Felepae 1

1Men Pɔɔl ne Timoti yaa ɛ Yeesu Kristo bonɔɔna la, yanee chwerɛ tɔn nɔ dɛɛ tɛ Korowii nɛra he wa aa toɡra, he ne Yeesu Kristo pɛ he do Felepae la, ne he nɛra baa tɔ asɔre tena sie ne nɛra baa chɔ tomare nyoo la bwa.#Weɛ 16:12-40

2Ń Naa Korowii ne ya Dɔɔ Yeesu Kristo cha heya, dɛ́ tɛ heyaa bosɔɔhna.

Korowii jaama ne o kpɛɛra

3Saŋ bɛlbwa maa lii he waa la, n dɛ jam N Naa Korowii he wa, 4dɛ́ yon kpɔ silɛɛ dɛ́ soŋo dɛɛ tɛ he bwa, 5pɛɛ ya ne he bwa aa pɛa dɛɛ cha dɔŋa Amanesoma toma la ta le mumpar ba le fini la nomanta. 6N dɔ hwɛɡa kɛŋɔ ɡɛ Korowii aa pa mun dɛɛ ɛ o tondɛɛɡa he bambile bini la, wɛɛ ja a taa ka tel awola Yeesu Kristo aa ba la.

7Aŋwɛnɛ taa n dɔ he hwɛɡa ɡɛ la, dɛkalkɛ he bwa waa lɔ n bambile ta. Baa do mɛ dea la, ne yoi maa yoa lɛ Amanesoma la cheɡ dɛ bol kasinteŋ aa lɔ a ta dɛɛ baɡle nɛra la, n ne he bwa nɛɛ Korowii sune dɛ cha yaa a ta. 8Korowii jemɔ kɛŋɔ he pɛla laɡ mɛ taeh, nɛnnyin Yeesu Kristo aa kpɔa do n bambile ta la nomanta.

9N dɛ soŋe Korowii kɛŋɔ ó ɡel he dɔ nɛnnyin kɛrɛdɛ dɛ́ɛ ja, dɛ́ berɛ dɔ wejema ne nfɛrɛ dɛ́ ja a ta, 10ásɛ dɛ won jemɛ waa aa wera kohona. Anee dɛ́ ɡel he won do kaih, nomɛlbwa aa wola he wechɔɡa dɔe ba dɛ bol ka tel awola Yeesu Kristo aa ba la. 11N dɛ soŋo kɛ he che Yeesu Kristo kpeɡri la ta dɛ́ won dɛɛ ɛ wedɛɛɡa kɛrɛdɛ, ásɛ nɛra ɛɛ tɛ Korowii sɔn ne jirima.

Jɔɡrɔre baa do Pɔɔl

12Yabala, n dɛ nyin kɛ he jemɛ kɛŋɔ wedɛɛɡa le waa aa chiɡ n nɛɛ la ta, dɛ́ ɡel Amanesoma la won kaa sie. 13Bonɔ koojen soojare baa dɛ daah o dem, ne nɛra baa lɔ bonɔ bwa jemɔ kɛŋɔ maa ɛ Yeesu Kristo bonɔɔ waa ba do mɛ dea.#Weɛ 28:16, 30-31 14Asɛ n dea chɔe la berɛ ɡel yabala ɡalɡa ɡee yarada ya Dɔɔ Yeesu kohona, dɛ́ dɔ bambile dɛ́ɛ baɡle Korowii Waa la kɛrɛdɛ, baa wola ɔmɛ.

