2 ತಿಮೊಥೆಯ 4
4
1ದೇವಡ ಮಿಂಞತ್, ಪಿಂಞ ಬದ್‍ಕಿತುಳ್ಳಯಿಂಗಳ ಪಿಂಞ ಚತ್ತಯಿಂಗಳ ತೀರ್ಪ್ ಮಾಡ್‌ವಕುಳ್ಳ ಯೇಸು ಕ್ರಿಸ್ತಂಡ ಮಿಂಞತ್, ಪಿಂಞ ಅಂವೊ ಪುನಃ ಆಳುವಕ್ ರಾಜಾನಾಯಿತ್ ಬಪ್ಪಕುಳ್ಳ ಪ್ರಸನ್ನತ್‌ಲ್ ನಾನ್ ಇದ್‍ನ ನೀಕ್ ಆಜ್ಞೆ ಮಾಡ್‌ವಿ. 2ಅನುಕೂಲವಾನ ಸಮಯತ್‍ಲು, ಅನುಕೂಲಯಿಲ್ಲತ ಸಮಯತ್‍ಲು ನಲ್ಲ ಸುದ್ದಿನ ಬೋದನೆ ಮಾಡ್‌ವಕ್ ತಯಾರಾಯಿತ್ ಇರ್; ತ್‍ೕರ ತಾಳ್ಮೆಯಿಂಜ, ಅಯಿಂಗ ಮಾಡ್‍ನ ತಪ್ಪ್‌ನ ಎಣ್ಣಿ ಕೊಡ್‌ತಿತ್, ಕಂಡನೆ ಮಾಡಿತ್, ಪುರ್‌ಡ್ ಕೊಡ್‌ತಿತ್ ಎಚ್ಚರವಾಯಿತ್ ಬೋದನೆ ಮಾಡ್.
3ಎನ್ನಂಗೆಣ್ಣ್‌ಚೇಂಗಿ, ಅಯಿಂಗ ಆರೋಗ್ಯವಾನ ಬೋದನೆನ ಕ್‍ೕಪಕ್ ಮನಸ್ಸಿಲ್ಲತೆ, ಅಯಿಂಗಡ ಸ್ವಾರ್ಥ ಆಸೆಕ್ ತಕ್ಕಂತ, ಅಯಿಂಗಡ ಕೆಮಿಕ್ ಎಂತ ಕುಶಿಯುಂಡೋ ಅದ್‍ನ ತಕ್ಕ್ ಪರಿಯುವಂತ ಬೋದನೆಕಾರಂಗಳ ದುಂಬ ಕೂಟಿಯಂಡ್ ಬಪ್ಪ ಕಾಲ ಬಪ್ಪ. 4ಅಯಿಂಗ, ಸತ್ಯಕ್ ಕೆಮಿ ಕೊಡ್‍ಕತೆ, ಕಟ್ಟ್‌ಕಥೇನ ಕ್‍ೕಪಕ್ ಪೋಪ. 5ಆಚೇಂಗಿ ನೀನ್ ಎಲ್ಲಾ ವಿಷಯತ್‍ಲು ಮನಸ್ಸ್ ತೆಳ್ಂಗ್‍ನಂವೊನಾಯಿತ್ ಇರ್, ಕಷ್ಟ ಅನುಬವಿಚಿಡ್‍ವಕ್ ಕುಶಿ ಪಡ್, ನಲ್ಲ ಸುದ್ದಿರ ಬೋದನೆಕಾರಂಡ ಕರ್ತವ್ಯತ್‍ನ ಮಾಡ್, ದೇವ ನೀಕ್ ತಂದ ಸೇವೇನ ಪೂರ್ತಿಮಾಡ್.
