗಡ ಜನ ದಾರೂ ಅಡ್ಡ ಬಪ್ಪ್‌ಲೇಂದ್‌ ಎಣ್ಣ್‌ಚಿ. 7ಅಬ್ರಹಾಮ ಎದ್ದಿತ್, ಹಿತ್ತಿಯಂಡ ವಂಶಕಾರಂಗಳಾನ ಆ ದೇಶತ್‌ರ ಜನಕ್‌ ಬಗ್ಗಿತ್‌ ನಮಸ್ಕಾರ ಮಾಡಿತ್: 8ನಾಡ ಪೊಣ್ಣ್‌ರ ಚಾವ್‌ ತಡಿನ ಪೂಪಕ್‌ ನಿಂಗ ಒಪ್ಪಿತುಂಡೇಂಗಿ, ನಾಡ ತಕ್ಕ್‌ನ ಕ್‍ೕಟಿತ್, ಚೋಹರಂಡ ಮೋಂವೊನಾನ ಎಫ್ರೋನಂಡ ಕೂಡೆ ನಾಕಾಯಿತ್‌ ತಕ್ಕ್‌ಪರ್‌ಂದಿತ್, 9ಅಂವೊಂಡ ಬೂಮಿರ ಕಡೇಲ್‌ ಉಳ್ಳ ಮಕ್ಪೇಲ ಎಣ್ಣುವ ಗುವೆನ ನಾಕ್‍ ಪೂಪಕ್‌ ಸ್ವಂತ ಜಾಗವಾಯಿತ್‌ ತಪ್ಪಕ್‌ ಬೋಡಿಯೊಳಿ. ಅದ್‌ಂಡ ಬೆಲೆನ ಪೂರ್ತಿಯಾಯಿತ್‌ ಕೊಡ್‌ಪೀಂದ್‌ ಎಣ್ಣ್‌ಚಿ. 10ಅಕ್ಕ ಎಫ್ರೋನ ಅಲ್ಲಿಯೇ ಹಿತ್ತಿಯಂಡ ವಂಶಕಾರಂಗಡ ಮದ್ಯತ್‌ಲ್‌ ಅಳ್‌ತ್‌ತಿಂಜತ್; ಅಕ್ಕ ಹಿತ್ತಿಯನಾನ ಎಫ್ರೋನ ತಾಂಡ ಊರ್‌ಲ್‌ ಉಳ್ಳಯಿಂಗಡ ಮಿಂಞತ್‌ ಅಬ್ರಹಾಮಂಗ್: 11ಇಲ್ಲೆ ಸ್ವಾಮಿ, ನಾಡ ತಕ್ಕ್‌ನ ಕ್‍ೕಳ್, ಆ ಬೂಮಿನ ಪಿಂಞ ಅದ್‌ಲ್‌ ಉಳ್ಳ ಗುವೆನ ಸಹ ನೀಕ್‌ ತಪ್ಪಿ. ಇದ್‌ನ ನಾಡ ಜನಡ ಮಿಂಞತ್‌ ನೀಡ ಪೊಣ್ಣ್‌ನ ಪೂಪಕಾಯಿತ್‌ ತಪ್ಪೀಂದ್‌ ಎಣ್ಣ್‌ಚಿ. 12ಅಕ್ಕ ಅಬ್ರಹಾಮ ಆ ದೇಶತ್‌ರ ಜನಕ್‌ ಬಗ್ಗಿತ್‌ ನಮಸ್ಕಾರ ಮಾಡಿತ್: 13ಆ ದೇಶತ್‌ರ ಜನ ಕ್‍ೕಪನೆಕೆ ಎಫ್ರೋನಂಗ್: ನೀಕ್‌ ಆ ಬೂಮಿನ ಕೊಡ್‌ಪಕ್‌ ಕುಶಿ ಉಂಡೇಂಗಿ, ನಾನ್‌ ಎಣ್ಣುವಾನ ನೀನ್‌ ಕ್‍ೕಳ್; ನಾನ್‌ ಅದ್‌ನ ಕ್ರಯಕ್‌ ಎಡ್‌ಪಿ. ಅದ್‌ನ ನಾಡ ಕೈಯಿಂಜ ಎಡ್‌ತ. ಬಯ್ಯ ನಾಡ ಪೊಣ್ಣ್‌ರ ಚಾವ್‌ ತಡಿನ ಆ ಜಾಗತ್‌ಲ್‌ ಪೂಪೀಂದ್‌ ಎಣ್ಣ್‌ಚಿ. 