Ebrews 7

Mewkisedeki ka aynsima gikiytani

1Ig amekene Mewkisedeki ig akivara paha paytwempu kewye Saleh. Ig gimuwvega Kiyavwiye Uhokri ku pariye kane gikiytanisima. Minikwak ku aysaw amekene Abraawh diyuhpiye abetitak ini kerka ku kavim ig mateke ka aynsima ikivarat, ig amekene Mewkisedeki patiptakig atere, ig sarayhe kabayka givitit.

2Igme amekene Abraawh kakanhaw git Kiyavwiye Uhokri git igi amekene Mewkisedeki. Ig kakanhaw git araytak ku pariye gixiwhan giwkis neras ikivarat. Ig wiwh paha ariwntak mpuse madikawku gewkanbet, ig ikepni git amekene Mewkisedeki. Igme amekene Mewkisedeki kanumka pitana gikanmak kiyatye. In giw Mewkisedeki, inakni wownavrikwiy “Waditye Ikivarat”. Inme paytwempu Saleh ku kiney ig kumaduka, inakni ariw wownavrikwiy “Pasamraki”. Nikwe ig amekene Mewkisedeki hawata ig kanumka “Pasamraki Akivara”.

3Yuma hiyeg ahiyekten ku pariye amekene Mewkisedeki gig ine ku pariye ginag ine ku pariye gihawkrivwi. Kiyavwiye Uhokri giwn ka akki wotwiy. Wixwiy ka hiyak ku samah giwayvuka. Wixwiy kawnata hiyak ku samah gimiremni. In ke wotbe ig yuma gikavuskabe ke wotbe ig yumanawata gimaksemnibe. In ke wotbe ig misakwa hiyeg gawnamnihtenkis adahan avanenekwa hawata ke Kiyavwiye Uhokri gikamkayhbe.

Mewkisedeki ka aynsima kiyate giwkis nawenyevwi muwveg

4Ig amekene Mewkisedeki ig ka aynsima gikiytani. Yis hiyap? He igwa judeyenevwi gihawkrikis amekene Abraawh ig ikiy amekene Mewkisedeki kiyate giw. Mmanawa ig ike gikan gidahan Uhokri ta giwakurit amekene Mewkisedeki ariwntak gixiwhan giwkis neras ikivarat.

5Ariwnteke ini kibite kamukri akiw ig amekene Abraawh gihiwhi Levi amadga wayk. Ayge nikwe igme Kiyavwiye Uhokri ike gitkis amekene Levi gihiwhivwi ini iwetrit adahan amevene hiyeg gikankis gidahan Kiyavwiye Uhokri. Neras gihiwhivwi ku pariye humaw muwveg gidahankis hiyeg judeyenevwi igkis ik adahan amava giwkis hiyeg paha ariwntak mpuse madikawku gewkanbetkis. Igkis amava ini gikankis hiyawa igkisweke pakebyeknevwi gikakkis neras kakanhewnevwi. Igkiswata gihiwhivwi amekene Abraawh.

6Igme amekene Mewkisedeki ig ka amekene Levima gihiwhima. Ig kuwis ayivwite ay kuwis gavit amekene Levi. Heneme ig hawata ameve pahavwi gikan git Kiyavwiye Uhokri. Mmanawa ig ameve amekene Abraawh gikan. Hawata akiw ig sarayhe kabayka givitit amekene Abraawh. Igme amekene Abraawh ka aynsima kiyathaka. Ig ikaksaka git ka aynsima kabayka gavit Kiyavwiye Uhokri.

7Heneme in kahayak huwewe wot ku ig amekene Mewkisedeki ig ka aynsima kiyate giw amekene Abraawh mmanawa ku pariye sarayhne kabayka givitit pahavwi igi kiyate giw.

8Ignesme amekene Levi gihiwhivwi ku pariye amevene hiyeg gikankis ku akak inin gidahan Kiyavwiye Uhokri, igkis miyarapnek. Igme amekene Mewkisedeki, Kiyavwiye Uhokri giwn ka akki ku ig miyap. In ke wotbe ig ay adahan avanenekwatbe.

9Hawata akiw in ke wotbe igwa amekene Levi payak gikakkis neras gihiwhivwi ku pariye amevenevwi hiyeg gikankis ofan, in ke wotbe igkis ikiy amekene Mewkisedeki ka aynsima kiyate giwkis. Mmanawa in ke wotbe igkisbe kakanhewne git payak gikak amekene Abraawh.

