Matiu 22
22
Hanfale kondikwaa sɛɡla
(Luk 14:15-24)
1Yeesu berɔ kpɔ sɛɡla dɛ bol waa baɡle nɛra la ja, 2dɛ ŋɔ, “Kenii Korowii Kora ɛɛ ba doe. Kooro bɛlee lawɛ hanfale tɛ o bie, dɛ ɡel ba ɛ o hanfale kondikwa.#Luk 14:16-24 3O tomɛ o bonɔɔna ŋɔ bá ka yerɛ nɛra waa yer ba ŋɔ bá ba di hanfale kondikwaa la, asɛ ba sie ta on sui dɛ vɛh bala.
4Anee o berɛ kwaa tomɛ banfala dɛ ŋɔ ba be ŋɔ, ‘Hé ka ŋɔ nɛra maa yer ba la be ŋɔ ba tonɛ kondikwaa la. N kpoo nabala ne nae aa do noorare kohona, anomanta, n tonɛ komɛlbwa kɛ bá ba.’ 5A bwa pɛpɛrɛ nɛ, ba vɛoh dɛ kaa ba tomare ta. Bɛl kaa o koo, bɛl ɡe kaa o bonadibɔr, 6asɛ ba kar la ɡe lawɛ o bonɔɔna waa tom ba la dɛ ɛɛ ba hɔhɔrɔwa dɛ kpoo ba. 7A ɛ kooro la bandia kohona dɛ ɡel o tomɛ o soojare ba ka kpoo banɔ la baa kpoo o bonɔɔna la, asɛ dɛ fuh ba bwɛjen la ɡe.
8Anee o kwaa yerɛ o bonɔɔna bane ɡe ja, dɛ ŋɔ ba be ŋɔ, ‘Ba tonɛ n hanfale kondikwaa la, kɛ nɛra la maa yer ba ŋɔ bá ba di la, a ta ban chɛɛ. 9Name te hé le kaa fɔɡbaahna, dɛ́ ka yerɛ nɛra haa na ba la bwa ba hanfale kondikwaa la mun.’ 10Asɛ bonɔɔna la le kaa fɔɡbaahna, dɛ ka yerɛ nɛra baa na ba la bwa. Nɛndɛɛɡa ne nɛnchɔɡa bwaa ba yerɛ, asɛ nɛra su bela baa lawɛ hanfale la maa ken.
11Kooro la aa dɛ jam hɔɔhra la aa baa cheme bela la, o na baa bɛl ba bini kɛ o te ta laala aa chɛ kɛŋɔ ó do dɛ ba hanfale dem bela la ane doe. 12Anee o bɔɔ baa la ŋɔ, ‘N dam, ŋwɛnɛ besoo taa a che he ba bonɔ, haa wola laala aa chɛ kɛ hé do dɛ́ ba hanfale dem bonɔ nɔ ane doe nɔɔ?’ Waa bɔɔro ɡɛ la, o ta waane dɔe dɛ bol.
13Anee kooro la den ŋɔ o bonɔɔna la be ŋɔ, ‘Hé vɔrɔwe baa nɔ nɔɔra ne o nakpale, dɛ́ kpɔɔ ka ta dahara biro ta. Belaa wii ne weweele do.’ ”
14Yeesu aa kpɔ sɛɡla nɔ bol waa baɡ ba tonɛ la, asɛ o ŋɔ, “Nɛra maa yer ba warɔ taeh, kɛ ba bini tamaa kenii n chale.”
Toɔ bɔe wepɛɛre
(Mak 12:13-17; Luk 20:20-26)
15Farisii tena la le bokɛre dɛ ka vɔrɔwe ɡɛ baa ɛ dɛ́ dɔ Yeesu lawɛ webɔɔra ne.#Luk 11:52 16Anomanta, ba tomɛ ba habɔteŋra bane ne Hɛrɔd nɛra bane, ba ba o be dɛ ba ŋɔ, “Nomoa, ya jemɔ kɛŋɔ kasinteŋ ɡboo hɛɛ bol, haa nyosone teŋe. Korowii ŋwɛnɛɛ hɛɛ chaɡle nɛra kasinteŋ ne. He ta bolɛ dɛɛ ɔmɛ a habɔɔ kɛŋɔ a dɛ do bane som, kɛɛ a dɛ we bane bambile nɔ. Haa nɛra siebɔr nyiŋi dɛɛ bol wa, kɛŋɔ bɛl ɛ kooro kɛɛ nomoa kɛɛ bechala nɔ. 17Anomanta, chaɡle yaa ɡɛ haa na waa nɔ yá jemɛ. Ya mmarare dɛ tɛ yaa ŋwɛnɛ kɛ ya bɔ toɔ dɛɛ tɛ Rom Koojen Siisa la aa, kɛɛ waa yaa ŋwɛnɛ tɛ?”
