Matiu 14

Jɔn waa dɛ sɔ nɛra Korowii nee nyu teŋa

(Mak 6:14-29; Luk 9:7-9)

1Kooro Hɛrɔd waa dɛ nyiŋi Galilia harɛ ta ɡɛ saŋ la no Yeesu wa, 2asɛ dɛ ŋɔ o bonɔɔna be ŋɔ, “Jɔn o fa aa dɛ sɔ nɛra Korowii nee laanee la. O weero le seo ta. A waa o won nyokpowaa nɔ ɛɛ la.”

3Kooro Hɛrɔd nɔ fa ɡelɔ ba lawɛ Jɔn, dɛ doo kpɛɛ dɛ kpɔɔ ka do dea. Kooro nɔ nime Felep haah Hɛrɔdeas waa o koh ɛ Jɔn ɡɛ la,#Luk 3:19-20 4dɛkalkɛ kooro la moo, asɛ Jɔn ŋɔ o be ŋɔ o ta an aŋwɛnɛ ta ɛɛ kɛ waa mo Hɛrɔdeas la.#Lew 18:16 5Asɛ kooro la fe ɛɛ nyin Jɔn dɛ́ kpo. Kɛ dɛ o dɛ ɔmɛ Juu tena la, dɛkalkɛ ba te bwa ŋɔ Jɔn ɛ Korowii keame.

6Awola bɛlee kooro la ɛɛ di o lola tɔpere, asɛ Hɛrɔdeas bihaah ba sa baɡle nɛra la bwa. O sae la ɡelɔ kooro la sie lɛ. 7O ŋɔ tolo la be ŋɔ, “N ŋwɛɛrɔ kɛ komɛlbwa haa dɛ nyin la, mɛɛ kpɔɔ tɛɛ.” 8O la ka ŋɔ o nya be. O nya ɡel o la dɛ ka ŋɔ kooro la be ŋɔ, “N dɛ nyin kɛ he kpɔ Jɔn waa dɛ sɔ nɛra Korowii nee la nyu dawɛ korɔ ta ba tɛ mɛ taraken.” 9Waa nɔ we kooro la nɛɛ kɛrɛdɛ, kɛ o ntam waa ŋwɛɛra la ne nɛra baa soɡe bela dɛ no la nomanta, waa nyin kɛ ó to o ntam la, asɛ dɛ sɛh, 10dɛ ɡel ba la dea bela baa do Jɔn la, dɛ ka teŋe o nyu, 11dɛ kpɔ dawɛ korɔ ta ba tɛ tolo la, asɛ o ɡe kpɔ ka tɛ o nya. 12Jɔn habɔteŋra la balɔ dɛ ba kpɔ lale la ka huɡe, asɛ dɛ ka taa baɡle Yeesu.

Yeesu tɛ nɛra kaɡboŋa banue kondikwaa ba di

(Mak 6:30-44; Luk 9:10-17; Jɔn 6:1-14)

13Yeesu aa no ɡɛ waa nɔ la, o le nɛra baah dɛ ka kpɔ ɡbera dɛ kaa bela nomɛlbwa aa wola toole. Nɛra no ɡɛ waa la, dɛ le ba bwɛɛre ta dɛ kpɔ naa ta dɛ tiu. 14Yeesu aa le ɡbera la bini, dɛ nɛnlaa tenten lɔ bela. Ba waa domɛ o tea, asɛ o chah ba bini weela tena.#Mat 9:36

15Bɔr aa dɛ jo la, o habɔteŋra la baa ŋɔ o be ŋɔ, “Nomoa, bonɔ ɛ kpɔɡ baah, bɔr ɡe dɛ jo. Anomanta, ŋɔ ba be bá kaa bwɛɛre nɔ aa bar bonɔ nɔ ta, dɛ́ ka yawɛ kwaane di.”

