Wepila 4
4
Kookara waa lɔ Korowii be nyundua
1Anɔ bwa habɔɔ la, n nao kɛŋɔ doonyoa bɛl pilo ta Korowii bwɛɛ la ta, dɛ no taa bɛl n fa aa noo kɛŋɔ bɛla la.#Wep 1:10 Taa la ŋɔ n be ŋɔ, “Teeh ba bonɔ ń baɡle waa aa dɛ ba ɛɛ anɔ nɔ habɔɔ.” 2Buɡ la ta, Korowii Domadɛɛɡe la den ir n nɛ, asɛ n na kɛŋɔ kookara bɛl cheɡɛ nyundua, nomɛl so o ta. 3Naate waa soɡe o ta la dɛ nyɛɡle al-al kɛŋɔ bwedɛɛɡa answɛɛma aa dɛ nyɛɡle. Dɛ bwaala deŋɡare bɛl bar o kookara la, dɛ do kɛŋɔ bwelwɛɛne ane aa dɛ nyɛɡle. 4N na kookane fifraanɛ dɛ anaarɛ a bar o kookara la cheme. Nomonome fifraanɛ dɛ banaarɛ do laalapoŋa dɛ pi suuɡaswɛm kooɡbɛrɛre dɛ so a ta.#Ɛse 1:5 5Dɛ kookara la waa lɔ baah ta la bɔr dɛ ɡbɔɡre kɛŋɔ, bwaala aa dɛ nyɛɡle dɛɛ jiɡri dɛɛ kɔɡre la. Kandere anuanɛ ɡe cheɡɛ kookara la sie dɛɛ hɔ. Korowii Domare anuanɛ laanee. 6Kookara la sie la ɛo kɛ mpo aa chɔa dɛ do ɡereŋ kɛ diɡi ken.
Hweera kwaa anaarɛ ane aa dɔ kena cheɡɔ bar kookara la, bɛlbwa cheɡɛ o bampera beŋkpoŋ ta. A dɔ sibie a siini bobɛlbwa ne a habɔɔne bobɛlbwa. 7Hweera kwaa nɔ bɛl do kɛŋɔ nyujente, bɛl do kɛŋɔ nabal, bɛl siebɔr do kɛŋɔ nɛn, bɛl ɡe do kɛŋɔ kee aa paɡri o kena dɛɛ ir la ken. 8Bɛlbwa dɔ kena anumɛl, dɛ dɔ sibie a bwara bobɛlbwa ne a kena lɔɡre ɡba. A lɔ o be chɔɔ ne jwaana dɛɛ kpɛɛro aa wola ɡel bwa, dɛɛ ŋɔ,
“Korowii Haa Ɛ Kpeɡri Bwa Dɔɔ
dɛ do le saŋ la dɛ ba le fini,
dɛɛ ba le doe saŋ bɛlbwa la,
he do ɡoroŋ noo, he do ɡoroŋ kɛrɛdɛ.”#Aes 6:2-3; Wep 1:4
9Saŋ bɛlbwa hweera kwaa anaarɛ la aa kpɔ jam dɛɛ tɛ naate waa soɡe kookara la ta dɛ do le saŋ bɛlbwa la, dɛɛ duuru, dɛɛ tɛo jirima la, 10dɛ nomonome fifraanɛ dɛ banaarɛ la laa ba kooɡbɛrɛre pili bil kookara la sie dɛ ɡuŋi naate waa soɡe kookara la ta dɛ do le saŋ bɛlbwa la, dɛɛ duuru ŋɔ,
11“N Naa Korowii haa dɔ komɛlbwa la,
he chɛ kɛŋɔ nɛra bwa tɛɛ jirima dɛ́ duuri,
dɛ́ sɛh kɛŋɔ hen dɔ kpeɡri bwa,
dɛkalkɛŋɔ henee ta komɛlbwa,
he tetoora taa a che a do le.”
Currently Selected:
Wepila 4: mzw
Highlight
Copy
Compare
Share
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
