Romanus 14

Ka yi muwaka iki yikebyi ku ig ka kibeynema

Mt 7.1; Ro 2.1; 1Ko 4.5; Tiy 4.11

1Ku pahavwi kuwis kamaxwa givitit Kiyavwiye Jesus, heneme ku ig kote hiyakte hiyakemniki kabayntiwatma, ka sam. Amavanigbay, heneme ka ba yi iniyak gikak amin ku samah gihiyekemni.

2Git pahavwi hiyeg ka sam ig ax madikte axkaritnenevwi. Pahavwime ku pariye ka hiyak hiyakemniki kabayntiwatma ig ka ax im madiktema.

3Amawka ku ner ku pariye ax im madikte, amawka ku ig ka ikaw kabaytema giw ner ku pariye ka ax im madiktema. Hawata akiw ner ku pariye ka ax im madiktema, ku aysaw ig hiyap ner ku pariye ax im madikte, amawka ku ig ka ikigi ku ig waditnevyenen. Mmanawa igwa Uhokri amavig akak gihiyekemni hene.

4 Nukebyi, pariyenekap pis awnene gimin ku ig ka kibeynema? Ner ka pihiyegama adahan pis ivegminene gihiyekemni ba in kibeynewatma. Ignewa pahavwiwa gikivara ik adahan awna gimin ba ig kibeyne, ba kawk, ba ig ka kibeynema. Bawa ig kibeyne, mmanawa ig Ukivarawiy ka aynsima gidatni adahan keh hiyeg kibeyne.

5Gaytakkis hiyeg iki pahay hawkri ku in pi kiyatte ariw nawenyewa hawkri. Gaytakkisme iki madikte hawkri kiyatyekuye. Amawka madikte hiyeg ahegbetenekuye gihiyekemnikis amin ku pariye givegminankis kahadbe gihiyekemnikis ka matekbetnema.

6Ku pahavwi kiyatha pahay hawkri, ka sam. Ig kiyatin gidahan Uhokri gibetki. In kabay. Hawata ku pahavwi ax im madikte, kawnata sam. Ig axne gidahan Ukivarawiy gibetki. Mmanawa ig kabayha Uhokri adahan ini gimana. Hawata ku pahavwi ka ax madiktema axkaritnenevwi, kawnata sam. Ig maxhewne gidahanwata Ukivarawiy gibetki, ig hawata kabayha Uhokri adahan gimana.

7Mmanawa wixwiy Jesus gihiyegavu, wixwiy ka kumaduka uvitwiy akiw. Ine wixwiy ka kumaduka umiremniwiy.

8Ku samah wixwiy aynete amadga inin, wixwiy keh madikte gidahanen Ukivarawiy gibetki. Ku aysaw wixwiy miyarap, wixwiy miyarap ku samah Ukivarawiy gibetki. Ku wixwiy misakwa ay, ka sam. Ku wixwiy miyarap, kawnata sam. Wixwiy udukweneywa giwaku Ukivarawiy.

9Adahanikwa ini ig Cristo umahkiswe ayteke ig kannikew ariw gimiremni ig iveg akiw kahadbe ig wageswa gikivarakiswata hiyeg miyaravyempu gikakkis ku pariye kotene miyate.

10Pariyenekap nikwe, mmahkama pis iki pikebyi ku ig waditnevyenen avatra ku samah ig ka wew hawata kema pisma? Ya pis? Pariyenekap, mmahkama pis ikaw kabayte giw pikebyi? Aysawnemenek wixwiy madikte tabirbet givetun Uhokrinek adahan igwa hiyak ukakwiy.

11Henewa in ku samah Uhokri gannasan awna. In awna:

— Ukivarawiy awna wotwiy: ‘Ku samah inyewa nah hiyakni ku nah ay, nah hawata nah hiyakni ku inyewa madikte hiyegviyenevwi paberetusaw nuvetunatnek aysawnemenek adahan igkis kumadukasewnes nutuh. Avim ini madikte hiyeg awnanek ku nahnewa Uhokri.’

12Ayge wixwiy mpuse akkamnihnek madikte ku pariye ukehniwiy ta git Uhokri adahan igwa hiyak ukakwiy.

Ka ba taraksasa pikebyi akak im

1Ko 8.7

13Nikwe uyay ka muwaka iki pahavwinema ukebyi ku ig ka kibeynema. Uyay ka avuriw ukebyuvwi gitaraksankis. Uyay avuriw udahanwiywa utaraksanwiy. Battukawnabay adahan yivit adahan yis ka kehpima yikebyi tarakse.

14Nah hiyakni kabayntiwa ku yuma ariknawnema ku pariye Uhokri keh, yuma ariknawnema keh wixwiy humaw patehwevye giwtrik Uhokri. Heneme ku pahavwi iki paha arikna ku in ik adahan keh ig patehwe, henewa ku ig daxni in patahwakiwa gidahan. Kuwis Ukivarawiy Jesus akki inakni nutuh.

15 Nikwe hiyapnabay, nukebyuvwi. Ku wixwiy Jesus gihiyegavu ax im giwtrik pahavwi ku pariye iki ku in keh wis patehwe, nikwe ik adahan wixwiy taraksasig. Amun ini nikwe wixwiy ka wewnema akak Uhokri gamnihra. Ig Cristo umahkiswe gidahan ner pahavwi hawata. Ka yi muwaka ax ariknawnema ku pariye ik adahan taraksase pahavwi ku kadahan Cristo umahkiswe. Nawenetke yis keh ig biyuk giw Uhokri.

16Ku pis kehkere ku pariye arikna kabay pit, heneme gitkisme nawenyevwi hiyeg in ka kabay, amawka pis ka keh ini ku pariye kane kabay gitkis.

17Mmanawa ku samah wixwiy kuwis abet Uhokri gikumadukan, nikwe axka, higapka, ka ariknawnema wotwiy akiw. Nah akkite yit arikna ku pariye pi awaygte wotwiy. Inin ukehniwiy kabayka akak pasamraki hawata akak batekka giwntak Uhokri Gitip, inineki ku pariye pi awaygte wotwiy.

18Ku pahavwi wew akak ini Cristo gihiyekemni, nikwe ig keh Uhokri batek ginaktin. Hawata giyakivwi hiyeg batek ginaktinkis gikak.

19Nikwe uyay aharit avanenekwa ku pariye adahan pasamraki. Uyay aharit ku pariye adahan wagahkisne ukamaxwanwiy pawtak.

20Ku pis taraksase pahavwi akak im ku pariye ka kawih gidahan, nawenetke pis menbete ini hiyakemniki ku pariye Uhokri kuwis ike givitit. Ka muwaka keh hene. Madikte axka ka sam wis ax. Heneme ku umana taraksase ukebyi, in ka kabay wis axni giwtrik.

21Pi kabayte wis ka ax im, wis ka higap win, wis ka keh ariknawnema ku pariye taraksasa ukebyi.

22Ku pis hiyapkni ku madikte axkaritnenevwi ka sam, tinwohew ariw pi kabayte. Hiyakni gikaknen Uhokri. Ku wis keh ku pariye wis hiyakni ku in wadit, hiyawa wis batek.

23Heneme ku wis ax im ku pariye wis ka hiyak ba in inyewatma kabay adahan wis ax, nikwe wis tarakse giwtrik Uhokri. Mmanawa amun ini wis mpiksewne keh ku pariye wis ka hiyak ba inyewatma kabay adahan wis keh. Ku wis keh ku pariye wis ka hiyak ba in waditnema, ayge nikwe wis kehne taraksaki.

Currently Selected:

Romanus 14: pluPB

Highlight

Copy