1 ಥೆಸಲೊನೀಕ 3
3
1ಆನಗುಂಡ್, ಇಂಞು ಮಿಂಞಕ್ ನಂಗಕ್ ಸಹಿಸಿಯಂಡ್ ಇಪ್ಪಕ್ ಕಯಿಂಜಿತ್‌ಲ್ಲೆ. ಅನ್ನನೆ ಅಥೇನೆ ಪಟ್ಟಣತ್‍ಲ್ ನಂಗ ಮಾತ್ರ ಇಪ್ಪದ್ ಚಾಯೀಂದ್ ಗೇನ ಮಾಡ್‍ಚಿ. 2ಅದ್ಂಗಾಯಿತ್ ನಂಗ ತಿಮೊಥೆಯನ ನಿಂಗಡ ಪಕ್ಕ ಅಯಿಚತ್. ಅಂವೊ ನಂಗಡ ತಮ್ಮಣನು, ನಂಗಡ ಕೂಡೆ ದೇವಡ ಸೇವೆ ಮಾಡ್‌ವಂವೊನು, ಕ್ರಿಸ್ತಂಡ ನಲ್ಲ ಸುದ್ದಿರ ಸೇವೇಲ್ ನಂಗಡ ಕೂಡೆ ಪ್ರಚಾರ ಮಾಡ್‍ವಂವೊನಾಯಿತು ಉಂಡ್. ಅಂವೊ ನಿಂಗಡ ಪಕ್ಕ ಬಂದಿತ್, ನಿಂಗಡ ನಂಬಿಕೇನ ಸ್ತಿರಪಡ್‌ತಿತ್, ನಿಂಗ ಆತ್ಮೀಯ ಬದ್‍ಕ್‍ಲ್ ಬೂವತನೆಕೆ ಇಪ್ಪಕ್ ಸಹಾಯ ಮಾಡ್‌ವ. 3ಅಕ್ಕ, ದಾರೂ ನಿಂಗಳ ನಿಂಗಡ ನಂಬಿಕೆಯಿಂಜ ಬಲಿಪಕ್ ಕಯ್ಯುಲೆ. ನಂಗ ಯೇಸುರ ಬಯ್ಯಕ್ ಬಪ್ಪಕ, ಜನ ನಂಗಳ ಹಿಂಸೆ ಮಾಡ್‌ವಾಂದ್ ಉಳ್ಳದ್ ದೇವಡ ಚಿತ್ತಾಂದ್ ನಿಂಗಕ್ ಗೊತ್ತುಂಡಲ್ಲ. 4ನಂಗ ನಿಂಗಡ ಕೂಡೆ ಇಪ್ಪಕ, ಅಯಿಂಗ ನಂಗಳ ಹಿಂಸೆ ಮಾಡ್‌ವಾಂದ್ ನಿಂಗಕ್ ಎಣ್ಣಿಯಂಡಿಂಜತ್; ಅದ್ ಅನ್ನನೆ ಆಚೀಂದ್ ನಿಂಗಕ್ ಗೊತ್ತಾಚಿ. 5ಆನಗುಂಡ್, ನಿಂಗಡ ವಿಷಯತ್ ನಾಕ್ ಪಾರಕಾತಂಡ್ ಇಪ್ಪಕ್ ಕಯ್ಯತೆ, ಯೇಸುರ ಮೇಲೆ ನಿಂಗಕ್ ಉಳ್ಳ ನಂಬಿಕೆ ಎನ್ನನೆ ಉಂಡ್‍ೕಂದ್ ಗೊತ್ತಾಪಕಾಯಿತ್ ಅಂವೊನ ನಿಂಗಡ ಪಕ್ಕ ಅಯಿಚಿಯೆ. ನಂಗಳ ಸೋದನೆ ಮಾಡ್‌ವ ಸೈತಾನ ನಿಂಗಳ ಸೋದನೆ ಮಾಡಿತ್, ನಂಗ ಇಲ್ಲಿಕತ್ತನೆ ನಿಂಗಡಲ್ಲಿ ಮಾಡ್‍ನ ದೇವಡ ಸೇವೇಕ್ ಒರ್ ಪ್ರಯೋಜನವು ಇಲ್ಲತ ಪೋಯಿರುವಾಂದ್ ನಾಕ್ ಪೋಡಿ ಆಚಿ.
