Sefania 3
3
Jerusalam kerekere wa
1Bwɛjen baa dɛ do ba nɛra
hɔhɔrɔwa,
dɛ ɛ deŋnekpeɡ tena dɛɛ ɛ
wedoŋa la, ó bwɛɛlɛ!
2O nɛra ta Korowii be noɛ,
ba ta sɛɛh dɛ teŋɛ toɡra
waa toɡ ba la ta.
Ba ta ba te kpɔe dawɛ
Korowii nɛ,
kɛɛ dɛ soŋe chae le o be.
3Bwɛjen la nomonome do
kɛŋɔ nyujentena
aa dɛ dooɡe lɔŋɔre ken,
o koranar ɡe do kɛŋɔ
ɡboli aa lawɛ ol jɔmɔra,
aa wola won haŋre dɛ́ ɡel
hoɡ ɡba ka tɔɔ per o ta.
4O keamere waa ta kasinteŋ
dɔe, ba dɔ mbarafo.
O sɔfore kpɔ doŋa dɛɛ kah
kwaa aa do ɡoroŋ,
dɛɛ ɡole Korowii Mmara
ɡɛ baa dɛ nyin.
5Korowii ta lɔ bwɛjen la bini,
o waa toɡrɔ,
waa wola wedoŋa nyin.
Tɔpere bɛlbwaa wɛɛ di o nɛra
kasinteŋ, waa wola habɔɔ
le saŋ bɛlbwa,
kɛ ane a bwa, sihiih aa
wechɔɡ-ɛɛra baa lɔ
o ta la kpo.
6Korowii ŋɔ, “N chɔɡ
harɛre bwa nɛra
ne ba bwɛjena, dɛ kuuɡi
danjwɛɛre baa maa bara,
ne a dejaŋa bwa
a berɛ dimɡbeeni.
Bwɛjena la chɔ pɛɛ,
nɛra toole a fɔɡbaahna,
nomɛlbwa ta kae kpa.
7N ɛ n liire kɛŋɔ n nɛra fe ɛɛ
che anɔ taa dɛ́ tɛ mɛ duure,
dɛ́ sɛh teŋɛ toɡra
maa dɛ toɡ ba la ta,
dɛ bɛ deŋnetɛra
maa kpɔa toɡ ba la soh.
Kɛ buɡ nɔ ta ba we-ɛɛla
berɔ kaa ba webena la ta.”
8Anomanta, Korowii ŋɔ,
“Dɛɛ kpaa mɛ
ka tel tɔpere la maa ba bol
harɛre nɛra wa.
N ɛ n liire kɛŋɔ
mɛɛ boa harɛre nɛra,
ne koranar
ne ba harɛre nyoaa,
ásɛ dɛ kpɔ n bandia kohona
ba ta ba nɛ.
N bwaawee ɛɛ ir ba nɛɛ
kohonaa, ásɛ dɛ fuh
harɛ nɔ bwa kɛŋɔ nii ken.
9A ɡɛ saŋ la, mɛɛ beɡre harɛre
nɛra bwa liiree, ásɛ dɛ ɡel
ba ɡel voɡa toma
dɛɛ yerɛ n sɔn ɡbo.
Ba bwa ɛɛ pɛ nyoa
dɛɛ tom mɛ.
10N nɛra baa lɔa peɡre ka do
Itiopia harɛ bojaŋ la ɛɛ
ba saraha kwaa nee
ba tɛ mɛ, dɛ́ baa tom mɛ.
11Gɛ tɔpere la, maa ɡel sihiih
kpo heyaa
he deŋnekpeɡ haa ɛɛ mɛ la
waa kpa.
Mɛɛ le mbarafo tena bwa nee
n bwɛjen nɔ ta,
ásɛ bɛlbwa ɡe aa won ɛɛ mɛ
sisawaa n bweɡoroŋ
n Dea aa chɔŋɛ
o ta la ta kpa.
12Nɛra ba waa aa pwɛra
ne nɛra baa kpɔ ba te
dawɛ n nɛɛ
laanee dɛ́ so bela,
ásɛ ba ba n be, ń cha ba.
13Israel tena baa ka harɛ
la ta la aa wechɔɡaa ɛ,
kɛɛ dɛ́ teŋe nyosone,#Wep 14:5
kɛɛ dɛ́ neɡre ba dɔŋa.
Baa dɔ komɛlbwa baa dɛ
nyinii ba deŋna sɔɔh ba,
baa wola nomɛlbwaa ɔmɛ.”
14Israel tena, hé ɡo yela
silɛɛ ne, dɛ́ kpɔ takpeɡ
kpɛɛ Korowii.
Jerusalam tena,
hɛ́ɛ hɛɡre bambile bwa ne!
15Korowii ɡel he deŋne tɛra,
dɛ le he dɔma bwa ne.
Korowii waa ɛ Israel kooro la
ja he nɛ.
Komɛlbwa toole
he ɔmɛ kpa.
16Tɔpere bɛl dɛ ba ásɛ ba bol
Jerusalam tena be ŋɔ,
“He bɛ ɔmɛ,
Bwɛɡoroŋ Saayɔn tena.
He bɛ ɡel he bwara hwah.
17Korowii haa dɛ tomɔ la
ja he nɛ.
O dɔ kpeɡri dɛ́ won lɛ heya.
O sie ɛɛ lɛ he nɛɛ kohonaa,
dɛ́ che o nyina ta tɛ heyaa
mkpafale.
Wɛɛ ɡo yelaa
dɛɛ hɛɡre he wa.
18O sie ɛɛ lɛo
kɛŋɔ nɛra aa dɛ di tɔpejen
bɛl dɛɛ lɛ ba sie la ken.”
Korowii ŋɔ,
“N ɡelɔ he wenaale la
ba a jaɡa, dɛ laa waa
aa dɛ do heyaa sihiih
ɡe kpɔ.
19Saŋ bɛl dɛ ba ń tɛr nɛra baa
dɛ do heyaa hɔhɔrɔwa la
deŋne.
Mɛɛ lɛ banɔ la ba peri
aa serewaa,
dɛ́ berɛ ba banɔ baa laɡ ba
kaa harɛfala ta la ne dem.
Mɛɛ ɡeloo banɔ la ba fa aa
di sihiih la berɛ dɔ duure,
ásɛ harɛ nɔ ta nɛra bwa
kpɛɛ ba.
20Saŋ bɛl dɛ ba ásɛ n boa he
nɛra baa peɡra nyoa,
dɛ́ ba ba ne dem.
Mɛɛ ɛ heyaa nɛnjenaa,
ásɛ harɛ nɔ ta nɛra bwa
kpɛɛ heya,
dɛ́ ɡel he berɛ dɔ kondɔɔh ja.
Men Korowiirii bola.”
Currently Selected:
Sefania 3: mzw
Highlight
Copy
Compare
Share
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
