Sawmus 57
57
Nah abet mbeyne heneme nah kuwis ahegbete nuhiyekemni adahan nah paksene piw
1Uya amnihun, Kiyavwiye Uhokri, uya amnihun, mmanawa pisnewa nayemwekri! Aynte anavi pihanpi ayge nah uti ayemweket adahan nah mpiyasene mbeyne.
2Nah amnihswa git Kiyavwiye Uhokri kane gidatnisima. Nah amnihswa git Kiyavwiye Uhokri awaku ignewa.
3Inuriktak ig kaytwanek nuwnuh. Ig amnihunek. Ig keh neras ku pariye keryevwi nukakuh igkis hahwanek. Kiyavwiye Uhokri akkanek nutuh gamnihra akak gabay.
4Nuvetunyavu ayipa kiyaraniwhpen. Igkis kewa kawokwinebe aharit naxwitni, gaybukis kewa kurumwibe akak yakot, ginenkisme kewa iwanbe kiyawhaku.
5Kiyavwiye Uhokri, hiyapkisanaba pidatni aynte inurik hawata pikiytani muwapuw amadga hawkri.
6Nuvetunyavu ehe tey nudahan adahan nukamaxwitni. Nahme wakaymni ka aynsima. Igkis kehe pahayku miyokwiye avigku nuhina, heneme igkisnewa tuguhbetwikisnek atere arikut.
7Kiyavwiye Uhokri, nah kuwis ahegbete nuhiyekemni adahan nah paksene piw. Nah ka miniw niw.
8Nah hawata tesne nagigni hebek akak egu lira adahan kabeyhene piw. Nah kannikasakere kamuw hawkanawa akak nuvanuh!
9Kiyavwiye, nah kabayhapnek aynte gibetkis hiyegviyenevwi. Nah kabayhapnek aynte gibetkis nawenyevwi hiyeg.
10Pamnihra danuh tahan inurikut, inme pikiytani hawata danuh tahan abetit ukuhne.
11Kiyavwiye Uhokri, hiyapkisanaba pidatni aynte inurik hawata pikiytani muwapuw amadga hawkri.
Currently Selected:
Sawmus 57: pluPB
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
