Efesyus 1

Nah Pol awahkis kabayka yimin

1 Nah Pol awahkis kabayka yimin. Kibeyne, Kiyavwiye Uhokri kaniyven akak gibetki adahan nah humaw Jesus Cristo giwatni. Nah awahkis kabayka yimin, yis Jesus gihiyegavu efesuyenevwi. Kibeyne, yis kamaxwene kabayntiwa givitit Jesus Cristo, yis wewne pahavwiwa gikak.

2Ig Wigwiy Kiyavwiye Uhokri gikak Ukivarawiy Jesus Cristo gabaykis yikaknek. Igkis kariswehse yiyakninek.

Avit hawkri humaw Uhokri kaniyvewiy

Jo 15.14; Ro 8.29; Ef 1.4; 1Tes 1.4; 2Tes 2.13; 2Tim 1.9; 1Ped 1.2, 2.9

3Kibeyne gidahan Kiyavwiye Uhokri. Ignewa Ukivarawiy Jesus Cristo gig. Ig iki madikte kabayka uvititwiy givitimpi Gitip. Ig iki wotwiy awaku ku samah wixwiy pahavwiwa gikak Cristo ku pariye kuwisnene aynte inurik.

4Minikwak avit hawkri humaw, ig Kiyavwiye Uhokri ayipa kaniyvewiy adahan wixwiy pahavwiwa gikak Jesus Cristo kahadbe ig keh wixwiy humaw barewvityevwi, yuma uvathawniwiy aynesnima giwtrik, kahadbe wixwiy wew akak gamnihra ay uvitwiy.

5Avim ini ig kaniyvewiy adahan wixwiy humaw gikamkayuvwi awaku ku samah wixwiy pahavwiwa gikak Jesus Cristo. Ig kaniywiy hene akak madikte gabay akak madikte gibetki.

6Ayge nikwe gikiytani kabayhaka avanenekwa adahan ini gabay kibeynewatnene. Wixwiy ka kiseweknema adahan ig batek ukakwiy, heneme ig batek ukakwiy awaku ku samah wixwiy pahavwiwa gikak gikamkayh gibetki.

7Igme gikamkayh katiwnihpewiy akak gimig adahan wixwiy isahptaw ariw utaraksanwiy. Inneki keh ig Kiyavwiye Uhokri bayahminawiy ariw utaraksanwiy. Ig ka gabayisima ig keh hene.

8 Kibeyne, ig ka gabayisima ukakwiy mpinevevye. Ig hawata ig ka gihiyekemnisima. Ig kannuh avuriwiy.

9 Ku avim inin ig keh wixwiy hiyak gihiyekemni ku pariye minikwak hiyeg kotenene hiyakte. Henewa gibetki ig keh hene. Ig muwaka akki wotwiy ini kabayka ku pariye ig ikiswanaw udahanwiy awaku ku samah wixwiy pahavwiwa gikak Cristo.

10Ig akki wotwiy ku aysawnemenek ku aysaw ahawkanavrik danuh, ig ahiwviye madikte ku pariye amedgenevwi inin payak gikakkis madikte ku pariye arikunevwi en. Avim ini ig ikevgikis giwakuwit Cristo adahan igme kumadukigkis adahan avanenekwa.

11Avim ini wixwiy darih uwetriwiy abet ini gikumadukan awaku ku samah wixwiy pahavwiwa gikak. Hene ig Kiyavwiye Uhokri kuwis ikiswanaw udahanwiy akak madikte gibetki. Ku pariye Kiyavwiye Uhokri gibetki henewa ig keh in humaw.

12 Nikwe ig kannipewiy adahan wixwiy darih uwetriwiy abet gikumadukan. Ayge nikwe gikiytani kabayhakanek adahan avanenekwa. Ig kaniy usuh hiyeg judeyenevwi ku pariye minikwak wahepne Cristo ku aysaw ig danuh.

