Matiu 20
20
Tom-ɛɛra baa bɔ ba paa sɛɡla
1Yeesu berɔ ŋɔ, “Korowii Kora la do kɛŋɔ paa bɛl ne o tom-ɛɛra bane wa. Paa la iro chɔmbibi dɛɛ nyin tom-ɛɛra bá ka ɛ toma o koo ta dɛ́ lɛ suuɡa. 2O ne ba di yoɡ, asɛ ba sɛh kɛ baa ɛ toma tɔpebir la bwaa, dɛ́ lɛ denaare beŋkpoŋ aa ɛ tɔpebir toma kembɔr, asɛ o ɡel paa tena la kaa koo la ta.
3Dɛ́ɛ kaa koola nenyɔɔ saŋ la, o berɔ ka na bonɔɔna bane baa cheɡɛ fɔɡbaah pɛɛpɛɛ. 4Anee o ŋɔ ba be ŋɔ, ‘Hé ɡe kaa n koo la ta ka ɛ toma, ásɛ n tɛ heyaa kembɔr aa chɛ heya.’ 5Asɛ ba no o be dɛ kaa.
Gɛ saŋ wee aa baa che nyufala, ne wekee saŋ la, o berɔ na tom-ɛɛra la bane ɡe ja, dɛ bol ba ɡe be ɡɛ waa bol banɔ la be la, asɛ ba ɡe kaa koo la ta. 6Aa baa ka tamaa ken wee jo la, o berɔ ka na nɛra bane kɛ ba ɡe aa cheɡɛ fɔɡbaah pɛɛpɛɛ. Anee o pɛɛ ba ŋɔ, ‘Ɛrɛ waa fini bwa he che bonɔ dɛɛ chɔɡ pɛɛpɛɛ nɔɔ?’
7Belaa ba chaŋo ŋɔ, ‘Nomɛlbwa ta yaa o toma ta kpɔe.’
Anee baa la ŋɔ, ‘Gɛɛ te naa, hé ɡe kaa n koo ta bela ka ɛ toma.’
8Wee aa baa swɛɛ bɔr jo name la, o yerɛ naate waa dɛ nyiŋi o koo la ta la dɛ ŋɔ o be ŋɔ, ‘Yerɛ tom-ɛɛra la, dɛ́ bɔ ba kem. Kɛ tɔ sie le banɔ la baa ka mun ba la nɛ, dɛ́ bɔ ba kem.’
9Banɔ la baa ba toma la ta dɛ wee dɛ ba joe la bɛlbwa dɔ denaare beŋkpoŋ. 10Anomanta, dɛ banɔ la baa tɔ sie ba toma la ta chɔmbibi ne la dɛ lii kɛ baa dɔ suuɡaa ɡwaa ba bala la, kɛ denaare beŋkpoŋaa o bɔ ba ɡe bwa. 11Baa lɛ ba kembɔr la dɛ ba berɔ dɛɛ naɡre paa la waa ŋɔ, 12‘Banɔ te aa dena ba ta biɡre bɛlbwa wee den swɛɛ, asɛ ya te le chɔmbibi ne bwa wedamanta nɔ kpo yaa, ɡɛɛ he saah bɔ ya bwa kem kɛrɛdɛ aa?’
13Anee paa la chaŋe ba bini nomoa la ŋɔ, ‘N dam, n ta heyaa faahrɛ. N ne he ta toma nɔ yoɡ dii, he sɛh denaare beŋkpoŋa mɔɔ dɛ ba ɛa? 14Hé kpɔ he suuɡa le n sie kaa. Men dɛɛ nyin dɛ bɔ he bwa kem kɛrɛdɛ. 15N ta ŋwɛnɛ dɔe kɛ ń kpɔ n ɡbaɡba suuɡa ɛ ɡɛ aa too n tea a? Kɛɛ ɡɛ maa ta tea dɛ ɛ laanee dɛɛ we he nɛ?’ ”
16Yeesu aa bol ɡɛ waa nɔ tonɛ la, o ŋɔ, “Gɛɛ a do, muŋkaala ɛɛ ba tɔ siee, ásɛ sitɔɔla berɛ ba ka mun.”
Yeesu berɔ bol o seo waa toorotena
(Mak 10:32-34; Luk 18:31-34)
17Yeesu aa dɛ kaa Jerusalam la, o kaa ŋɔ o habɔteŋra fi dɛ banɛ la ɡbo be ŋwɛnɛ la ta ŋɔ, 18“Hɛ́ɛ no n be. Yaa dɛ kaa Jerusalam nɔ, baa ka le Men Nɛn Biee tɛ Sɔfonomonome ne Tɔnjerema la. Baa pa mɛ bolchɔɡee dɛ́ ŋɔ bá kpo mɛ.#Mat 16:21 19Baa kpɔ mɛɛ do nɛra baa wola Juu tena ɛɛ la nɔn ta, bá di n loro, dɛ́ cha mɛ chweremi, dɛ́ kpaa mɛ pɛl daɡaɡre ta, dɛ́ kpo mɛ, ásɛ tɔpetooro wee la ń ir seo ta.”
