1 Joawh 3

Wixwiy wageswanek Uhokriyanbetnewa

Ro 8.18,29; 2Ko 3.18; Ef 4.24; 2Ped 1.4,10

1Kibeyne, ig Wigwiy ba gibetkitenwa ukakwiy keh ig kanumwiy gikamkayuvwiy. Inyewa wixwiy kuwis humaw gikamkayuvwi. Inneki keh neras kane Uhokriyanvuma igkis ka pukuha ku samah uhiyekemniwiy kuri. Mmanawa igkis ka pukuha Wigwiy gihiyekemni.

2Nukebyuvwi kibeynevwi, ku yis hiyap wixwiy kuwis humaw Kiyavwiye Uhokri gikamkayuvwi, aysawnemenek kabayte akiw. In kote kahayakte ku samah wixwiy wageswa aysawnemenek. Heneme avim ini ku aysaw ig hiyapkiswa wotwiynek, ayge wixwiy hiyavginek ku samah gihivak ka gikiytanisima. Ayge nikwe wixwiy wageswa Uhokriyanbetnewa.

3Ku pahavwi ihpa inakni, ku ig wahepnenekwa ku aysaw in danuh, igi tukuhwene ariw givathawni takunipti kahadbe gihiyekemni avanenekwa barewbet hawata ke Kiyavwiye Uhokribe gihiyekemni.

4 Uhokriyan ka kis keh patahwaki. Mmanawa ku wixwiy keh patahwaki, amun ini wixwiy taraksene Uhokri gikumadukan. Hawata akiw ku wixwiy taraksa Uhokri gikumadukan, amun ini wixwiy kehne patahwaki.

5 Uhokriyan ka kis keh patahwaki mmanawa Jesus Cristo danuh amadgat inin adahanikwa pisenwevye akak uvathawniwiy. Igi yumahwa givathawni ay givit. Inakni kahayak huwewe wotwiy.

Ku pariye gibetki keh patahwaki, igi ka Uhokriyanma

6Nikwe ku wis pahavwiwa gikak Cristo, ka ik adahan wis tiviknene kehnene patahwaki. Ku pahavwi gibetki keh patahwaki, igi ka iveg givitit Cristo. Ig kote hiyakte gihiyekemni.

7Nukamkayuvwi, ka yi muwaka kinikiswa git pahavwinema hiyeg amadgaya inin. Ku pahavwi gibetki keh kabayka, ignewa ku pariye kibeyne hiyeg. Ig kibeyne ke Kiyavwiye Uhokribe.

8Igme ku pariye gibetki keh patahwaki, ignewa wavityeyan. Igme wavityempu gikivarakis igwa gibetki keh patahwaki ku samah akavuska hawkri. Awaku ini ig Kiyavwiye Uhokri gikamkayh danuh atan amadgat inin, adahanikwa ig pisenwevye akak wavitye gikehni.

9Ku pariye igyewa Uhokriyan, igi ka batek keh patahwaki. Mmanawa Uhokri gihiyekemni avanenekwa ay abet gihiyekemni. Ig ka ikwa adahan ig tiviknene kehnene patahwaki mmanawa igwa Kiyavwiye Uhokri ay givit.

Ku pariye kane batek gikak pahavwi, igi ka Uhokriyanma

10 Ka mahikonema adahan wis hiyak pahavwi hiyeg ba ig Uhokriyanwatma, ba kawk, ba ig wavityeyanma. Ku pahavwi ka keh kabayka, igi ka Uhokriyanma. Hawata akiw ku pahavwi ka batek gikak pahavwi, igi kawnata Uhokriyanma.

11Inwata Kiyavwiye Uhokri ginetni ku pariye wixwiy timap ku samah akavuska hawkri. Amawka ku wixwiy batekak pawtak. Henewatbaki in.

