Matiu 27
27
Ba lawɛ Yeesu ka che Paelet sie
(Mak 15:1; Luk 23:1-2; Jɔn 18:28-32)
1Tɔɔ aa pera chɔmbibi la, Korowii Dea Sɔfonomonome bwa ne ba harɛ la nomonome chemo dɛ vɔrɔwe Yeesu kpoe vɔrɔwa, 2dɛ vɔrɔwe o nɔɔra, dɛ kpɔɔ ka tɛ Rom nomoa Paelet waa dɛ nyiŋi bela harɛ ta.
Judas seo wa
(Weɛ 1:18-19)
3Judas la waa le Yeesu tɛ ba dɔɔ lawɛ la aa bera na kɛ ba dɛ nyin ba kpo Yeesu la, a we o nɛ, asɛ o berɛ charɛ o liire kɛŋɔ o fe jemaa, o fe ta suuɡa la lɛɛ dɛ le Yeesu tɛ, asɛ dɛ berɛ kpɔ suuɡapoŋa fifraatoro la ka tɛ Sɔfonomonome la ne bwɛɛ nomonome la, dɛ ŋɔ,#Weɛ 1:18-19 4“N ɛ wechɔɡa kɛ maa le nɛn waa wola wechɔɡa bɛlbwa ɛɛ tɛ heyaa ŋɔ hé ka kpoo nɔ.”
Anee nɛra la ŋɔ, “Ya te waane laa, a bwa do kɛ hen.”
5Anee Judas kpɔ suuɡapoŋa la viɡri Korowii Dea bela, asɛ dɛ ka saɡɛ o te.
6Sɔfonomonome la pa suuɡa la dɛ ŋɔ, “Suuɡa nɔ ɛ chal suuɡa, asɛ ya mmarare ɡe aa yaa ŋwɛnɛ tɛ kɛŋɔ ya won kpɔ suuɡa nɔ ja Korowii Dea suuɡa ta.” 7Anomanta, ba bwa nyoa pɛo kɛŋɔ bá kpɔ suuɡa la ka yawɛ harɛ bɛl waa ɛ vimamaa harɛ, ásɛ dɛɛ huɡe hɔɔhra baa wola Juu tena ɛɛ bela. 8A waa ɡela baa yerɛ bela harɛ la Chal Harɛ dɛ ba le fini la. 9Waa Korowii keame Jeremia fa aa bola la ɛ kpela. O fa ŋɔ, “Ba lɛ suuɡapoŋa fifraatoro, ɡɛ Israel tena nyoa aa pɛa ba di o yoɡ la,#Sek 11:12-13#Jer 19 10asɛ dɛ kpɔ ɡɛ suuɡa la ka yawɛ vimamaa harɛ la ɡɛ Korowii aa ŋɔ n be la.”
Yeesu aa cheɡɛ Paelet sie wɛɛ pɛɛro wa
(Mak 15:2-5; Luk 23:3-5; Jɔn 18:33-38)
11Dɛ Yeesu ɡe cheɡɛ nomoa Paelet sie. Asɛ Paelet bɔɔro ŋɔ, “Henee Juu tena kooro ɛ?”
Asɛ Yeesu ŋɔ, “Anee he bol la.”
12Sɔfonomonome ne harɛ nomonome la teŋe nyosone dawɛ Yeesu nɛ, kɛ Yeesu ta ban chaŋɛ. 13Asɛ Paelet bɔɔro ŋɔ, “Wedamanta nɔ bwa baa kpɔa dɛɛ dawɛ nɔ, haa no kɛɛ?” 14Yeesu ta wobɛlbwa chaŋɛ, o ta a bɛlbwa tɔeh, asɛ nomoa Paelet nyoa kpo kohona.
Ba ŋɔ a chɛ kɛ bá kpo Yeesu
(Mak 15:6-15; Luk 23:13-25; Jɔn 18:39—19:16)
15Dɛ o dɔ we-ɛɛle bɛl waa dɛ ɛ bena bɛlbwa. A ɡɛ tɔpejen la baa tel aa, wechɔɡ-ɛɛ te bɛlbwa baa doo dea asɛ bwɛɛla la ŋɔ ó fooru ta la, a chɛ kɛŋɔ ó fooru ta. 16A ɡɛ saŋ la, dɛ ba do baa bɛl baa dɛ yerɔ Barabas nomɛlbwa aa dɛ no o sɔnchɔɡe dea. 17Asɛ baa ba Paelet be o bɔɔ ba ŋɔ, “Barabas ne Yeesu baa dɛ yerɔ Kristo la, ba bini umee hɛɛ nyin ń fooru ta tɛ heya ɔ?” 18Dɛ o ɡbabir jemɔ kɛŋɔ bɔweela waa ba che Yeesu nɛɛ pɛɛpɛɛ dɛ kpɔɔ ba o be la.
