ಆದ್ಯತ್‌ರ ಪುಸ್ತಕ 19
19
ಸೋದೋಮ್‌ ಗೊಮೊರ ಪಟ್ಟಣ ನಾಶ ಆಪದ್‌
1ಬಯಿಟಾಪಕ ಆ ದಂಡ್‌ ದೂತಂಗಳೂ ಸೊದೋಮ್‌ ಪಟ್ಟಣಕ್‌ ಬಾತ್. ಆ ಸಮಯತ್‌ಲ್‌ ಸೊದೋಮ್‌ ಪಟ್ಟಣತ್‌ರ ಪಡಿರ ಪಕ್ಕ ಲೋಟ ಅಳ್‌ತಂಡಿಂಜತ್. ಅಂವೊ ಅಯಿಂಗಳ ಕಾಂಬಕ ಎದ್ದಿತ್‌ ಅಯಿಂಗಡ ಮಿಂಞತ್‌ ಮಂಡೆ ಬಗ್ಗಿಚಿಟ್ಟಿತ್: 2ಸ್ವಾಮಿಯಳೇ, ದಯಬೆಚ್ಚಿತ್‌ ನಾಡ ಮನೆಕ್‌ ಬಾರಿ. ನಿಂಗಡ ಕಾಲ್‌ನ ಕತ್ತಿತ್, ಇಂದ್‌ ಬಯಿಟ್ ಅಲ್ಲೇ ಒಳಿಂಜಿತ್, ಪೊಲಾಕ ಎದ್ದಿತ್‌ ನಿಂಗಡ ಬಟ್ಟೆಲ್ ಪೋಯೀಂದ್‌ ಎಣ್ಣ್‌ಚಿ. ಅದ್‌ಂಗ್‌ ಆ ದೇವದೂತಂಗ: ಇಲ್ಲೆ, ನಂಗ ಪೋಪ ಬಟ್ಟೆಲ್, ಬೀದೀಲ್‌ ಬಯಿಟ್ ಕಯಿಪಾಂದ್‌ ಎಣ್ಣ್‌ಚಿ. 3ಆಚೇಂಗಿ ಲೋಟ ಅಯಿಂಗಳ ದುಂಬ ಒತ್ತಾಯ ಮಾಡ್‌ಚಿ. ಅದ್‌ಂಗ್‌ ಅಯಿಂಗ ಅಂವೊಂಡ ಕೂಡೆ ಅಂವೊಂಡ ಮನೆಕ್‌ ಪೋಚಿ. ಅಂವೊ ಪುಳಿಯಿಲ್ಲತ ಒಟ್ಟಿನ ಕೂಡ ಗದ್ದಾಳ ತಯಾರ್‌ ಮಾಡಿತ್‌ ಅಯಿಂಗಕ್‌ ಕೊಡ್‌ತತ್. ಅಯಿಂಗ ಅದನ ಉಂಡತ್. 4ಅಯಿಂಗ ವರ್ವಕ್‌ ಮಿಂಞ, ಸೋದೋಮ್‌ ಪಟ್ಟಣತ್‌ರ ಎಲ್ಲಾ ಬಾಗತ್‌ಂಜ ಬಾಲ್ಯಕಾರ ಮಕ್ಕಯಿಂಜ ಪುಡ್‌ಚಿತ್‌ ವಯಸ್ಸಾನಯಿಂಗಕತ್ತನೆ ಎಲ್ಲಾ ಆಣಾಳ್‌ವಳು ಬಂದಿತ್‌ ಅಂವೊಂಡ ಮನೆರ ಸುತ್ತ್‌ಲ್‌ ನಿಂದತ್. 