Yela 69
69
Chae wesoŋa
Kooro Devid yel
1N Naa Korowii, lɛɛ mɛ,
n wenaale do kɛŋɔ
nee aa sua
dɛ ba maɡɛ n baŋa ta.
2A do kɛŋɔ maa dɛ morɛ
vil kpechɛɡre aa lɔ o bini,
n ta bodɛɛɡe dɔe
ń kpɔ n naa cheɡ.
A do kɛŋɔ maa le vil bini
nehɛma ɛɛ ba lɔe ba tɔ
n nɛ.
3N wio noe ŋɔ hé ba
cha mɛ, dɛ ba koh,
n lobi bwa holɔ.
N nyiŋi he siwi ta,
he ba cha mɛ kahonɛ.
4Nɛra baa hah mɛ pɛɛ
warɔ ɡwaa n nyumpona.
N dɔma teŋe nyosone
dɛɛ dawɛ n nɛ,
ba bwara kpeɡri baa
nyin mɛ dɛ́ kpo,
ba ɡelɔ n berɛ bɔ kwaa
maa wola ŋwɛɛ kem tɛɛ ba.
5N Naa Korowii,
n wechɔɡa bwa chɔ he sie,
he jemɛ n ɡɛnewaa bwa.
6Nemenɛ Korowii, bɛ ɡel
nɛra baa kpɔ ba te dawɛ
he nɛɛ la di sihiih n wa.
Bɛ ɡel a che n nɛɛ sihiih
kpo nɛra baa dɛ tomɛ.
Henee Korowii
Israel tena aa dɛ tomɛ.
7He waa ba koh dɛɛ chɛɡ mɛ,
asɛ sihiih kpo mɛ.
8N berɛ hɔɔh n lolanar be,
dɛ do kɛ nomɛl waa le
harɛfale bɛl ta,
n ɡbaɡba nɛra bini.#Jɔn 1:11
9He Dea la waa swɛɛ n siwi
taeh,
chɛɡa baa dɛ chɛɡre
bwa ɡe dawɛ n nɛ.#Jɔn 2:17
10N vɔwɛ nyoa dɛɛ di suna,
asɛ nɛra ɛɛ chɛɡ mɛ.
11N tɔ lweyal
asɛ baa mam mɛ.#Job 17:6
12Ba dɛ bol n waa fɔɡbaahna,
sennyɔdɛɛra kpɔ mɛ
dɛɛ ɡo yela.
13Kɛ N Naa Korowii,
henee n wi dɛɛ no,
le saŋ haa dɛ nyin
cheɡ dɛ́ chaŋ mɛ.
Chaŋ mɛ he nyina
waa kana la wa,
he nyoa haa baɡ mɛ
nomanta, hɛɛ lɛɛ mɛɛ.
14Lɛɛ mɛ le n wenaale
aa do kɛ maa dɛ morɛ
vil kpechɛɡre
aa lɔ o bini ta.
Lɛɛ mɛ le n dɔma nɔn
ne vile ta.#Jer 38:6
15Bɛ ɡel nee la su ba kpɔ mɛ,
bɛ ɡel ń ka chɔ vile bini,
kɛɛ seo ba kpo mɛ.
16N Naa Korowii,
che he nyina aa wola
jaɡa dɔe ta, dɛ́ chaŋ mɛ.
Berɛ sie n be,
dɛ́ sune n nɛɛ kohona.
17Bɛ he sie laa kpɔ men
maa ɛ he bonɔɔ nɛ,
n lɔ wenaale kohona bini,
ba dɛ́ ba cha mɛ warane!
18Ba n be dɛ́ ba lɛɛ mɛ,
lɛɛ mɛ le n dɔma nɔn ta.
19He ɡbabir
na ɡɛ baa dɛ chɛɡ mɛ,
ɡɛ sihiih aa dɛ kpo mɛ,
baa wola men komɛlbwa
yerɛ,
he dɛ na n dɔma bwa.
20Chɛɡa ɡelɔ n bambile chɔɡ,
dɛ ɡel n liire bwa damɛ.
N dɛ nyin nomɛl ó fee
ba larawe n bwara,
n ta nɛn nae,
kɛɛ nomɛl ba do mɛ ɡbemba,
kɛ nɛn toole.
21Lɔr aa dɛ kpo mɛ la,
ba kpɔ tɛɡkpela do
kondikwaa ta tɛ mɛ n di,
nyoɡre ɡe aa dɛ kpo mɛ la,
sennyɛɡaa ba tɛ mɛ n nyɔ.#Mat 27:48; Jɔn 19:28-29
22Gɛ saŋ baa dɛɛ di
kwaa dɛɛ lɛ ba sie la,
ɡel siswɛm piɡ ba,
ɡel ba kondikonjena dii
ber ba kwaa baa lɔ
naa a ta dɛ́ choɡli.
23Gel ba nyoŋe,
ásɛ dɛɛ na wahala
saŋ bɛlbwa.
24Gel he bandia kohona
la ba ba nɛ,
kpɔ he bandia waa do
ɔma kohona ta ba nɛ.
25Gel ba sobɔr chɔ pɛɛ,
nomɛlbwa bɛ ba
tɛnte deene bini do,#Weɛ 1:20
26dɛkalkɛ ba dɛ ɛ
nɛra haa tɛr ba deŋne
la hɔhɔrɔwa,
dɛɛ bol nɛra haa do ba
bola,
ba bonyɛɡa baa dɛ na
la wa.
27Chwerɛ ba wechɔɡa
baa ɛa bwa bil,
bɛ ɡel ba ja he lɛɛ
haa dɛ lɛ nɛra la ta.
28Gel ba fee ba sɔna
le Mkpa Tɔn la bini,
bɛ ba sɔna kpɔ ja
he nɛra nɛ.#Yel 56:8; Wep 3:5
29N Naa Korowii,
n bwara dɛ nyɛɡ,
n hwɛɡa tonɛ,
laɡ mɛ ir dɛ́ lɛɛ mɛ.
30Mɛɛ ɡo yelaa kpɛɛ
Korowii sɔn,
dɛ́ kpɔ jam tɛo o kan waa
doa wa.
31Anee dɛ su o siwi dɛ́ ɡwaa,
kɛ baa kpɔ nabal baa sao
ɛ saraha tɛo,
a ɡwaa kɛ baa kpo nabal
waa kpeɡa kɛrɛdɛ tɛo.
32Nɛra baa dɛ fiɡ ba la
na ɡɛ naa, ba sie ɛɛ lɛo,
ásɛ banɔ la baa dɛ tomɛ
Korowii dɔ ɡbemba.
33Korowii dɛ no nɛŋɡwɛɡra
wii, waa nɛra baa laɡ ba
do dea waa soh.
34Korowii kontaala aa lɔ
nyundua ne harɛ kwaa
bwa kpɛɛ Korowii,
mpo ne kwaa aa lɔ o bini
bwa ɡe kpɛɛro.
35Korowii ɛɛ lɛ Jerusalam
tenaa,
dɛ́ berɛ kwaa ma Juda harɛ bwɛjena,
ásɛ o nɛra berɛ ka kpɔ harɛ la,
dɛ́ so o ta.
36O bonɔɔna naanaree dɛ́ ka so o ta,
nɛra baa dɛ nyin o waa
laanee dɛ́ ka so bela.
Currently Selected:
Yela 69: mzw
Highlight
Copy
Compare
Share
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