6ಎನ್ನಂಗೆಣ್ಣ್‌ಚೇಂಗಿ, ನಾಡ ಬದ್‍ಕ್‍ನ ದೇವಕ್ ಬಲಿ ಕೊಡ್‍ಪಕ್ ನಾನ್ ತಯಾರಾಯಿತುಳ್ಳ. ನಾನ್ ಈ ಲೋಕತ್‍ನ ಬುಟ್ಟಿತ್ ಪೋಪಕುಳ್ಳ ಸಮಯ ಪಕ್ಕ ಬಾತ್. 7ನಾನ್ ನಲ್ಲ ಪೋರಾಟತ್‍ನ ಪೋರಾಡ್‍ನ, ಓಟತ್‍ನ ಪೂರ್ತಿ ಮಾಡ್‍ನ, ನಾಡ ನಂಬಿಕೇನ ಕಾಪಾಡ್‍ನ. 8ಆನಗುಂಡ್, ಇಕ್ಕ ನಾಕ್ ನೀತಿರ ಕಿರೀಟ ಬೆಚ್ಚಿತುಂಡ್. ನೀತಿಯುಳ್ಳ ನ್ಯಾಯಕಾರನಾನ ಒಡೆಯ ಆ ದಿವಸತ್‍ಲ್ ಅದ್‍ನ ನಾಕ್ ತಪ್ಪ; ನಾಕ್ ಮಾತ್ರ ಅಲ್ಲ, ಅಂವೊ ಪುನಃ ಬಪ್ಪದ್‍ನ ಕಾಂಬಕ್ ಪಾರಕಾತಂಡುಳ್ಳ ಎಲ್ಲಾರ್‌ಕು ಅದ್‍ನ ತಪ್ಪ.
ಪೌಲಂಡ ಕಡೆ ತಕ್ಕ್
9ತಿಮೊಥೆಯ, ಆಪಚ್ಚಕ್ ನಾಡ ಪಕ್ಕ ಬೆರಿಯ ಬಪ್ಪಕ್ ಪ್ರಯತ್ನಪಡ್. 10ಎನ್ನಂಗೆಣ್ಣ್‌ಚೇಂಗಿ ಈ ಲೋಕತ್‍ರ ಮೇಲೆ ಉಳ್ಳ ಆಸೆರಗುಂಡ್ ದೇಮ ನನ್ನ ಬುಟ್ಟಿತ್ ಥೆಸಲೊನೀಕ ಪಟ್ಟಣಕ್ ಪೋಯಿರ್‌ತ್. ಕ್ರೆಸ್ಕ, ಗಲಾತ್ಯಕ್ ಪಿಂಞ ತೀತ, ದಲ್ಮಾತ್ಯಕ್ ಪೋಯಿರ್‌ತ್. 11ಲೂಕ ಮಾತ್ರ ನಾಡ ಕೂಡೆ ಉಂಡ್. ಮಾರ್ಕನ ನೀಡ ಕೂಡೆ ಕಾಕಿಯಂಡ್ ಬಾ. ನಾಡ ಸೇವೇಲ್ ಅಂವೊ ನಾಕ್ ಸಹಾಯ ಮಾಡ್‌ವ. 12ನಾನ್ ತುಖಿಕನ ಎಫೆಸಕ್ ಅಯಿಚಿಯೆ. 13ನೀನ್ ಬಪ್ಪಕಾಪಕ, ತ್ರೋವತ್‍ಲ್ ಉಳ್ಳ ಕರ್ಪಂಡ ಪಕ್ಕ ಬುಟ್ಟಿತ್ ಬಂದ ಕೋಟ್‍ನ, ಪುಸ್ತಕತ್‍ನ ಪಿಂಞ ಮುಕ್ಯವಾಯಿತ್ ತೋಲ್‍ರ ಕಾಗದತ್‍ನ ಎಡ್‌ತ ಬಾ.
14ಕಚ್ಚಿ ಪಣಿಕಾರನಾನ ಅಲೆಕ್ಸಾಂದ್ರ ನಾಕ್ ದುಂಬ ಕ್‍ೕಡ್ ಮಾಡ್‍ಚಿ. ಅಂವೊ ಮಾಡ್‍ನ ಕಾರ್ಯಕ್ ದೇವ ಅಂವೊಂಗ್ ಶಿಕ್ಷೆ ತಪ್ಪ. 15ನೀನ್ ಸಹ ಅಂವೊಂಡ ವಿಷಯತ್‍ಲ್ ಎಚ್ಚರವಾಯಿತಿರ್. ಎನ್ನಂಗೆಣ್ಣ್‌ಚೇಂಗಿ, ಅಂವೊ ನಂಗ ಮಾಡ್‍ನ ಬೋದನೆಕ್ ದುಂಬ ಎದ್‍ರ್ ನಿಂದತ್.
