Matews 22
22
Wixwiy axnek git Uhokri
Lk 14.16
1Ayteke ig Kiyavwiye Jesus awna nawenyewa iwit patuwesbuhka ta gitkis akiw. Ig awna:
2— Nah akkite yit ku samah Uhokri gikumadukan. Ig Uhokri kewa pahavwi ikivaratbe ku pariye kehne fet adahan maripkawka gidahan gikamkayh.
3Ig awahkis gibukvig tahan watiha gawnasanvu. Igkisme gawnasanvu ka ayta fetya gikak.
4Igme ikivarat hiyapni hene, ig awahkis nawenyewa gibukvig giminkis akiw. Ig awna gitkis: “Su yi atak akka gitkis nawnasanvu ku nah kuwis ahegbete madikte axka. Nah kuwis umahkise nuviguh pak. Nah kuwis umahkise pak akamkayuvwi ku pariye aynengarudi. Madikte kuwis ahegbet. Wani igkis ayta ax nukakuh.”
5 Igkisme gibukvig atere utevgikis. Igkis ekke gitkis inakni gikivarakis giwn. Igkisme gawnasanvu ka aminama giwkis. Igkis tivik kannivwiyekuye. Pahavwi tivik ta giwasrakat, pahavwime tivik kannivwiye piyuket.
6Igkisme gasemnekis kamaxave gibukvig. Igkis arewhe gitkis. Igkis umahavegikis.
7Ayteke ig ner ikivarat hiyapni hene, ig dagawne. Nikwe ig awahkise gisuwtatavu giminkis neras umehekevutnevwi. Ignesme umahavevgikis, bukahave givinkis.
8Ayteke nikwe ig ikivarat awna gitkis gibukvig: “Fet kuwis ahegbet, heneme nawnasanvu ka kis adahan igkis ax nukakuh. 9Su yi atak wew ta avigkut madikte ahin. Ayge yis awnasa madikte hiyeg ku pariye yiwitwan adahan ignes ayta fetya nukakuh.”
10Igkisme gibukvig ihe giwn. Igkis tivik atere avigkute ahin. Igkis pahadguhave madikte hiyeg ku pariye giwitwankis ayge, hiyeg ku pariye ikaka kane kibeynevwima payegbitak gikakkis hiyeg ku pariye ikaka kibeynevwi. Ayge nikwe fet avin kivun akak hiyeg.
Ku pariye patehwevye igi ka hiya igma parak ta git Uhokri
Gal 5.1; 1Ko 6.9; Ef 5.5; Ap 21.18,26, 22.15
11— Ayteke nikwe givin kuwis kivun, ig ner ikivarat pareke atere adahan iwasevye gawnasanvu. Ayge ig hiyap pahavwi awayg ku pariye ka amava ini simis barewbetye adahan ig kawihni abet maripkawka.
12Ig hiyapni hene, ig ayavgi: “Nukagmada, pis yuma pisimsa barewbetye adahan pis fetya adahan maripkawka. Mmah piverekepni atan?” Igme ner awayg ig ka ik adahan ig kaytwa pahatnema iwit.
13Nikwe ner ikivarat awna ta gitkis gibukvig. Ig awna: “Asa wanakminenay giwan payak akak gibagwan. Ayteke yis padekwig ta kabaywakat, ta abetit amisnavyad, ku kiney hiyeg tihebdi ignes kagah gaybukisnek.”
14Mmanawa ig Uhokri awnasa ka aynsima hiyeg adahan ignes danuh ta git, heneme ig kaniy ka kiyesradima adahan ignes misakwa ay gimun.
Henewatbaki ig Kiyavwiye Jesus awna.
Ikinay git Uhokri madikte ku pariye kawih gidahan
Mk 12.13; Lk 20.20; Ro 12.1
15Ayteke ariwnteke ini igkis farizewkis tivik ahegbete ginetnikis adahan igkis hiyap ba igkis keh Kiyavwiye Jesus awna iwit taraksebetnema adahan igkis gimetkepten.