18Yeesu tɔ sie jemɛ ba liichɔɡa, anomanta, o ŋɔ ba be ŋɔ, “He nɛra haa nyiŋi nɛra sie mɔɔ dɛɛ ɛ wa! Ɛrɛɛ hɛɛ nyin dɛ́ har mɛ bel nɔɔ? 19Hé kpɔ suuɡa haa kpɔa dɛɛ bɔ toɔ la tɛ mɛ ń na.” Baa kpɔ suuɡa la ba la, 20anee o pɛɛ ba ŋɔ, “Ume nyu ne o sɔnee nɔɔ?”
21Anee ba chaŋo ŋɔ, “Koojen Siisa nyu ne o sɔnee.”
Anee Yeesu ŋɔ ba be ŋɔ, “Gɛɛ a do te naa, hé kpɔ kwaa aa ɛ Koojen Siisa kwaa tɛo, dɛ́ kpɔ kwaa aa ɛ Korowii kwaa la tɛ Korowii.”#Rom 13:7
22Baa no ɡɛ Yeesu aa bola la, ba nyoa kpoo, ba le o be dɛ kaa.
Seo ta ira wepɛɛre
(Mak 12:18-27; Luk 20:27-40)
23Awola tenten la, Saduki tena ba Yeesu be. Dɛ baa yarada kɛŋɔ nɛn sewaa, wɛɛ berɔɔ ir ja. 24Ba baa bɔɔ Yeesu ŋɔ, “Nomoa, Mosis fa ŋɔ dɛ baa sewɔ ɡel o haah ba ta bii dɔe yaa, a chɛ kɛŋɔ o nime kɛɛ o dɔɔ kpɔ haah la mo dɛ́ loɡle bii, ásɛ a ɡɛ bii la ɛ lale la bii.#Mma 25:5 25Asɛ baa bɛl ne o nimanar banumɛlee fa lole. Nomoa la mo haah dɛ ba sewɛ, dɛ o ne haah la ta bie lolɛ, anomanta, o nime waa teŋɛ o nɛɛ la kpɔ haah la mo. 26O ɡe ne haah la ta lolɛ, o sewɛ. Gɛɛ toorote la ne banɔ la baa kaa la mo haah la ka lɔ nyoa, dɛ ba serewe. 27A habɔɔ la, luhaah la ɡe baa sewɛ. 28Taraken nɔ, dɛ tɔpere nɛra baa sewa bwa aa dɛ ba ira nɔ telaa, baala banuanɛ la bini, umee dɛɛ ba haah la jaa ɛɛ yɔ? Ba bwa ɡee moo ka.”
29Anee Yeesu chaŋ ba ŋɔ, “He kono kwaraa! Haa wola Korowii Waa baa chwera ne o kpeɡri waa jemɛ la waa. 30Dɛ nɛra baa sewa la berɔ iraa, baala aa haahnaa mo, haahna ɡe aa yalɛ. Baa soo kɛŋɔ nyundua toroma ken. 31Nɛra seo ta ira ɡe la nɔ, he ta ɡɛ Korowii aa bol he be la kure dɛ no a mun kɛɛ? 32O ŋɔ, ‘Menee Korowii Abraham ne Aesek dɛ Jekɔb aa tomɔ la.’ Lala laa dɛɛ tomɛ Korowii, weeraa dɛɛ tomɔ.”#Kaa 3:6
33Nɛnlaa la aa no ɡɛ waa nɔ la, ba nyoa kpo o webaɡla ta.
Korowii Mmarare la bini onjen
(Mak 12:28-34; Luk 10:25-28)
34Belaa Farisii tena la aa no ɡɛ Yeesu aa chaŋe Saduki tena la kɛrɛdɛ ba ta berɛ won dɔ waane dɛ́ bol kpa la, ba kaa cheme, 35asɛ ba bini Tɔnjereme bɛl pɛɛ Yeesu waane, dɛ́ kpɔ harɔ bel.
