1 ಕೊರಿಂಥ 2
2
1ನಾಡ ಅಣ್ಣತಮ್ಮಣಂಗಳೇ, ನಾನ್ ಆದ್ಯವಾಯಿತ್ ನಿಂಗಡ ಪಕ್ಕ ದೇವಡ ವಿಷಯತ್‍ನ ಎಣ್ಣುವಕ್ ಬಪ್ಪಕ, ನಾನ್ ಎಂತೋ ಬಲ್ಯ ಬಲ್ಯ ತಕ್ಕ್ ಎಣ್ಣಿಯಂಡ್, ಜ್ಞಾನತ್‍ರ ಬಲ್ಯ ತಕ್ಕ್ ಪರ್ಂದಂಡ್ ಬಂದಿತ್ತ್‌ಲ್ಲೆ. 2ಎನ್ನಂಗೆಣ್ಣ್‌ಚೇಂಗಿ, ನಾನ್ ನಿಂಗಡ ಕೂಡೆ ಇಪ್ಪಕ ಯೇಸು ಕ್ರಿಸ್ತನ ಪಿಂಞ ಅಂವೊ ಶಿಲುಬೇಲ್ ಚತ್ತದ್‍ನ ಬುಟ್ಟಿತ್ ಬೋರೆ ಒಂದು ನಿಂಗಕ್ ಗೊತ್ತಾಪದ್ ಬೋಂಡಾಂದ್ ನಾನ್ ತೀರ್ಮಾನ ಮಾಡಿಯೆ. 3ನಾನ್ ನಿಂಗಡ ಪಕ್ಕ ಬೋದನೆ ಮಾಡ್‌ವಕ್ ಬಲ ಇಲ್ಲತೆ, ಒಂದು ಮಾಡ್‌ವಕ್ ಕಯ್ಯತೆ, ದುಂಬ ಬೊತ್ತಿತ್ ನಡ್‍ಗಿಯಂಡ್ ಇಂಜ್. 4ನಿಂಗಡ ನಂಬಿಕೆ, ಮನುಷ್ಯಂಡ ಜ್ಞಾನತ್ಂಜ ನಿಕ್ಕತೆ, ದೇವಡ ಶಕ್ತಿಲ್ ನಿಪ್ಪಕಾಯಿತ್, 5ನಾಡ ತಕ್ಕ್ ಪಿಂಞ ಬೋದನೆ, ಮನುಷ್ಯಂಡ ಜ್ಞಾನತ್‍ಲ್ ಇಲ್ಲತೆ, ಪವಿತ್ರಾತ್ಮ ಪಿಂಞ ಅಂವೊಂಡ ಶಕ್ತಿರಗುಂಡ್ ಇಂಜತ್‍ೕಂದ್ ನಿಂಗ ಕಾಂಬಕಿಂಜತ್.
ಪವಿತ್ರಾತ್ಮತ್‍ರ ಜ್ಞಾನ
6ಅನ್ನನೆ ಇಂಜತೇಂಗಿಯು, ಆತ್ಮತ್‍ರ ಬದ್‍ಕ್‍ಲ್ ಬೊಳ್ಂದಿತುಳ್ಳಯಿಂಗಡ ಪಕ್ಕ ಜ್ಞಾನತ್‍ರ ವಿಷಯತ್‍ನ ನಂಗ ಪರಿವ. ಈ ಲೋಕತ್‍ರ ಜ್ಞಾನತ್‍ನ ಅಲ್ಲ, ಪಾಳಾಯಿ ಪೋಪ ಈ ಲೋಕತ್‍ರ ರಾಜಂಗಡ ಜ್ಞಾನವು ಅಲ್ಲ, 7ಆಚೇಂಗಿ ಈ ಲೋಕ ಸೃಷ್ಟಿ ಆಪಕ್ ಮಿಂಞಲೇ ನಂಗಡ ಮಹಿಮೆಕಾಯಿತ್ ಉಂಟ್‍ಮಾಡಿತ್, ಅದ್‍ನ ಒಳ್‌ಪ್‍ಚಿಟ್ಟಿತ್‌ಂಜ ಗುಟ್ಟಾನ ದೇವಡ ಜ್ಞಾನತ್‍ನ ನಂಗ ಪರಿವ. 8ಆಚೇಂಗಿ ಈ ಲೋಕತ್‍ರ ರಾಜಂಗ ದಾರೂ ಇದ್‍ನ ಅರ್ಥ ಮಾಡಿಯಂಡಿತ್‌ಲ್ಲೆ. ಅನ್ನನೆ ಅರ್ಥ ಮಾಡಿತ್ಂಜತೇಂಗಿ, ಮಹಿಮೆಯುಳ್ಳ ಒಡೆಯನ ಅಯಿಂಗ ಶಿಲುಬೇಕ್ ಇಡ್‍ವಕಿಂಜಿಲೆ. 9ದೇವಡ ವಾಕ್ಯತ್‍ಲ್ ಒಳ್‍ದ್‍ನ ಪ್ರಕಾರ:
ದೇವ, ಅಂವೊಂಡ ಮೇಲೆ ಪ್ರೀತಿ ಉಳ್ಳಯಿಂಗಕ್ ತಯಾರ್ ಮಾಡಿತುಳ್ಳದ್‍ನ,
ಒರ್ ಕಣ್ಣ್ ಕಂಡಿತು ಇಲ್ಲೆ, ಕೆಮಿ ಕ್‍ೕಟಿತು ಇಲ್ಲೆ, ಅದ್ಂಡ ಗೇನ ಮನುಷ್ಯಂಡ ಹೃದಯತ್‍ಲ್ ಪುಟ್ಟಿತು ಇಲ್ಲೆ.#2.9 ಯೆಶಾಯ 64.4
