ಆದ್ಯತ್‌ರ ಪುಸ್ತಕ 20
20
ಆಬರಹಮ ಅನಡ ಆಬಿಮೆಲೇಕ
1ಅಬ್ರಹಾಮ ಆ ಜಾಗತ್‌ನ ಬುಟ್ಟಿತ್, ತೆಕ್ಕ್‌ ಸೀಮೆಲ್‌ ಉಳ್ಳ ನೆಗೆವ್‌ ಎಣ್ಣುವ ಜಾಗಕ್‌ ಪೋಪಕ್‌ ಪ್ರಯಾಣ ಮಾಡಿತ್, ಕಾದೇಶಿಕು ಶೂರುಕು ಮದ್ಯತ್‌ಲ್‌ ವಾಸಮಾಡ್‌ಚಿ. ಚೆನ್ನಕಾಲ ಗೆರಾರಿ ಎಣ್ಣುವ ಬಲ್ಯ ಊರಲ್‌ ಇಂಜತ್. 2ಅಲ್ಲಿ ಇಪ್ಪಕ ಅಬ್ರಹಾಮ ತಾಂಡ ಪೊಣ್ಣ್‌ ಸಾರಳ ತಂಗೇಂದ್‌ ಎಣ್ಣ್‌ನಗುಂಡ್‌ ಗೆರಾರಿರ ರಾಜನಾನ ಅಬೀಮೆಲೆಕ ಅವಳ ಕಾಕಿಚಿಟ್ಟಿತ್ ತಾಂಡ ಮನೆಲ್ ಬೆಚ್ಚಂಡತ್. 3ಆಚೇಂಗಿ ಬಯಿಟ್ ದೇವ ಅಬೀಮೆಲೆಕಂಡ ಸ್ವಪ್ನತ್‌ಲ್‌ ಬಂದಿತ್: ಆ ಪೊಣ್ಣಾಳ್‌ನಗುಂಡ್‌ ನೀನ್ ಚಾವಿಯ. ಅವ ಬೋರೆ ಒಬ್ಬಂಡ ಪೊಣ್ಣಾಯಿತ್‌ ಉಂಡಲ್ಲಾಂದ್‌ ಎಣ್ಣ್‌ಚಿ. 4ಆಚೇಂಗಿ ಅಬೀಮೆಲೆಕ ಅವಡ ಕೂಡೆ ಇಂಞು ಬುದ್ದತಗುಂಡ್, ಅಂವೊ: ಒಡಯನೇ, ನೀತಿವಂತ ಜನಳ ನೀನ್ ನಾಶಮಾಡ್‌ವಿಯಾ? 5ಅಂವೊ ಇವಳ ತಾಂಡ ತಂಗೇಂದ್‌ ಎಣ್ಣಿಚಲ್ಲಾ? ಇವಳು ಅಂವೊನ ತಾಂಡ ಅಣ್ಣಾಂದ್‌ ಎಣ್ಣಿಚಲ್ಲಾ? ನಾನ್‌ ಇದ್‌ನ ನಲ್ಲ ಮನಸ್ಸ್‌ಲ್‌ ಪಿಂಞ ಶುದ್ದ ಕೈಯಿಲ್‌ ಮಾಡಿಯೇಂದ್‌ ಎಣ್ಣ್‌ಚಿ. 6ಅದ್‌ಂಗ್‌ ದೇವ: ಅಕ್ಕು ನೀನ್ ಇದ್‌ನ ನಲ್ಲ ಮನಸ್ಸ್‌ಲ್‌ ಮಾಡಿತುಳ್ಳಿಯಾಂದ್‌ ನಾಕ್‍ ಗೊತ್ತುಂಡ್. ನೀನ್ ನಾಕ್‍ ವಿರೋದವಾಯಿತ್‌ ಪಾಪ ಮಾಡತನೆಕೆ ನಿನ್ನ ತಡ್‌ತಿತ್‌ ಅವಳ ಮುಟ್ಟ್‌ವಕ್‌ ನಾನ್‌ ಬುಟ್ಟಿತ್‌ಲ್ಲೇಂದ್‌ ಎಣ್ಣ್‌ಚಿ. 