Rom 7

Hahmor ne yal mmara wa

1Yabala, he jemɛ mmara wa, anomanta, he jemɔ kɛ harɛ ta ɡboo mmara dɔ kpeɡri nɛra nɛ. 2Haah waa yala la, dɛ o jaa ta sewaa, hahmor mmara vɔrɔwo, o ɛ o jaa la ɡbo haah. O jaa sewɔ te naa, dɛ hahmor mmara ta on vɔrɔwɛ kpa. 3Kɛ dɛ o jaa ta soɡe le, asɛ o ne banfale ɡe berɛ do le ja aa, baa yerɔ hanjwamanee. Dɛ o jaa sewɔ te naa, dɛ hahmor mmara ta on vɔrɔwe kpa. O yalɛ banfale aa, dɛ o ta jwamane bɔe.

4Yabala, Yeesu Kristo seo waa sewa la, a ɛo kɛŋɔ he ne onee pɛa sewɛ. Anomanta, he toole Mmara lɔɡa. Mmara la aa kpeɡri di he nɛɛ kpa kɛŋɔ haah jaa sewaa, waa wola toole hahmor Mmara lɔɡa kpa la. He berɔ ɛ Yeesu Kristo waa ir seo ta la nɛra, ásɛ dɛ won ɛ Korowii toma, he waa dɔ tɔnɔ o be. 5Saŋ la yaa lɔ wechɔɡa ya nɛwɛnyini mar nɔ wechɔɡa aa suu nɔ aa dɛ nyin la ta dɛɛ ɛ la, dɛ Mmara la dɛ ir ya bambile wechɔɡa ɛɛ ta, asɛ wobɛlbwa yaa dɛ ɛ la, aa kaa ya ne seo ta. 6Taraken te ya fooro, Mmara la ta yaa dɔe kpa, dɛkalkɛŋɔ ya ne a ɡɛ Mmara nɔ o fa aa kpɔ yaa berɛ yoma la toole wobɛlbwa bini kpa. Ya ɛo kɛ yaa serewa. Yaa Mmara ŋwɛnɛ ta kpɔe dɛɛ tomɛ Korowii kpa. Korowii Domadɛɛɡe laanee dɛɛ baɡle yaa ŋwɛnɛfale yaa tomɛ Korowii taraken.

Mmara ne wechɔɡa wa

7Aa do ɡɛ nɔ, dɛ Mmara la aa were kɛɛ? O wer, kɛ on ɡela n jemɛ kɛŋɔ komɛl lole baa yerɔ wechɔɡa. Dɛ Mmara la fe ta ŋɔe ŋɔ nɛwɛnyini bɛ ɡel o sie beɡre o dɔŋ kon aa, n fe aa jemɛ kɛŋɔ sibeɡra aa were. 8Liichɔɡa nao kɛŋɔ aa wonoo che Mmara Korowii aa doa la ta, dɛ́ ɡel n ɛ wechɔɡa. Liichɔɡa aa na ɡɛ la, a cheɡɛ Mmara la ta dɛ ɡel n sie ɛɛ beɡre komɛlbwa ta. Dɛ mmara toole naa, wechɔɡa ta kpeɡri dɔe. 9Mmara aa wola toole la, dɛ wobɛlbwa toole n baŋa n so. Kɛ mmara aa bala la, belaa liichɔɡa ɡe ir, asɛ n na kɛŋɔ n sewɔ. 10Mmara o fe aa chɛ kɛ ó ba mkpa ne la, seo nee o ba. 11Liichɔɡa nao kɛŋɔ a dɔ bɔr name. Mmara taa a che dɛ neɡ mɛ, dɛ taɡ mɛ do seo ta.

12Ya jemɔ kɛŋɔ Mmara la ɛ kondɛɛɡe, asɛ o bini wobɛlbwa ɡe toɡre dɛ do wer. 13Aah dɛ kon waa wera nɔ, o taa a berɛ che mɛɛ ba seo dɔe yaa? O ta laa. Liichɔɡaa cheɡɛ kon waa wera ta dɛ ɡel n dɔ seo, dɛ baɡle o dor ásɛ n jemɔ kɛrɛdɛ. Mmara la taa a che asɛ ya jemɛ kɛŋɔ liichɔɡa doŋo, aa wola were kwaraa.

14Ya jemɔ kɛŋɔ Korowii Domadɛɛɡe bee Mmara la le dɛ do wer. Kɛ n te, nɛwɛnyinii men, anomanta, wechɔɡa yaɡ mɛ. 15Waa maa dɛ ɛ kwaraa la nɔ, n ta wone jemɛ waa aa ɡela mɛɛ ɛa, dɛkalkɛŋɔ maa waa n fe aa dɛ nyin ɛɛ la ɛ. Waa maa wola nyin laanee mɛɛ ɛ. 16Maa wola waa maa dɛ ɛ nyin dɛ ɡee ɛa la nɔ, a baɡlɔ kɛŋɔ n sɛoh kɛŋɔ Mmara la wer. 17Anomanta, n ɡbaɡba laa dɛɛ ɛ a ɡɛ wechɔɡa nɔ. Liichɔɡa aa lɔ n bini la, an ɡela mɛɛ ɛa. 18N jemɔ kɛŋɔ liidɛɛɡa bɛlbwa toole n bini. N nɛwɛnyini mar nɔ wechɔɡa aa suu nɔɔ n ŋɔ nɔ. Maa dɛ ŋɔ nɔ, n dɛ nyin wedɛɛɡa ɛɛ, kɛ maa won an ɛ. 19Wedɛɛɡa maa dɛ nyin ɛɛ la, a laa mɛɛ ɛ. Wechɔɡa maa wola a ɛɛ nyin la, anee mɛɛ ɛ. 20Dɛ waa maa wola ɛɛ nyin la, dɛ anee mɛɛ ɛ aa, a baɡlɔ kɛŋɔ n ɡbaɡba laa dɛɛ ɛa kpa, dɛ liichɔɡa aa lɔ n bini laanee dɛɛ ɛa.

21Waa maa naa laanee kɛŋɔ n dɛ nyin wedɛɛɡa ɛɛ yaa, dɛ komɛl ŋɔ n bɛ ɛ. 22N bambile fe lawɛ Korowii Mmara la ta teŋa, 23kɛ n bwadabii ɡe berɔ do dor bɛl. O dɛ vuuɡi n bambile. N bwadabii aa Korowii Mmara la aa lɔ n bambile bini la ta teŋa nyin. Liichɔɡaa ɡela n bwadabii aa wola Korowii Mmara la ta teŋa nyin nɔ. A ɡɛ liire nɔ yaɡ mɛ yom. 24Akwe! Bɔkwa waa na mɛ ken ɔ? Umee dɛ́ lɛɛ mɛ bwadabii nɔ waa dɛ kaa n ne seo ta nɔ nɔn ta nɔ? 25Korowii jam. Ya Dɔɔ Yeesu Kristo alaworomɛ, Korowiirii dɛ́ lɛɛ mɛ.

Anomanta, n bambile bini te, Korowii Mmara taa mɛɛ teŋɛ. Kɛ n nɛwɛnyini mar wechɔɡa aa suu nɔ be pera te, wechɔɡa taa mɛɛ teŋɛ.

Currently Selected:

Rom 7: mzw

Highlight

Copy