5ಅಯಿಂಗೆಲ್ಲಾರು ಲೋಟನ ಜೋರಾಯಿತ್‌ ಕಾಕಿತ್: ಇಂದ್‌ ಬಯಿಟ್ ನೀಡ ಮನೆಲ್ ಒಳಿಯೊಕ್‌ ಬಂದಿತುಳ್ಳ ಆಣಾಳ್‌ವ ಎಲ್ಲಿ? ಅಯಿಂಗಳ ಪೊರಮೆ ಕಾಕಿಯಂಡ್‌ ಬಾ, ಅಯಿಂಗಡ ಕೂಡೆ ನಂಗ ಬುದ್ದಂಡೂಂದ್‌ ಎಣ್ಣ್‌ಚಿ. 6ಅಕ್ಕ ಲೋಟ ಪೊರಮೆ ಬಂದಿತ್‌ ಅಂವೊಂಡ ಬಯ್ಯತ್‌ ಪಡಿನ ಇಟ್ಟಿತ್, ಅಯಿಂಗಡ ಪಕ್ಕ ಪೋಯಿತ್: 7ಅಣ್ಣತಮ್ಮಣಂಗಳೇ, ದಯಬೆಚ್ಚಿತ್‌ ಇಂತ ಕ್‍ೕಡಾನ ಕಾರ್ಯತ್‌ನ ಮಾಡತೀಂದ್‌ ಲೋಟ ಅಯಿಂಗಳ ಬೋಡ್‌ಚಿ. 8ನೋಟಿ, ಆಣಾಳ್‌ವಡ ಕೂಡ ಬುದ್ದತ ದಂಡ್‌ ಮೂಡಿ ಮಕ್ಕ ನಾಕ್‍ ಉಂಡ್. ಅಯಿಂಗಳ ನಾನ್‌ ಪೊರಮೆ ಕಾಕಿಯಂಡ್‌ ಬಪ್ಪಿ. ನಿಂಗ ಅಯಿಂಗಕ್‌ ಎಂತ ಬೋಂಡಿಯೇಂಗಿಯು ಮಾಡಿ. ಆಚೇಂಗಿ ಈಂಗ ನಾಡ ಬೆಂದ್‌ಕ, ಅಯಿಂಗಳ ನಾನ್‌ ಕಾಪಾಡಂಡು, ಅಯಿಂಗಕ್‌ ಒಂದು ಮಾಡತೀಂದ್‌ ಎಣ್ಣ್‌ಚಿ. 9ಅದ್‌ಂಗ್‌ ಅಯಿಂಗ: ನಂಗಕ್‌ ಬಟ್ಟೆ ಬುಡ್. ಇಂವೊ ನಂಗಡಲ್ಲಿಕ್‌ ಪರದೇಶಿಯಾಯಿತ್‌ ಬಾತ್. ಇಕ್ಕ ಇಂವೊ ನಂಗಕ್‌ ನ್ಯಾಯ ತಕ್ಕ್‌ ಪರಿಯುವಕ್‌ ಬಂದಂಡುಂಡ್. ಇಕ್ಕ ಅಯಿಂಗಕ್‌ ಮಾಡುವ ಕ್‍ೕಡ್‌ಕಿಂಜ ನೀಕ್‌ ದುಂಬ ಕ್‍ೕಡ್‌ ಮಾಡ್‌ವಾಂದ್‌ ಎಣ್ಣಿತ್, ಲೋಟನ ತಳ್ಳಿಯಂಡ್‌ ಮನೆರ ಪಡಿನ ಒಡೆಪಕ್‌ ಬಾತ್. 10ಆಚೇಂಗಿ ಒಳ್‍ಲ್‍ಯಿಂಜ ಆ ದಂಡ್‌ ದೇವದೂತಂಗ ಪೊರಮೆ ಕೈ ನೀಟ್ಟಿತ್, ಲೋಟನ ಒಳ್‌ಕ್‌ ಬಲ್‌ಚಿತ್‌ ಪಡಿನ ಇಟ್ಟತ್. 11ಅದ್‌ಲ್ಲತೆ ಮನೆರ ಪೊರಮೆ ನಿಂದಿತ್‌ಂಜ ಬಾಲ್ಯಕಾರಂಗ ಪಿಂಞ ಬಲ್ಯಯಿಂಗಕ್‌ ಮನೆರ ಪಡಿನ ಕಾಂಗತನೆಕೆ, ಅಯಿಂಗಡ ಕಣ್ಣ್‌ನ ಕುರುಡ್‌ ಮಾಡ್‌ಚಿ. 