Romanus 5

Wixwiy batek abetnewa mbeyne

Mt 5.12; Lk 21.10; Ro 8.35; 2Ko 4.8, 6.4, 12.10; Fil 1.12,28; 2Tim 2.9; Tiy 1.2; 1Ped 4.13, 5.9

1Kuri wixwiy kuwis kibeynevwi giwtrik Uhokri awaku ku samah wixwiy kamaxwa givitit Kiyavwiye Jesus. Kuri nikwe wixwiy ik adahan wixwiy darihwak gikak Uhokri givitimpi Ukivarawiy Jesus Cristo.

2Ignewa ahin adahan wixwiy danuh ta git Uhokri. Kibeyne, in kibeyne kabayka ig keh wixwiy hiyap ku avim inin abetimpi ukamaxwanwiy givitit. Wixwiy kabayhig takunipti, mmanawa wixwiy iveg givitit ku ig keh wixwiy humaw kiyatyevwi akak Kiyavwiye Jesus gikiytani avigkutavrik ku samah Uhokri gimawkan. Wixwiy hiyakni ku in danuh wotwiy.

3Hiyawa wixwiy hiyap mbeyne, heneme ka sam. Wixwiy udukweneywa kibeyhenene Uhokri. Mmanawa wixwiy hiyakni ku ini mbeyne ku in ukannuhtenwiy adahan wixwiy kannuhwa kamaxwa givitit Uhokri abetnewa mbeyne.

4Ku wixwiy kamaxwenene givitit Uhokri abetnewa mbeyne, nikwe ig Uhokri parak abet uhawkanwiy. Avim ini nikwe in keh wixwiy pi ivegte givitit akiw.

5Wixwiy ka iveg givitit Uhokri waditnevyenenma. Hiyawa wixwiy abet mbeyne, heneme ka sam. Mmanawa ig kuwis kawihkis Gitip ta uvititwiy. Igme ay ekkenenekwa wotwiy ku samah Uhokri batek ukakwiy mpiynevevye. Ig ekkenenekwa wotwiy ku samah ig ka gamnihrasima ukakwiy.

Jesus umahkiswe gidahankis taraksavye

Mt 9.13; 2Ko 5.19; Ef 2.5; Kol 1.21; 2Tim 1.15

6Minikwak ku aysaw wixwiy yumahte wawaygiwiy wowntekneywa, ig Cristo amnihpewiy abetnewa ini hawkri. Avim ini ku aysaw wixwiy kote hiyakte Uhokri, ig pareke abet uhawkanwiy he ig umahkiswe udukwenavrikwiy.

7In ka aynsima mahiko uti pahavwi ku pariye umahkiswekere gidahan pahavwi. Hiyawa ig pahavwi kibeyne hiyeg, heneme in mahiko adahan uti pahavwi ku pariye umahkiswekere gidahan. Nawenetke ay pahavwi ku pariye umahkiswekere gidahan pahavwi kibeynewatnen.

8Hiyaksa ig Cristo umahkiswe udahanwiy avim ini ku samah wixwiy taraksevye. Innebaki arakak ku ig Uhokri batek ukakwiy mpiynevevye.

9Kuri nikwe wixwiy kibeyne giwtrik Uhokri awaku ku samah ig gikamkayh sukase gimig udahanwiy. Ku yis hiyap ig amnihpewiy hene ku samah wixwiy taraksevyete, kurikata akiw akak inin wixwiy kibeynevwi giwtrik? Ig pi amnihwiyte akiw. Ig ka ivukwawiy arimkanit biyukwiki.

10Pitatye wixwiy ka kibeynevwima giwtrik Uhokri. Heneme ig kehe wixwiy humaw kewa kibeynevwibe giwtrik awaku ku samah gikamkayh umahkiswe udukwenavrikwiy. Ku yis hiyap ig amnihpewiy hene ku samah wixwiy kote kibeynevwima giwtrik, kurikata akiw akak inin wixwiy kibeynevwi giwtrik? Ig pi amnihwiyte akiw. Ig keh gikamkayh ke wotbe gaymahwan ay uvitwiybe kahadbe aysawnemenek wixwiyme aymuhwanek gimun Uhokri payak gikak.

