1 Pedru 5
5
Avuriwnabay Jesus gihiyegavu kabayntiwa
1Kuri nah kadahan pahat hiyakemniki yidahan yis ku pariye giwewkistenkis Jesus gihiyeravu. Nah igwata giwewkistenkis Jesus gihiyegavu ke yisbe. Nah hiyap Cristo gimiremni akakwa nuwtyak. Aysawnemenek nah hiyap gikiytani hawata payak gikak.
2 Nukebyuvwi, nah aya yit, avuriwnabay kabayntiwa Kiyavwiye Uhokri gihiyegavu ku pariye ayge yimun. Avuriwnigkis kewa pahavwi muwtohvutnebe ku samah ig avuriw givigvu kabayntiwa. Avuriwnigkis akak madikte yabivwi gidahan Kiyavwiye Uhokri. Ka ba yi avuriwgikis akakma mabivwiki. Kawnata yi muwaka avuriwgikis adahan yis aharitnema karukrima. Heneme yis avuriwgikis adahanikwa kehne kabayka gidahankis.
3Ka ba yi kabukhaw gitkis neras ku pariye ayge yiwaku. Heneme mpiksawnay wew akak kibeyne hiyakemniki giwtrikkis adahan yis humaw gikannuhtenkis kahadbe igkisme ikaw hawata ke yisbe.
4Ayge nikwe ku aysaw ig Ukivarawiy danuh, ig iki yit yitiwni ku pariye dahwa adahan avanenekwa. Ini yitiwni kewa paha iyuwtibe ku pariye kis adahan kibeyne ibukti kawihni. In kane amuwyisima ku pariye gamuwyi kane hiyak tigahkati.
Tuwatasawnabay pawtak
Mt 20.25; Mk 9.35; Lk 14.10, 18.13, 22.25; Jo 13.12; Ro 12.3, 10.16; Ef 4.2; Fil 2.3; Tiy 4.6
5Hawata nah aya yit takwavyegben adahan yis iha giwnkis yiwewkisten. Nah aya yit madikte yis Kiyavwiye Uhokri gihiyegavu adahan yis tuwatasaw pawtak. Mmanawa Uhokri gannasan awna:
“Kiyavwiye Uhokri suguh neras ku pariye kane kumadukasewkere git. Heneme ig iki gawaygikis neras ku pariye tuwatasewviye gitivut.”
6Nikwe tuwatasawnabay gitivut Kiyavwiye Uhokri ku pariye kane gidatnisima. Ayge nikwe ku aysaw ahawkanavrik danuh, ig iki yikiytani yivititnek.
Uhokri hiyak ukakwiy
Mt 6.25; Fil 4.6; Eb 13.15
7Akkanabay madikte yikiyimwihwan giwakuwit Kiyavwiye Uhokri mmanawa ig amnihwiy ig hiyak ukakwiy.
Satanas amewvari uhavu ke kawokwinebe
8Avuriwnabay yihiyekemni kabayntiwa. Wewnabay pukuhpaw gavit uvetunyawiy wavityempu gikivarakis. Mmanawa ig amewvari ke pahavwi kawokwinebe mativwevyebe ku pariye ivegvene pahavwi hiyeg adahan gaxni. Igme amewvari adahan ukawihpitniwiy.
9 Ka ba yi iki iwetrit git aynesnima. Suguhnigbay akak madikte yikamaxwan givitit Kiyavwiye Uhokri. Kiyeminanabay ku muwapuw amadga hawkri ukebyuvwiy Jesus gihiyegavu igkis hiyepnes mbeyne hawata ke yisbe.
Yihiyvan mbeyne ka adahan ayivwadima
Iz 28.27-28; 2Ko 4.16; 1Ped 1.6
10 Ka sam. Kiyavwiye Uhokri ka gamnihrasima ukakwiy. Ig humekwewiy gimkat adahan wixwiy hiyap gikiytani adahan avanenekwa givitimpi Cristo. Henewa yis hiyepne mbeyne heneme ka adahan ayivwadima. Aysawnemenek igwa Kiyavwiye Uhokri wadithebdih madiktenek. Ignewa iki yawaygi yit. Ignewa yiyawka. Ig keh yis kamaxwa givitit kabayntiwa adahan yis ka isahkis yihiyekemni aynesnima.
11 Kibeyne gidahan Kiyavwiye Uhokri. Ig ka gidatnisima adahan avanenekwa akiwka akiwkanek. Ameh.
Ka ba yi isahkiswa ariw Uhokri gamnihra
Ro 8.38; Eb 6.7
12 Nukebyuvwi, inakni aynesa nnetni yit nah annasin git ukebyi kibeyne Sílas. Nah nuvewkan ikene yawaygi. Nuvewkan nah ekkene yit ku Kiyavwiye Uhokri inyewa amnihwiy. Ka yi muwaka isahkiswa ariw ini gamnihra.
13Madikte yiyakivwi Uhokri gikanyanvu ku pariye ay Babiloniya, igkis awahkis kabayka yimin. Nukamkayh Markus hawata.
14Aytnihaknabay pawtak nudahan akak batekka. Kiyavwiye Uhokri kariswehse yiyakninek yis madikte ku pariye pahavwiwa gikak Cristo.
Currently Selected:
1 Pedru 5: pluPB
Highlight
Copy
Compare
Share
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
