Yela 89
89
Kooro Devid ne Korowii fɔo baa fɔwa
Esera te Etan yel
1N Naa Korowii, mɛɛ ɡo
he nyina aa wola jaɡa dɔe
bwa la yelee dɛɛ bol
he waa aa dɔ kasinteŋ la
saŋ bɛlbwa.
2Mɛɛ boloo ŋɔ he nyina
aa wola jaɡa dɔe bwa,
cheɡɔ kiŋkiŋ saŋ
bɛlbwa dɛɛ la.
He waa dɔ kasinteŋ
saŋ bɛlbwa,
ɡɛ nyundua aa lole
saŋ bɛlbwa la.
3He ŋɔ, “N ne nɛn
maa leo tɛ n te la fɔwɛ fɔo.
N baɡɛ n bonɔɔ
Kooro Devid nyoa ŋɔ,#1We 17:11-12
4‘He naanaree mɛɛ ba ɡela
bá di kora saŋ bɛlbwa,
dɛ́ ɡel he kora che kiŋkiŋ,
ka tel he naanar baa
ka ba bwa nɛ.’ ”
5Kwaa aa lɔ nyundua
dɛ kpɛɛ he nyokpowe-ɛɛla,
nyundua toroma ɡe ɡo yela
dɛɛ kpɛɛ he kasinteŋ haa
dɔa.
6N Naa Korowii, nomɛlbwa
toole dɛ do nyundua
kɛ hen,
koŋkwaa aa lɔ nyundua la
bini bɛlbwa ta hen tele.
7Nyundua toroma bwa
chemaa,
hen Korowiirii do ɔma
kohona,
a bwa dɛ ɔmɛ, dɛ kpɔ
duure dɛɛ tɛɛ.
8Korowii Waa Ɛ Koranar Bwa Kooro,
umee dɔ kpeɡri kɛ hen ɔ?
N Naa Korowii, he waa dɔ
kasinteŋ wobɛlbwa ta.
9Mpo nehɛma dɛ ta kohona
naa,
henee dɛɛ di kpeɡri o ta,
he wono ɡel wɛɛ hel.
10He kpo oljen#89:10 Oljen nɔ ɛ saŋ la oljen bɛl baa dɛ yerɔ Rahab. waa lɔ mpo ta,
he kpeɡri nee he pɔ he
dɔma nɛ.
11Nyundua ne harɛ bwa
ɛ he kwa,
henee ta harɛ
ne komɛlbwa aa lɔ o ta.
12Henee ta weekaŋle
nyunduabɔr,
ne weekaŋle harɛbɔr.
Tabɔ ne Hɛmɔn Bwejena
ɡo yela
dɛɛ kpɛɛre kɛŋɔ nɛra
aa dɛ ɡo yela ken.
13He kpeɡri kan,
he dɔ bokpeɡa ɡe kohona!
14Waa aa toɡra ne waa bola
dɛ́ pa bole aŋwɛnɛ ta,
nee hɛɛ di kora.
Nɛnnyin ne kasinteŋ ɡboo
he kpɔ dɛɛ ɛ he wa.
15Nɛra baa ɡo yela
dɛɛ kpɛɛre,
ne banɔ la baa dɛ valɛ bɔr
waa chaah he sie la,
ba na som.
16Ba dɛ hɛɡre he waa
saŋ bɛlbwa,
dɛɛ kpɛɛre toɡra haa toɡra
wa.
17Henee tɛɛ ba he kpeɡri
ne jirima kohona,
he cheɡɛ he nyina ta
dɛ ɡel ya pɔ ya dɔma nɛ.
18N Naa Korowii,
henee dɛɛ tɔ yaa ɡbemɡbe,
henee Israel Nɛŋɡoroŋ,
dɛ le ya kooro tɛ yaa la.
Korowii nyoa waa baɡɛ Kooro Devid
19N Naa Korowii, saŋ la he pili
he waa bini
baɡle he nɛndɛɛɡa ŋɔ,
“N tɛ banyoo bɛl kpeɡri,
n kpɔ kora tɛ nɛn maa
leo cheɡ le nɛra bini.
20N fuɡe noo aa do ɡoroŋ
do n bonɔɔ Devid nyu ta,
dɛ cheɡo kora ta.#Weɛ 13:22
21Mɛɛ ja o nɛɛ saŋ bɛlbwaa,
dɛ́ chao dɛɛ tɛo bokpeɡa.
22O dɔma aa won yoo,
dɛ́ lawɔ do ba lɔɡa,
nyubinikpeɡ te bɛlbwa
aa won pɔ o nɛ.
23Mɛɛ lɔ o dɔmaa bil,
dɛ́ kpo nomɛlbwa waa
haoh.
24N nyina aa wola jaɡa dɔe la
nee mɛɛ ba o nyina,
ásɛ o che n sɔn ta pɔ o bala
nɛ.
25Mɛɛ ɡeloo o harɛ do kan,
le Mɛdetereenea Mpo ta
ba kaa Yufretis Moo ta.