19Nomoa Paelet aa soɡe o kara ta dɛɛ bol waa la, o haah tomɛ nɛn o be ŋɔ, “Nyiŋi kɛrɛdɛ dɛ bɛ baa la wobɛlbwa ɛ. Nɛndɛɛɡe tentenee. Gɛ maa dee o waa fini nɔ la, a we n nɛɛ taeh.”
20Jaah dɛ Sɔfonomonome ne bwɛɛ nomonome la do nɛnlaa la bwa ŋɔ bá ŋɔ Barabasee baa nyin kɛ Paelet foo ta ásɛ dɛ kpo Yeesu.
21Anee Paelet bɔɔ ba ŋɔ, “Nɛra banɛ nɔ bini umee hɛɛ nyin ń foo ta tɛ heya ɔ?”
Asɛ ba ŋɔ, “Barabas.”
22Belaa o berɛ bɔɔ ba ŋɔ, “Aah ɛrɛɛ he ŋɔ ń ɛ Yeesu nɔ baa dɛ yerɔ Kristo nɔɔ?”
Asɛ ba bwa pɛ ŋɔ, “Kpaaro pɛl daɡaɡre ta!”
23Anee Paelet bɔɔ ba ŋɔ, “Ɛrɛɛ yɔ? Bɔkwa wechɔɡaa o ɛɔ?”
Ate, dɛ ba berɔ kwaa ŋɔ kohona ŋɔ, “Kpaaro pɛl daɡaɡre ta!”
24Nomoa Paelet aa naa kɛ dɛ o ŋɔ o saɡɛ waa la ta naa, waa aa ba la aa wer doe ba la, o ɛ nee dɛ samɛ o nɔɔra nɛnlaa la bwa sie dɛ ŋɔ, “N laa dɛɛ do heyaa ŋɔ hé kpo nɛndɛɛɡe nɔ. He ɡbaɡbaa dɛɛ ɛ he wa!”#Mma 21:6-9
25Anee nɛra la ŋɔ, “Ɔɔh, hé te ɡel o seo wobɛlbwa dawɛ ya ne ya naanar nɛ!”
26Belaa Paelet le Barabas ta, ɡɛ baa dɛ nyin la, dɛ ɡel ba lɔɔ Yeesu bampɔrɔ ŋwɛɛra ne mɔɔ dɛ kpɔɔ tɛ ŋɔ bá ka kpaaro pɛl daɡaɡre ta.#Aes 53:5
Gɛ soojare aa muɡli Yeesu baah
(Mak 15:16-20; Jɔn 19:2-3)
27Asɛ soojare la kpɔ Yeesu le kaa nomoa Paelet dem, dɛ yerɛ ba bala soojare la bwa ba ba baro cheme, 28dɛ laa o laala foo, dɛ kpɔ yaswɛm bɛl kɛŋɔ ba bela kooro yal ba tɔɔ, 29dɛ kpɔ sɔɔhne sɔh kooɡbɛrɛ piu, dɛ kpɔ daa bɛl do o nɔndiɡ ta, dɛɛ ɡuŋu harɛ kɛŋɔ baa dɛ ɛ kooro la dɛɛ taramo dɛɛ si, “Woowo, Juu tena kooro!” 30Asɛ dɛ ta nentane dɛɛ ta o nɛ, dɛ kpɔ daa la dɛɛ cha o nyu. 31Baa muɡli o baah tonɛ la, ba laa yal la foo o bwara ta, dɛ kpɔ o ɡbaɡba laala o fa aa doa wubwa la doo, dɛ kpɔɔ le dɛɛ kaa dɛ́ ka kpaaro pɛl daɡaɡre ta.