7ಇಕ್ಕ ನೀನ್ ಆ ಮನುಷ್ಯಂಡ ಪೊಣ್ಣ್‌ನ ತಿರಿತ್‌ ಅಂವೊಂಡ ಪಕ್ಕ ಅಯಿಚಿರ್. ಅಂವೊ ಒರ್‌ ಪ್ರವಾದಿ; ಅಂವೊ ನೀಕಾಯಿತ್‌ ಪ್ರಾರ್ಥನೆ ಮಾಡುವ, ನೀನ್ ಬದ್‌ಕ್‌ವಿಯ; ನೀನ್ ಅವಳ ತಿರಿತ್‌ ಅಂವೊಂಡ ಪಕ್ಕ ಅಯಿಕತೆ ಪೋಚೇಂಗಿ, ನೀನ್ ಪಿಂಞ ನೀಡ ಎಲ್ಲಾ ಮನೆಕಾರಂಗ ನೇರಾಯಿತು ಚತ್ತ್‌ ಪೋಪಾಂದ್‌ ಸ್ವಪ್ನತ್‌ಲ್‌ ಎಣ್ಣ್‌ಚಿ. 8ಆನಗುಂಡ್‌ ಅಬೀಮೆಲೆಕ ಪೊಲಾಕ ಬೆರಿಯ ಎದ್ದಿತ್‌ ತಾಂಡ ಪಣಿಕಾರಳ ಕಾಕಿತ್, ಈ ವಿಷಯತ್‌ನೆಲ್ಲಾ ಅಯಿಂಗಕ್‌ ಎಣ್ಣ್‌ವಕ, ಅಯಿಂಗಕ್‌ ದುಂಬ ಪೋಡಿಯಾಚಿ. 9ಅಲ್ಲಿಂಜ ಅಬೀಮೆಲೆಕ ಅಬ್ರಹಾಮನ ಕಾಕಿಚಿಟ್ಟಿತ್: ನೀನ್ ನಂಗಕ್‌ ಎಂತ ಕಾರ್ಯ ಮಾಡಿಯಾ? ನಾನ್‌ ನೀಕ್‌ ಎಂತ ತಪ್ಪ್‌ ಮಾಡಿಯೇಂದ್‌ ನೀನ್, ನಾಕ್‍ ಪಿಂಞ ನಾಡ ರಾಜ್ಯತ್‌ರ ಮೇಲೆ ಇಚ್ಚಕ್‌ ಬಲ್ಯ ಪಾಪ ಬಪ್ಪ್‌ಚಿಡ್‌ವಕ್‌ ಇಂಜಿಯೆ? ಮಾಡ್‌ವಕ್ಕಾಗಾಂದ್‌ ಉಳ್ಳ ಕಾರ್ಯತ್‌ನ ನೀನ್ ನಾಕ್‍ ಮಾಡಿತುಳ್ಳಿಯಾಂದ್‌ ಎಣ್ಣ್‌ಚಿ. 10ನೀನ್ ಏದ್‌ ಕಾರಣಕಾಯಿತ್‌ ಈ ಕಾರ್ಯತ್‌ನ ಮಾಡಿಯಾಂದ್‌ ಅಬೀಮೆಲೆಕ ಪುನಃ ಅಬ್ರಹಾಮನ ಕ್‍ೕಟತ್. 11ಅದ್‌ಂಗ್‌ ಅಬ್ರಹಾಮ: ಈ ಜಾಗತ್‌ರ ಜನಕ್‌ ಕಂಡಿತವಾಯಿತ್‌ ದೇವಡ ಪೋಡಿಯಿಲ್ಲೆ. ನಾಡ ಪೊಣ್ಣ್‌ರಗುಂಡ್‌ ನನ್ನ ಕೊಲ್ಲ್‌ವಾಂದ್‌ ನಾನ್‌ ಗೇನ ಮಾಡ್‌ನ. 12ಅದ್‌ಲ್ಲತೆ ಅವ ನೇರಾಯಿತು ನಾಡ ತಂಗೆ. ನಂಗ ದಂಡಾಳ್‌ಕು ಅಪ್ಪ ಒಬ್ಬನೇ ಆಚೇಂಗಿ ನಂಗಡ ಅವ್ವಂಗ ಬೋರೆ. ನಾನ್‌ ಅವಳ ಮಂಗಲ ಕಯಿಚಿಯೆ. 13ದೇವ ನಂಗಳ ನಂಗಡ ಅಪ್ಪಂಡ ಮನೆಯಿಂಜ ದೂರ ಕಾಕಿಯಂಡ್‌ ಬಪ್ಪಕ, ನಾನ್‌ ಅವಕ್: ನಂಗ ಪೋಪ ಜಾಗತ್‌ಲೆಲ್ಲ ನೀನ್ ನನ್ನ ಅಣ್ಣಾಂದ್‌ ಎಣ್ಣಿತ್‌ ನಾಕ್‍ ದಯೆ ಮಾಡ್‍ೕಂದ್‌ ನಾನ್‌ ಅವಡ ಪಕ್ಕ ಎಣ್ಣಿತ್‌ಂಜ್ಂದ್‌ ಎಣ್ಣ್‌ಚಿ. 