2 Timotyu 2

Kannuh hiyeg adahan igkisme kannuh nawenyevwi hiyeg akiw

1 Timotyu, nah awna pikak ke nukamkayhbe, awayghawnaba akakwa Cristo Jesus gawaygi mmanawa kuwis pis pahavwiwa gikak.

2Kuwis pis timavun nah ekkene Kiyavwiye Uhokri ginetni gitkis ka aynsima hiyeg. Kuri numawkan pisme akki inakniwata inetit gitkis nawenyevwi hiyeg akiw. Akkinba gitkis awaykemni ku pariye ik adahan pis iveg givititkis adahan igkisme kannuh nawenyevwi hiyeg akiw nimin.

Mpiksawnaba keh kibeyne annivwit gidahan Uhokri

3Humawnaba ke kibeyne suwtatbe gidahan Cristo Jesus. Ku samah kibeyne suwtat hiyap mbeyne heneme ig dehewnene nibet, hawata amawka pis dehewnene abet mbayka ke nahbe.

4Hawata akiw suwtat ka parak abet nawenyewatma annivwit akiw amedgene inin. Ig kehnenekwa gikivaranen gibetki akak pahatwowa gihiyekemni. Amawka ku pis hawata.

5Hawata akiw ku pahavwi kannivwiye gidahan gikivara, heneme ku ig ka keh gannivwi ku samah gikivara gimawkan, nikwe ig ka katiwnihka. Amawka ku pis kannivwiye gidahan Kiyavwiye Uhokri avigkutavrik ku samah gimawkan kahadbe pannivwi ka waditnevyenenma.

6Pahavwi ku pariye pi kannivwite ig pi katiwnihkante. Ke pahavwi was akivarabe. Ku ig pi kannivwite amadga giwasra, nikwe ig pi axte. Nikwe mpiksawnaba kannivwi gidahan Kiyavwiye Uhokri akak madikte pawaygi.

7Ivegminanaba pihiyekemni amin inakni nuwnuh pit. Ayge Ukivarawiy woka pihiyekemninek adahan pis pukuhpin madikte.

Wis ka hiya awankak Uhokri giwn

8Ivegminanaba pihiyekemni avanenekwa gimin Jesus Cristo ku samah ig kannivwiye gidahan gig he danuhe ahawkavrik gimiremni. Ayteke nikwe ig kannikasaka ariw ini gimiremni. Ig ihtikekne hawata ke wisbe, ig amekene Davi gihiwhi, heneme ig kannikasaka ariw gimiremni. Inakninewa Kiyavwiye Uhokri ginetni ku pariye wis ekkene gitkis hiyeg.

9Nah hiyepne mbeyne ka aynsima awaku ku samah nah ekkene inakni ginetni gitkis hiyeg. He nah wanakminepka akak xen nivatra ke wotbe nah kakehniyebe. Ka sam. Kiyavwiye Uhokrime giwn igkis ka hiya niwankak. Ik adahan in pes muwapuw.

10Nikwe nah amava madikte mbeyne ku pariye danuh nutuh. Nah amavin gidahankis Uhokri gikanyanvu kahadbe igkis isahptaw ariw gitaraksankis, kahadbe igkis uti gikiytanikis gimun Kiyavwiye Uhokri adahan avanenekwa. Mmanawa ignewa Cristo Jesus keh igkis isahptaw hene.

Ka sam wis umahkiswa gidahan Uhokri

At 21.13; Gal 6.17; Kol 1.24; Fil 2.17, 3.10; Ap 12.11

11 Timotyu, nah akkite pit pahat iwit akiw ku pariye kane waditnevyenenma. Ku wis umahkiswa gidahan Cristo, nikwe wis aymuhwanek adahan avanenekwa aynte gihumwanek.

12Ku wis dehewnene abetnewa mbeyne gidahan, nikwe wis kumaduka payak gikaknek. Heneme ku wis wihwe giw, ig wihwepta wownek.

13Ku wown diyuhe butte, gidahanme ka diyuhti. Ig keh madikte ku pariye ig awna adahan ig keh. Mmanawa ka hiya igma wihwa ariw giwn.

Akkanaba Uhokri giwn avigkutavriknawa

14Kiyekisnaba inakni iwit gitkis pihiyegavu. Ikinaba gihiyekemnikis akak madikte pawaygi giwavrik Ukivarawiy adahan igkis ka iniyak amin iwit ku pariye he waditnevyenen. Akebi inakni iwit he matekbetenen gihiyekemnikis neras ku pariye timepnevwi giwnkis.

15Mpiksawnaba kannivwi kabayntiwa gidahan Kiyavwiye Uhokri kahadbe aysawnemenek ig hiyap pis kibeyne giwtrik, kahadbe pis ka marekepma pivit givetun. Akkanaba Kiyavwiye Uhokri giwn avigkutavriknawa.