16Yeesu chaŋ ba ŋɔ, “Ba ta chɛɛ kɛ ba kaa. Hé ɡe nyin kwaa tɛɛ ba bá di.”#2Ko 4:42-44

17Anee ba ŋɔ, “Paanoo anue ne pɛŋa anɛ ɡboo ya dɔ bonɔ.”

18Anee Yeesu ŋɔ, “Hé kpɔ ba tɛ mɛ.” 19O ɡel nɛra la bwa so harɛ kpɔɡlor la ta, asɛ dɛ kpɔ paanoo anue la ne pɛŋa anɛ la, dɛ ha sie nyiŋi nyundua dɛ jam Korowii, dɛ mɔne paanoo la do o habɔteŋra la nɔɔra ta dɛ ŋɔ bá bɔne tɛɛ ba, 20asɛ nɛra la bwa di dɛ vaɡre. O habɔteŋra la aa tɔɔ paanoo ne pɛŋa baa dia a ka la pɛ la, a su wɛɡrɛjena fi dɛ anɛ. 21Nɛra baa di kwaa la, ba baala ɡbo ɛɛ ɛ kaɡboŋa banue. Haahna ne bechale te ta jae.

Yeesu valɛ nee sie

(Mak 6:45-52; Jɔn 6:15-21)

22Belaa Yeesu ɡel o habɔteŋra la jo ɡbera bini dɛ tɔ sie kaa moo la baŋ, asɛ o ɡe ɡel nɛra la ɛɛ peɡre. 23Nɛra la aa kaala la, o teehnɔ kaa bwejen bɛl doa, dɛ ka soŋe Korowii bela. Bɔr aa baa ɡarɛ bwa, dɛ o ɡbo ta lɔ bela. 24Gɛ saŋ nɔ bwa dɛ ɡbera la lɔ mobaah ta asɛ nehɛma ɛɛ beɡro, dɛkalkɛ dɛ peu bɛl tao dɛɛ chem ba.

25Jabal loɡla sii saŋ la, Yeesu valɔ kpɔ nee la sie dɛɛ kaa ba be. 26Baa nao o valɛ nee sie dɛɛ ba la, ba ɔmɔ dɛ dooɡe lɔŋɔre ŋɔ, “Lalee yoo!”

27Yeesu den ŋɔ, “Hé lawɛ bambile. Menee! He bɛ ɔmɛ!”

28Anee Pita ŋɔ, “N Dɔɔ, dɛ henee yaa, ɡel ń ɡe won valɛ nee sie ba he be.”

29Anee Yeesu ŋɔ, “Ba.”

Belaa Pita den le ɡbera bini tu nee sie dɛ valɛ dɛɛ kaa o be. 30Waa na ɡɛ peu la aa dɛ ta la, o berɔ ɔmɛ dɛ den dɛɛ morɛ, asɛ dɛ do lɔŋɔ ŋɔ, “N Dɔɔ, lɛɛ mɛ!”

31Buɡ la ta, dɛ Yeesu tel bela dɛ lawɔ dɛ ŋɔ, “He yarada aa kanɛ kwara! Ɛrɛɛ he berɛ di tɔŋla nɔɔ?”

32Baa jo ɡbera la bini la, peu la ɡel tae. 33Yeesu habɔteŋra baa lɔ ɡbera la bini la ɡuŋu dɛ ŋɔ, “Kasinteŋ, henee Korowii Bie la kpela.”

34Ba tawɔ ka chuɡe moo la baŋ bɛl Gɛnɛsarɛt harɛ ta.#Mak 6:53-56 35Bela tena la aa jemɔ la, ba kaa yerɛ baah bela tena ba bwara aa dɛ wee ba bwa ba Yeesu be. 36Ba soŋo ŋɔ ó ɡel weela tena la leɡe o batakaare nyoa ɡbo ásɛ dɛ ɡbaŋre. Asɛ banɔ baa leɡe o batakaare nyoa la bwa ɡbaŋre.

Currently Selected:

Matiu 14: mzw

Highlight

Copy