Ba kpaa Yeesu pɛl daɡaɡre ta
(Mak 15:21-32; Luk 23:26-43; Jɔn 19:17-27)
32Baa dɛ kaa la, ba kaa na Sairini baa bɛl baa dɛ yerɔ Seemɔn. Ba ɛɡro o lɛ Yeesu daɡaɡre la che. 33Asɛ ba ba bela baa dɛ yerɔ Gɔlɡɔta la. Gɔlɡɔta munii Nyuhoɡ Bɔr. 34Asɛ ba kpɔ koŋkpelakpela ane koo sen ta dɛ kpɔ tɛ Yeesu ŋɔ ó nyɔ. Waa daɡa na la, o vɛh nyɔe. 35Ba foo o laala, dɛ kpaa o nɔɔra ne o nakpale pɛl daɡaɡre ta. Dɛ soojare la dɛ nyin Yeesu laala bɔna, dɛ ta chacha mɔɔ dɛ́ won jemɛ laala ba bɛlbwa aa di.#Yel 22:18 36Gɛɛ ba ɛ mɔɔ dɛ ba so dɛɛ nyiŋu. 37Ba chwerɛ o wechɔɡa waa ɛa ba koh a waa kpoo la pɛl o daɡaɡre la ta o nyundua. A ɡɛ waa laanee, yeesu, juu tena kooroo nɔ.#Jɔn 19:19-22 38Belaa ba kpaa ŋwɛɛra banɛ pɛl daɡaɡra ta ja Yeesu nɛ, bɛl saɡɛ o diɡ ta, bɛl ɡe saɡɛ o ɡal ta. 39Nɛra baa kpɔ bela bɔr baa kaa la chɛɡre Yeesu dɛɛ muɡli o baah ŋɔ,#Yel 22:7-8 40“Chwa! Nɛn waa dɛ ba Korowii Dea paɡra dɛ́ won kpɔ tɔpera atoro mao la laa nɔ ɡbao? Lɛ he te! Dɛ henee Korowii Bie la aa, le daɡaɡre la doa tu harɛ yá na!”
41Gɛɛ Sɔfonomonome ne Tɔnjerema ne bwɛɛ nomonome muɡli o baah ɡɛ banɔ la aa ɛa la, 42dɛ ŋɔ, “Ao! O won bane te lɛɛ, kɛ waa won lɛ o te ɡbaɡba. Kɛ Israel tena kooroo yɔ. Hé ɡel ó tu le daɡaɡre la doa ba harɛ yá na ásɛ dɛ yaradao. 43O ŋɔ Korowii nɛɛ o sie dawɛ, dɛ ŋɔ Korowii Biee on. Dɛ o waa dɛ lɛ Korowii sie te naa, amɔ Kórowii ba lɛo taraken.” 44Dɛ ɡɛɛ ŋwɛɛra baa kpaa ba pɛl daɡaɡra ta ja o nɛɛ la ɡee chɛɡro.
Yeesu seo
(Mak 15:33-41; Luk 23:44-49; Jɔn 19:28-30)
45Wee aa baa che nyufala la, bɔr biro jumaa ken dɛ ka tel wekee saŋ mɔɔ dɛ berɛ chaah ja. 46Wekee saŋ aa baa tel la, Yeesu do lɔŋɔ kpeɡri nɛɛ dɛ ŋɔ, “Eli, Eli, lama sabaktani?” O munii kɛŋɔ, “N Mɛɛ Korowii, n Mɛɛ Korowii, ɛrɛɛ he chwa mɛ nɔɔ?”#Yel 22:1
47Nɛra baa cheɡɛ bela la aa no ɡɛ la, ba ŋɔ, “Hɛ́ɛ no! Elaejaa wɛɛ yerɛ la.”
48Asɛ bɛl chwa buɡ la ta, dɛ ka kpɔ konjɔɡɔjɔɡɔ bɛl waa dɛ lɛ nee ka li sennyɛɡa ta dɛ kpɔ toh daa ta, dɛ kpɔ pao ó nyɔ.#Yel 69:21 49Nɛra baa kaa la ɡe ŋɔ, “Hé ɡel ya na, dɛ Elaeja ɛɛ ba lɛo wa aa?”
50Belaa Yeesu berɛ do lɔŋɔ kohona, asɛ dɛ ɡel o doma kaa, o den sewɛ.
