Matews 3
3
Ahekbetaw avit Jesus gaytni
Mk 1.1-8; Lk 3.1-20; Jo 1.19-28
1Avim ini hawkri ku samah Jesus ayge avit Nazaré, Joawh Batista tivik amadgate amatap, ayge avit Judeyamnaw. Ayge ig ekkene giwsavan Uhokri.
2Ig awna gitkis hiyeg:
— Wagesnabay yihiyekemni ariw yitaraksan mmanawa ahawkanavrik Uhokri gikumadukan kuwis danuh!
Henewatbaki ig Joawh Batista awna gitkis hiyeg.
3Gimin Joawh Batista, minikwak Uhokri gawneve amekene Izaíyas kinetihwa. Ig tamak inakni giwn amadga gikagtan. Ig awna:
“Pahavwi kinetihwanek amadga amatap. Ig awnanek: ‘Ahekbetawnabay gavit Ukivarawiy gaytni. Ig nehmnik ig. Wadithanabay yihiyekemni gidahan kahadbekam yis kawih adahan Uhokri gikumadukan.’”
4Ig Joawh Batista madiptivye. Gikawihni kewa amekene Eliyas gikawihnibe. Ig kasimsavu akak kamelu asivri, hawata ig kakabutikvu akak pak amar. Gimaname tanan akak ahayak anun amadgatak amatap.
5Ka aynsima hiyeg danuh atere gimkanit Joawh Batista adahan igkis timepnes ginetni. Igkis danuh avititak paytwempu Jerusalém. Hawata igkis danuh avititak madikte waxri Judeyamnaw, hawata avititak waxri muwapuw aranwa warik Jordawh.
6Igkis ekkenes gitaraksankis, igme Joawh Batista kaywevgikis avigku egu warik Jordawh adahan areketni ku igkis wageswiyes gihiyekemnikis.
7Ka aynsima farizewkis gikakkis sadusewkis igkis ayta hawata adahan kaywasewnes git. Ig hiyapni hene, ig awna gitkis:
— Yis hiyeg kaybunyene pahaywotneyevwi! Kiyavwiye Uhokri ka batek akak yihiyekemni kane kibeynema. Mmah yitneki ku yikewven keh Kiyavwiye Uhokri hiyavyi ke wotbe yis kibeynevwibe hiyeg giwtrik?
8Kawa. Ini yikewven ka kinisgi. Amawka ku yis inyewa wages yihiyekemni ariw yitaraksan. Kavusawnay wew wadit. Ini yiwewni waditye ininewa arakak ku yis inyewa wages yihiyekemni.
9Ka yi muwaka ivegmina yihiyekemni adahan yis awna: “Wixwiy judeyenevwi, wixwiy amekene Abraawh gihiwhivwi. Amun ini wixwiy kuwis Kiyavwiye Uhokri gihiyegavu. Hawata Kiyavwiye Uhokri ka aminama ariw utaraksanwiy. Ig hiyavwiy kewa kibeynevwibe giwtrik.”
Ka ik adahan yis awna inakni hene. In ka ariknawnema ku wixwiy amekene Abraawh gihiwhivwi. Ka innema keh wixwiy isahptaw. Kiyavwiye Uhokri ik adahan keh nor tip hawata humaw amekene Abraawh gihiwhivwi.
10Ahawkanavrik kaba danuh adahan Kiyavwiye Uhokri ivukevye hiyeg patahwavye hanpa arimkanit biyukwiki. Pahavwi ku pariye kane wew wadit amadga hawkri igi kewa pahaktibe amutri ku pariye sarayh guw kane kabaynovwima. Igme Kiyavwiye Uhokri ig kewa pahavwi awaygbe ku pariye kuwis ahegbet akak gimegwan adahan ig ahukepten egu ah kane kabaynoma. Madikte gamutra ku pariye sarayh guw kane kabaynovwima, egu ig ihukavevgunek, ig padakavevgunek ariwtrikut tiket.
11 Ayteke ig Joawh Batista awna gitkis madikte hiyeg. Giwn:
— Nah kawihkis un yivitit adahan areketni ku yis wagese yihiyekemni ariw yitaraksan. Heneme pahavwi nehmnikuhpiye nuhavu butte igi kaywaynek akak igyewa Uhokri Gitip adahan ig kawihkis gidahanwa gihiyekemni akak gannu yivitit. Yaytakme ig kawihkisnek tiket yivitit. Igi ka aynsima gikiytani mpiyan. Nah yumahwa nukiytani gitivut adahan nah ayavig hiyuh gikaswatni.
12Aysawnemenek ig ibekhebdihnek hiyeg hawata ku samah wis ibekhebdihpiye amutri ayak ariw amar. Ig kuwis ahegbet ibekhevye hiyeg ke pahavwi awaygbe akak huw ay giwaku adahan ig mihikohbetene amutri ayak ariw amar. Ig ibakhanek ku pariye kibeynevwi akak ku pariye kane kibeynevwima. Ku samah wis bayah amutri ayak arikut payt, amarme wis bukehpin, hawata ner nehmnikuhpiye ig bayahnek hiyeg ku pariye kibeynevwi ariku givin. Ignesme ku pariye kane kibeynevwima ig bukahavenek ariwtrikut tiket ku pariye kane awakti.
Jesus gikaywak
Mk 1.9-11; Lk 3.21-22; Jo 1.32
13Abetnewa ini hawkri, ig Kiyavwiye Jesus pese avititak Galileyamnaw ig tivik avigkute warik Jordawh. Ig danuhe atere git Joawh Batista, ig awna git:
— Uya kaywevun.
14Igme Joawh kaytwa giwn:
— Kawk, Kiyavwiye. Pis yuma pivathawnisima. Nah ka kis adahan nah kaywap. Pis kis adahan kaywan.
15Igme Kiyavwiye Jesus kaytwa giwn:
— Ka sam. Uya keh ku samah nuwnuh pit. In wadit pis kaywan, mmanawa henewa Wigwiy gimawkan.
Joawh hiyapni hene, ig ihe giwn.
16Ig kaywevgi. Igme Kiyavwiye Jesus iyakantenwa ahakwatak un, en woke. Ig hiyap Uhokri Gitip muhuke givitit, gihivak ke pahavu tukwabe.
17Ayteke pahat ikuvimnat awnaka inuriktak. In awna:
— Pisnewa nukamkayh nubetki. Nah batek pikak ka aynsima.
Currently Selected:
Matews 3: pluPB
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.