12ಅಕ್ಕ ಆ ದೂತಂಗ ಲೋಟಂಗ್: ಇಲ್ಲಿ ನೀಡ ಜನ ಇಂಞು ದಾರೇಂಗಿ ಉಂಡಾ? ನೀಡ ಮೈಮಂಗ, ಕ್‌ಣ್ಣ ಮಕ್ಕ, ಮೂಡಿ ಮಕ್ಕ ಇಲ್ಲೆ ಇಂಞು ದಾರೇಂಗಿ ಉಂಡಾ? ಅನ್ನನೆ ಇಂಜತೇಂಗಿ ಅಯಿಂಗಳ ಇಕ್ಕಲೆ ಪೊರಮೆ ಕಾಕಿಯಂಡ್‌ ಪೋಂದ್‌ ಎಣ್ಣ್‌ಚಿ. 13ಎನ್ನಂಗೆಣ್ಣ್‌ಚೇಂಗಿ, ನಂಗ ಈ ಜಾಗತ್‌ನ ಪೂರ್ತಿಯಾಯಿತ್‌ ನಾಶ ಮಾಡುವ. ಈಂಗಕ್‌ ವಿರೋದವಾಯಿತ್‌ ಬಲ್ಯ ಮೊರೆ ಯೆಹೋವಂಗ್‌ ಮುಟ್ಟ್‌ನಗುಂಡ್‌ ಈಂಗಳ ನಾಶಮಾಡುವಕಾಯಿತ್‌ ನಂಗಳ ಅಯಿಚಿತ್‍ೕಂದ್‌ ಎಣ್ಣ್‌ಚಿ. 14ಅಕ್ಕ ಲೋಟ ಪೊರಮೆ ಪೋಯಿತ್ ತಾಂಡ ಮೂಡಿ ಮಕ್ಕಕ್‌ ಗೊತ್ತ್‌ಮಾಡ್‌ನ ಮೈಮಂಗಡ ಪಕ್ಕ ಪೋಯಿತ್: ನಿಂಗ ಎದ್ದಿತ್‌ ಈ ಜಾಗತ್‌ನ ಬುಟ್ಟಿತ್‌ ಪೋಯಿರಿ. ಯೆಹೋವ ಈ ಪಟ್ಟಣತ್‌ನ ನಾಶಮಾಡ್‌ವಕ್‌ ಉಂಡ್‍ೕಂದ್‌ ಎಣ್ಣ್‌ಚಿ. ಆಚೇಂಗಿ ಅಯಿಂಗ ಲೋಟ ತಮಾಶಿ ಮಾಡಿಯಂಡುಂಡ್‍ೕಂದ್‌ ಗೇನ ಮಾಡ್‌ಚಿ. 15ಪೊಲಾಕ ಆಪಕ್‌ ಮಿಂಞ ಆ ದೂತಂಗ ಲೋಟಂಗ್: ನೀನ್‌ ಏಳ್, ನೀಡ ಪೊಣ್ಣ್‌ನ ಪಿಂಞ ನೀಡ ದಂಡ್‌ ಮೂಡಿ ಮಕ್ಕಳ ಬೆರಿಯ ಕಾಕಿಯಂಡ್‌ ಪೋ; ಇಲ್ಲತಪೋಚೇಂಗಿ ನೀನೂ ಈ ಪಟ್ಟಣತ್‌ರ ಮೇಲೆ ಬಪ್ಪ ದಂಡನೆಲ್‌ ನಾಶ ಆಯಿ ಪೋಪಿಯಾಂದ್‌ ಎಣ್ಣಿತ್ ಅಂವೊನ ಅವಸರ ಪಡ್‌ತ್‌ಚಿ. 