26Devid ɛɛ yer mɛɛ ŋɔ,
‘Henee n Mɛɛ
ne Korowii maa dɛ tomɛ,
he do kɛ Bwetal maa
chwaa baa marɛ hɛɛ lɛɛ
mɛ.’
27Mɛɛ leo cheɡ tɛ n te
kɛ n bibanloɡle,
ó ɡwaa koranar bwa
baa lɔ harɛ nɔ ta.
28Mɛɛ ɡeloo n nyina
do o nɛɛ saŋ bɛlbwa,
ásɛ n ne o fɔo yaa
fɔwɛ la bɛ chɔɡ bwa.
29O naanar ɛɛ dɛɛ di koraa
saŋ bɛlbwa dɛɛ la.
O kora dii ɛɛ cheo kiŋkiŋ
saŋ bɛlbwa,
ɡɛ nyundua aa lole
saŋ bɛlbwa nɔ.
30Kɛ dɛ o naanar vɛh
me Mmarare ta teŋa,
dɛ vɛh ɡɛ maa do ba a ta,
31dɛ laa sie kpɔ
waa maa chaɡ ba ta,
baa men Mmarare ta teŋɛ
aa,
32mɛɛ tɛr ba deŋnee
ba wechɔɡa baa ɛa waa,
ba bwara ɛɛ nyɛɡ ba a
waa.
33Kɛ maa Devid nyinaa ɡel
bwa,
kɛɛ dɛ́ vɛh n ne o baah fɔo
la.
34Maa n ne o fɔo yaa fɔwa
laanee chɔɡ, kɛɛ dɛ́ charɛ
nyoa maa baɡɔ la
beŋkpoŋ kwara.
35N berɔ ŋwɛɛ n sɔn
waa do ɡoroŋ,
maa wola nyoa berɛ,
maa Devidii neɡre bwa,
36wɛɛ dɔ naanaree saŋ bɛlbwa,
mɛɛ nyiŋi o harɛ taa ó che
kiŋkiŋ saŋ bɛlbwa kɛŋɔ wee
aa dɛ chaah saŋ bɛlbwa nɔ.
37O kora ɛɛ cheo kiŋkiŋ saŋ
bɛlbwa dɛɛ la
ɡɛ korobie aa lɔ nyundua
saŋ bɛlbwa nɔ,
dɛ́ ɛ danseɛ.”
Kooro dɔma aa yoo dɛ pɔ o nɛɛ wiile
38He baah di kooro haa
leo cheɡ tɛ he te la nɛ,
he berɛ habɔɔ kpoo dɛ vɛoh.
39He chɔɡ he ne he bonɔɔ
fɔo haa fɔwa la,
dɛ kpɔ o kooɡbɛrɛ ta harɛ.
40He kuuɡi o bwɛjen
danjwɛɛre bwa,
o danjwɛkpeɡa bwa chɔ
harɛ.
41Nɛra baa vala baa kaa
bwa dɛ ŋwɛ o laala,
o bala bwa dɛ mamɔ.
42He ɡelɔ o dɔma pɔ o nɛ,
dɛ ɡel ba bwa sie lɛ.
43He ɡelɔ o dɔmkwaa ɛ pɛɛpɛɛ,
dɛ ɡel ba pɔ o nɛɛ laa ta.
44He laa o koodaŋɡbala lɛ,
dɛ lɛ o kora o be.
45He teŋe o bonɔɔne saŋ tɔpere
ta, dɛ ɡel o di ncho.
Korowii lɛɛ wesoŋa
46N Naa Korowii,
saŋ besoo hɛɛ ba
he te sɔeh ka tel ɔ?
Saŋ besoo he baah ɛɛ
ba dii kohona dɛɛ la ɡɛ nɔ?
47Jemɛ kɛŋɔ nɛn mkpa
aa jaŋɛ bɛlbwa.
Lii kɛŋɔ he ta yaa
ya ɛ nɛwɛnyina yaa
dɛ ba wona sewɛ.
48Umee dɛ́ so le
waa wola sewɛ bwa nɔ?
Nɛwɛnyinii ume, dɛ́ ŋɔ,
waa lalbɔɔ binii kaa lɔ?
49N Naa Korowii,
he nyina o fa aa kana la
sɛ?
Nyoa he fa aa baɡɛ Devid
la ɡe sɛ?
50N Naa Korowii,
lii men maa ɛ he bonɔɔ wa,
n bwara dɛ nyɛɡ
bammuɡla ne chɛɡa
nɛra aa dɛ chɛɡ mɛ.
51He dɔma dɛ chɛɡre
kooro haa leo cheɡ la.
Bela waa kpɔ bwa,
ba dɛ chɛɡro.
52Hé kpɛɛ Korowii
saŋ bɛlbwa dɛɛ la!
Aamen!
Currently Selected:
Yela 89: mzw
Highlight
Share
Copy
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
