2 Joawh 1
1
Nah Joawh awahkis kabayka pimin
1Nah Joawh awahkis kabayka pimin, kiyavuno, payak gikakkis pikamkayuvwi. Yis Uhokri gikanyanvu gibetkivu. Nah batek yikak inyewa avititakwa nuyakni. Ka nahwanema batek yikak, heneme madikte hiyeg ku pariye hiyeknevwi inyewa Uhokri gihiyekemni ignes madikte batek yikak kiyesrad.
2Innewa Uhokri gihiyekemni inyewatnene innewa ku pariye keh usuh batek yikak. In ay abet uhiyekemniwiy, in misakwa ukakwiy adahan avanenekwa.
3 Kibeyne, ig Wigwiy Kiyavwiye Uhokri gikak gikamkayh Jesus Cristo gabaykis, gamnihrakis ukakwiynek. Igkis kariswehse uyakniwiynek. Igkis akka wotwiynek hiyakemniki ku pariye inyewatnene. Igkis keh wixwiy batekak pawtaknek.
4Nah ka aynsima batek awaku ku samah nah patipteke gikakkis gaytakis pikamkayuvwi nah hiyap igkis wewnenes akak Uhokri gihiyekemni inyewatnene, igkis wewnes avigkutavrik ku samah Wigwiy aya wotwiy.
Batekaknay pawtak
Jo 13.34
5Kuri nah aya pit kiyavuno, adahan yis batekak pawtak. Inakni nayapni pit in ka nukunema. Inakniwata Kiyavwiye Uhokri gayapni wotwiy ku pariye wixwiy kuwis timap ku samah akavuska hawkri.
6Ku wixwiy batekak pawtak, amun ini nikwe wixwiy ihpene Uhokri gikumadukan. Innewa gikumadukan adahan wixwiy batekak pawtak. Wixwiy kuwis timap inakni iwit ku samah akavuska hawkri.
Kinisekevutnevwi awna ku Jesus ka Uhokrima ihtikeknema
1Jo 4.1
7Kadahan ka aynsima kinisekevutnevwi muwapuw amadga inin hawkri kuwis. Igkis kinetihwa gitkis hiyeg ku Jesus Cristo ka ayta wotwiy giwntakma Kiyavwiye Uhokri, ig ka wageswa ihtikeknema kema wixwiyma. Ku yis timap pahavwi awna inakni hene, igi kinisekevutne. Ig Cristo givetunya.
8Avuriwnabay kahadbe yis ka kinikiswa git yis ka biyuksa inakni hiyakemniki ku pariye usuh kuwis ekke yit akak madikte wawaygi. Numawkan yis darih madikte ini kabayka ku kaharitne yis.
9Ku pahavwi ka misakwa akak Cristo gihiyekemni, ku ig manuke arit nawenyewa hiyakemniki akiw, igi yumahwa Kiyavwiye Uhokri ay givit. Igme ku pariye misakwa akak Cristo gihiyekemni, igi kadahan Wigwiy Kiyavwiye Uhokri ay givit piyamate gikak gikamkayh.
Ka ba yi amava kinisekevutnevwi yivinekut
10Nikwe ku pahavwi danuh atere yit adahan yikannuhten, ku ig kannuhyi amin hiyakemniki ku pariye nawenyewa ariw Cristo gihiyekemni, ka ba yi amavig yivinekut. Ine ka yi muwaka kaytwa giwn akak batekka.
11Mmanawa ku yis kaytwa giwn akak batekka, nikwe hiyeg ikiy ku yis batek akak ini gihiyekemni mbeyevye.
Nah awahkis kabayka pimin
12Nah kadahan ka aynsima inetit akiw adahan nah kinetihwene pit. Heneme nah ka muwaka akkin pit amadgatak kagta. Gikak Kiyavwiye Uhokrinek nah danuh atere pit adahan wis kinetihwa pavetunak kahadbe wis batek payak.
13Pikebyi kabayno gukamkayuvwi awahkis kabayka pimin.
Currently Selected:
2 Joawh 1: pluPB
Highlight
Copy
Compare
Share
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