16ಅಂವೊ ತಡಮಾಡ್‌ವಕ ಯೆಹೋವ ಅಯಿಂಗಡ ಮೇಲೆ ಕರುಣೆ ಕಾಟ್‌ನಂಗ್‌ ಆ ದೇವದೂತಂಗ ಅಂವೊಂಡ ಕೈಯಿನ, ಅಂವೊಂಡ ಪೊಣ್ಣ್‌ರ ಕೈಯಿನ, ಅಂವೊಂಡ ದಂಡ್‌ ಮೂಡಿ ಮಕ್ಕಡ ಕೈಯಿನ ಪುಡಿಚಿತ್, ಅಯಿಂಗಳ ಪಟ್ಟಣತ್‌ರ ಪೊರಮೆ ಕಾಕಿಯಂಡ್‌ ಪೋಯಿತ್ ಬುಟ್ಟ್‌ರ್‌ತ್. 17ಅಯಿಂಗಳ ಪೊರಮೆ ಕಾಕಿಯಂಡ ಪೋಯಿತ್ ಬುಟ್ಟಿತಾನ ಪಿಂಞ ಒಬ್ಬ ದೇವದೂತ: ನಿಂಗಡ ಪ್ರಾಣತ್‌ನ ಬಚಾವ್‌ ಮಾಡ್‌ವಕಾಯಿತ್‌ ಓಡಿ ಪೋಯಿ. ನಿಂಗ ಬಯ್ಯಕ್‌ ತಿರಿತ್‌ ನೋಟತಿ; ಈ ಸಮತಟ್ಟ್‌ ಬೂಮಿಲ್‌ ಎಲ್ಲಿಯೂ ನಿಕ್ಕತೆ ಕುಂದ್‌ಕ್‌ ಓಡಿಪೋಯಿರಿ. ಇಲ್ಲತಪೋಚೇಂಗಿ ನಿಂಗಳು ನಾಶ ಆಯಿ ಪೋಪಿರಾಂದ್‌ ಎಣ್ಣ್‌ಚಿ. 18ಅದ್‌ಂಗ್‌ ಲೋಟ: ಅಯ್ಯೋ, ದಯಬೆಚ್ಚಿತ್‌ ಅದ್‌ ಕಯ್ಯುಲೆ ಸ್ವಾಮಿ, 19ನೀನ್‌ ನಾಡ ಮೇಲೆ ಕರುಣೆ ಕಾಟಿತ್‌ ನಾಡ ಜೀವತ್‌ನ ಬಚಾವ್‌ ಮಾಡ್‌ನದ್‌ ನಾಕ್‍ ಬಲ್ಯ ಸಹಾಯ ಆಚಿ. ಆಚೇಂಗಿ ಆ ಕುಂದ್‌ಕ್‌ ಓಡಿ ಪೋಪಕ್‌ ನಾಕ್‍ ಕಯ್ಯುಲೆ. ಅದ್‌ ಬಾರಿ ದೂರ ಉಂಡ್. ನಾನ್‌ ಅಲ್ಲಿಕ್‌ ಎತ್ತ್‌ವಕ್‌ ಮಿಂಞಲೆ ಈ ಪಟ್ಟಣನಾಶ ಆಪ, ಅನ್ನನೆ ನಾನು ಚತ್ತ್‌ ಪೋಪೀಂದ್‌ ಎಣ್ಣ್‌ಚಿ. 20ನೋಟಿ, ಇಲ್ಲಿ ಪಕ್ಕತ್‌ಲ್‌ ಒರ್‌ ಊರ್‌ ಉಂಡ್. ದಯಬೆಚ್ಚಿತ್‌ ನನ್ನ ಅಲ್ಲಿಕ್‌ ಪೋಪಕ್‌ ಬುಡ್. ಅದ್‌ ಚೆರಿಯದಾಯಿತ್‌ ಉಂಡಲ್ಲ? ನಾಡ ಪ್ರಾಣ ಉಳಿಯುವಾಂದ್‌ ಎಣ್ಣ್‌ಚಿ. 