Wepila 17

Haah bɛl ne olchɔɡe bɛl wa

1Belaa nyundua toroma banuanɛ baa kpoŋe loɡa anuanɛ la bɛl ŋɔ n be ŋɔ, “Ba ń baɡle ɡɛ Korowii aa dɛ ba jwamane te tenten la deŋne tɛra. O soɡe neerare nyoo. 2O ne harɛ nɔ ta koranar bwa di sɛm. O wedoŋa la ɛo kɛŋɔ sen, asɛ o kpɔ tɛ harɛ nɔ ta nɛra ba nyɔ dɛ dɛɛ.”

3Belaa Korowii Domadɛɛɡe ir n nɛ, asɛ nyundua torome la kpɔ mɛ kaa pua hɛŋle ɡbo harɛ ta, asɛ n na haah bɛl o so olchɔɡe bɛl nɛ. Olchɔɡe la swɛɛrɔ dɛ dɔ sɔnchɔɡa o bwa, a bwa ɛ chɛɡa dɛɛ yaɡɛ Korowii. O dɔ nyuune anuanɛ, o nyeɡlare ɡe ɛ fi. 4Haah la di toli dɛ do laaladɛɛɡa, ane swɛɛ a sie do ɡimeɡime, ane ɡe swɛɛ peihpeih dɛ do wer. O do baŋa kwaa ne deŋna kwaa ne nɔnloɡa baa kpɔ suuɡaswɛm ne bwedɛɛɡa bwa soo siwi ɛa, dɛ kpoŋe suuɡaswɛm luwee, wedoŋa ne jwamane we-ɛɛla suu. 5Ba chwerɛ sɔn bɛl pɛl haah la tile ta. O ɛ sɔn o mun aa sɔah. Sɔn laanee babelɔnjen, jwamane tena ne harɛ nɔ ta wedoŋa bwa nya.

6N na haah la kɛ waa dɛɛra. Korowii nɛra ba wa aa toɡra dɛ teŋɛ Yeesu nɛɛ ba koh a waa kpoo ba la chalee o nyɔ dɛ dɛɛ.

Maa nao la, n nyoa kpoo taeh. 7Nyundua torome la pɛɛ mɛ ŋɔ, “Ɛrɛɛ he nyoa kpo nɔɔ? Mɛɛ pili haah nɔ ne olchɔɡe la waa soɡe o ta o dɔ nyuune anuanɛ ne nyeɡlare fi la waane aa sɔah binii baɡle. 8Olchɔɡe la haa nao la, o siwi fa lole. Kɛ taraken te o siwi toole kpa. O dɛ ba teehna dɛ́ le Bɔnsam Bɔluŋ la bini, dɛ́ la Korowii ka chɔɡo. Nɛra baa lɔ harɛ nɔ ta Korowii aa wola ba sɔna chwerɛ do Mkpa Tɔn la bini nyundua ne harɛ mumpar bwa la, ba nyoa ɛɛ kpoo ɡɛ saŋ baa na olchɔɡe la kɛŋɔ o fa aa lole waa wola berɛ do le kpa dɛ berɛ le la.

9Dɛ he ta wejema dɔe yaa, haa won no waa nɔ mun. Olchɔɡe la nyuune anuanɛ la cheɡɔ tɛ bwejena anuanɛ. A taa haah la so. A berɔ che tɛ koranar banuanɛ ɡe. 10Ba bini banue toole kpa. Bɛl ta dɛ di o kora. Bɛl ɡe ta lole, o ta dii mɔɔ. Dɛ o baa di aa, waa kora taa biɡri. 11Olchɔɡe la o fa aa lole waa wola berɛ do le kpa la, o ɡe ɛ kooro nuatorote dɛ ja banuanɛ la nɛ. O dɛ ba kaala Korowii ka chɔɡo.

12Nyeɡlare fi haa naa la cheɡɔ tɛ koranar fi baa wola kora dii mɔɔ. Ba tɔpere telaa, baa di koraa dɔŋhwere beŋkpoŋ ɡbo. Ba ne olchɔɡe la bwaa dɛɛ ba pɛɛ di kora. 13Koranar la bwa ɛɛ ɛ liire beŋkpoŋii, dɛ́ kpɔ ba kpeɡri bwa tɛ olchɔɡe la. 14Ba ne Pebie la ɛɛ yo laalee, ásɛ Pebie la ne nɛra waa lee ba, dɛ kpɔ ba teŋɛ o nɛɛ ba waa dɔ kasinteŋ la pɔ ba nɛ, dɛkalkɛŋɔ onee Dɔɔranar Bwa Dɔɔ dɛ ɛ Koranar Bwa Kooro.”

15Nyundua torome la ŋɔ n be ŋɔ “Neerare la haa naa kɛŋɔ jwamane te la soɡe a nyoo la cheɡɔ tɛ wobol te bɛlbwa nɛra baa lɔ harɛ nɔ ta bobɛlbwa. 16Nyeɡlare fi la haa naa a che tɛ koranar fi la ne olchɔɡe la ɛɛ hah hanjwamane laanee, dɛ́ foo o bwara komɛlbwa, dɛ́ ɡelo dakpaŋ ɡɛ. Baa chwe o olii, ásɛ dɛ fuh o kabora, 17dɛkalkɛŋɔ Korowiirii kpɔ ɡɛ do ba bambile bini kɛŋɔ bá ɛ waa waa dɛ nyin, dɛ́ ɡel ba ɛ liire beŋkpoŋ, dɛ́ kpɔ ba kpeɡri tɛ olchɔɡe la ó di ka tel kɛŋɔ waa Korowii aa bola la aa ɛa. 18Haah la haa nao la cheɡɔ tɛ bwɛjen la waa dɔ harɛ nɔ ta kora bwa la.”

Currently Selected:

Wepila 17: mzw

Highlight

Copy

Compare