Attus 24

Judeyenevwi kamiye Pol git Felix

1Ayteke ariwnteke ini pohowku hawkri, ig muwvegviyene gikivarakis Ananiyas ig danuh atere Sesareya. Gaytakis judeyenevwi giwewkistenkis danuh gihapti. Hawata akiw pahavwi awnakevutne kewye Tertulu danuh gihaptikis. Igkis madikte danuh gimkat Felix adahan gikamyehpitni Pol git.

2Igme Pol waxwepka atere, igme Tertulu kavusa kamiyevgi. Ig awna git Felix. Giwn:

— Kiyavwiye Felix, pis kibeyne hiyaptigi. Pis kariswehse inin uwaxig. Usuh judeyenevwi hiyepne ka aynsima kabayka awaku ku samah pis kumadukene usuh.

3Usuh kabayhap adahan madikte inin muwapuw avanenekwa.

4Kiyavwiye, nah ka muwaka mpithebdih pihawkan ku avim inin. Inneki keh nah ka awna kibitema iwit. Nah aya pit adahan pis kiyaknihwa timap nuwnuh ku avim inin.

5Ner awayg Pol ig sigimwikevutne ig. Ig dakuhwesene hiyeg judeyenevwi muwapuw amadga wayk. Ig gihwitentenkis neras hiyeg taraksavye kewye nazareyenevwi.

6Hawata akiw ig patehevye uleglisa Kiyavwiye Uhokri Givin. Usuh hiyapni hene, usuh kamaxwig. Usuh kamaxwig adahan usuh gihivetni baki ig wadityewatma giwtrik amekene Moís gikumadukan.

7Henneme ner suwtat gikivarakis Lisyas ig danuh atere ubetit. Ig xuwehe Pol uwakutak akak gihawna.

8Ayteke ig keh usuh ayta pimkanit adahan gikamyehpitni. Mmah piswa ka aya Pol amin ku pariye gikehni? Pis timap giwn, amun ini pis hiyakni ku gihiyekemni henewa ku samah nah awna pit.

Henewatbaki ig Tertulu awna.

9Igkisme neras judeyenevwi ayge igkis awna:

— Henewa madikte ku pariye kiyavwiye Tertulu awna ig awna inyewa.

Pol ay givetun Felix

10Ayteke ig Felix ig he basenen Pol adahan igme awna. Ayteke nikwe ig Pol awna git:

— Nah batek nnaktin ku samah nah ay pivetun ku avim inin adahan nah ekkevye pit ku nah ka keh mbayka. Mmanawa pis hiyakemniye awayg. Ka kuyenema pis ay kumadukene usuh judeyenevwi.

11Kuri piswa hiyak baki nah awna inyewatma iwit. Ka ayivwadima nah danuh atere Jerusalém adahan kiyathene Kiyavwiye Uhokri. Ininewa madikawku hawkri akak pina arawna (12) mpiyatinen.

12Nah ka inyewatma utipka ku nah iniyekne gikakkis hiyeg ayge ariku Kiyavwiye Uhokri Givin. Nah kawnata dakuhwesenema hiyeg ariku gileglisakis ine avuwiw paytwempu.

13Igkis uwewkisten usuh judeyenevwi igkis yumahwa gakkankis ku nah keh inakni mbayka aynesnima. Igkis awna he gikehbetankisnen.

14Henneme nah akki pit ku pariye nukehni. Nah kiyatha igwata Kiyavwiye Uhokri ku pariye uhawkrivwi kiyatha. Heneme nah wew akak Kiyavwiye Jesus gihiyekemni. Igkisme neras uwewkisten gitkis ig Kiyavwiye Jesus gihiyekemni in nawenyewa ariw Uhokri gihiyekemni bawa kawa. Nahme hawata ke igkisbe nah ihpa madikte iwit tameknene amadga amekene Moís gikumadukan. Nah ihpa madikte ku pariye Uhokri gannasan gitkis gawnevevu pitatyevwi.

15Nah ihpa ke igkisbe ku aysawnemenek ig Kiyavwiye Uhokri kannikase madikte hiyeg ariw gimiremnikisnek, hiyeg kibeynevwi payegbitak akak hiyeg ku pariye kane kibeynevwima.

