Sawmus 102
102
Nah wakaymine pahapo
1Kiyavwiye, timapnaba nuviryepkawni. Timapnaba namnihswan pit.
2Ka ba ayamwa nuwhu ku aysaw nah ay abet wakaymniki. Timapnanuba ku aysaw nah amnihswene pit. Kaytwanaba nuwnuh kibehtenwa.
3Nudehetni me madikemet kewa sariyanbe, nuvituhme ka aynsima awehe kewa ariwtrikbe tiket.
4Nah mabimnevye kewa pamatkabe tigahka, sibuhka; nah kawnata maguwasni akiw.
5Nah migiswa ka ahawnasima. He nah kevi avitnenwa.
6Nah kewa pahavu kuhivrabe kahiyotnivyo pahapo amatmadga. Nah pahapo kewa pahavu pukupkube aynte avitmin payt mehwevye ikiska.
7Nah ka himaksaki. Nah kewa pahavu kuhivrabe pahaponano avuheku payt.
8Nuvetunyavu miyathan kiberevut. Neras ku pariye numahivwihtni igkis kawih nuwhu adahan humakisne mbeyne.
9-10Awaku pidagoni akak pimabyan, naxni wageswe hewyekata. Inme nukantak payegbitak akak nuhigvan, mmanawa pis sumuhpen, pis tukuhpen piyawakad piw.
11Nudehetni kewa anmaptibe menwempiye ku aysaw kamuw uguhpiye aygete. Nah kewa pamatkabe ku pariye tiviknene huruhrunene.
Nah kadniye aharit paytwempu Jerusalém
12Heneme, pis Kiyavwiye Uhokri, pis Ikivarat adahan avanenekwa. Madikte hiyeg aytwinihpiye akiw igkis kiyepinek.
13 Nah hiyak ku pis kannikawnek, pis kayahnek adahan pidahanwa paytwempu Jerusalém, mmanawa kuwis danuh ahawkanavrik adahan pis amnihni. Henewatbaki, ahawkanavrik kuwis danuh.
14 Usuh pihiyegavu piyawakad niw kuri heneme usuh adukwenewa batek nikak, hiyawa in madikte mehpika. Igkis amnihepni, hiyawa in madikte hehe warikwit.
15Aysawnemenek neras nawwotunyevwi avisnek gibohri Kiyavwiye Uhokri. Henewatbaki, madikte ikivaratiyenevwi amedgene inin avisnek abohri gidatni.
16Ku aysaw ig Kiyavwiye kannikasanek Jerusalém akiw, ig hiyapkisnek gikiytani ayge.
17Avim ini hawkri ig timapnek gihiyegavu tukuhkare gamnihswankis hawata ig timapnek giviryepkawnikis.
18Amawka inakni tamaka amadga kagta adahan uhiwhivwiy hiyaknek ku pariye ig Kiyavwiye Uhokri kehe hawata kahadbe neras ku pariye wayvukanek kabayhig hawata.
19Ariwntak giwetri barewye inuriktak, ig Kiyavwiye Uhokri iveg; inuriktak ig iveg arimkanit waxri
20adahan timepne gimigiswankis kamaxkarempu, hawata adahan ig giwiwhpitnikis neras ku pariye ikaksepka adahan miyaka.
21Hene ig Kiyavwiye Uhokri kabayhakanek ay avit Jerusalém akiw. Ayge giw kavusaw akkakanek
22avim ini ku aysaw nawwotunyevwi gikakkis kumadukenevwi pahadguhwanek adahan kiyathene giw.
23Nah nudukwenewa takweye, heneme ig Kiyavwiye Uhokri wiwhe nudatni hawata ig matkuhe nayivwi amadga inin.
24Inneki keh nah aye git adahan ig ka iwevunma kuri pabuskak nudehetni. Ka sam. Kiyavwiye Uhokri, nuwohkiga, pisnewa ku pariye dahwa adahan avanenekwa.
25Pitatye akavuska hawkri pis kehe waxri humaw. Hawata akakwa piwak pis kehe en.
26Aysawnemenek waxri akak en in biyukenek. Pismeti dahwanek adahan avanenekwa. Aysawnemenek waxri akak en in mugumgupnek ke kamisbe. Pisme uniyavepninek ku samah hiyeg uniyah gikawihni, inme padakavepkanek.
27Pismeti ka uniyehwati. Pis pidukwenewa misakwa adahan avanenekwa.
28Inneki keh nah hiyak ku ukamkayuvwi misakwanek abet pabay. Igkisme gihiwhivwikis hiyapnek pamnihra adahan avanenekwa.
Currently Selected:
Sawmus 102: pluPB
Highlight
Copy
Compare
Share
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