21ಅದ್‌ಂಗ್‌ ದೇವದೂತ: ಸರಿ, ನೀನ್‌ ಕ್‍ೕಟನೆಕೆ ಆ ಚೆರಿಯ ಊರ್‌ನ ನಾನ್‌ ನಾಶ ಮಾಡುಲೇಂದ್‌ ಎಣ್ಣ್‌ಚಿ. 22ಆಚೇಂಗಿ ಬೆರಿಯ ಅಲ್ಲಿಕ್‌ ಓಡಿ ಪೋಯಿತ್ ಬಚಾವ್‌ ಮಾಡಿಯ. ನೀನ್‌ ಅಲ್ಲಿ ಎತ್ತ್‌ವಕತ್ತನೆ ನಾನ್‌ ಒಂದು ಮಾಡ್‌ವಕ್‌ ಕಯ್ಯುಲೇಂದ್‌ ಎಣ್ಣ್‌ಚಿ. ಇದ್‌ನಗುಂಡ್‌ ಆ ಊರ್‌ಕ್‌ ಚೋಗಾರ್‌ಂದ್‌ ಪೆದ ಕ್‌ಟ್ಟ್‌ಚಿ. 23ಲೋಟ ಚೋಗರ್‌ಕ್‌ ಎತ್ತ್‌ವಕ, ಸೂರ್ಯ ಉದಿಚಿತಿಂಜತ್. 24ಅಕ್ಕ ಯೆಹೋವ ಸೊದೋಮ್‌ ಗೊಮೋರತ್‌ರ ಮೇಲೆ ಗಂಧಕ ಪಿಂಞ ತಿತ್ತ್‌ರ ಮಳೆನೆ ಪೊಜ್ಜತ್. 25ಅನ್ನನೆ ಅಲ್ಲಿ ಇಂಜ ಪಟ್ಟಣತ್‌ನೆಲ್ಲಾ, ಸಮತಟ್ಟ್‌ ಬೂಮಿಯೆಲ್ಲಾನ, ಅಲ್ಲಿ ಇಂಜ ಪಟ್ಟಣತ್‌ಲ್‌ ಜೀವಂತವಾಯಿತ್‌ಂಜ ಪ್ರತಿ ಮನುಷ್ಯನ ಪಿಂಞ ಬೂಮಿಲ್‌ ಬೊಳ್‌ಂದ ಬೊಳೆನ ಪೂರ್ತಿಯಾಯಿತ್‌ ನಾಶಮಾಡ್‌ಚಿ. 26ಆಚೇಂಗಿ ಲೋಟಂಡ ಪೊಣ್ಣ್‌ ಅಂವೊಂಡ ಬೆಂಬರತ್‌ಲ್‌ ಬಂದಂಡಿಪ್ಪಕ ತಿರಿತ್‌ ನೋಟ್‌ನಂಗ್‌ ಅವ ಉಪ್ಪುರ ಕಂಬ ಆಚಿ. 27ಪೊಲಾಕ ಅಬ್ರಹಾಮ ಬೆರಿಯ ಎದ್ದಿತ್‌ ತಾನ್‌ ಯೆಹೋವಂಡ ಮಿಂಞತ್‌ ನಿಂದ ಜಾಗಕ್‌ ಪುನಃ ಪೋಯಿತ್, 28ಸೊದೋಮ್‌ ಗೊಮೋರ ಪಟ್ಟಣತ್‌ರ ಕಡೆಕು ಪಿಂಞ ಎಲ್ಲಾ ಸಮತಟ್ಟ್‌ ಬೂಮಿರ ಕಡೆಕು ನೋಟ್‌ವಕ, ಒರ್‌ ಪೊಗೆ ಕೊಳಪೆಯಿಂಜ ಬಪ್ಪ ಪೊಗೆರನೆಕೆ ಆ ಪಟ್ಟಣತ್‌ಂಜ ಪೊಗೆ ಬಪ್ಪದ್‌ನ ಕಂಡತ್. 