16Inneki keh nah battukaw adahan nuvituh adahan nuhiyekemni barewbet ariw taraksaki gikak Kiyavwiye Uhokri gikakkis hiyeg amadgayavu inin.

17Kibite kamukri kuwis nah ka danuh atere Jerusalém. Ayteke metakwa nah atere. Nah atere adahan ewkne karukri gitkis nukebyuvwi judeyenevwi madiptavye. Adahan nah kakanhewne git Kiyavwiye Uhokri.

18Ku samah nah kehnete ini, nah utepka ayge ariku Kiyavwiye Uhokri Givin. Nah ka keh mbaykama ayge. Nah kuwis barewvithaw ku samah usuh hiyeg judeyenevwi uhiyekemni. Yuma hiyeg kabubuknema nukakuh. Yuma dakuhwaki.

19Henneme aynesa judeyenevwi ariwntak Asiyamnaw ayge. Igkis yuma ay ku avim inin. Ke nuthube amawka igkisnewa danuh atan pit adahan kamiyevun. Ku igkis hiyavun nah kehne mbayka, nikwe amawka igkiswa kamiyan.

20Igkisme neras hiyeg ku pariye ay ku avim inin igkis ka hiyavun ayge. Ininewa igkis hiyavun ku aysaw nah aynte givetunkis ukivara usuh hiyeg judeyenevwi ku samah igkis kehnes givahdukawnikis. Ayapnaba gitkis nikwe ku pariye mbayka igkis uti nuvituh avim ini. 21Pahatwowa mbayka nah keh ayge. Nah tabire ayge nah awna gitkis: “Nah ay ku avim inin adahan yis hiyavun ba nah wadityewatma awaku ku samah nah ihpa ku hiyeg kannikaw ariw gimiremnikis.” Ininewa mbayka nah keh.

Pol paraksepka gimun Felix

22Pisenwa inakni Pol gawnan ig Felix awna gitkis:

— Uyay miseke inakni inetit adahan avim inin.

Ig Felix kuwis time gak Kiyavwiye Jesus gihiyekemni ka aynsima. Nikwe ig awna gitkis:

— Hawkavanek nah timap yiwn akiw ku aysaw ig suwtat gikivarakis kiyavwiye Lisyas danuh atan.

23Ayteke ig awna git pahavwi suwtat:

— Avuriwkisnaba Pol git pahavwi suwtat. Ka ba wanakisgi. Isaksa gikagmadavu danuhpa git. Isaksigkis adahan igkis hiyak gikak.

Pisenwa ig tivik danuhpene avitit nawenyewa paytwempu.

24Ayteke ariwnteke ini kibite hawkri akiw ig Felix diyuhe akiw. Ig danuh payak gukak gihayo Drusila. Egme judeyano. Ig danuh atere, ig humakise Pol gimkat. Ayteke nikwe igkis kinetihwa pawtak amin ku samah hiyeg kamaxwa givitit Cristo Jesus.

25Ig Pol awna git:

— Amawka wis wew wadit giwtrik Kiyavwiye Uhokri. Amawka wis avuriw uhiyekemni kabayntiwa. Hiyapnaba. Aysawnemenek ig Kiyavwiye Uhokri uhivetniwiynek baki wixwiy kibeynewatma giwtrik.

Igme Felix timapni hene, ig avisasew ig segke. Ig awna:

— Hiyawa pis tivik aterewata parakseket arikut. Ku aysaw nah kahawkanek nah watihpap akiw.

26Ariw ini ig Felix givewkan ku nawenetke Pol katiwnihgi kahadbe ig isahkiswig. Inneki keh ig watihpig kiberevut adahan ig kinetihwene gikak. Igme ka katiwnihgi.

27Ariwnteke ini pikana kamukri akiw, pahavwi awayg kewye Pórsyu Festu humaw hiyaptigi giwenyan Felix. Igme Felix tivikwiye, ig ikise Pol ariku parakseket awaku neras judeyenevwi giwewkistenkis ka muwaka ig isahkisgi.

Currently Selected:

Attus 24: pluPB

Highlight

Copy