11Ka ininewatma wixwiy isahptawma ariw mbayka, heneme hawata wixwiy uti batekka giwntak Uhokri. Wixwiy utipni givitimpi Ukivarawiy Jesus Cristo ku pariye wadithebdihpiye uhawkanwiy gikak Uhokri.

Ig Adão woka mbayka igme Cristo woka kabayka

1Ko 15.21,45

12Minikwak pahavwiwa awayg ig paraksase patahwaki gidahankis madikte hiyeg amedgenevwi inin. Ayge nikwe ig hawata paraksase miyaka gidahankis abetimpi ini patahwaki. Inneki keh madikte hiyeg miyarap awaku madikte hiyeg patahwa.

13Avit Uhokri akka gikumadukan git amekene Moís, ayipa hiyeg patahwa kuwis amadga inin, heneme kote akkakante gitkis ku igkis tarakse Uhokri gikumadukan, mmanawa yumahte amekene Moís gikumadukan.

14Miyaka adahan madikte hiyeg ku samah giwenketeke amekene Adão he danuhe git amekene Moís. Hiyawa ignes amekenegben ka taraksa Uhokri gikumadukan kema amekene Adawhma, heneme ignekiswa miyarap. Ku samah in amekene Adão givathawni tuguh givititkis madikte hiyeg, ig humaw abektey adahan ku samah Kiyavwiye Jesus gabay tuguh givititkis madikte gihiyegavu.

15Igme amekene Adão gitaraksan paraksase mbayka wotwiy. Igme Kiyavwiye Jesus kakanhaw kabayka wotwiy. Ku samah ig amekene Adão ig pahavwiwa keh ka aynsima hiyeg hiyap miyaka, igme Jesus Cristo ig pahavwiwa keh ka aynsima hiyeg pi hiyapte kabayka akiw, mmanawa ig ka gabayisima ukakwiy.

16Pahatwowa taraksaki gidahan pahavwiwa awayg keh Uhokri hiyavwiy taraksevye. Igme Jesus Cristo gikan wotwiy nawenyewa. Hiyawa wixwiy ka aynsima utaraksanwiy, heneme ig keh Uhokri hiyap wixwiy ke kibeynevwibe giwtrik. Ini gikan ig iki wotwiy he wamnihkawiynen.

17 Henewatbaki in. Miyaka gidahankis madikte hiyeg awaku gitaraksan pahavwiwa awayg. Igme Jesus Cristo ig pahavwiwa keh wixwiy uti kabayka ka aynsima pi kiyeste ariw ini mbayka. Madikte hiyeg ku pariye amava Uhokri gabay ku pariye ka nibayisima, madikte hiyeg ku pariye ig keh kewa kibeynevwibe giwtrik akak gabay, igkisnewa aymuhwanek gimun Uhokri igkis kumadukanek adahan avanenekwa, avitimpi ku samah igkis pahavwiwa gikak Jesus Cristo.

18Amekene Adão ig tarakse pahaywowa. Ini gitaraksan woke mbayka gidahankis madikte hiyeg. Inneki keh wixwiy madikte humaw taraksavyekuye awaku. Heneme Jesus Cristo aytwe ig hawata wadithebdihe uhawkanwiy pahaywowa. Kibeyne, ini gikehni kabayka in wiwhe madikte gihiyegavu abetitak mbayka, in keh igkis humaw kibeynekuye awaku. Amun ini ig woka kabayka dehetniki gidahankis madikte hiyeg.

19Igme amekene Adão ku samah ig ka iha Uhokri giwn, ig keh ka aynsima hiyeg taraksevyenen. Igme Jesus Cristo ku samah ig ihpenenekwa Uhokri giwn avanenekwa, ig keh ka aynsima hiyeg kibeynevwinen.

20Inme amekene Moís gikumadukan ikepka wot adahan in keh wis pi hiyakte utaraksan. Inme ku samah wis pi hiyakte utaraksan in keh wis pi hiyakte ku samah Uhokri ka gamnihrasima ukak.

21Inme utaraksan in keh wis uti miyaka. Inme Uhokri gamnihra in keh wis aymuhwa gimun Uhokri adahan avanenekwa, givitimpi Ukivarawiy Jesus Cristo, awaku ku samah ig keh wis kibeynekuye giwtrik Uhokri.

Currently Selected:

Romanus 5: pluPB

Highlight

Copy