36O pɛɛro ŋɔ, “Nomoa, mmarare nɔ te bwa bini umee dena ɡwaa a bwa nɔ?” 37Yeesu chaŋɔ ŋɔ, “ ‘Hé nyin N Naa Korowii he bambile bwa, he hweera ne he liire bwa ne.’#Mma 6:5 38Onɔɔ ɡwaa a bwa dɛ tɔ a bwa sie. 39Onɔ la waa jaa dɛ teŋɛ nɛɛ o waa hiah la ɡee kɛŋɔ, ‘Nyin he dɔŋ kɛ he ɡbaɡba.’ 40Gɛ mmarare anɛ nɔ binii Mosis Mmara la ne waa Korowii keamere la aa baɡla la bwa le.”
Kristo la wepɛɛre
(Mak 12:35-37; Luk 20:41-44)
41Farisii tena la bane aa kaa pɛ so la, Yeesu pɛɛ ba ŋɔ, 42“Ɛrɛɛ hɛɛ lii Kristo la Korowii aa baɡɛ nyoa ŋɔ wɛɛ tomɔɔ ó ba lɛ yaa laɔ? He dɛ lii kɛ ume naa yɔ?”
Anee ba ŋɔ, “Devid naa.”
43Anee Yeesu berɛ pɛɛ ba ŋɔ, “Aah ɛrɛ waa Korowii Domadɛɛɡe la aa ir Devid nɛɛ la o berɛ yerɔ o dɔɔ nɔɔ? Devid fa ŋɔ,
44‘N Naa Korowii ŋɔ n Dɔɔ be ŋɔ
ó so nomombɔr o diɡ ta ka tel kɛŋɔ
waa ba o dɔma ne harɛ ásɛ o tiɡri ba nɛ.’#Yel 110:1
45Dɛ Devid fa yerɔ o dɔɔ raa, ŋwɛnɛ besoo taa a che Kristo la berɛ ba ɛ Devid naa ɔ?” 46Nomɛlbwa ta wone chaŋe waa Yeesu aa pɛɛra la, anomanta, le awola tɔpere la dɛɛ kaa la, nomɛlbwa ta wone ba che o sie, dɛ pɛɛro waane kpa.
Currently Selected:
Matiu 22: mzw
Highlight
Share
Copy
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
Matiu 22
22
Hanfale kondikwaa sɛɡla
(Luk 14:15-24)
1Yeesu berɔ kpɔ sɛɡla dɛ bol waa baɡle nɛra la ja, 2dɛ ŋɔ, “Kenii Korowii Kora ɛɛ ba doe. Kooro bɛlee lawɛ hanfale tɛ o bie, dɛ ɡel ba ɛ o hanfale kondikwa.#Luk 14:16-24 3O tomɛ o bonɔɔna ŋɔ bá ka yerɛ nɛra waa yer ba ŋɔ bá ba di hanfale kondikwaa la, asɛ ba sie ta on sui dɛ vɛh bala.
4Anee o berɛ kwaa tomɛ banfala dɛ ŋɔ ba be ŋɔ, ‘Hé ka ŋɔ nɛra maa yer ba la be ŋɔ ba tonɛ kondikwaa la. N kpoo nabala ne nae aa do noorare kohona, anomanta, n tonɛ komɛlbwa kɛ bá ba.’ 5A bwa pɛpɛrɛ nɛ, ba vɛoh dɛ kaa ba tomare ta. Bɛl kaa o koo, bɛl ɡe kaa o bonadibɔr, 6asɛ ba kar la ɡe lawɛ o bonɔɔna waa tom ba la dɛ ɛɛ ba hɔhɔrɔwa dɛ kpoo ba. 7A ɛ kooro la bandia kohona dɛ ɡel o tomɛ o soojare ba ka kpoo banɔ la baa kpoo o bonɔɔna la, asɛ dɛ fuh ba bwɛjen la ɡe.
8Anee o kwaa yerɛ o bonɔɔna bane ɡe ja, dɛ ŋɔ ba be ŋɔ, ‘Ba tonɛ n hanfale kondikwaa la, kɛ nɛra la maa yer ba ŋɔ bá ba di la, a ta ban chɛɛ. 9Name te hé le kaa fɔɡbaahna, dɛ́ ka yerɛ nɛra haa na ba la bwa ba hanfale kondikwaa la mun.’ 10Asɛ bonɔɔna la le kaa fɔɡbaahna, dɛ ka yerɛ nɛra baa na ba la bwa. Nɛndɛɛɡa ne nɛnchɔɡa bwaa ba yerɛ, asɛ nɛra su bela baa lawɛ hanfale la maa ken.
