Matiu 1
MZW

Matiu 1

1
Gɛ Yeesu Kristo nabaala aa teŋɛ dɔŋa nɛɛ wa
(Luk 3:23-38)
1Gɛ Kooro Devid naa Yeesu Kristo nabaala aa teŋɛ dɔŋa nɛɛ laanee nɔ. Abrahamee ɛ ba bwa nyu te.
2Abraham lolɛ Aesek,
Aesek lolɛ Jekɔb,
Jekɔb lolɛ Juda ne o dɔɔranar ne nimanar,
3asɛ Juda lolɛ Pɛrɛs ne Sɛra. Ba nya sɔne Taama.
Pɛrɛs lolɛ Hɛsrɔn,
Hɛsrɔn lolɛ Ram,
4Ram lolɛ Aminadab,
Aminadab lolɛ Naasɔn,
Naasɔn lolɛ Salmon,
5Salmon lolɛ Boas, o nya sɔne Rahab,
Boas lolɛ Ɔbɛd, o nya sɔne Rut,
Ɔbɛd lolɛ Jese,#Rut 4:17
6asɛ Jese lolɛ Kooro Devid.
Kooro Devid lolɛ Solomɔn. Solomɔn nyaa haah bɛl Uria fa aa moo ka la,
7Solomɔn lolɛ Rɛhoboam,
Rɛhoboam lolɛ Abija,
Abija lolɛ Asa,
8Asa lolɛ Jehosafat,
Jehosafat lolɛ Jehoram,
Jehoram lolɛ Ussia,
9asɛ Ussia lolɛ Jotam.
Jotam lolɛ Ahas,
Ahas lolɛ Hɛsɛkea,
10Hɛsɛkea lolɛ Manasɛ,
Manasɛ lolɛ Amɔn,
Amɔn lolɛ Josia,
11asɛ Josia lolɛ Jekonia ne o nimanar.
A ɡɛ saŋee Babelɔn tena pɔ Israel tena nɛɛ dɛ laɡ ba kaa ba harɛ la.
12Baa laɡ ba kaa Babelɔn harