Wepila 19

Korowii kpɛɛra

1A habɔɔ la, n no waane Korowii doa kɛŋɔ nɛnlaa tenten ɡbɔɡa baa si,

“Hé kpɛɛ N Naa Korowii! Onee lɛ nɛwɛnyina,

on chɛ jirima, on dɔ kpeɡri bwa,

2dɛkalkɛ ɡɛ waa bol waa dɛɛ pa bole la

ɛ kasinteŋ dɛ toɡre.

O pa hanjwamane tenten la waa ɛ wedoŋa,

dɛ chɔɡ harɛ nɔ la bolchɔɡe,

dɛ tɛr o deŋne dɛ kpɔ bɔ o bonɔɔna ne toli

waa kpoo ba la kem.”#Mma 32:43

3Ba berɔ si ja,

“Hé kpɛɛ N Naa Korowii! Babelɔn chuu

ɛɛ dɛɛ kaa nyundua saŋ bɛlbwaa.”

4Nomonome fifraanɛ dɛ banaarɛ la ne hweera kwaa anaarɛ la ɡuŋo dɛɛ duu Korowii waa soɡe o kookara ta la, dɛɛ si,

“Aamen. Hé kpɛɛ N Naa Korowii!”

5Asɛ taa bɛl le kookara la ta dɛ ŋɔ,

“He nɛra haa ɛ N Naa Korowii

bonɔɔna ne o toli la, hɛ́ɛ tɛo sɔn.

He bini nɛŋɡwɛɡra ne nɛnjena

haa dɛ ɔmɔ bwa, hɛ́ɛ tɛo sɔn.”

6N berɔ no nɛnlaa tenten baa dɛ bol waa kɛŋɔ chuubu aa dɛ si la, a berɛ do kɛŋɔ bwaala aa dɛ kɔɡre kohona la. Ba ŋɔ,

“Hé kpɛɛ N Naa Korowii!

Korowii Waa Ɛ Koranar Bwa Kooro la dɛ di kora.

7Hé ɡel ya sie lɛ ya hɛɡre kohona. Yá tɛo sɔn,

dɛkalkɛŋɔ Pebie la hanfale lawa telo.

O haah ɡe kpɔ o te cheɡ.#Aes 61:10

8Ba kpɔ yapondɛɛɡe kpelkpel tɛo ó tɔ.”#19:8 Yapondɛɛɡe la cheɡɔ tɛ Korowii nɛra ba wa aa toɡra, wedɛɛɡa baa ɛa wa.

9Anee nyundua torome la ŋɔ n be ŋɔ, “Chwerɛ waa nɔ bil. Nɛra baa yer ba ŋɔ bá ba di Pebie la hanfale kwaa la na som,” dɛ́ berɛ ŋɔ, “Korowii wobolee, a ɛ kasinteŋ.”

10Belaa n ɡuŋi o sie, dɛ fee ŋɔ n duuru, asɛ o ŋɔ n be ŋɔ, “Bɛ ɡɛ ɛ. N ne hen ne he bala la baa lawɛ Yeesu waa bini la bwa ɛ o bonɔɔna. Korowiirii chɛ kɛ he duu. Yeesu waa waa baɡla laanee ɛ keamere la bwa wobol.”

Nɛn waa soɡe jaaɡɔpoŋ ta wa

11Asɛ n na kɛŋɔ nyundua aa pila, jaaɡɔpoŋ bɛl le. Nɛn waa soɡe o ta la, ba dɛ yerɔ Kasinteŋ Te, o waa do Goroŋ. O dɛ bol nɛra waa kasinteŋ ne, dɛɛ yo laa aŋwɛnɛ ta. 12O sibie do kɛŋɔ ninlao ken. O pi kooɡbɛrɛre a warɛ pirim. O sɔn bɛl dawɛ o nɛ, nomɛlbwa aa wola sɔn la jemɛ nemenɛ o ɡbo. 13O sɔn bɛl ɡee Korowii Nyoa Wobol. O tɔ yal bɛl baa kpɔa li chal. 14Nyundua dɔm baa dɛ la laa do yapondɛɛɡa aa wera, dɛ so jaaɡɔpoŋa ta dɛ teŋɛ o nɛ. 15Asɛ tokobii waa nyɛɡa ɛɛ le o nyoa, o kpɔ dɛɛ ba harɛ ta nɛra bwa yoi, dɛ́ pɔ ba nɛ. Wɛɛ nyiŋi ba nɛɛ kpeɡri ne aŋwɛnɛ taa, dɛ́ ɛɛ ba kɛŋɔ baa dɛ sa daa nɔna baa kpɔa dɛɛ ɛ sen ta a nee ɛɛ le la. Korowii Waa Ɛ Kpeɡri Bwa Dɔɔ bandiaa a nee la.#Yel 2:9 16Sɔn bɛl dawɛ o yal ne o hwii ta. Gɛ sɔn laanee koranar bwa kooro ne dɔɔranar bwa dɔɔ.

17N berɔ na nyundua torome bɛl o che wee ta, dɛ kpɔ takpeɡ ŋɔ jumbii aa dɛ ɡah nyundua bwa be ŋɔ, “Hé bwa ba cheme Korowii kondikonjena la mun. 18Koranar ne soojanomonome, ne nɛnjena, ne jaɡre ne a dɔɔranar, ne nɛra bwa, ba bini banɔ la baa dɔ ba te ne yoma, ne nomonjena, dɛ bechale bwa serewɔ. Anomanta, hé ba di ba ola.”

19Belaa n na olchɔɡe la, ne harɛ ta koranar, ne ba dɔm aa kpɔ ba te dɛɛ ba, dɛ́ ba yo naate waa soɡe jaaɡɔ ta la ne o dɔm. 20Kɛ ba lawɛ olchɔɡe la, ne keamechɔɡe la o fa aa dɛ ɛ wejena dɛɛ tɛ olchɔɡe la, dɛɛ neɡre nɛra baa dɔ olchɔɡe la nso dɛɛ tomɛ kon baa mao o do kɛ olchɔɡe la. Ba kpɔ ba bwa ne ba siweela ka ta bela nii ne jebɔrɔwe aa yɛɛra chɔ kɛŋɔ moo dɛɛ fuh.#Wep 13:1-10 21Naate waa soɡe jaaɡɔ ta la kpɔ tokobinyɛɡ waa le o nyoa ta la kpoo olchɔɡe la nɛra baa kaa la, asɛ jumbii la bwa di ba ola ɡɛ aa wona.

Currently Selected:

Wepila 19: mzw

Highlight

Copy

Compare