13Ig hawata kaniyvey yis hiyeg ku pariye kane judeyenevwima. Minikwak yis time inakni inetit inyewatnene adahan ku samah wis isahptaw ariw uvathawni adahan wis danuhne git Kiyavwiye Uhokri. Yis timapni hene, yis kamaxwe givitit Cristo. Ayge nikwe ig Kiyavwiye Uhokri kawihkise Gitip yivitit ku samah ig ikakse gitkis gihiyegavu.

Uhokri Gitip areketni ku wixwiy Uhokri gidahan

Ro 8.14; 2Ko 1.21

Ig Gitip barewvitye. Ku samah ig Gitip ay uvitwiy, ig humaw areketni wotwiy ku wixwiy Kiyavwiye Uhokri gidahan.

14Hawata akiw ig Gitip humaw areketni huwewe wotwiy adahan aysawnemenek wixwiy darihnek madikte ini kabayka ku pariye Kiyavwiye Uhokri ikakse wotwiy. Kibeyne, ku samah ig ay uvitwiy, amun ini wixwiy kuwis darih abusku ku pariye gikaksan wotwiy. Ig humaw areketni wotwiy he wixwiy gihiyegavu wageswanek avigkutavrik ku samah Kiyavwiye Uhokri gimawkan. Avim ini gikiytani kabayhakanek adahan avanenekwa.

Nah piriyepkewnenekwa yidahan

Ef 3.14; Kol 1.9; Fil 1.9; 1Tes 5.23; Eb 13.20; 2Tes 1.11, 2.16

15 Nukebyuvwi, nah kinetni yak ku yis kamaxwene givitit Ukivarawiy Jesus kabayntiwa, yis amnihne madikte gihiyegavu.

16Nah timapni hene, nah ka matiswati kabayha Kiyavwiye Uhokri yidahan. Nah piriyepkewnenekwa yidahan.

17Nah piriyepkaw yidahan git Kiyavwiye Uhokri. Ignewa Ukivarawiy Jesus Cristo giwohkiga. Ig Wigwiy kane gikiytanisima. Nah aya git adahan ig iki gihiyekemni yivitit, adahan ig woka yihiyekemni adahan yis hiyakgi kabayntiwa.

18Nah aya git adahan ig uguh yihiyekemni kahadbe yis hiyeke ini kabayka ku kadahan ig humekwewiy. Numawkan yis pukuha ku samah ini kabayka ku pariye kibeynewatnene kane nikiytanisima ku pariye ig utipkis gitkis gihiyegavunek.

19Numawkan yis pukuha hawata ku samah ig Kiyavwiye Uhokri gidatni, ku samah ig ka gidatnisima udahanwiy ku pariye kamaxwenevwi givitit.

20Ini gidatniwata ku pariye kannikase Cristo ariw gimiremni. Ini gidatniwata ku pariye batahkiswig gihumwat Kiyavwiye Uhokri aynte inurik, ay amun ini iwetrit ku pariye kane nikiytanisima kihehaptak.

21Ayge ig avitmin madikte ku pariye inurikyenevwi gikivarakis mbeyevyenen gikakkis madikte ku pariye inurikyenevwi giwewkistenkis. Ig avitmin madikte ku pariye kumadukenevwi madikte ku pariye detyevwi. Ig pi datte giwkis madikte ikivaratviyene ku akak inin avanenekwa.

Wixwiy Cristo givit

Ro 12.4; 1Ko 12.12; Ef 4.16; Kol 3.15

22 Kibeyne, ig Kiyavwiye Uhokri kuwis kumadukase madikte ta git Cristo. Wixwiy gihiyegavu hawata kumadukaka gavit pahavwite. Igme Cristo igi utewiy.

23Wixwiyme humaw givit ay amadga inin. Wixwiy keh ig pahavwite ay. Igme kawihkiswa uvititwiy. Henewa. Ig ku pariye keh pahatte hawkri ignewa kawihkiswa uvititwiy.

Currently Selected:

Efesyus 1: pluPB

Highlight

Copy