12Amawka ku wixwiy ka amiyha pahavwi kema amekene Kayihma. Igi wavityeyan mmanawa ig umehe gisamwi. Ig umehpig avatra ku samah ig gisamwi batek keh kabayka, igme batek keh mbayka. Nikwe ig amiyhevgi ig umehpig.

13 Henewatbaki gihiyekemnikis hiyeg kane Uhokriyanvuma. Ku yis hiyap ku ignes amiyha wixwiy Jesus gihiyegavu ku akak inin, ka yi muwaka wadisasaw akak ini. Henewatbaki gihiyekemnikis.

14 Wixwiyme ka henema. Wixwiy batek gikakkis madikte hiyeg. Inneki areketni ku inyewa wixwiy kuwis pese abetitak miyaka abetit dehetniki. Heneme ku pariye ka batek gikak pahavwi, igi gidukwenewa abet miyaka.

15Mmanawa ku pahavwi amiyha pahavwi, in ke wotbe ig kuwis umehpigbe. Wis hiyak ku pariye umehekevutne igi yumahwa dehetniki ay givit. Nikwe ku pahavwi amiyha pahavwi, amun ini nikwe ig abet miyaka.

Amawka ku wixwiy batekak inyewa avititakwa uyakniwiy

Jo 13.34; 2Ko 6.6; 2Tim 1.5; Eb 13.1; 1Ped 1.22, 4.8

16Ig Jesus Cristo humaw ukannuhtenwiy adahan ku samah amawka wixwiy batek gikakkis hiyeg. Nah akkite yit ku samah. Ig ka kiye givit aynesnima he ig umahkiswe udahanwiy. Kuri amawka ku wixwiy kawnata kiye uvitwiy akiw. Amawka ku wixwiy kiye nawenyewa hiyeg takunipti.

17Ku pahavwi awayg igisye ku ig hiyap gikebyi abet mbeyne, heneme ku ig pidik giwak gidahan, ba Kiyavwiye Uhokri gamnihra ay givit? Yuma.

18Nukamkayuvwi, uyay batekak inyewa avititakwa uyakniwiy. Uyay amnihak pawtak. Amawka ku wixwiy ka batekak akakma unetniwiynenwatma akakma uhepkawiynenwatma.

Uhokri hiyak ku pariye igyewa Uhokriyan

2Tim 2.19

19Ku wis amnih hiyeg, innebaki akkaw ku wis igyewa Uhokriyan. Nikwe wis ka kiyimwihwa avit uyakni. Wis hiyakni ku wis ay giwaku Kiyavwiye Uhokri.

20Ku wis kiyimwihwa avit uyakni, ku wis ivegmina uhiyekemni baki wis Uhokriyanwatma, ka sam. Ig Kiyavwiye Uhokri hiyakte wow. Ig hiyak madikte ku pariye ay abet uhiyekemni.

Ku wis ihpene Uhokri gikumadukan, ig iki wot ku pariye wayapni git

Jo 15.7; Tiy 5.16

21Nukebyuvwi kibeynevwi, ku wis ka kiyimwihwa avit uyakni, ku wis hiyakni kabayntiwa ku wis Uhokriyan, nikwe wis kiboka piriyepkaw git Kiyavwiye Uhokri.

22Ku pariye wayapni git, ig iki wot, mmanawa wis ihpene gikumadukan wis kehne gibetki.

23Nah akkite yit ku pariye inakni Uhokri gikumadukan. Pahat gikumadukan adahan wixwiy kamaxwa givitit gikamkayh Jesus Cristo. Pahatme adahan wixwiy batekak pawtak ku samah ig Jesus Cristo aya wotwiy.

24Ku pariye ihpa inakni gikumadukan, igi pahavwiwa gikak Kiyavwiye Uhokri. Igme Kiyavwiye Uhokri pahavwiwa gikak ner pahavwi. Ini ku samah ig kawihkis Gitip uvititwiy innebaki akkaw ku ig pahavwiwa ukakwiy.

Currently Selected:

1 Joawh 3: pluPB

Highlight

Copy

Compare