Filemoh 1
1
Usuh awahkis kabayka pimin
1 Nah Pol, ku pariye ay ariku parakseket givatra Cristo Jesus, nah gikak ukebyi kiyavwiye Timotyu usuh awahkis kabayka pimin kiyavwiye Filemoh. Usuh ka aynsima batek pikak. Usuh batek ku samah pis kannivwiye payak ukakuh.
2 Usuh awahkis kabayka hawata giminkis neras ku pariye lammesyavu ayge pivineku. Wani ukebyi kiyavuno Afiya, kiyavwiye Arkivu ku pariye kannivwiye payak ukakuh wani egkis kabay udahan.
3Wigwiy Kiyavwiye Uhokri gikak Ukivarawiy Jesus Cristo gabaykis yikaknek. Igkis kariswehse yiyakninek.
Kibeyne, pis kuwis amnih ka aynsima Jesus gihiyegavu
4 Nukebyi Filemoh, mpuse hawkri nah piriyepkaw pidahan, nah kabayha Kiyavwiye Uhokri pidahan.
5Mmanawa takunipti nah kinetni pak ku samah pis batek gikak Kiyavwiye Jesus pis kamaxwene givitit kabayntiwa. Pis hawata batek gikakkis gihiyegavu, pis kamaxwenewagivititkis.
6 Kibeyne adahan ku samah pis hiyapkisne pikamaxwan gitkis hiyeg. Ku samah ignes hiyap ini kabayka ay pivit, nikwe igkis hiyapni hene, igkis mpiksawte keh Cristo gibetki. Henewatbaki nuviryepkawni gidahankis.
7Pis kuwis amnih ka aynsima gihiyegavu Jesus. Pis kariswehse giyaknikis. In keh nah batek ka aynsima. In iki nawaygi. Kibeyne, nukebyi.
Uya amnih nudahan pibuk
8 Kuri nuvewkan nah ayepne pit amnihka pahaynewata akiw. Ik adahan nah mpiksaptihpi giwavrik Cristo adahan pis keh ini ku pariye numawkan mmanawa ku pariye nah aya pit ini wadit.
9Heneme nah ka mpiksaptihpi. Nah batek pikak. Nah he amnihswa pit, nah Pol ku pariye kuwis kiyavarivye ku pariye ay ariku parakseket gidahan Cristo Jesus.
10Nah aya pit adahan pis amnih pahavwi ku pariye kene nukamkayhbe, ig pibuk Onesimu. Ig kuwis wageswe kewa nukamkayhbe mmanawa ku samah ig timap nuwnuh ay ariku parakseket ig wagese gihiyekemni git Cristo.
11 Ig Onesimu giw inakni “kabivwiye”. Minikwak ig ibukti mabivuwivye ayge pimun. Kurime, kibeyne, ig kabivwiye pidahan ig hawata kabivwiye nudahan.
12Kuri nah gawahkisten pimkanit. Igi nuyakniwa nah awahkis pimin.
13Ku samah nah ay ariku parakseket avatra ku samah nah ekkene Kiyavwiye Uhokri ginetni, nah ka aynsima muwaka ig misakwa ay nukakuh ig nayavetni piwenyan.
14Heneme nah ka muwaka keh ariknawnema ku pariye ka pimawkanma. Nah ka muwaka mpiksaptihpi adahan pis isaksig adahan ig ayavan. Numawkan pis keh piwnteknewa.
15Ini ku samah ig Onesimu higihwe piw minikwak nuvewkan igwa Kiyavwiye Uhokri isaksig adahan ig higihwa adahan aynesa hawkri. Kahadbe ku aysaw ig diyuh pit ig misakwa pidahan adahan avanenekwa.
16Kuri ig kawki ininewatma pibuk. Ig kabayte kuri. Ig kuri pikebyi Jesus gihiyega. Nutuh ig kibeyne nukebyi. Pit ig kibeynewata. Mmanawa ig kibeyne pibuk, ig hawata kibeyne pikebyi Uhokriyan.
17Nikwe ku samah pis kanumun pikagmada, uya amavig kabayntiwa ke wotbe nahbe danuhnebe pit.
18Ku ig kuwis tarakse pikak minikwak, ku ig matiwnih pit arikna, hiyawa pis sarayh madikte nuduhyakat.
19Nah Pol nahwa katiwnihninek. Nah anniri inakni akakwa nuwakuh. Nah ka awna aynesnima amin pidahan pimatiwnihni ay numunuh. Mmanawa nuwnuh kuwis keh pis uti pidehetni. Kuri uya diyuhkis nuwakuh.
20Nukebyi, nah aya pit, uya amnihun kuri gidahan Kiyavwiye Uhokri. Keh nuyakni karisaw gidahan Cristo.
21Nah iveg pivitit ku pis ihpa inakni nuwnuh. Inneki keh nah awahkis inin kagta pimin. Mmanawa nah hiyakni ku pis keh mpiy ku pariye nayapni pit.
Nah danuh atere pitnek
22Hawata numawkan pis ahegbeta nudahan pahayku iwetrit. Mmanawa nah iveg givitit Kiyavwiye Uhokri ku ig timap yiviryepkawni. Ig pekkiswenek, ig keh nah danuh atere yit akiw.
23Kiyavwiye Epafras awahkis kabayka pimin. Ig ay nukakuh ariku parakseket givatra Cristo Jesus.
24Hawata kiyavwiye Markus gikakkis kiyavwiye Aristarku, kiyavwiye Demas, kiyavwiye Luwkas igkis awahkis kabayka pimin.
25Ukivarawiy Jesus Cristo gabay yikaknek.
Currently Selected:
Filemoh 1: pluPB
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