16Ayteke nikwe igkis awahkise gikannuhnivwi payak gikakkis Erodis gihiyegavu gimin Kiyavwiye Jesus. Igkisme danuh atere, igkis awna git:
— Kiyavwiye, usuh hiyak ku pis waditye hiyeg. Pis ka awna mpusema iwit gidahankis hiyeg. Pis awna pahatwowa iwit gitkis madikte hiyeg. Hiyawa hiyeg gihiyekemnikis nawenyewa ariw pidahan, heneme in ka sam ta pit. Pis awna pahatwowa iwit. Pis akka Uhokriyewa gihiyekemni gitkis. 17Ayge nikwe usuh muwaka hiyak pahat hiyakemniki. Uya akki wotuh. Ig Sezar neras romayenevwi gikivarakis ig mpiksaptih wixwiy judeyenevwi adahan wixwiy katiwnihgi. Ba wadit adahan wixwiy katiwnihgi? Ba ka wadit?
18Igme Kiyavwiye Jesus hiyak ku gihiyekemnikis in mbeyevye igkis awna inakni adahan gikinsepten. Ig hiyapni hene, ig kaytwa giwnkis:
— Yis ikawnamah ke wotbe yis kibeynevwibe hiyeg bawa yis pi mbayte giwkis nawenyevwi hiyeg! Mmahki yis ayta nuhikekten hene?
19Akkanay nutuh pahamku kirehka ku pariye wis kawih adahan katiwnih kiyavwiye Sezar.
Igkisme timapni hene, igkis iwe pahamku karukri igkis ewkwig ta git.
20Ayteke nikwe ig ayavgikis:
— Pariyeva kahehpakye gumadga nor kirehka? Pariyeva kiwye ay gumadga?
21Igkisme kaytwa giwn:
— In kiyavwiye Sezar giw akak gahehpak.
Igme kaytwa giwnkis:
— Nikwe nor karukri kawih gidahan kiyavwiye Sezar. Hiyawa wixwiy ikevgu git. Heneme amawka ku wixwiy iki ta git Uhokri madikte ku pariye kawih gidahan Uhokri.
22Igkis timapni inakni giwn hene, igkis wakaymnibdi ka aynsima. Ayteke nikwe igkis maytevgi. Igkis tivik.
Wixwiy kannikaw ariw umiremniwiynek
Mk 12.18; Lk 20.27; Jo 5.21, 6.39, 11.23; Ro 8.10; 1Ko 6.14, 15.12; 1Tes 4.16; Ap 20.4
23Avimnewa ini nawenyevwi hiyeg danuh atere git Kiyavwiye Jesus akiw. Igkis sadusewkis. Gitkis sadusewkis hiyeg miyap ignes pisenwe gihawkankis igkis ka kannikaw akiw.
24Igkis danuh atere, igkis awna git:
— Kiyavwiye, amekene Moís awna:
“Ku pahavwi hiyeg miyap guw gihayo, ku ig yuma gikamkayh gukak egu gihayo, amawka gikebyi maripkaw gukak egu giwgun marihwa eg kakamkayh hawata ke wotbe ignebe gikebyibe kakamkayh gukakbe.”
Henewatbaki ig amekene Moís gikumadukan awna.
25Kuri, minikwak ntewnehker gikebikis ay ukakuh. Ig eggutye maripkew gukak pahavu tino. Ayteke ig miyap kawke ig kakamkayh gukak. Ig ikise gihayo ay giwaku gisamwi.
26Ayteke nikwe ig gisamwi givun maripkew gukak egu giwgun. Ig hawata ig miyap guw. Ig kawnata kakamkayh gukak. Ayteke nikwe ig gisamwikis gimamnampiye ig hawata ig maripkew gukakwata akiw. Hene madikte neras ntewnehkernene gikebikis miyarapwata.
27Pisenwa egme hawata eg miyop.
28 Kuri, Kiyavwiye, usuh ayapi. Aysawnemenek avim ini ku aysaw hiyeg kannikew ariw gimiremnikis, pariyevahki gibetitakkis neras ntewnehkernene gikebikis darihgu? Mmanawa igkis madikte maripkewnekuye gukak.