10ಆಚೇಂಗಿ ನಂಗಕ್ ದೇವ ಅದ್‍ನ ತಾಂಡ ಆತ್ಮತ್‍ರಗುಂಡ್ ಕಾಂಬ್‍ಚಿಟ್ಟತ್. ಆ ಆತ್ಮ ದೇವಡ ಆಳವಾನ ವಿಷಯತ್‍ನೆಲ್ಲಾ ತ್‍ೕಡ್‌ವ. 11ಒರ್ ಮನುಷ್ಯಂಡ ಆತ್ಮಕ್ ಅಲ್ಲತೆ, ಬೋರೆ ದಾರ್‌ಕ್ ಆ ಮನುಷ್ಯಂಡ ವಿಷಯ ಗೊತ್ತಾಪ? ಅನ್ನನೆ ದೇವಡ ಆತ್ಮಕ್ ಅಲ್ಲತೆ ದೇವಡ ವಿಷಯತ್‍ನ ಬೋರೆ ದಾರೂ ಅರ್ಥಮಾಡುಲೆ. 12ನಂಗ ಈ ಲೋಕತ್‍ರ ಆತ್ಮತ್‌ನ ಅಲ್ಲ, ಆಂಡ ಬದ್‍ಲ್, ದೇವ ನಂಗಕ್ ಇನಾಮಾಯಿತ್ ಕೊಡ್‍ತಿತುಳ್ಳದ್‍ನ ಗೊತ್ತಾಪಕಾಯಿತ್ ದೇವ ನಂಗಕ್ ಅಯಿಚ ಪವಿತ್ರಾತ್ಮತ್‍ನ ಕ್‍ಟ್ಟ್‌ನಯಿಂಗಳಾಯಿತುಂಡ್. 13ಈ ವಿಷಯತ್‍ನೆಲ್ಲಾ ಮನುಷ್ಯಂಗಡ ಜ್ಞಾನ ಎಣ್ಣಿತಂದನೆಕೆ ಬೋದನೆ ಮಾಡುಲೆ, ಆಚೇಂಗಿ, ಪವಿತ್ರಾತ್ಮ ನಂಗಕ್ ಎಂತ ಬೋದನೆ ಮಾಡ್‍ಚೋ, ಆ ತಕ್ಕ್‌ನ ಮಾತ್ರ ಪರಿಂದಿತ್, ಆತ್ಮೀಯ ವಿಷಯತ್‍ನ ಪವಿತ್ರಾತ್ಮ ಉಳ್ಳಯಿಂಗಕ್ ವಿವರಿಚಿಟ್ಟಂಡುಂಡ್. 14ದೇವಡ ಆತ್ಮ ಇಲ್ಲತ ಮನುಷ್ಯ, ದೇವಡ ಆತ್ಮತ್‍ರ ವಿಷಯತ್‍ನ ಸ್ವೀಕಾರ ಮಾಡುಲೆ. ದೇವಡ ವಿಷಯವೆಲ್ಲ ಅಂವೊಂಗ್ ಪುಚ್ಚಿ ತಕ್ಕ್‌ರನೆಕೆ ಇಪ್ಪ. ಅಂವೊಂಗ್ ಅದ್‍ನ ಅರ್ಥ ಮಾಡ್‌ವಕ್ ಕಯ್ಯುಲೆ. ಎನ್ನಂಗೆಣ್ಣ್‌ಚೇಂಗಿ ಆತ್ಮೀಯವಾಯಿತ್ ಉಳ್ಳಯಿಂಗಕ್ ಮಾತ್ರ ಪವಿತ್ರಾತ್ಮ ಎಣ್ಣ್‌ವದ್ ಅರ್ಥ ಆಪ. 15ಪವಿತ್ರಾತ್ಮ ಉಳ್ಳ ಮನುಷ್ಯ ಎಲ್ಲಾ ವಿಷಯತ್‍ನ ಅರ್ಥ ಮಾಡಿತ್ ನೋಟ್‍ವಕಯ್ಯು. ಆಚೇಂಗಿ ಅಂವೊನ ಬೋರೆ ದಾರ್‌ಕು ಅರ್ಥ ಮಾಡಿತ್ ನೋಟ್‌ವಕಯ್ಯುಲೆ. 16ದೇವಡ ವಾಕ್ಯ ಎಣ್ಣ್‌ವನಕೆ:#2.16 ಯೆಶಾಯ 40.13
ಒಡೆಯಂಡ ಮನಸ್ಸ್‌ನ ಅರ್ಥ ಮಾಡಿತ್ ಅಂವೊಂಗ್ ಬುದ್ದಿ ಎಣ್ಣ್‌ವಂವೊ ದಾರ್?
ಆಚೇಂಗಿ, ದೇವಡ ಮನಸ್ಸ್‌ನ ಅರ್ಥಮಾಡ್‌ವಕಾಯಿತ್ ಕ್ರಿಸ್ತಂಡ ಮನಸ್ಸ್‌ನ ಪವಿತ್ರಾತ್ಮ ನಂಗಕ್ ತಂದಿತುಂಡ್.
Currently Selected:
1 ಕೊರಿಂಥ 2: ಕೊಡವ
Highlight
Share
Copy
Want to have your highlights saved across all your devices? Sign up or sign in
© 2017, New Life Literature (NLL)