Haah bɛl waa soŋa tɛ o bii
(Mak 10:35-45)
20Asɛ Sebedii haah ne o bii ba, dɛ ba ɡuŋi Yeesu sie dɛ soŋo ŋɔ, ó ɛ waane tɛɛ ba.#Mat 4:21
21Anee Yeesu pɛɛ haah la ŋɔ, “Bɔkwaa hɛɛ nyin kɛ ń ɛ tɛɛ nɔ?”
Belaa haah la chaŋo ŋɔ, “Baɡ mɛ nyoa kɛ dɛ he baa di kora aa, hɛɛ ɡeloo n bii banɛ nɔ bɛl so he diɡ ta, bɛl ɡe so he ɡal ta.”
22Anee Yeesu ŋɔ bii la be ŋɔ, “Haa waa haa dɛ soŋe nɔ mun jemɛ. Hɛɛ wonoo nyɔ n tɛɡkpela nɔ maa dɛ ba nyɔe nɔ ane aa?”
Anee ba sɛh ŋɔ, “Yaa wonoo.”
23Asɛ Yeesu berɛ ŋɔ, “A ɛ kasinteŋ kɛ hɛɛ nyɔ n tɛɡkpela nɔ dɔŋaa te, kɛ n ta kpeɡri dɔe dɛ́ kpɔ nɛn so n diɡ ne n ɡal ta. Banɔ la baa su n Mɛɛ siwi laanee dɛɛ ba bela dɔe dɛ́ so.”
24Yeesu habɔteŋra fi la aa kaa la, ba no waa Sebedii bii la aa ɛa la, ba baah di ba nɛɛ kɛrɛdɛ. 25Anomanta, Yeesu yerɛ ba bwa cheme dɛ ŋɔ, “He jemɔ kɛ harɛ nɔ ta nomonome ne ba nomonjena dɛ di kpeɡri ba nɛra nɛ, dɛ ɡel baa tom ba, dɛ ɛ ɡɛ baa dɛ nyin dɛɛ tɛɛ ba. 26Kɛ ɡɛ laa chɛ kɛŋɔ hé te do. He bini bɛl dɛ nyin kɛ ó ɛ nomoa aa, a chɛ kɛ ó kpɔ o te ɛ kɛ bechala dɛɛ tomɛ heya. 27Dɛ he bini bɛl dɛ nyin kɛ wɛɛ tɔ he sie naa, a chɛ kɛ ó berɛ o te kɛ he bwa bonɔɔ.” 28Dɛ ŋɔ, “Men Nɛn Bie ta balɛ kɛ nɛ́ra tom mɛ. N te balɔ dɛ́ ba tomɛ nɛra,#Jɔn 13:4 dɛ́ ɡarɛ kpɔ n nyu charɛ nɛndamanta mkpa.”#Jɔn 10:15; 11:51-52
Yeesu chah nyoŋa banɛ bane
(Mak 10:46-52; Luk 18:35-43)
29Yeesu ne o habɔteŋra la aa le Jeriko dɛɛ kaa la, nɛnlaa tenten teŋɛ ba nɛ. 30Dɛ nyoŋa banɛ bane soɡe ŋwɛnɛ nyoa dɛ no Yeesu ɡbɔɡa kɛ waa dɛ kaa, asɛ ba kpɔ takpeɡ dɛɛ yerɔ ŋɔ, “N Dɔɔ, Devid Naa, na ya sum!”
31Dɛ nɛnlaa la dɛ kah ba ŋɔ bá tɔ nyoa. Kɛ dɛ namee ba taa dooɡe lɔŋɔre kohona dɛɛ yerɛ, “N Dɔɔ, Devid Naa, na ya sum!”
32Anee Yeesu jaɡɛ che, dɛ yer ba dɛ pɛɛ ba ŋɔ, “Bɔkwaa hɛɛ nyin kɛ ń ɛ tɛ heya ɔ?”
33Asɛ ba chaŋo ŋɔ, “Nomoa, ya dɛ nyin he ɡel yá berɛ won dɛɛ na.”
34Yeesu dɔ tedoma tɛɛ ba, dɛ kpɔ o nɔn leɡe ba sibie. Buɡ la ta, dɛ ba sie pilo ba won dɛɛ na, dɛ teŋɛ Yeesu nɛ.