29Igme Kiyavwiye Jesus kaytwa giwnkis:
— Yis tarakse mmanawa yis ka pukuha Uhokri gannasan ine yis kawnata hiyak ku samah Uhokri gidatni.
30Aysawnemenek avim ini ku aysaw hiyeg kannikewbet ariw gimiremnikis, ayge ignes ka maripkaw akiw. Igkis misakwa henep ke ahjbe.
31 Kuri uyay kinetihwa amin wixwiy hiyap ba hiyeg kannikaw ariw gimiremnikis. Mmah yis kote ivegbohate ku pariye Uhokri awna ta yit?
32Ig awna:
“Nahnewa kuri Abraawh giwohkiga, nahnewa kuri Izaki giwohkiga, nahnewa kuri Jakó giwohkiga.”
Inakni iwit akki wot ku igkis gidukweneswa igkis iveg. Ig Uhokri kawki miyaravyema giwohkigakisma. Ig hiyeg ivegnene giwohkigakis.
33Neras hiyeg kabubuknene ayge igkis timapni inakni iwit hene, igkis wakaymnibdi ka aynsima.
Uhokri gikumadukan adahan wis batek gikak Uhokri mpiynevevye, inakni pi kabayte ariw madikte kumadukaki
Mt 10.37; Mk 12.28; Lk 10.25; Jo 21.24; 1Jo 2.15, 5.3; Ap 2.4
34Ayteke neras farizewkis time Kiyavwiye Jesus gak ku ig mateke neras sadusewkis akak giwn. Igkis timapni hene, igkis pahadguhwe atere git.
35Ayge pahavwi gaytakkis, ig kannuhekevutne amin amekene Moís gikumadukan, ig ayavgi pahat ayapka adahan gihikekten.
36Ig awna:
— Kiyavwiye, pariyeva Uhokri gikumadukan pi kabayte ariw madikte kumadukaki?
37Igme Kiyavwiye Jesus kaytwa giwn:
— Nah akkite yit ku pariye gikumadukan pi kabaytenene:
“Batek gikak Kiyavwiye Uhokri akak madikte piyakni. Batek gikak akak madikte pibetki. Batek gikak abet madikte pihiyekemni.”
38Inakni gikumadukan pi kiyatte pi kabayte ariw madikte kumadukaki.
39Ayteke ariwnteknewa inakni iwit ay pahat gikumadukan akiw ku pariye pi kabayte ariw madikte kumadukaki:
“Batek gikakkis piyakivwi hiyeg hawata ku samah pis batek akak pivit.”
40Inakni pitenemnene gikumadukan in huwase amekene Moís gikumadukan akak Uhokri gawnevevu giwnkis madikte.
Cristo ignewa amekene Davi gikivara
Mk 12.35; Lk 20.41
41Ku samah igkis farizewkis pahadguvu ayge, ig Kiyavwiye Jesus ayavgikis:
42— Mmahpa yivewkan gimin Cristo, ig Uhokri gikanyan adahan ukumaduketniwiy? Pariyeki gihawkri?
Igkisme kaytwa giwn:
— Ig Cristo ig kahawkriye amekene Davi.
43Igme Kiyavwiye Jesus ayavgikis:
— Heneme igwa amekene Davi kanumgi “nukivara”. Inakni iwit ikepka git gavit Uhokri Gitip minikwak. Avim ini ig awna:
44“Ukivarawiy Uhokri awna ta git nukivara Cristo. Giwn: ‘Batnaba ay nuhumwa kihehaptak amun inin iwetrit kiyatye ku samah nah sibuhkisnete pivetunyavu pit.’”
45Ka ba yis hiyap igwa amekene Davi ka kanum Cristo “nuhiwhi”? Ig kanumgi “nukivara”. Ig Cristo ka he gihiwhinenwatma. Ig hawata ig gikivara.
46Neras hiyeg timepnevwi ayge igkis ka hiya adiyasak ginetni aynesnima. Ariwntak ini igkis ka kiboka ayavgi akiw.
