Matews 20
20
Was akivara katiwnih gihiyegavu hehpekuye gitiwnikis
1— Nah akkite yit nawenyewa abektey amin ku samah Uhokri gikumadukan. Minikwak pahavwi was akivara tivik hawkanawa adahan ivegvene hiyeg adahan igkis kannivwiyes amadga giwasra.
2Ig ute hiyeg, ig awna gitkis: “Uyay atak kannivwi nudahan mataytak. Nah katiwnihyi ku samah hiyeg gibetkikis katiwnih. Nah iki yit pahamku karukri seyno yitiwni. Ba kabay yit?” Igkisme kaytwa giwn: “Ihi, in kabayntiwa wotuh.” Ayteke nikwe ig awahkiswigkis ta wasamdakat.
3Ariwnteke ini inute kamuw, ig tivik danuhpene ta higiwmadgat. Ayge ig uti hiyeg he tabirenen.
4Ig hiyapni hene, ig awna gitkis: “Yis hawata ik adahan kannivwi amadga nuwasra. Su yi atak atere. Nah iki yitiwni ku samah in kabay nutuh.” Igkisme tivik wasemdekete.
5Ariwnteke ini puwipka abet, ig ner was akivara keh hawata akiw. Ariwnteke ini daraka kamuw, ig keh henevawata akiw.
6Ayteke ariwnteke ini arimkat aygetwiki, ig tivik ta higiwmadgat akiw. Ayge ig ute nawenyevwi hiyeg akiw, igkis he tabirenenwa ayge. Ig hiyapni hene, ig ayavgikis: “Mmahki yis he tabirenenwa ay amadga higiw mataytak?”
7Igkisme kaytwa giwn: “Awaku yuma hiyeg ikine wannivwi.” Igme hiyapni hene, ig awna gitkis: “Yis hawata ik adahan kannivwi amadga nuwasra. Su yi atak atere.”
8Ayteke ariwnteke ini aygete kuwis, ig was akivara awna ta git akavriwten karukri. Giwn: “Watihanaba madikte nuhiyegavu. Katiwnihnigkis. Katiwnihnaba igkiskit neras ku pariye parak buttitnene abet annivwit he pis danuh ta gitkis neras ku pariye pitatyevwi parak.”
9Igme akavriwten karukri timapni hene, ig ihe giwn. Ig watihe gihiyegavu. Igkisme danuh atere, igme gikatiwnihpitnikis. Neras ku pariye parak arimkat aygetwiki igkis daxnekuye pahamku kirehka seyno. Hene ig katiwnihave madikte gikivara gihiyegavu.
10Ayteke metakwa neras ku pariyekit parak abet annivwit igkis danuh atere adahan daxwiyes gikakurakis. Givewkankiskam igkis dax pi kiyeste gitiwnikiskam. Heneme igkis dax hawata pahamku kirehka seyno.
11Igkis hiyapni hene, igkis awnebdi ta git ner gikivarakis.
12Giwnkis: “Kiyavwiye, pis ka keh wadit ukakuh. Neras buttitwiyenen igkis kannivwiye pahawowa ler. Usuhme kannivwiye mataytak abet kamuw awahni. Heneme pis katiwnihpigkis hawata ku samah pis katiwnih usuh.”
13Igme kaytwa pahavwi giwn: “Nukagmada, nah ka kinispi. Wis kuwis ahegbete unetni adahan nah katiwnihpi pahamku kirehka seyno. 14Amerepnaba pitiwni adahan pis diyuhe ta pivinwat. Nahwa muwaka katiwnih neras buttitwiyenen parak hawata ku samah nah katiwnihpep. 15Nukakura eg nudahan adahan nah keh gukak ku samah numawkan. Ka muwaka dagawnhaw adahan ku samah nah kehne kabayka gikakkis.”
16Ayteke pisenwa gawnan inakni iwit, ig Kiyavwiye Jesus awna:
— Inaknibaki arakak adahan ku samah aysawnemenek ka aynsima hiyeg ku pariye ikaka yumanene gikiytanikis ay amadga inin, aysawnemenek yuma hiyeg pi kiyatte mpiyigkis. Hawata akiw ka aynsima hiyeg ku pariye ikaka pi kiyatte mpiy pahavwi, aysawmenemek ignes ka mpiya pahavwinema hiyeg.
Jesus kinetihwa akiw amin gimiremni
Mk 10.32; Lk 18.31
17Ayteke ig Kiyavwiye Jesus ay avigku ahin tivikwiye arimkat paytwempu Jerusalém, ig pahadguhe giwatnivwi (12) ta git igkiswo.
18Ayge ig awna ta gitkis:
— Kuri wixwiy tivikwiye avitit Jerusalém. Ayge nah, ku pariye wageswe awayg amadgaya inin, nah kamaykiswikanek ta gitkis muwveg kiyatyevwi, ta gitkis neras kannuhekevutnevwi amin amekene Moís gikumadukan. Ayge nikwe igkis ikaksevun adahanikwa miyaka.