16Higihwanaba ariw kinetihwaki ku pariye he waditnevyenen ku pariye kane ekkenema Uhokri gihiyekemni. In he uwaxwetni avawyewa giw Kiyavwiye Uhokri.

17In mbayha uhiyekemni hawata ku samah pahayku busukne axwempiye mbayha wih. Ig kiyavwiye Himenew gikak kiyavwiye Filetu igkis gaytakis neras ku pariye kinetihwa waditnevyenen hene.

18Igkis kuwis dagehe ariw Kiyavwiye Uhokri ginetni inyewatnene. Igkis awna: “Kuwis uhiyekemniwiy kannikaw adahan nukune uhiyekemniwiy akiw. Henewa ukankawniwiy. Uvitwiyme ka kannikaw akiw.” Kuwis igkis tuguhkis gaytakis hiyeg gikamaxwankis akak inakni giwnkis.

Ku pariye inyewa Uhokriyan igi miniw ariw patahwaki

1Jo 2.15

19 Ka sam. Ku pariye hiyeg igyewa Kiyavwiye Uhokri gihiyegavu igkis gikamaxwankis ka tuguhti. Igkis kewa paytbe ku pariye mutuhka kabayntiwa adahan in ka hakuhti. Ig Kiyavwiye Uhokri akki wot ku pariye hiyeg igyewa gihiyegavu. Ig akkin wot akak pitana iwit ay amadga gannasan. Inakni pitatye iwit awna:

— Ig Kiyavwiye Uhokri hiyak ku pariye hiyeg igyewa gihiyegavu.

Aveynivye iwit awna:

— Ku pariye hiyeg ikewnevwi Kiyavwiye Uhokri gihiyegavu, amawka ku ignes miniw ariw patahwaki.

Humawnaba kewa barewyo higeptetbe gidahan Uhokri

20 Nah kehte abektey akak ke igisavye givinkisbe. Ariku igisavye givinkis ka aynsima arakembet higeptet ayge. Araytak kehka karukri wahano. Araytakme kehka karukri wahano seyno. Heneme araytak kehka ah. Arayktakme batakka parawkam. Araytak higeptet barewyo adahan kibeyne kawihka. Araytakme henenwa adahanenwa kawihka paytrik. Timotyu, humawnaba kewa pohow higeptetbe ku pariye barewyowa gidahan Kiyavwiye Uhokri.

21Ku pahavwi miniw ariw madikte patahwaki, igi humaw kewa barewyo higeptetbe gidahan Kiyavwiye Uhokri. Ig barewvitye, ig ik adahan gikivara keh gibetki gikak. Ig ahegbet adahan kibeyne kawihka.

22Awaykemni ku pariye kote kiyavwite igkis gibetkikis miyarhaw aharit arakembet kane kabay. Pisme ka muwaka ikaw kema ignesma. Higihwanaba ariw madikte ini patahwaki. Mpiyasiniba aytontak piharaptak. Heneme hiyakemniki kibeyne pis ikin aytekihpa pihepkatak. Kamaxwanaba givitit Kiyavwiye Jesus kabayntiwa. Bateknaba gikakkis hiyeg. Pasamraknaba gikakkis. Ikawnaba kewa madikte hiyegbe ku pariye amnihswenevwi git Kiyavwiye Uhokri akak gihiyekemnikis barewbetye.

23Heneme tukuhwepnaba ariw kinetihwaki ku pariye he mahayakemnikinen ku pariye yumanene hiyakemniki nibet. Akebi inakni kinetihwaki he kehnenen hiyeg iniyak.

Amawka wis wadithebdih hiyeg gihiyekemnikis akak huwivgaki

1Tim 5.1

24Heneme pahavwi ku pariye Kiyavwiye Jesus gihiyega amawka ku ig ka iniyak. Amawka ku ig misakwa huwipegevye gikakkis madikte hiyeg. Amawka ku ig kannuh hiyeg kabayntiwa amin Uhokri gihiyekemni. Amawka ku ig kiyakniye gikakkis hiyeg.

25Ku aysaw ig wadithebdihne gihiyekemnikis hiyeg ku pariye gihiyekemnikis matekbetnene, amawka ku ig kinetihwa gikakkis akak madikte huwivgaki. Ku ig keh hene, nawenetke ig Kiyavwiye Uhokri huwitha gihiyekemnikis avigkut inyewa hiyakemniki akiw.

26Ayge nikwe igkis hawkamnihawnek akiw, igkis diyuhnek ariw ini wavitye giteyni ku pariye gikamaxwitnikis. Igkis diyuh adahan igkis kehne Kiyavwiye Uhokri gibetki akiw.

Currently Selected:

2 Timotyu 2: pluPB

Highlight

Copy