Currently Selected:
Matews 22: pluPB
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
Matews 22
22
Wixwiy axnek git Uhokri
Lk 14.16
1Ayteke ig Kiyavwiye Jesus awna nawenyewa iwit patuwesbuhka ta gitkis akiw. Ig awna:
2— Nah akkite yit ku samah Uhokri gikumadukan. Ig Uhokri kewa pahavwi ikivaratbe ku pariye kehne fet adahan maripkawka gidahan gikamkayh.
3Ig awahkis gibukvig tahan watiha gawnasanvu. Igkisme gawnasanvu ka ayta fetya gikak.
4Igme ikivarat hiyapni hene, ig awahkis nawenyewa gibukvig giminkis akiw. Ig awna gitkis: “Su yi atak akka gitkis nawnasanvu ku nah kuwis ahegbete madikte axka. Nah kuwis umahkise nuviguh pak. Nah kuwis umahkise pak akamkayuvwi ku pariye aynengarudi. Madikte kuwis ahegbet. Wani igkis ayta ax nukakuh.”
5 Igkisme gibukvig atere utevgikis. Igkis ekke gitkis inakni gikivarakis giwn. Igkisme gawnasanvu ka aminama giwkis. Igkis tivik kannivwiyekuye. Pahavwi tivik ta giwasrakat, pahavwime tivik kannivwiye piyuket.
6Igkisme gasemnekis kamaxave gibukvig. Igkis arewhe gitkis. Igkis umahavegikis.
7Ayteke ig ner ikivarat hiyapni hene, ig dagawne. Nikwe ig awahkise gisuwtatavu giminkis neras umehekevutnevwi. Ignesme umahavevgikis, bukahave givinkis.
8Ayteke nikwe ig ikivarat awna gitkis gibukvig: “Fet kuwis ahegbet, heneme nawnasanvu ka kis adahan igkis ax nukakuh. 9Su yi atak wew ta avigkut madikte ahin. Ayge yis awnasa madikte hiyeg ku pariye yiwitwan adahan ignes ayta fetya nukakuh.”
10Igkisme gibukvig ihe giwn. Igkis tivik atere avigkute ahin. Igkis pahadguhave madikte hiyeg ku pariye giwitwankis ayge, hiyeg ku pariye ikaka kane kibeynevwima payegbitak gikakkis hiyeg ku pariye ikaka kibeynevwi. Ayge nikwe fet avin kivun akak hiyeg.
Ku pariye patehwevye igi ka hiya igma parak ta git Uhokri
Gal 5.1; 1Ko 6.9; Ef 5.5; Ap 21.18,26, 22.15
11— Ayteke nikwe givin kuwis kivun, ig ner ikivarat pareke atere adahan iwasevye gawnasanvu. Ayge ig hiyap pahavwi awayg ku pariye ka amava ini simis barewbetye adahan ig kawihni abet maripkawka.
12Ig hiyapni hene, ig ayavgi: “Nukagmada, pis yuma pisimsa barewbetye adahan pis fetya adahan maripkawka. Mmah piverekepni atan?” Igme ner awayg ig ka ik adahan ig kaytwa pahatnema iwit.
13Nikwe ner ikivarat awna ta gitkis gibukvig. Ig awna: “Asa wanakminenay giwan payak akak gibagwan. Ayteke yis padekwig ta kabaywakat, ta abetit amisnavyad, ku kiney hiyeg tihebdi ignes kagah gaybukisnek.”
14Mmanawa ig Uhokri awnasa ka aynsima hiyeg adahan ignes danuh ta git, heneme ig kaniy ka kiyesradima adahan ignes misakwa ay gimun.
Henewatbaki ig Kiyavwiye Jesus awna.
Ikinay git Uhokri madikte ku pariye kawih gidahan
Mk 12.13; Lk 20.20; Ro 12.1
15Ayteke ariwnteke ini igkis farizewkis tivik ahegbete ginetnikis adahan igkis hiyap ba igkis keh Kiyavwiye Jesus awna iwit taraksebetnema adahan igkis gimetkepten.