15Kasinteŋ, bɔweela ne dɔŋa meera waa nɛra bane ɛɛ bol Kristo Amanesoma la, asɛ bane ɡee bola bambile bwa ne. 16Ba te la, nɛnnyin waa baa ɛa, dɛkalkɛ ba jemɔ kɛŋɔ Korowiirii kpɔ toma nɔ tɛ mɛ ŋɔ ń yo lɛ Amanesoma la cheɡ. 17Banɔ la ɡe, ba ɡbaɡba sɔn nyina waa baa bol Yeesu Kristo wa, ba tepoŋ ne laa. Ba dɛ lii kɛŋɔ ba ɛ ɡɛ naa, baa wonoo ɡel n tea bini chɔɡ dɛ́ ja n dea chɔe nɔ ta. 18Kɛ pɛɛpɛɛ. Dɛ liichɔɡa nee baa bola o, dɛ tepoŋ nee baa bola o, Yeesu Kristo waa baa bol la, n baah sɔɔh mɛ.

Aa sɔɔh mɛɛ dɛɛ la, 19dɛkalkɛŋɔ n jemɔ kɛ Korowii ɛɛ lɛɛ mɛɛ le waa aa chiɡ n nɛɛ nɔ ta, he Korowii soŋa ne Yeesu Kristo Domadɛɛɡe la alaworomɛ. 20Waa maa dɛ nyin n siwi swɛɛ a ta laanee kɛŋɔ, n bɛ n toma ba ɛ kahonɛ sihiih kpo mɛ, kɛɛ n won dɔ bambile kɛrɛdɛ taraken kɛŋɔ n fa aa dɔ bambile la, ásɛ Yeesu Kristo won dɔ jirima n we-ɛɛla bini. Dɛ ba ɡelɔ n so le noo, ba kpo mɛ noo, Yéesu Kristo dɔ jirima a bwa bini. 21N soɡa nɔ maa soɡa nɔ, Yeesu Kristo waa n so. Dɛ n sewɔ ɡe aa, anee dɔ tɔnɔ tɛ mɛ kwara. 22Kɛ dɛ n ta soɡe le naa, mɛɛ ba wonoo ɛ toma á won dɔ tɔnɔ kɛrɛdɛ. Anomanta, maa jemɛ onɔ la bwa waa wera n be ń kpɔ. 23N chinchaŋo. N dɛ nyin kɛ n sewɛ dɛ́ ka so Yeesu Kristo be. A bɔ kohona kɛ maa soɡe bonɔ. 24Kɛ he nomanta, a hiaoh kohona kɛ n do bonɔ dɛ́ won cha heya. 25Anomanta, n jemɔ kɛŋɔ mɛɛ so he bee dɛ́ won cha he bwa he kpeɡ Yeesu Kristo waa la ta, dɛ́ dɔ silɛɛ he yarada ta, 26ásɛ dɛ n baa so he be ja aa, he won dɔ bɔr kɛrɛdɛ dɛɛ jaaɡi n wa, dɛ́ɛ kpɛɛ Yeesu Kristo.

27Waa aa hiaah laanee kɛŋɔ hé ɡel he we-ɛɛla bwa do wer ɡɛ aa chɛ kɛ nɛra baa no Yeesu Kristo Amanesoma la waa aa doa, ásɛ dɛ n baa ba he be noo, n ta ba wone ba noo, ń no he waa kɛŋɔ he bwa liire ɛ beŋkpoŋ, hé che kiŋkiŋ, he nyoa pɛ, hé che tɛ Amanesoma la haa yaradaa la, á won la sie, 28dɛ́ berɛ dɔ bambile haa wola he dɔma ɔmɛ tamaa bɛlbwa bwa. He bambile dɔe la taa bá che jemɛ kɛŋɔ Korowii ɡbaɡba ɛɛ lɛ heyaa dɛ́ chɔɡ ba. 29Korowii ɡelɔ he won yarada Yeesu Kristo, dɛ berɛ won koh o waa na hɔhɔrɔwa. Wejenaa o ɛ tɛ heyaa he won koh o waa na hɔhɔrɔwa la. 30He ɡba dɛ yo ɡɛ tenten he fa aa na mɛ mɛɛ yo la. Gɛ yoi laanee hɛɛ no kɛ n ta dɛ yo la.

Currently Selected:

Felepae 1: mzw

Highlight

Copy