ತಿಮೊಥೆಯಂಡ ಪುರ್‌ಡ್ ಕೊಡ್‍ಪ ಅರಿಕೆ
6ಇಕ್ಕ ತಿಮೊಥೆಯ ನಿಂಗಡಲ್ಲಿಂಜ ನಂಗಡ ಪಕ್ಕ ಬಂದಿತ್, ನಿಂಗ ನಂಬಿಕೇಲ್ ಸ್ತಿರವಾಯಿತ್ ಇಪ್ಪಾನ ಪಿಂಞ ಒಬ್ಬೊಬ್ಬಂಡ ಮೇಲೆ ಉಳ್ಳ ನಿಂಗಡ ಪ್ರೀತಿನ, ನಲ್ಲರಿಕೆಯಾಯಿತ್ ನಂಗಕ್ ಎಣ್ಣ್‌ಚಿ. ನಿಂಗ ನಂಗಳ ಎಕ್ಕಾಲು ಕುಶೀಲ್ ಗೇನ ಮಾಡಿಯಂಡ್, ನಂಗ ನಿಂಗಳ ಕಾಂಗಂಡೂಂದ್ ಆಸೇಲ್ ಗೇನ ಮಾಡ್‌ವನೆಕೆ, ನಿಂಗಳು ನಂಗಳ ಕಾಂಗಂಡೂಂದ್ ಆಸೆಯಾಯಿತ್ ಉಳ್ಳಿರಾಂದ್ ಅಂವೊ ನಂಗಕ್ ಎಣ್ಣ್‌ಚಿ. 7ಅದ್ಂಗಾಯಿತ್ ಅಣ್ಣತಮ್ಮಣಂಗಳೇ, ನಂಗಡ ಎಲ್ಲಾ ಕಷ್ಟತ್‍ಲ್ ಪಿಂಞ ಜನ ಮಾಡ್‌ವ ಹಿಂಸೆರ ಮದ್ಯತ್‍ಲ್ ನಿಂಗಕ್ ದೇವಡ ಪಕ್ಕ ಉಳ್ಳ ನಂಬಿಕೇಲ್ ಸ್ತಿರವಾಯಿತ್ ಉಳ್ಳಿರಾಂದ್ ಕ್‍ೕಪಕ ನಂಗಕ್ ಪುರ್‌ಡ್ ಕ್‍ಟ್ಟ್‌ಚಿ. 8ದೇವಡ ಪಕ್ಕ ಉಳ್ಳ ನಂಬಿಕೇಲ್ ನಿಂಗ ಸ್ತಿರವಾಯಿತ್ ಉಳ್ಳಿರಾಂದ್ ಕ್‍ೕಟಿತ್, ನಂಗಕ್ ಬದ್‌ಕ್‍ವಕುಳ್ಳ ಪುದಿಯ ಶಕ್ತಿ ಕ್‍ಟ್ಟ್‌ಚಿ. 9ನಿಂಗಕಾಯಿತ್ ನಂಗ ದೇವಡ ಪಕ್ಕ ಎಚ್ಚಕ್ ವಂದನೆ ಮಾಡ್‍ಚೇಂಗಿಯು ಮದಿ ಆಪುಲೆ. ನಿಂಗಡಗುಂಡ್ ದೇವಡ ಸನ್ನಿದಾನತ್‍ಲ್ ನಂಗಕ್ ಅಚ್ಚಕ್ ದುಂಬ್‍ನ ಕುಶಿ ಆಚಿ. 10ನಿಂಗಳ ಇಂಞೊಮ್ಮ ಕಾಂಬಕಾಯಿತ್ ಪಿಂಞ ನಿಂಗ ದೇವಡ ಪಕ್ಕ ಬೆಚ್ಚಿತುಳ್ಳ ನಂಬಿಕೇಲ್ ಕಮ್ಮಿಯಾಯಿತ್ ಉಳ್ಳಾನ ಪೂರ್ತಿ ಮಾಡ್‌ವಕಾಯಿತ್ ದೇವಡ ಪಕ್ಕ ನಂಗ ನಿಂಗಕಾಯಿತ್ ಬಯಿಟ್ ಪೋಲು ಪ್ರಾರ್ಥನೆ ಮಾಡಿಯಂಡ್ ಉಂಡ್.
11ನಂಗ ಎಲ್ಲಾಡ ಅಪ್ಪನಾನ ದೇವ ಪಿಂಞ ನಂಗ ಎಲ್ಲಾಡ ಒಡೆಯನಾನ ಯೇಸು ಕ್ರಿಸ್ತ ನಿಂಗಡ ಪಕ್ಕ ಬಪ್ಪಕಾಯಿತ್ ನಂಗಕ್ ಬಟ್ಟೆ ಕಾಟಿತರಡ್. 12ನಂಗ ನಿಂಗಡ ಮೇಲೆ ಬೆಚ್ಚಿತುಳ್ಳ ಪ್ರೀತಿರನೆಕೆ, ನಿಂಗ ಸಹ ಒಬ್ಬೊಬ್ಬಂಡ ಮೇಲೆ ಉಳ್ಳ ಪ್ರೀತಿಲ್ ಪಿಂಞ ಬೋರೆಯಿಂಗಡ ಮೇಲೆ ಬೆಚ್ಚಿತುಳ್ಳ ಪ್ರೀತಿಲ್ ದುಂಬಿತ್ ಇಂಞು ಬೊಳಿಯುವಕ್ ಒಡೆಯ ಸಹಾಯ ಮಾಡಡ್. 13ಇನ್ನನೆ, ನಂಗಡ ಒಡೆಯನಾನ ಯೇಸು ಕ್ರಿಸ್ತ ತಾಂಡ ಪವಿತ್ರವಾನಯಿಂಗಡ ಕೂಡೆ ಪುನಃ ಬಪ್ಪಕಾಪಕ, ದೇವಡ ಸನ್ನಿದಾನತ್‍ಲ್ ನಿಂಗೆಲ್ಲಾರು ಒರ್ ತಪ್ಪಿಲ್ಲತನೆಕೆ, ಪವಿತ್ರವಾನಯಿಂಗಳಾಯಿತ್ ಇಪ್ಪಕ್ ನಿಂಗಡ ಹೃದಯತ್‍ನ ಸ್ತಿರಪಡ್‍ತಡ್.
Currently Selected:
1 ಥೆಸಲೊನೀಕ 3: ಕೊಡವ
Highlight
Share
Copy
Want to have your highlights saved across all your devices? Sign up or sign in
© 2017, New Life Literature (NLL)