16Ayteke nikwe igkis awahkise gikannuhnivwi payak gikakkis Erodis gihiyegavu gimin Kiyavwiye Jesus. Igkisme danuh atere, igkis awna git:
— Kiyavwiye, usuh hiyak ku pis waditye hiyeg. Pis ka awna mpusema iwit gidahankis hiyeg. Pis awna pahatwowa iwit gitkis madikte hiyeg. Hiyawa hiyeg gihiyekemnikis nawenyewa ariw pidahan, heneme in ka sam ta pit. Pis awna pahatwowa iwit. Pis akka Uhokriyewa gihiyekemni gitkis. 17Ayge nikwe usuh muwaka hiyak pahat hiyakemniki. Uya akki wotuh. Ig Sezar neras romayenevwi gikivarakis ig mpiksaptih wixwiy judeyenevwi adahan wixwiy katiwnihgi. Ba wadit adahan wixwiy katiwnihgi? Ba ka wadit?
18Igme Kiyavwiye Jesus hiyak ku gihiyekemnikis in mbeyevye igkis awna inakni adahan gikinsepten. Ig hiyapni hene, ig kaytwa giwnkis:
— Yis ikawnamah ke wotbe yis kibeynevwibe hiyeg bawa yis pi mbayte giwkis nawenyevwi hiyeg! Mmahki yis ayta nuhikekten hene?
19Akkanay nutuh pahamku kirehka ku pariye wis kawih adahan katiwnih kiyavwiye Sezar.
Igkisme timapni hene, igkis iwe pahamku karukri igkis ewkwig ta git.
20Ayteke nikwe ig ayavgikis:
— Pariyeva kahehpakye gumadga nor kirehka? Pariyeva kiwye ay gumadga?
21Igkisme kaytwa giwn:
— In kiyavwiye Sezar giw akak gahehpak.
Igme kaytwa giwnkis:
— Nikwe nor karukri kawih gidahan kiyavwiye Sezar. Hiyawa wixwiy ikevgu git. Heneme amawka ku wixwiy iki ta git Uhokri madikte ku pariye kawih gidahan Uhokri.
22Igkis timapni inakni giwn hene, igkis wakaymnibdi ka aynsima. Ayteke nikwe igkis maytevgi. Igkis tivik.
Wixwiy kannikaw ariw umiremniwiynek
Mk 12.18; Lk 20.27; Jo 5.21, 6.39, 11.23; Ro 8.10; 1Ko 6.14, 15.12; 1Tes 4.16; Ap 20.4
23Avimnewa ini nawenyevwi hiyeg danuh atere git Kiyavwiye Jesus akiw. Igkis sadusewkis. Gitkis sadusewkis hiyeg miyap ignes pisenwe gihawkankis igkis ka kannikaw akiw.
24Igkis danuh atere, igkis awna git:
— Kiyavwiye, amekene Moís awna:
“Ku pahavwi hiyeg miyap guw gihayo, ku ig yuma gikamkayh gukak egu gihayo, amawka gikebyi maripkaw gukak egu giwgun marihwa eg kakamkayh hawata ke wotbe ignebe gikebyibe kakamkayh gukakbe.”
Henewatbaki ig amekene Moís gikumadukan awna.
25Kuri, minikwak ntewnehker gikebikis ay ukakuh. Ig eggutye maripkew gukak pahavu tino. Ayteke ig miyap kawke ig kakamkayh gukak. Ig ikise gihayo ay giwaku gisamwi.
26Ayteke nikwe ig gisamwi givun maripkew gukak egu giwgun. Ig hawata ig miyap guw. Ig kawnata kakamkayh gukak. Ayteke nikwe ig gisamwikis gimamnampiye ig hawata ig maripkew gukakwata akiw. Hene madikte neras ntewnehkernene gikebikis miyarapwata.
27Pisenwa egme hawata eg miyop.
28 Kuri, Kiyavwiye, usuh ayapi. Aysawnemenek avim ini ku aysaw hiyeg kannikew ariw gimiremnikis, pariyevahki gibetitakkis neras ntewnehkernene gikebikis darihgu? Mmanawa igkis madikte maripkewnekuye gukak.