51Waa sewa la, ate dɛ yal waa teŋe Korowii Dea la baah ta la pere anɛ le nyundua ba ta harɛ.#Kaa 26:33 Harɛ jiɡro, asɛ bwetala bini peɡri, 52lalbɔɔne pili, asɛ Korowii nɛra baa serewa kɛrɛdɛ ir seo ta. 53Yeesu aa ir seo ta la, ba ɡe le ba lalbɔɔne bini dɛ ka jo bwɛjen Jerusalam, asɛ nɛra kɛrɛdɛ na ba.
54Sooja nomoa ne o soojare baa dɛ daah Yeesu la aa na ɡɛ harɛ aa jiɡra ne waa aa chiɡa la, ba ɔmɔ, asɛ ba ŋɔ, “Korowii Biee baa nɔ kpela!”
55Dɛ haahna warɔ dɛ che bojaŋ dɛɛ nyiŋi. A ɡɛ haahna nɔɔ teŋɛ o nɛɛ le Galilia harɛ dɛ daa kondikwaa dɛɛ tɛo.#Luk 8:2-3 56Ba bini banee Mɛɛre waa le Maɡdala la, ne Jems ne Josef nya Mɛɛre, dɛ Sebedii bii la nya.
Yeesu huɡa
(Mak 15:42-47; Luk 23:50-56; Jɔn 19:38-42)
57Awola jɔmɔra la baa bɛl baa dɛ yerɔ Josef, o le Arimatea dɛ ɛ suuɡate balɔ. Dɛ o ɡba ɛ Yeesu habɔteŋra la bɛl,#Aes 53:9 58dɛ ɡe la Paelet be dɛ ka soŋo ŋɔ ó tɛo ŋwɛnɛ ó ka kpɔ Yeesu lale la. Paelet sɛh dɛ kpɔ tɛo. 59Anee Josef kpɔɔ, dɛ kpɔ yapondɛɛɡe bɛl dɛ fɔrɔwo, 60dɛ kpɔɔ ka huɡe lalbɔɔ o ɡbaɡba aa forɛ bwe bɛl ta o do kɛŋɔ dea ken baa wola nomɛlbwa o bini huɡe mɔɔ la, dɛ ɡbili bwejen bɛl tɔ o nyoa, asɛ dɛ le bela kaa. 61Dɛ Mɛɛre waa le Maɡdala la ne o dɔŋ Mɛɛre la soɡe bela, asɛ ba sie pa lalbɔɔ la ta baa nyiŋi.
Yeesu lalbɔɔ daahna
62Awola tɔpere la, dɛ Juu tena dɛ kpɔ ba te ásɛ tɔɔ peraa, bá di ba Ona Tɔpere. Tɔ aa pera la, Sɔfonomonome ne Farisii tena la kaa cheme nomoa Paelet dem, 63dɛ ŋɔ o be ŋɔ, “Nomoa, ɡɛ saŋ a ɡɛ nyosonteŋni nɔ aa wola sewɛ mɔɔ la, dɛ o dɛ bol ŋɔ dɛ o sewaa, tɔpera atoro wɛɛ iruu ja. 64Anomanta, do nɛra bá kaa daah lalbɔɔ la mɔɔ tɔpetooro wee la tel. A waa laa aa, o habɔteŋra la ɛɛ ka ŋwɛ lale laanee le bɔɔ la bini, dɛ́ ka teŋe nyosone baɡle nɛra bwa ŋɔ iraa ba Dɔɔ la ir. Dɛ ɡɛ laa aa, neɡra baa dɛ ba ŋwɛnɛ dɔe ka neɡre nɛra nɔ ɛɛ dɔ bɔree che ɡwaa ɡɛ baa tɔ sie neɡre nɛra la bwa.”
65Anee nomoa Paelet ŋɔ ba be ŋɔ, “Soojaree la. Hé ɡel bá ka daah bɔɔ la. Ŋwɛnɛ te bɛlbwa haa kpɔ o ta ásɛ ba bɛ won ka ŋwɛ lale la la, hé kpɔ o ta.” 66Anee ba ka ɛ ɡɛ baa ɛ bwa nɛn bɛ won ka ŋwɛ lale la. Ba kaa maa lalbɔɔ la ne bwe la baa kpɔa tɔ o nyoa la bobɛl pɛ ɡɛ aa ɛ dɛ nomɛl ŋwɛo jo bɔɔ la bini naa, ba won jemɛ, asɛ dɛ berɛ kpɔ soojare so bela ŋɔ báa daah bela.