29ಆಚೇಂಗಿ, ಯೆಹೋವ ಆ ಸಮತಟ್ಟ್‌ ಬೂಮಿಲ್‌ ಉಳ್ಳ ಪಟ್ಟಣತ್‌ನೆಲ್ಲಾ ನಾಶಮಾಡುವಕ ಅಬ್ರಹಾಮಂಡ ಕೋರಿಕೆನ ಗೇನಮಾಡಿತ್, ಲೋಟ ವಾಸಮಾಡಿಯಂಡಿಂಜ ಪಟ್ಟಣಂಗಕ್‌ ಬಂದ ಕ್‍ೕಡಿಂಜ ಲೋಟ ತಪ್ಪಿಚಿಡ್‌ವನೆಕೆ ಅಂವೊನ ಅಯಿಚಿರ್‌ತ್. 30ಪಂಞ ಲೋಟ ಚೋಗರ್‌ ಪಟ್ಟಣತ್‌ಲ್‌ ವಾಸಮಾಡ್‌ವಕ್‌ ಪೋಡಿಚಿಟ್ಟಂಡ್‌ ತಾಂಡ ದಂಡ್‌ ಮೂಡಿಮಕ್ಕಳ ಕಾಕಿಯಂಡ್‌ ಕುಂದ್‌ಲ್‌ ಉಳ್ಳ ಗುವೆಲ್‌ ವಾಸಮಾಡ್‌ಚಿ.
ಲೋಟ ಪಿಂಞ ಅಂವೊಂಡ ದಂಡ್‌ ಮೂಡಿ ಮಕ್ಕ
31ಇನ್ನನೆ ಇಪ್ಪಕ ಒರ್‌ ದಿವಸ ಲೋಟಂಡ ಪೆರಿಯ ಮೋವ ತಾಂಡ ತಂಗೆರ ಪಕ್ಕ: ನಂಗಡ ಅಪ್ಪಂಗ್‌ ದುಂಬ ವಯಸ್ಸಾಚಿ. ಈ ಲೋಕತ್‌ಲ್‌ ಎಲ್ಲೆಲ್ಲು ನಡ್‌ಪ ಪದ್ದತಿರ ಪ್ರಕಾರ ನಂಗಳ ಮಂಗಲ ಕಯಿಪಕ್‌ ಈ ಜಾಗತ್‌ಲ್‌ ಒರ್‌ ಆಣಾಳ್‌ ಸಹ ಇಲ್ಲೆ. 32ಬಾ, ನಂಗ ಅಪ್ಪಂಗ್‌ ಕಳ್ಳ್ ಕುಡಿಪ್‌ಚಿಟ್ಟಿತ್‌ ಅಂವೊಂಡ ಕೂಡೆ ಬುದ್ದೋನ. ಅಕ್ಕ ನಂಗಕ್‌ ಮಕ್ಕ ಆಯಿತ್‌ ಅಪ್ಪನಗುಂಡ್‌ ಸಂತಾನತ್‌ನ ಉಳಿಚಿಡನಾಂದ್‌ ಎಣ್ಣ್‌ಚಿ. 33ಆ ಬಯಿಟ್ ಅಯಿಂಗಡ ಅಪ್ಪಂಗ್‌ ಕಳ್ಳ್ ಕುಡಿಪ್‌ಚಿಟ್ಟಿತ್‌ ಪೆರಿಯ ಮೋವ ಅಂವೊಂಡ ಕೂಡೆ ಬುದ್ದಂಡತ್. ಅವ ಎಕ್ಕ ಬುದ್ದಂಡತೋ ಎಕ್ಕ ಎದ್ದಿತ್‌ ಪೋಚೋ ಅಂವೊಂಗ್‌ ಒಂದೂ ಗೊತ್ತಾಯಿತ್‌ಲ್ಲೆ. 