19Avim ini igkis ikevun ta giwakuritkis hiyeg kane judeyenevwima. Igkisme mahivwihpennek igkis biptevun akak tigay. Pisenwa nikwe igkis deddehpen aminat ahnek. Heneme abet amamnampiye hawkrinek nah kannikaw akiw.
Tiyagu gikak Joawh ikewkere gavitminkis hiyeg
Mk 10.35; Lk 22.24
20Ayteke ig amekene Zebedew gihayo eg danukwa atere git Kiyavwiye Jesus. Eg ayta payak gikakkis gukamkayuvwi ig Tiyagu gikak Joawh. Eg paberetusew gikimpurit Kiyavwiye Jesus, eg awna git:
— Kiyavwiye, uya amnihun keh ku samah numawkan pit.
21Igme Kiyavwiye Jesus kaytwa guwn:
— Pariyeki pimawkan nutuh?
Egme kaytwa giwn:
— Aysawnemenek avim ini ku aysaw pis kumadukenenek, uya amnih isaksa neras nukamkayuvwi piyana gikebikis adahan igkis bat ayge pihumwa ay amun ini iwetrit ku pariye pi kiyattenene. Numawkan pahavwi bat kihehaptak, pahavwime bat patuwanaptak.
22Igme Kiyavwiye Jesus awna gitkis gukamkayuvwi:
— Yis ka hiyak ku pariye yayapni. Aysawnemenek nah hiyap mbeyne ka aynsimanek. In ke nah higevyebenek higapka kane ativinisima arikutak pohow higeptet. Ba yis ik adahan yis higap arikutak nor higeptet hawata ke nahbenek?
Igkisme kaytwa giwn:
— Ihi. Usuh ik adahan amavin hawata ke pisbenek.
23Igme Kiyavwiye Jesus awna gitkis:
— Aysawnemenek yis higa ini nuhigvannek arikutak nugobla. Yis hiyap mbeyne ka aynsimanek. Heneme ka nahma batahkis hiyeg ayge nuhumwa ine kihehaptak ine patuwanaptak. Ini iwetrit kane nikiytanisima ini gidahankis neras ku kadahan Wigwiy kuwis ahegbetemni.
24Igkis Jesus giwatnivwi asemne madikawkunene gikebikis, igkis timapni hene, igkis hahayruke gikakkis neras piyananene gikebikis Tiyagu gikak Joawh.
Amawka wixwiy ikaw tuwatavye ke ibuktibe
Mk 9.35; Jo 13.20; Lk 14.10, 18.13, 22.25; Ro 12.3, 10,16; Ef 4.2; Fil 2.3; Tiy 4.6; 1Ped 5.3
25Igme Kiyavwiye Jesus hiyapni hene, ig pahadguhe gikannuhnivwi madikte git. Ig awna gitkis:
— Ka yi muwaka ikaw gavitminema pahavwi. Yis kuwis hiyak neras ikivarat amadgayavu inin gihiyekemnikis, ku samah igkis ikaw gavitminkis gihiyegavukis, igkis kabukhewvi gitkis. 26Yisme ka henema. Yidahan nawenyewa. Ku pahavwi yaytak humewkere yavitmin madikte, amawka ig ka kabukhaw yit. Amawka ku ig ikaw ke wotbe ignewa yibukbe. 27Ku pahavwi yaytak humewkere kiyatye hiyeg giwtrik Uhokri, amawka ku ig ikaw ke wotbe ig yumahbe gikiytanibe ay amadga inin. 28Amawka ku yis ikaw hawata ke nahbe. Nah, ku pariye wageswe awayg amadgaya inin, nah ka ayta adahanma hiyeg keh kabayka nudahan heneme nah ayta adahanikwa nah kehne kabayka gidahakis hiyeg. Hawata akiw nah ayta adahan nah umahkiswene gidukwenavrikkis hiyeg kahadbe ignes isahptaw.
Jesus makniwa piyana motavye
29Ku samah igkis peswiye avititak paytwempu Jerikó, ka aynsima hiyeg makeke gihavu Kiyavwiye Jesus.
30Avimnewa ini piyana gikebikis motavye bat ayge ahinmu. Igkis kinetni Kiyavwiye Jesus gak ku ig mpiyeviye. Igkis timapni hene, igkis kabiman git:
— Kiyavwiye, pis ukivara hawata ke amekene Davibe. Uya amnih usuh.
31Neras hiyeg ku pariye pahabunene ayge igkis timapni hene, igkis himehpigkis. Igkis awna ta gitkis:
— Ka yi muwaka kabiman hene.
Igkisme pi kabimenpiva akiw. Igkis awna:— Kiyavwiye, pis ukivara hawata ke amekene Davibe. Uya amnih usuh.
32Ig Kiyavwiye Jesus timapni inakni gabimankis hene, ig misekwe. Ig humekwigkis ayta git. Igkisme danuh atere, ig ayavgikis:
— Pariye yimawkan nutuh?
33Igkisme kaytwa giwn:
— Kiyavwiye, usuh muwaka usuh hiyap akiw.
34Igme Kiyavwiye Jesus amnihpigkis. Ig daxe giwtyakkis, aynewa igkis hiyap. Ayteke igkis makekwevi gihavu butte.
Currently Selected:
Matews 20: pluPB
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