Currently Selected:
Matiu 27: mzw
Highlight
Share
Copy
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
Matiu 27
27
Ba lawɛ Yeesu ka che Paelet sie
(Mak 15:1; Luk 23:1-2; Jɔn 18:28-32)
1Tɔɔ aa pera chɔmbibi la, Korowii Dea Sɔfonomonome bwa ne ba harɛ la nomonome chemo dɛ vɔrɔwe Yeesu kpoe vɔrɔwa, 2dɛ vɔrɔwe o nɔɔra, dɛ kpɔɔ ka tɛ Rom nomoa Paelet waa dɛ nyiŋi bela harɛ ta.
Judas seo wa
(Weɛ 1:18-19)
3Judas la waa le Yeesu tɛ ba dɔɔ lawɛ la aa bera na kɛ ba dɛ nyin ba kpo Yeesu la, a we o nɛ, asɛ o berɛ charɛ o liire kɛŋɔ o fe jemaa, o fe ta suuɡa la lɛɛ dɛ le Yeesu tɛ, asɛ dɛ berɛ kpɔ suuɡapoŋa fifraatoro la ka tɛ Sɔfonomonome la ne bwɛɛ nomonome la, dɛ ŋɔ,#Weɛ 1:18-19 4“N ɛ wechɔɡa kɛ maa le nɛn waa wola wechɔɡa bɛlbwa ɛɛ tɛ heyaa ŋɔ hé ka kpoo nɔ.”
Anee nɛra la ŋɔ, “Ya te waane laa, a bwa do kɛ hen.”
5Anee Judas kpɔ suuɡapoŋa la viɡri Korowii Dea bela, asɛ dɛ ka saɡɛ o te.
6Sɔfonomonome la pa suuɡa la dɛ ŋɔ, “Suuɡa nɔ ɛ chal suuɡa, asɛ ya mmarare ɡe aa yaa ŋwɛnɛ tɛ kɛŋɔ ya won kpɔ suuɡa nɔ ja Korowii Dea suuɡa ta.” 7Anomanta, ba bwa nyoa pɛo kɛŋɔ bá kpɔ suuɡa la ka yawɛ harɛ bɛl waa ɛ vimamaa harɛ, ásɛ dɛɛ huɡe hɔɔhra baa wola Juu tena ɛɛ bela. 8A waa ɡela baa yerɛ bela harɛ la Chal Harɛ dɛ ba le fini la. 9Waa Korowii keame Jeremia fa aa bola la ɛ kpela. O fa ŋɔ, “Ba lɛ suuɡapoŋa fifraatoro, ɡɛ Israel tena nyoa aa pɛa ba di o yoɡ la,#Sek 11:12-13#Jer 19 10asɛ dɛ kpɔ ɡɛ suuɡa la ka yawɛ vimamaa harɛ la ɡɛ Korowii aa ŋɔ n be la.”
Yeesu aa cheɡɛ Paelet sie wɛɛ pɛɛro wa
(Mak 15:2-5; Luk 23:3-5; Jɔn 18:33-38)
11Dɛ Yeesu ɡe cheɡɛ nomoa Paelet sie. Asɛ Paelet bɔɔro ŋɔ, “Henee Juu tena kooro ɛ?”
Asɛ Yeesu ŋɔ, “Anee he bol la.”
12Sɔfonomonome ne harɛ nomonome la teŋe nyosone dawɛ Yeesu nɛ, kɛ Yeesu ta ban chaŋɛ. 13Asɛ Paelet bɔɔro ŋɔ, “Wedamanta nɔ bwa baa kpɔa dɛɛ dawɛ nɔ, haa no kɛɛ?” 14Yeesu ta wobɛlbwa chaŋɛ, o ta a bɛlbwa tɔeh, asɛ nomoa Paelet nyoa kpo kohona.
Ba ŋɔ a chɛ kɛ bá kpo Yeesu
(Mak 15:6-15; Luk 23:13-25; Jɔn 18:39—19:16)
15Dɛ o dɔ we-ɛɛle bɛl waa dɛ ɛ bena bɛlbwa. A ɡɛ tɔpejen la baa tel aa, wechɔɡ-ɛɛ te bɛlbwa baa doo dea asɛ bwɛɛla la ŋɔ ó fooru ta la, a chɛ kɛŋɔ ó fooru ta. 16A ɡɛ saŋ la, dɛ ba do baa bɛl baa dɛ yerɔ Barabas nomɛlbwa aa dɛ no o sɔnchɔɡe dea. 17Asɛ baa ba Paelet be o bɔɔ ba ŋɔ, “Barabas ne Yeesu baa dɛ yerɔ Kristo la, ba bini umee hɛɛ nyin ń fooru ta tɛ heya ɔ?” 18Dɛ o ɡbabir jemɔ kɛŋɔ bɔweela waa ba che Yeesu nɛɛ pɛɛpɛɛ dɛ kpɔɔ ba o be la.