14ಅಕ್ಕ ಅಬೀಮೆಲೆಕ ಅಬ್ರಹಾಮಂಗ್ ಕೊರಿ ಎತ್ತ್‌ಕಡ್‌ಚಿಯಳ ಪಿಂಞ ಪಣಿಕಾರ ಪಣಿಕಾರ್ತಿಯಳ ಕೊಡತಿತ್, ಅಂವೊಂಡ ಪೊಣ್ಣ್‌ ಆನ ಸಾರಳನ ಸಹ ಅಂವೊಂಡ ಪಕ್ಕ ಒಪ್ಪ್‌ಚಿಟ್ಟತ್. 15ಅಲ್ಲಿಂಜ ಅಬೀಮೆಲೆಕ ಅಬ್ರಹಾಮಂಗ್: ಇದಾ, ನಾಡ ರಾಜ್ಯ ನೀಡ ಮಿಂಞತ್‌ ಉಂಡ್. ನೀಕ್‌ ಏದ್‌ ಜಾಗ ಕುಶಿ ಉಂಡೋ ಆ ಜಾಗತ್‌ಲ್‌ ವಾಸಮಾಡ್‍ೕಂದ್‌ ಎಣ್ಣ್‌ಚಿ. 16ಪಿಂಞ ಸಾರಳನ ನೋಟಿತ್: ನೋಟ್ ನೀಡ ಅಣ್ಣಂಗ್‌ ಆಯಿರ ಬೊಳ್ಳಿರ ನಾಣ್ಯತ್‌ನ ಕೊಡ್‌ತ್ತಿಯೆ. ನೀಕ್‌ ನಾನ್‌ ಎಂತಾಚೇಂಗಿ ತಪ್ಪ್‌ ಮಾಡಿತುಂಡೇಂಗಿ ಅದ್‌ನ ಸರಿಪಡ್‌ತ್‌ವಕ್‌ ಕೊಡ್‌ತಂಡುಳ್ಳ. ಇದ್‌ ನಾಡ ವಿರುದ್ದ ನೀಕ್‌ ಎಂತೇಂಗಿ ಹಕ್ಕ್‌ ಉಂಡೇಂಗಿ ಅದ್‌ ಪೂರ್ತಿ ಆಪ. ನೀಡ ಮರ್ಯಾದೆ ಉಳಿಯುವಾಂದ್‌ ಎಣ್ಣ್‌ಚಿ. 17-18ಅಬೀಮೆಲೆಕ ಅಬ್ರಹಾಮಂಡ ಪೊಣ್ಣ್‌ ಆನ ಸಾರಳನ ಬೆಚ್ಚನಗುಂಡ್‌ ದೇವ ಅಬೀಮೆಲೆಕಂಡ ಮನೆಲ್ ಇಂಜ ಪೊಣ್ಣಾಳ್‌ನೆಲ್ಲಾಲ ಕುಳುಮೆಕಾರ್ತಿ ಆಕತನೆಕೆ ತಡುತಿತ್‌ಂಜತ್. ಅಕ್ಕ ಅಬ್ರಹಾಮ ಯೆಹೋವನಾನ ದೇವನ ಬೋಡ್‌ಚಿ. ಅಕ್ಕ ಯೆಹೋವ ಅಬೀಮೆಲೆಕನ, ಅಂವೊಂಡ ಪೊಣ್ಣ್‌ ಪಿಂಞ ಅಂವೊಂಡ ಪಣಿಕಾರ್ತಿಯಳ ವಾಸಿಮಾಡಿತ್‌ ಮಕ್ಕಳ ಪೆರುವನೆಕೆ ದೆಯೆ ಮಾಡ್‌ಚಿ.
Currently Selected:
ಆದ್ಯತ್‌ರ ಪುಸ್ತಕ 20: ಕೊಡವ
Highlight
Share
Copy
Want to have your highlights saved across all your devices? Sign up or sign in
© 2017, New Life Literature (NLL)