10Mmanawa avim ini ku aysaw ig amekene Abraawh patipteke gikak amekene Mewkisedeki, ig amekene Levi kote amadgate wayk. Ig aynete givit amekene Abraawh.

11Ariwnteke ini kibite kamukri akiw ig Kiyavwiye Uhokri ekke gikumadukan git amekene Moís. Avim ini ig kaniye amekene Levi gihiwhivwi adahan igkis humaw gimuwvegavu. Mmanawa ig kaniye amekene Arawh gikakkis gikamkayuvwi adahan igkis humaw hiyeg gawnamnihtenkis git Kiyavwiye Uhokri adahan igkis wadithebdihne gitaraksankis gikak Kiyavwiye Uhokri. Wake igkis keh avigkutavriknewatbe ku samah Kiyavwiye Uhokri gimawkan, nikwekam ig Kiyavwiye Uhokri ka muwakapkam adahan ig kaniy pahavwi nawenyewatkam muwveg giwenyankis. Heneme ig kuwis kannikase pahavwiwa akiw giwenyankis ku pariye ka kema amekene Arawhma. Ig ka aynsima kiyate giw. Ig Kiyavwiye Jesus. Igi gikiytani kewa amekene Mewkisedekibe gikiytani.

Kiyavwiye Jesus ka aynsima kiyate giwkis nawenyevwi muwveg

12Ku samah ig kuwis kannikase nukune muwveg giwenyankis neras nawenyevwi ayge, nikwe ig hawata kannikase gikumadukan.

13Mmanawa amekene Moís gikumadukan iki ini annivwit adahan wadithebdihne hiyeg gitaraksankis giwakuritkis amekene Levi gihiwhivwi. Igme ku pariye kannikasaka giwenyankis ig ka kinagsaw gibetitakisma amekene Levi gihiwhivwima. Ig nawenyewa hiyeg gihiwhi ku pariye gihiwhivwi ka humawti muwveg, ignes ka awnamnihti hiyeg ay amun ini piriyepkewket ku kamin amekene Moís gikumadukan kinetihwa.

14Madikte hiyeg hiyakni ku ig Ukivarawiy Jesus ig amekene Juda gihiwhi. Amekene Moís gikumadukan ka awna pahatnema iwit giminkis amekene Juda gihiwhivwi adahan igkis humaw muwveg. In areketni huwewehe wotwiy ku ig Kiyavwiye Jesus avawyewa ariw amekene Moís gikumadukan. Ig ka aynsima kiyate giwkis neras muwvegviyenevwi ku kamin amekene Moís gikumadukan kinetihwa.

15In kahayak huwewe wot mmanawa ig Kiyavwiye Jesus igi muwveg gihumwabuk amekene Mewkisedeki.

16Ka innema kumadukaki amedgenema inin keh ig humaw hiyeg gawnamnihtenkis. Kawa. Ig humaw gawnamnihtenkis awaku ku samah ig detye adahan avanenekwa. Ig yumahwa gimaksemni.

17Mmanawa Uhokri gannasan awna:

— Pis misakwa hiyeg gawnamnihtenkis adahan avanenekwa. Pikiytani hawata ke amekene Mewkisedekibe gikiytani.

Henewatbaki ig Kiyavwiye Uhokri giwn git gikamkayh.

18Nikwe ignes nawenyevwi muwvegviyene ka kawih udahanwiy akiw awaku ku samah igkis yuma gidatnikis igkis waditnevyenen adahan wawnamnihtenwiy. Nikwe ig Kiyavwiye Uhokri wiwhe ini annivwit giwakutakis.

19Mmanawa ignes ku kamin amekene Moís gikumadukan kinetihwa igkis ka ik adahan wadithebdih hiyeg gihawkankis gikak Kiyavwiye Uhokri avigkutavrikma ku samah gimawkan. Kurime ig Kiyavwiye Uhokri kannikase pahavwi giwenyankis ku pariye ka aynsima kabayte adahan wixwiy kamaxwa givitit. Givitimpi igi gikamkayh ik adahan wixwiy danukwa kennesa gihumwat Kiyavwiye Uhokri takunipti.