19Nomoa Paelet aa soɡe o kara ta dɛɛ bol waa la, o haah tomɛ nɛn o be ŋɔ, “Nyiŋi kɛrɛdɛ dɛ bɛ baa la wobɛlbwa ɛ. Nɛndɛɛɡe tentenee. Gɛ maa dee o waa fini nɔ la, a we n nɛɛ taeh.”
20Jaah dɛ Sɔfonomonome ne bwɛɛ nomonome la do nɛnlaa la bwa ŋɔ bá ŋɔ Barabasee baa nyin kɛ Paelet foo ta ásɛ dɛ kpo Yeesu.
21Anee Paelet bɔɔ ba ŋɔ, “Nɛra banɛ nɔ bini umee hɛɛ nyin ń foo ta tɛ heya ɔ?”
Asɛ ba ŋɔ, “Barabas.”
22Belaa o berɛ bɔɔ ba ŋɔ, “Aah ɛrɛɛ he ŋɔ ń ɛ Yeesu nɔ baa dɛ yerɔ Kristo nɔɔ?”
Asɛ ba bwa pɛ ŋɔ, “Kpaaro pɛl daɡaɡre ta!”
23Anee Paelet bɔɔ ba ŋɔ, “Ɛrɛɛ yɔ? Bɔkwa wechɔɡaa o ɛɔ?”
Ate, dɛ ba berɔ kwaa ŋɔ kohona ŋɔ, “Kpaaro pɛl daɡaɡre ta!”
24Nomoa Paelet aa naa kɛ dɛ o ŋɔ o saɡɛ waa la ta naa, waa aa ba la aa wer doe ba la, o ɛ nee dɛ samɛ o nɔɔra nɛnlaa la bwa sie dɛ ŋɔ, “N laa dɛɛ do heyaa ŋɔ hé kpo nɛndɛɛɡe nɔ. He ɡbaɡbaa dɛɛ ɛ he wa!”#Mma 21:6-9
25Anee nɛra la ŋɔ, “Ɔɔh, hé te ɡel o seo wobɛlbwa dawɛ ya ne ya naanar nɛ!”
26Belaa Paelet le Barabas ta, ɡɛ baa dɛ nyin la, dɛ ɡel ba lɔɔ Yeesu bampɔrɔ ŋwɛɛra ne mɔɔ dɛ kpɔɔ tɛ ŋɔ bá ka kpaaro pɛl daɡaɡre ta.#Aes 53:5
Gɛ soojare aa muɡli Yeesu baah
(Mak 15:16-20; Jɔn 19:2-3)
27Asɛ soojare la kpɔ Yeesu le kaa nomoa Paelet dem, dɛ yerɛ ba bala soojare la bwa ba ba baro cheme, 28dɛ laa o laala foo, dɛ kpɔ yaswɛm bɛl kɛŋɔ ba bela kooro yal ba tɔɔ, 29dɛ kpɔ sɔɔhne sɔh kooɡbɛrɛ piu, dɛ kpɔ daa bɛl do o nɔndiɡ ta, dɛɛ ɡuŋu harɛ kɛŋɔ baa dɛ ɛ kooro la dɛɛ taramo dɛɛ si, “Woowo, Juu tena kooro!” 30Asɛ dɛ ta nentane dɛɛ ta o nɛ, dɛ kpɔ daa la dɛɛ cha o nyu. 31Baa muɡli o baah tonɛ la, ba laa yal la foo o bwara ta, dɛ kpɔ o ɡbaɡba laala o fa aa doa wubwa la doo, dɛ kpɔɔ le dɛɛ kaa dɛ́ ka kpaaro pɛl daɡaɡre ta.
