Maeka 7
7
Israel tena suna dii
1N waa sum kohona!
N do kɛŋɔ nɛn waa ɡaaɡa
dɛɛ nyin daa nɔna
lɔmɔɡa saŋ,
waa wola daa bɛlbwa nɔn
waa ka o ta kɛɛ ɡrepo nɔna
o daa ta nae dɛ́ di.
Ba tɔɔ ɡrepo nɔna,
ne fiɡ daa nɔna
aa soma la bwa.
2Ba doŋi nɛra baa dɛ duu
Korowii bwa le harɛ la ta,
nomɛlbwa ta kae
o waa toɡre kpa.
Nɛra bwa chɔɔ dɛɛ kpa kɛŋɔ
bá kpoo nɛra,
bɛlbwa dɛ harɛ o dɔŋ bel
dɛ́ dɔɔ lawɛ.
3Ba bwa hweli wechɔɡa
dɛ jema kɛrɛdɛ.
Nɛra baa bol waa
dɛɛ pa bole,
ne ba nomonome bwa
dɛ nyin kɛ baa yaɡ ba sen.
Ba ne nɛnjena kpɔ
wejema ŋwɛnɛ
lɛ kwaa dɛɛ le ba be.
4Ba bini nɛndɛɛɡe kwaraa
do kɛŋɔ jabalnadaŋɛ.
Onɔ la o wa aa toɡra
ɡe do kɛŋɔ sɔɔh daa ken.
Tɔpere telo kɛŋɔ
Korowii tɛr ba deŋne
ɡɛ waa cheɡɛ keamere
baa dɛ daah ba nɛɛ
kah ba la,
ba wilo taraken kwara.
5Dɛɛ berɛ he dɔŋ yaradae
ka tonɛ,
bɛ he dam ɡba nɛɛ hwɛɡɛ.
Hale he haah he ne waa pɛa
dɛɛ chɔ kalaŋ ta,
dɛɛ nyiŋi he nyoa wobol ta
kɛrɛdɛ.
6Bibaa ne o mɛɛ ɛɛ dɔmoo,
bihaah ne o nya dɔm,
ásɛ bihaah ne o helahaah
ɡe dɔm,
ásɛ nɛn lolanar berɛ
o dɔma.#Mat 10:36; Luk 12:53
7Kɛ n te, n dɛ hwɛɡɛ
dɛɛ nyiŋi Korowii ŋwɛnɛ.
Korowii waa ɛ n Lɛɛ
laanee mɛɛ kpa,
wɛɛ no n bee.
Israel ɛɛ iruu
8Ya dɔma, he bɛ ɡel he sie lɛ.
A lole kɛ ya cholo te,
yaa iruu.
Ya lɔ biro ta te,
Korowiirii dɛ́ do kɛ kandea
dɛɛ chaah yaa bɔr.
9Ya ɛ wechɔɡa dɛ jo
Korowii nɛ,
anomanta, a chɛ kɛ yá na
o bandia tama mɔɔ.
Wɛɛ lɛ yaa dɛ́ le chɔɡre
baa kpɔa ɛ yaa la ta.
Wɛɛ lawɛ yaa ba bɔchaah ta,
ásɛ ya na toɡra o wa aa toɡra.
10Belaa ya dɔma ɛɛ ba a nae
ásɛ sihiih kpo ba.
Banee fa muɡli ya baah ŋɔ,
“Leperaa Korowii haa
dɛ tomɔ la dɔɔ tenɔ?”
Yaa soo dɛ́ na ba chola,
baa tiɡri ba nɛɛ kɛŋɔ
baa dɛ tiɡri kpechɛɡre ta
ken fɔɡbaahna.
11Jerusalam tena, tɔpere bɛl dɛ ba
ásɛ he berɛ kwaa ma
he bwɛjen danjwɛɛre la,
dɛ́ paɡri he harɛ jwɛhre
kaa sie.
12Awola tɔpere la,
nɛra ɛɛ le Asiiria
ne Ijipt bwɛjena taa ba,
hale dɛ́ kpoŋe le Ijipt kaa
Yufretis Moo wee leebɔr,
dɛ́ berɛ le Ijipt
kaa weekaŋle harɛ bɔr,
dɛ́ le mpore ta harɛjaɡa
ba kaa bwejena dor.
13Kɛ harɛ bwa ɛɛ chɔɡoo,
o nɛra we-ɛɛla wa,
dɛ́ do kɛŋɔ
pua hɛŋle ɡbo harɛ ta ken.
Korowii suna waa sune Israel tena nɛ
14Ya Naa Korowii, nyiŋi
he nɛra nɛɛ kɛŋɔ peteɡre
aa dɛ nyiŋi peera,
nɛra haa lee ba tɛ he te la.
Ya do kɛ peera aa pere a te,
dɛ ka do kpɔɡbaah dɛɛ di.
Gel he nɛra ka do
harɛpare ondɛɛɡe
kɛŋɔ Basan ne Gelead ta,
dɛɛ di kɛ saŋ la.
15Gel ya na he nyokpowe-ɛɛla,
ɡɛ haa ɛa dɛ fa le ya ne
Ijipt harɛ ta ba la.
16Harɛre nɛra ɛɛ nao sihiih
kpo ba,
ba kpeɡri bwa ɛ pɛɛpɛɛ.
Ba bwara ɛɛ yɔroo,
bá kpɔ nɔɔra tɔ nyoo,
dɛ́ tɔɔɡe ba deŋna.
17Baa di teeraa kɛŋɔ harɛkon,
kɛŋɔ kwaa
aa dɛ tuuɡi tea ta ken.
Baa le ba dekpeɡa taa
bochela ne ɔmee ne,
dɛ́ berɛ ba hen Korowii
yaa dɛ tomɛ sie.
18N Naa Korowii yaa dɛ tomɛ,
nomɛlbwa ta do kɛŋɔ hen,
he kpɔ he nɛra baa kaa
wechɔɡa dɛɛ kɛ ba,
he nɛra baa ɛ
he kapɛrɛ nɛra la.
He baah diu waa, aa biɡri,
he sie dɛ lɛ kɛ hɛɛ na
ya sum.#Kaa 34:6-7; 2We 6:24; 30:9
19Hɛɛ berɔɔ dɔ tedoma ya nɛ,
dɛ́ kpɔ naa tire
ya wechɔɡa ta,
dɛ́ kpɔa ka ta mpo vile ta.#2We 6:30
20Hɛɛ teŋɛ kasinteŋ
ne he nyina
aa wola jaɡa dɔe taa,
dɛ́ sune Jekɔb ne Abraham
naanar nɛ,
ɡɛ haa baɡɛ ya naawa nyoa
saŋ la.
Currently Selected:
Maeka 7: mzw
Highlight
Copy
Compare
Share
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