Currently Selected:
Matiu 20: mzw
Highlight
Share
Copy
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
Matiu 20
20
Tom-ɛɛra baa bɔ ba paa sɛɡla
1Yeesu berɔ ŋɔ, “Korowii Kora la do kɛŋɔ paa bɛl ne o tom-ɛɛra bane wa. Paa la iro chɔmbibi dɛɛ nyin tom-ɛɛra bá ka ɛ toma o koo ta dɛ́ lɛ suuɡa. 2O ne ba di yoɡ, asɛ ba sɛh kɛ baa ɛ toma tɔpebir la bwaa, dɛ́ lɛ denaare beŋkpoŋ aa ɛ tɔpebir toma kembɔr, asɛ o ɡel paa tena la kaa koo la ta.
3Dɛ́ɛ kaa koola nenyɔɔ saŋ la, o berɔ ka na bonɔɔna bane baa cheɡɛ fɔɡbaah pɛɛpɛɛ. 4Anee o ŋɔ ba be ŋɔ, ‘Hé ɡe kaa n koo la ta ka ɛ toma, ásɛ n tɛ heyaa kembɔr aa chɛ heya.’ 5Asɛ ba no o be dɛ kaa.
Gɛ saŋ wee aa baa che nyufala, ne wekee saŋ la, o berɔ na tom-ɛɛra la bane ɡe ja, dɛ bol ba ɡe be ɡɛ waa bol banɔ la be la, asɛ ba ɡe kaa koo la ta. 6Aa baa ka tamaa ken wee jo la, o berɔ ka na nɛra bane kɛ ba ɡe aa cheɡɛ fɔɡbaah pɛɛpɛɛ. Anee o pɛɛ ba ŋɔ, ‘Ɛrɛ waa fini bwa he che bonɔ dɛɛ chɔɡ pɛɛpɛɛ nɔɔ?’
7Belaa ba chaŋo ŋɔ, ‘Nomɛlbwa ta yaa o toma ta kpɔe.’
Anee baa la ŋɔ, ‘Gɛɛ te naa, hé ɡe kaa n koo ta bela ka ɛ toma.’
8Wee aa baa swɛɛ bɔr jo name la, o yerɛ naate waa dɛ nyiŋi o koo la ta la dɛ ŋɔ o be ŋɔ, ‘Yerɛ tom-ɛɛra la, dɛ́ bɔ ba kem. Kɛ tɔ sie le banɔ la baa ka mun ba la nɛ, dɛ́ bɔ ba kem.’
9Banɔ la baa ba toma la ta dɛ wee dɛ ba joe la bɛlbwa dɔ denaare beŋkpoŋ. 10Anomanta, dɛ banɔ la baa tɔ sie ba toma la ta chɔmbibi ne la dɛ lii kɛ baa dɔ suuɡaa ɡwaa ba bala la, kɛ denaare beŋkpoŋaa o bɔ ba ɡe bwa. 11Baa lɛ ba kembɔr la dɛ ba berɔ dɛɛ naɡre paa la waa ŋɔ, 12‘Banɔ te aa dena ba ta biɡre bɛlbwa wee den swɛɛ, asɛ ya te le chɔmbibi ne bwa wedamanta nɔ kpo yaa, ɡɛɛ he saah bɔ ya bwa kem kɛrɛdɛ aa?’
13Anee paa la chaŋe ba bini nomoa la ŋɔ, ‘N dam, n ta heyaa faahrɛ. N ne he ta toma nɔ yoɡ dii, he sɛh denaare beŋkpoŋa mɔɔ dɛ ba ɛa? 14Hé kpɔ he suuɡa le n sie kaa. Men dɛɛ nyin dɛ bɔ he bwa kem kɛrɛdɛ. 15N ta ŋwɛnɛ dɔe kɛ ń kpɔ n ɡbaɡba suuɡa ɛ ɡɛ aa too n tea a? Kɛɛ ɡɛ maa ta tea dɛ ɛ laanee dɛɛ we he nɛ?’ ”
16Yeesu aa bol ɡɛ waa nɔ tonɛ la, o ŋɔ, “Gɛɛ a do, muŋkaala ɛɛ ba tɔ siee, ásɛ sitɔɔla berɛ ba ka mun.”
Yeesu berɔ bol o seo waa toorotena
(Mak 10:32-34; Luk 18:31-34)
17Yeesu aa dɛ kaa Jerusalam la, o kaa ŋɔ o habɔteŋra fi dɛ banɛ la ɡbo be ŋwɛnɛ la ta ŋɔ, 18“Hɛ́ɛ no n be. Yaa dɛ kaa Jerusalam nɔ, baa ka le Men Nɛn Biee tɛ Sɔfonomonome ne Tɔnjerema la. Baa pa mɛ bolchɔɡee dɛ́ ŋɔ bá kpo mɛ.#Mat 16:21 19Baa kpɔ mɛɛ do nɛra baa wola Juu tena ɛɛ la nɔn ta, bá di n loro, dɛ́ cha mɛ chweremi, dɛ́ kpaa mɛ pɛl daɡaɡre ta, dɛ́ kpo mɛ, ásɛ tɔpetooro wee la ń ir seo ta.”