Ba kpaa Yeesu pɛl daɡaɡre ta
(Mak 15:21-32; Luk 23:26-43; Jɔn 19:17-27)
32Baa dɛ kaa la, ba kaa na Sairini baa bɛl baa dɛ yerɔ Seemɔn. Ba ɛɡro o lɛ Yeesu daɡaɡre la che. 33Asɛ ba ba bela baa dɛ yerɔ Gɔlɡɔta la. Gɔlɡɔta munii Nyuhoɡ Bɔr. 34Asɛ ba kpɔ koŋkpelakpela ane koo sen ta dɛ kpɔ tɛ Yeesu ŋɔ ó nyɔ. Waa daɡa na la, o vɛh nyɔe. 35Ba foo o laala, dɛ kpaa o nɔɔra ne o nakpale pɛl daɡaɡre ta. Dɛ soojare la dɛ nyin Yeesu laala bɔna, dɛ ta chacha mɔɔ dɛ́ won jemɛ laala ba bɛlbwa aa di.#Yel 22:18 36Gɛɛ ba ɛ mɔɔ dɛ ba so dɛɛ nyiŋu. 37Ba chwerɛ o wechɔɡa waa ɛa ba koh a waa kpoo la pɛl o daɡaɡre la ta o nyundua. A ɡɛ waa laanee, yeesu, juu tena kooroo nɔ.#Jɔn 19:19-22 38Belaa ba kpaa ŋwɛɛra banɛ pɛl daɡaɡra ta ja Yeesu nɛ, bɛl saɡɛ o diɡ ta, bɛl ɡe saɡɛ o ɡal ta. 39Nɛra baa kpɔ bela bɔr baa kaa la chɛɡre Yeesu dɛɛ muɡli o baah ŋɔ,#Yel 22:7-8 40“Chwa! Nɛn waa dɛ ba Korowii Dea paɡra dɛ́ won kpɔ tɔpera atoro mao la laa nɔ ɡbao? Lɛ he te! Dɛ henee Korowii Bie la aa, le daɡaɡre la doa tu harɛ yá na!”
41Gɛɛ Sɔfonomonome ne Tɔnjerema ne bwɛɛ nomonome muɡli o baah ɡɛ banɔ la aa ɛa la, 42dɛ ŋɔ, “Ao! O won bane te lɛɛ, kɛ waa won lɛ o te ɡbaɡba. Kɛ Israel tena kooroo yɔ. Hé ɡel ó tu le daɡaɡre la doa ba harɛ yá na ásɛ dɛ yaradao. 43O ŋɔ Korowii nɛɛ o sie dawɛ, dɛ ŋɔ Korowii Biee on. Dɛ o waa dɛ lɛ Korowii sie te naa, amɔ Kórowii ba lɛo taraken.” 44Dɛ ɡɛɛ ŋwɛɛra baa kpaa ba pɛl daɡaɡra ta ja o nɛɛ la ɡee chɛɡro.
Yeesu seo
(Mak 15:33-41; Luk 23:44-49; Jɔn 19:28-30)
45Wee aa baa che nyufala la, bɔr biro jumaa ken dɛ ka tel wekee saŋ mɔɔ dɛ berɛ chaah ja. 46Wekee saŋ aa baa tel la, Yeesu do lɔŋɔ kpeɡri nɛɛ dɛ ŋɔ, “Eli, Eli, lama sabaktani?” O munii kɛŋɔ, “N Mɛɛ Korowii, n Mɛɛ Korowii, ɛrɛɛ he chwa mɛ nɔɔ?”#Yel 22:1
47Nɛra baa cheɡɛ bela la aa no ɡɛ la, ba ŋɔ, “Hɛ́ɛ no! Elaejaa wɛɛ yerɛ la.”
48Asɛ bɛl chwa buɡ la ta, dɛ ka kpɔ konjɔɡɔjɔɡɔ bɛl waa dɛ lɛ nee ka li sennyɛɡa ta dɛ kpɔ toh daa ta, dɛ kpɔ pao ó nyɔ.#Yel 69:21 49Nɛra baa kaa la ɡe ŋɔ, “Hé ɡel ya na, dɛ Elaeja ɛɛ ba lɛo wa aa?”
50Belaa Yeesu berɛ do lɔŋɔ kohona, asɛ dɛ ɡel o doma kaa, o den sewɛ.