16ನಾನ್ ಆದ್ಯವಾಯಿತ್ ನ್ಯಾಯಕಾರಂಡ ಮಿಂಞ ನಿಪ್ಪಕ ದಾರೂ ನಾಕ್ ಸಹಾಯ ಮಾಡಿತ್ತ್‌ಲ್ಲೆ. ಎಲ್ಲಾರು ನನ್ನ ಕೈ ಬುಟ್ಟ್‌ರ್‌ತ್, ಇದ್ ಅಯಿಂಗಡ ಲೆಕ್ಕಕ್ ಇಲ್ಲತೆ ಇರಡ್. 17ಆಚೇಂಗಿ ಒಡೆಯ ನಾಡ ಕೂಡೆ ನಿಂದಿತ್ ನನ್ನ ಬಲಪಡ್‍ತಿತ್, ನಾಡ ಮೂಲಕ ನಲ್ಲ ಸುದ್ದಿನ ಪೂರ್ತಿಯಾಯಿತ್ ಪ್ರಚಾರ ಮಾಡ್‌ವಕ್, ಯೆಹೂದ್ಯಂಗಲ್ಲತ ಜನ ಅದ್‍ನ ಕ್‍ೕಪನೆಕೆ ಮಾಡ್‍ಚಿ. ಇದ್ ಅಲ್ಲತೆ ಸಿಂಹತ್‍ರ ಬಾಯಿಯಿಂಜ ನನ್ನ ಬುಡ್‍ಗಡೆ ಮಾಡ್‍ಚಿ. 18ಅಕ್ಕು, ದೇವ ನನ್ನ ಎಲ್ಲಾ ಸೈತಾನಂಡ ಕ್‍ೕಡಿಂಜ ಕಾಪಾಡಿತ್, ಅಂವೊಂಡ ಪಕ್ಕ ಪರಲೋಕ ರಾಜ್ಯಕ್ ಕೂಟಿಯೊವ. ನಿತ್ಯ ನಿತ್ಯಕೂ ಅಂವೊಂಗ್ ಮಹಿಮೆ ಕ್‍ಟ್ಟಡ್.
ಪೌಲಂಡ ಆಕೀರ್ ವಂದನೆ
19ಪ್ರಿಸ್ಕಿಲ್ಲಂಗೂ, ಅಕ್ವಿಲ್ಲಂಗೂ ಪಿಂಞ ಒನೇಸಿಫೊನಂಡ ಮನೆಕಾರಂಗೂ ನಾಡ ವಂದನೆನ ಎಣ್ಣ್. 20ಎರಸ್ತ, ಕೊರಿಂಥ ಪಟ್ಟಣತ್‍ಲ್ ಒಳಿಂಜತ್. ತ್ರೋಫಿಮನಂಗ್, ಸೌಕ್ಯ ಇಲ್ಲತೆ ಇಪ್ಪಕ ಮಿಲೇತಲ್ ಬುಟ್ಟಿತ್ ಬಂದ್. 21ಕುಳ್‌ರ್ ಕಾಲ ಬಪ್ಪಾಂಗ್ ಮಿಂಞ ಇಲ್ಲಿ ಬಪ್ಪಕ್ ಪ್ರಯತ್ನಪಡ್. ಯುಬೂಲ, ಪೊದೆಯ, ಲೀನ ಎಣ್ಣ್‌ವಂವೊನು, ಕ್ಲೌದ್ಯ ಪಿಂಞ ಎಲ್ಲಾ ಅಣ್ಣತಮ್ಮಣಂಗ ನಿನ್ನ ಕ್‍ೕಟತ್.
22ಒಡೆಯನಾನ ಯೇಸು ಕ್ರಿಸ್ತ ನೀಡ ಆತ್ಮತ್‍ರ ಕೂಡೆ ಇರಡ್. ದೇವಡ ಕೃಪೆ ನೀಡ ಕೂಡೆ ಇರಡ್.
Currently Selected:
2 ತಿಮೊಥೆಯ 4: ಕೊಡವ
Highlight
Share
Copy
Want to have your highlights saved across all your devices? Sign up or sign in
© 2017, New Life Literature (NLL)