Haah bɛl waa soŋa tɛ o bii
(Mak 10:35-45)
20Asɛ Sebedii haah ne o bii ba, dɛ ba ɡuŋi Yeesu sie dɛ soŋo ŋɔ, ó ɛ waane tɛɛ ba.#Mat 4:21
21Anee Yeesu pɛɛ haah la ŋɔ, “Bɔkwaa hɛɛ nyin kɛ ń ɛ tɛɛ nɔ?”
Belaa haah la chaŋo ŋɔ, “Baɡ mɛ nyoa kɛ dɛ he baa di kora aa, hɛɛ ɡeloo n bii banɛ nɔ bɛl so he diɡ ta, bɛl ɡe so he ɡal ta.”
22Anee Yeesu ŋɔ bii la be ŋɔ, “Haa waa haa dɛ soŋe nɔ mun jemɛ. Hɛɛ wonoo nyɔ n tɛɡkpela nɔ maa dɛ ba nyɔe nɔ ane aa?”
Anee ba sɛh ŋɔ, “Yaa wonoo.”
23Asɛ Yeesu berɛ ŋɔ, “A ɛ kasinteŋ kɛ hɛɛ nyɔ n tɛɡkpela nɔ dɔŋaa te, kɛ n ta kpeɡri dɔe dɛ́ kpɔ nɛn so n diɡ ne n ɡal ta. Banɔ la baa su n Mɛɛ siwi laanee dɛɛ ba bela dɔe dɛ́ so.”
24Yeesu habɔteŋra fi la aa kaa la, ba no waa Sebedii bii la aa ɛa la, ba baah di ba nɛɛ kɛrɛdɛ. 25Anomanta, Yeesu yerɛ ba bwa cheme dɛ ŋɔ, “He jemɔ kɛ harɛ nɔ ta nomonome ne ba nomonjena dɛ di kpeɡri ba nɛra nɛ, dɛ ɡel baa tom ba, dɛ ɛ ɡɛ baa dɛ nyin dɛɛ tɛɛ ba. 26Kɛ ɡɛ laa chɛ kɛŋɔ hé te do. He bini bɛl dɛ nyin kɛ ó ɛ nomoa aa, a chɛ kɛ ó kpɔ o te ɛ kɛ bechala dɛɛ tomɛ heya. 27Dɛ he bini bɛl dɛ nyin kɛ wɛɛ tɔ he sie naa, a chɛ kɛ ó berɛ o te kɛ he bwa bonɔɔ.” 28Dɛ ŋɔ, “Men Nɛn Bie ta balɛ kɛ nɛ́ra tom mɛ. N te balɔ dɛ́ ba tomɛ nɛra,#Jɔn 13:4 dɛ́ ɡarɛ kpɔ n nyu charɛ nɛndamanta mkpa.”#Jɔn 10:15; 11:51-52
Yeesu chah nyoŋa banɛ bane
(Mak 10:46-52; Luk 18:35-43)
29Yeesu ne o habɔteŋra la aa le Jeriko dɛɛ kaa la, nɛnlaa tenten teŋɛ ba nɛ. 30Dɛ nyoŋa banɛ bane soɡe ŋwɛnɛ nyoa dɛ no Yeesu ɡbɔɡa kɛ waa dɛ kaa, asɛ ba kpɔ takpeɡ dɛɛ yerɔ ŋɔ, “N Dɔɔ, Devid Naa, na ya sum!”
31Dɛ nɛnlaa la dɛ kah ba ŋɔ bá tɔ nyoa. Kɛ dɛ namee ba taa dooɡe lɔŋɔre kohona dɛɛ yerɛ, “N Dɔɔ, Devid Naa, na ya sum!”
32Anee Yeesu jaɡɛ che, dɛ yer ba dɛ pɛɛ ba ŋɔ, “Bɔkwaa hɛɛ nyin kɛ ń ɛ tɛ heya ɔ?”
33Asɛ ba chaŋo ŋɔ, “Nomoa, ya dɛ nyin he ɡel yá berɛ won dɛɛ na.”
34Yeesu dɔ tedoma tɛɛ ba, dɛ kpɔ o nɔn leɡe ba sibie. Buɡ la ta, dɛ ba sie pilo ba won dɛɛ na, dɛ teŋɛ Yeesu nɛ.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.