14ಅದ್‌ಂಗ್‌ ಎಫ್ರೋನ: 15ಸ್ವಾಮಿ, ನಾಡ ತಕ್ಕ್‌ನ ಕ್‍ೕಳ್, ಆ ಬೂಮಿರ ಕ್ರಯ ನಾನೂರ್‌ ಬೊಳ್ಳಿರ ನಾಣ್ಯ. ಅದ್‌ ನಾಕು ನೀಕು ಸಾದಾರಣ ಕಾರ್ಯ; ಪೋಯಿತ್ ನೀಡ ಪೊಣ್ಣ್‌ರ ಚಾವ್‌ ತಡಿನ ಪೂಳ್‌ಂದ್‌ ಎಣ್ಣ್‌ಚಿ. 16ಅಕ್ಕ ಅಬ್ರಹಾಮ ಎಫ್ರೋನಂಡ ತಕ್ಕ್‌ಕ್‌ ಒಪ್ಪಿತ್, ಹಿತ್ತಿಯಂಡ ಮಿಂಞತ್‌ ಎಫ್ರೋನ ಎಣ್ಣ್‌ನನೆಕೆ, ವ್ಯಾಪರಿಯಂಗ ಎಚ್ಚಕ್‌ ಕ್ರಯಕ್‌ ಎಡ್‌ಪ, ಅಚ್ಚಕೇ ಕ್ರಯಕ್‌ ನಾನೂರ್‌ ಬೊಳ್ಳಿರ ನಾಣ್ಯತ್‌ನ ಅಂವೊಂಗ್‌ ತೂಕ್ಕಿತ್‌ ಕೊಡ್‌ತತ್.
17ಇನ್ನನೆ ಮಮ್ರೆಕ್‌ ಪಕ್ಕತ್‌ಲ್‌ ಉಳ್ಳ ಮಕ್ಪೇಲಕ್‌ ಕೂಡ್‌ನ ಎಫ್ರೋನಂಡ ಬೂಮಿನ ಕ್ರಯಕ್‌ ಎಡ್‍ತಂಡತ್. ಅದ್‌ಲ್‌ ಬೇಲ್‌ ಪಿಂಞ ಗುವೆನ ಕೂಟಿ, ಸುತ್ತ್‌ಲ್‌ ಇಂಜ ಮರತ್‌ನ ಕೂಟಿ ಎಡ್‍ತಂಡತ್. 18ಆ ಜಾಗ ಹಿತ್ತಿಯಂಡ ಪೆರಿಯಯಿಂಗಡ ಮಿಂಞತ್‌ ಮಾಡ್‌ನ ಒಪ್ಪಂದತ್‌ರ ಪ್ರಕಾರ ಅಬ್ರಹಾಮಂಗ್ ಸ್ವಂತವಾಚಿ. 19ಅಲ್ಲಿಂಜ ಅಬ್ರಹಾಮ ತಾಂಡ ಪೊಣ್ಣಾನ ಸಾರಳಂಡ ಚಾವ್‌ ತಡಿನ ಕಾನಾನ್‌ ದೇಶತ್‌ಲ್‌ ಹೆಬ್ರೋನ ಎಣ್ಣುವ ಮಮ್ರೆಕ್‌ ಪಕ್ಕತ್‌ಲ್‌ ಉಳ್ಳ ಮಕ್ಪೇಲ ಎಣ್ಣುವ ನೆಲತ್‌ಲ್‌ ಉಳ್ಳ ಗುವೆಲ್‌ ಪೂತತ್. 20ಇನ್ನನೆ ಹಿತ್ತಿಯಂಡ ವಂಶಕಾರಂಗಡಯಿಂಜ ಕ್ರಯಕ್‌ ಎಡ್‌ತ ಆ ಬೂಮಿನ, ಅದ್‌ಲ್‌ ಉಳ್ಳ ಗುವೆನ ಅಬ್ರಹಾಮಂಗ್ ಪೂಪಕುಳ್ಳ ಸ್ವಂತ ತೂಟ್ಂಗಳ ಬೂಮಿಯಾಯಿತ್‌ ದೃಡ ಪಡ್‌ತ್‌ಚಿ.
Currently Selected:
ಆದ್ಯತ್‌ರ ಪುಸ್ತಕ 23: ಕೊಡವ
Highlight
Share
Copy
Want to have your highlights saved across all your devices? Sign up or sign in
© 2017, New Life Literature (NLL)