11Kooro la aa dɛ jam hɔɔhra la aa baa cheme bela la, o na baa bɛl ba bini kɛ o te ta laala aa chɛ kɛŋɔ ó do dɛ ba hanfale dem bela la ane doe. 12Anee o bɔɔ baa la ŋɔ, ‘N dam, ŋwɛnɛ besoo taa a che he ba bonɔ, haa wola laala aa chɛ kɛ hé do dɛ́ ba hanfale dem bonɔ nɔ ane doe nɔɔ?’ Waa bɔɔro ɡɛ la, o ta waane dɔe dɛ bol.
13Anee kooro la den ŋɔ o bonɔɔna la be ŋɔ, ‘Hé vɔrɔwe baa nɔ nɔɔra ne o nakpale, dɛ́ kpɔɔ ka ta dahara biro ta. Belaa wii ne weweele do.’ ”
14Yeesu aa kpɔ sɛɡla nɔ bol waa baɡ ba tonɛ la, asɛ o ŋɔ, “Nɛra maa yer ba warɔ taeh, kɛ ba bini tamaa kenii n chale.”
Toɔ bɔe wepɛɛre
(Mak 12:13-17; Luk 20:20-26)
15Farisii tena la le bokɛre dɛ ka vɔrɔwe ɡɛ baa ɛ dɛ́ dɔ Yeesu lawɛ webɔɔra ne.#Luk 11:52 16Anomanta, ba tomɛ ba habɔteŋra bane ne Hɛrɔd nɛra bane, ba ba o be dɛ ba ŋɔ, “Nomoa, ya jemɔ kɛŋɔ kasinteŋ ɡboo hɛɛ bol, haa nyosone teŋe. Korowii ŋwɛnɛɛ hɛɛ chaɡle nɛra kasinteŋ ne. He ta bolɛ dɛɛ ɔmɛ a habɔɔ kɛŋɔ a dɛ do bane som, kɛɛ a dɛ we bane bambile nɔ. Haa nɛra siebɔr nyiŋi dɛɛ bol wa, kɛŋɔ bɛl ɛ kooro kɛɛ nomoa kɛɛ bechala nɔ. 17Anomanta, chaɡle yaa ɡɛ haa na waa nɔ yá jemɛ. Ya mmarare dɛ tɛ yaa ŋwɛnɛ kɛ ya bɔ toɔ dɛɛ tɛ Rom Koojen Siisa la aa, kɛɛ waa yaa ŋwɛnɛ tɛ?”
18Yeesu tɔ sie jemɛ ba liichɔɡa, anomanta, o ŋɔ ba be ŋɔ, “He nɛra haa nyiŋi nɛra sie mɔɔ dɛɛ ɛ wa! Ɛrɛɛ hɛɛ nyin dɛ́ har mɛ bel nɔɔ? 19Hé kpɔ suuɡa haa kpɔa dɛɛ bɔ toɔ la tɛ mɛ ń na.” Baa kpɔ suuɡa la ba la, 20anee o pɛɛ ba ŋɔ, “Ume nyu ne o sɔnee nɔɔ?”
21Anee ba chaŋo ŋɔ, “Koojen Siisa nyu ne o sɔnee.”
Anee Yeesu ŋɔ ba be ŋɔ, “Gɛɛ a do te naa, hé kpɔ kwaa aa ɛ Koojen Siisa kwaa tɛo, dɛ́ kpɔ kwaa aa ɛ Korowii kwaa la tɛ Korowii.”#Rom 13:7
22Baa no ɡɛ Yeesu aa bola la, ba nyoa kpoo, ba le o be dɛ kaa.