29Igme Kiyavwiye Jesus kaytwa giwnkis:
— Yis tarakse mmanawa yis ka pukuha Uhokri gannasan ine yis kawnata hiyak ku samah Uhokri gidatni.
30Aysawnemenek avim ini ku aysaw hiyeg kannikewbet ariw gimiremnikis, ayge ignes ka maripkaw akiw. Igkis misakwa henep ke ahjbe.
31 Kuri uyay kinetihwa amin wixwiy hiyap ba hiyeg kannikaw ariw gimiremnikis. Mmah yis kote ivegbohate ku pariye Uhokri awna ta yit?
32Ig awna:
“Nahnewa kuri Abraawh giwohkiga, nahnewa kuri Izaki giwohkiga, nahnewa kuri Jakó giwohkiga.”
Inakni iwit akki wot ku igkis gidukweneswa igkis iveg. Ig Uhokri kawki miyaravyema giwohkigakisma. Ig hiyeg ivegnene giwohkigakis.
33Neras hiyeg kabubuknene ayge igkis timapni inakni iwit hene, igkis wakaymnibdi ka aynsima.
Uhokri gikumadukan adahan wis batek gikak Uhokri mpiynevevye, inakni pi kabayte ariw madikte kumadukaki
Mt 10.37; Mk 12.28; Lk 10.25; Jo 21.24; 1Jo 2.15, 5.3; Ap 2.4
34Ayteke neras farizewkis time Kiyavwiye Jesus gak ku ig mateke neras sadusewkis akak giwn. Igkis timapni hene, igkis pahadguhwe atere git.
35Ayge pahavwi gaytakkis, ig kannuhekevutne amin amekene Moís gikumadukan, ig ayavgi pahat ayapka adahan gihikekten.
36Ig awna:
— Kiyavwiye, pariyeva Uhokri gikumadukan pi kabayte ariw madikte kumadukaki?
37Igme Kiyavwiye Jesus kaytwa giwn:
— Nah akkite yit ku pariye gikumadukan pi kabaytenene:
“Batek gikak Kiyavwiye Uhokri akak madikte piyakni. Batek gikak akak madikte pibetki. Batek gikak abet madikte pihiyekemni.”
38Inakni gikumadukan pi kiyatte pi kabayte ariw madikte kumadukaki.
39Ayteke ariwnteknewa inakni iwit ay pahat gikumadukan akiw ku pariye pi kabayte ariw madikte kumadukaki:
“Batek gikakkis piyakivwi hiyeg hawata ku samah pis batek akak pivit.”
40Inakni pitenemnene gikumadukan in huwase amekene Moís gikumadukan akak Uhokri gawnevevu giwnkis madikte.
Cristo ignewa amekene Davi gikivara
Mk 12.35; Lk 20.41
41Ku samah igkis farizewkis pahadguvu ayge, ig Kiyavwiye Jesus ayavgikis:
42— Mmahpa yivewkan gimin Cristo, ig Uhokri gikanyan adahan ukumaduketniwiy? Pariyeki gihawkri?
Igkisme kaytwa giwn:
— Ig Cristo ig kahawkriye amekene Davi.
43Igme Kiyavwiye Jesus ayavgikis:
— Heneme igwa amekene Davi kanumgi “nukivara”. Inakni iwit ikepka git gavit Uhokri Gitip minikwak. Avim ini ig awna:
44“Ukivarawiy Uhokri awna ta git nukivara Cristo. Giwn: ‘Batnaba ay nuhumwa kihehaptak amun inin iwetrit kiyatye ku samah nah sibuhkisnete pivetunyavu pit.’”
45Ka ba yis hiyap igwa amekene Davi ka kanum Cristo “nuhiwhi”? Ig kanumgi “nukivara”. Ig Cristo ka he gihiwhinenwatma. Ig hawata ig gikivara.
46Neras hiyeg timepnevwi ayge igkis ka hiya adiyasak ginetni aynesnima. Ariwntak ini igkis ka kiboka ayavgi akiw.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.