34ಪಿತ್ತಿಯಾಂದ್‌ ಪೆರಿಯವ ಚೆರಿಯವಕ್: ನಿನ್ನಾಂದ್‌ ಬಯಿಟ್ ನಾನ್‌ ಅಪ್ಪಂಡ ಕೂಡೆ ಬುದ್ದಿಯೆ. ಇಂದ್‌ ಬಯಿಟ್ ಅಂವೊಂಗ್‌ ಕಳ್ಳ್ ಕುಡಿಪ್‌ಚಿಡನ. ಅಲ್ಲಿಂಜ ನೀನ್‌ ಅಂವೊಂಡ ಕೂಡೆ ಪೋಯಿತ್ ಬುದ್ದ; ಇನ್ನನೆ ನಂಗಡ ಅಪ್ಪನಗುಂಡ್‌ ನಂಗಡ ಸಂತಾನತ್‌ನ ಉಳಿಚಿಡಂಗಾಂದ್‌ ಎಣ್ಣ್‌ಚಿ. 35ಅಂದ್‌ ಬಯಿಟ್ ಅಯಿಂಗಡ ಅಪ್ಪಂಗ್‌ ಕಳ್ಳ್ ಕುಡಿಪ್‌ಚಿಟ್ಟಪಿಂಞ ಚೆರಿಯವ ಅಂವೊಂಡ ಕೂಡೆ ಬುದ್ದಂಡತ್. ಪುನಃ ಅವ ಎಕ್ಕ ಬುದ್ದಂಡತೋ ಎಕ್ಕ ಎದ್ದಿತ್‌ ಪೋಚೋ ಅಂವೊಂಗ್‌ ಒಂದೂ ಗೊತ್ತಾಯಿತ್‌ಲ್ಲೆ. 36ಇನ್ನನೆ ಲೋಟಂಡ ಮೂಡಿ ಮಕ್ಕ ದಂಡಾಳು ತಂಗಡ ಅಪ್ಪಂಡಗುಂಡ್‌ ಕೆಲಕಾರ್ತಿಯಾಚಿ. 37ಪೆರಿಯವ ಒರ್‌ ಕ್‌ಣ್ಣ ಕುಂಞನ ಪೆತ್ತಿತ್ ಅಂವೊಂಗ್‌ #19.37 ಅಪ್ಪಂಡ ಮೂಲಕ ಪುಟ್ಟನಂವೋಂದ್‌ ಅರ್ಥಮೋವಾಬ್ಂದ್‌ ಪೆದ ಬೆಚ್ಚತ್. ಇಲ್ಲಿಕತ್ತನೆ ಮೋವಾಬ್ಯರಯಿಂಗಕ್‌ ಇಂವೊನೇ ಕಾರೋಣ. 38ಚೆರಿಯವ ಸಹ ಒರ್‌ ಕ್‌ಣ್ಣ ಕುಂಞಿನ ಪೆತ್ತಿತ್, ಅಂವೊಂಗ್‌ #19.38 ಬೆಂದ್‌ಕಡ ಮೂಲಕ ಪುಟ್ಟನಂವೋಂದ್‌ ಅರ್ಥಬೆನಮ್ಮಿಂದ್‌ ಪೆದ ಬೆಚ್ಚತ್. ಇಲ್ಲಿಕತ್ತನೆ ಅಮ್ಮೋನ್ಯರಯಿಂಗಕ್‌ ಇಂವೊನೇ ಕಾರೋಣ.
Currently Selected:
ಆದ್ಯತ್‌ರ ಪುಸ್ತಕ 19: ಕೊಡವ
Highlight
Share
Copy
Want to have your highlights saved across all your devices? Sign up or sign in
© 2017, New Life Literature (NLL)