Seo ta ira wepɛɛre
(Mak 12:18-27; Luk 20:27-40)
23Awola tenten la, Saduki tena ba Yeesu be. Dɛ baa yarada kɛŋɔ nɛn sewaa, wɛɛ berɔɔ ir ja. 24Ba baa bɔɔ Yeesu ŋɔ, “Nomoa, Mosis fa ŋɔ dɛ baa sewɔ ɡel o haah ba ta bii dɔe yaa, a chɛ kɛŋɔ o nime kɛɛ o dɔɔ kpɔ haah la mo dɛ́ loɡle bii, ásɛ a ɡɛ bii la ɛ lale la bii.#Mma 25:5 25Asɛ baa bɛl ne o nimanar banumɛlee fa lole. Nomoa la mo haah dɛ ba sewɛ, dɛ o ne haah la ta bie lolɛ, anomanta, o nime waa teŋɛ o nɛɛ la kpɔ haah la mo. 26O ɡe ne haah la ta lolɛ, o sewɛ. Gɛɛ toorote la ne banɔ la baa kaa la mo haah la ka lɔ nyoa, dɛ ba serewe. 27A habɔɔ la, luhaah la ɡe baa sewɛ. 28Taraken nɔ, dɛ tɔpere nɛra baa sewa bwa aa dɛ ba ira nɔ telaa, baala banuanɛ la bini, umee dɛɛ ba haah la jaa ɛɛ yɔ? Ba bwa ɡee moo ka.”
29Anee Yeesu chaŋ ba ŋɔ, “He kono kwaraa! Haa wola Korowii Waa baa chwera ne o kpeɡri waa jemɛ la waa. 30Dɛ nɛra baa sewa la berɔ iraa, baala aa haahnaa mo, haahna ɡe aa yalɛ. Baa soo kɛŋɔ nyundua toroma ken. 31Nɛra seo ta ira ɡe la nɔ, he ta ɡɛ Korowii aa bol he be la kure dɛ no a mun kɛɛ? 32O ŋɔ, ‘Menee Korowii Abraham ne Aesek dɛ Jekɔb aa tomɔ la.’ Lala laa dɛɛ tomɛ Korowii, weeraa dɛɛ tomɔ.”#Kaa 3:6
33Nɛnlaa la aa no ɡɛ waa nɔ la, ba nyoa kpo o webaɡla ta.
Korowii Mmarare la bini onjen
(Mak 12:28-34; Luk 10:25-28)
34Belaa Farisii tena la aa no ɡɛ Yeesu aa chaŋe Saduki tena la kɛrɛdɛ ba ta berɛ won dɔ waane dɛ́ bol kpa la, ba kaa cheme, 35asɛ ba bini Tɔnjereme bɛl pɛɛ Yeesu waane, dɛ́ kpɔ harɔ bel.
36O pɛɛro ŋɔ, “Nomoa, mmarare nɔ te bwa bini umee dena ɡwaa a bwa nɔ?” 37Yeesu chaŋɔ ŋɔ, “ ‘Hé nyin N Naa Korowii he bambile bwa, he hweera ne he liire bwa ne.’#Mma 6:5 38Onɔɔ ɡwaa a bwa dɛ tɔ a bwa sie. 39Onɔ la waa jaa dɛ teŋɛ nɛɛ o waa hiah la ɡee kɛŋɔ, ‘Nyin he dɔŋ kɛ he ɡbaɡba.’ 40Gɛ mmarare anɛ nɔ binii Mosis Mmara la ne waa Korowii keamere la aa baɡla la bwa le.”
Kristo la wepɛɛre
(Mak 12:35-37; Luk 20:41-44)
41Farisii tena la bane aa kaa pɛ so la, Yeesu pɛɛ ba ŋɔ, 42“Ɛrɛɛ hɛɛ lii Kristo la Korowii aa baɡɛ nyoa ŋɔ wɛɛ tomɔɔ ó ba lɛ yaa laɔ? He dɛ lii kɛ ume naa yɔ?”
Anee ba ŋɔ, “Devid naa.”
43Anee Yeesu berɛ pɛɛ ba ŋɔ, “Aah ɛrɛ waa Korowii Domadɛɛɡe la aa ir Devid nɛɛ la o berɛ yerɔ o dɔɔ nɔɔ? Devid fa ŋɔ,
44‘N Naa Korowii ŋɔ n Dɔɔ be ŋɔ
ó so nomombɔr o diɡ ta ka tel kɛŋɔ
waa ba o dɔma ne harɛ ásɛ o tiɡri ba nɛ.’#Yel 110:1
45Dɛ Devid fa yerɔ o dɔɔ raa, ŋwɛnɛ besoo taa a che Kristo la berɛ ba ɛ Devid naa ɔ?” 46Nomɛlbwa ta wone chaŋe waa Yeesu aa pɛɛra la, anomanta, le awola tɔpere la dɛɛ kaa la, nomɛlbwa ta wone ba che o sie, dɛ pɛɛro waane kpa.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.