51Waa sewa la, ate dɛ yal waa teŋe Korowii Dea la baah ta la pere anɛ le nyundua ba ta harɛ.#Kaa 26:33 Harɛ jiɡro, asɛ bwetala bini peɡri, 52lalbɔɔne pili, asɛ Korowii nɛra baa serewa kɛrɛdɛ ir seo ta. 53Yeesu aa ir seo ta la, ba ɡe le ba lalbɔɔne bini dɛ ka jo bwɛjen Jerusalam, asɛ nɛra kɛrɛdɛ na ba.
54Sooja nomoa ne o soojare baa dɛ daah Yeesu la aa na ɡɛ harɛ aa jiɡra ne waa aa chiɡa la, ba ɔmɔ, asɛ ba ŋɔ, “Korowii Biee baa nɔ kpela!”
55Dɛ haahna warɔ dɛ che bojaŋ dɛɛ nyiŋi. A ɡɛ haahna nɔɔ teŋɛ o nɛɛ le Galilia harɛ dɛ daa kondikwaa dɛɛ tɛo.#Luk 8:2-3 56Ba bini banee Mɛɛre waa le Maɡdala la, ne Jems ne Josef nya Mɛɛre, dɛ Sebedii bii la nya.
Yeesu huɡa
(Mak 15:42-47; Luk 23:50-56; Jɔn 19:38-42)
57Awola jɔmɔra la baa bɛl baa dɛ yerɔ Josef, o le Arimatea dɛ ɛ suuɡate balɔ. Dɛ o ɡba ɛ Yeesu habɔteŋra la bɛl,#Aes 53:9 58dɛ ɡe la Paelet be dɛ ka soŋo ŋɔ ó tɛo ŋwɛnɛ ó ka kpɔ Yeesu lale la. Paelet sɛh dɛ kpɔ tɛo. 59Anee Josef kpɔɔ, dɛ kpɔ yapondɛɛɡe bɛl dɛ fɔrɔwo, 60dɛ kpɔɔ ka huɡe lalbɔɔ o ɡbaɡba aa forɛ bwe bɛl ta o do kɛŋɔ dea ken baa wola nomɛlbwa o bini huɡe mɔɔ la, dɛ ɡbili bwejen bɛl tɔ o nyoa, asɛ dɛ le bela kaa. 61Dɛ Mɛɛre waa le Maɡdala la ne o dɔŋ Mɛɛre la soɡe bela, asɛ ba sie pa lalbɔɔ la ta baa nyiŋi.
Yeesu lalbɔɔ daahna
62Awola tɔpere la, dɛ Juu tena dɛ kpɔ ba te ásɛ tɔɔ peraa, bá di ba Ona Tɔpere. Tɔ aa pera la, Sɔfonomonome ne Farisii tena la kaa cheme nomoa Paelet dem, 63dɛ ŋɔ o be ŋɔ, “Nomoa, ɡɛ saŋ a ɡɛ nyosonteŋni nɔ aa wola sewɛ mɔɔ la, dɛ o dɛ bol ŋɔ dɛ o sewaa, tɔpera atoro wɛɛ iruu ja. 64Anomanta, do nɛra bá kaa daah lalbɔɔ la mɔɔ tɔpetooro wee la tel. A waa laa aa, o habɔteŋra la ɛɛ ka ŋwɛ lale laanee le bɔɔ la bini, dɛ́ ka teŋe nyosone baɡle nɛra bwa ŋɔ iraa ba Dɔɔ la ir. Dɛ ɡɛ laa aa, neɡra baa dɛ ba ŋwɛnɛ dɔe ka neɡre nɛra nɔ ɛɛ dɔ bɔree che ɡwaa ɡɛ baa tɔ sie neɡre nɛra la bwa.”
65Anee nomoa Paelet ŋɔ ba be ŋɔ, “Soojaree la. Hé ɡel bá ka daah bɔɔ la. Ŋwɛnɛ te bɛlbwa haa kpɔ o ta ásɛ ba bɛ won ka ŋwɛ lale la la, hé kpɔ o ta.” 66Anee ba ka ɛ ɡɛ baa ɛ bwa nɛn bɛ won ka ŋwɛ lale la. Ba kaa maa lalbɔɔ la ne bwe la baa kpɔa tɔ o nyoa la bobɛl pɛ ɡɛ aa ɛ dɛ nomɛl ŋwɛo jo bɔɔ la bini naa, ba won jemɛ, asɛ dɛ berɛ kpɔ soojare so bela ŋɔ báa daah bela.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.