20Ay nawenyewa areketni wot ku ig Kiyavwiye Jesus ka aynsima kiyate giwkis neras nawenyevwi awnamnihkevutnevwi. Nah akkite yit ku samah. Ig Kiyavwiye Uhokri igwa humaw gawneve adahan givit adahan ku samah ig ka uniyehti gihiyekemni ariw inakni giwn git gikamkayh. Ig ka keh hene avim ini ku aysaw ig kaniye amekene Levi gihiwhivwi adahan igkis humaw muwveg adahan hiyeg judeyenevwi gawnamnihtenkis.

21Heneme ku aysaw ig awna git gikamkayh, igwa humaw gawneve adahan givit adahan ku samah ig ka uniyehti gihiyekemni. Mmanawa Uhokri gannasan awna:

— Kiyavwiye Uhokri igwa humaw gawneve adahan givit adahan ku samah ig ka uniyehti gihiyekemni avim ini ku aysaw ig awna git gikamkayh: ‘Pis misakwa hiyeg gawnamnihtenkis adahan avanenekwa.’

22Inakni giwn areketni wot ku ini gahegbetawni adahan ig Kiyavwiye Jesus wadithebdih uhawkan gikak Kiyavwiye Uhokri in ka aynsima avitminte ariw ini gahegbetawni gidahankis ignes nawenyevwi muwvegviyene adahan igkis wadithebdihne hiyeg gihawkankis gikak Kiyavwiye Uhokri.

Kiyavwiye Jesus wawnamnihtenwiy adahan avanenekwa

23Hawata akiw neras nawenyevwi muwvegviyenevwi igkis ka aynsima gikebikis awaku igkis ka dahwa adahan ayivwadima hawkri. Kuwewa pahavwi gaytakis miyap pahavwime kannikaw adahan awnamnihne hiyeg giwenyan.

24Igme Kiyavwiye Jesus misakwa adahan avanenekwa. Inneki keh ig ka muwaka nawenyevwi muwvegviyenevwi giwenyan. Ignewa wawnamnihtenwiy adahan avanenekwa.

25Nikwe ik adahan ig parak abet uhawkanwiy takunipti avanenekwa adahan ig wawnamnihtenwiy wixwiy ku pariye danuhpiye git Kiyavwiye Uhokri givitimpi Kiyavwiye Jesus. Mmanawa ig ay adahan avanenekwa.

Kiyavwiye Jesus avigkutavrik ku samah Uhokri gimawkan

26 Kibeyne, ig Kiyavwiye Jesus ignewa umawkanwiy adahan wawnamnihtenwiy. Ig awnamnihkevutne ku pariye ka aynsima kiyate giwkis madikte mmanawa ignewa waditye. Yumahwa gitaraksan aynesnima. Ine yuma givathawni. Ig ka pasamrak akak uvathawniwiy aynesnima. Inneki keh ig ikepka git giwetri ku pariye avitmin aynte inurik.

27Ig ka kema neras nawenyevwi awnamnihkevutnevwima. Hewkevye ner muwveg ku pariye kiyatenene ig umehpiye puwikne gidukwenavrikkis hiyeg adahan katiwnihpiye gitaraksankis. Pitatye ig umah puwikne adahan katiwnihpiye gidahankite gitaraksan. Butte nikwe gidahankisme gihiyegavu. Igme Kiyavwiye Jesus ig ka muwaka adahan ig katiwnih gidahanma gitaraksan mmanawa ig yuma gitaraksan. Ine ig kawnata muwaka adahan ig katiwnih gihiyegavu gitaraksankis hewkevyema mmanawa ig kuwis katiwnih gitaraksankis pahayewvi ku aysaw ig umahkiswe gidukwenavrikkis.

28Neras muwvegviyenevwi ku pariye kiyatenene ku pariye amekene Moís gikumadukan kaniy, igkis kataraksan hawata ke madiktehbe hiyegbe. Igme ku pariye Kiyavwiye Uhokri kaniy giwenyankis igi yuma gitaraksan. Ig Kiyavwiye Uhokri gikamkayh. Ku aysaw Kiyavwiye Uhokri kaniyvig ig awna ku ig ka kaniy nawenyewatma akiw. Mmanawa ig kuwis humaw avigkutavrik ku samah Kiyavwiye Uhokri gimawkan. Ig misakwa hene adahan avanenekwa.

Currently Selected:

Ebrews 7: pluPB

Highlight

Copy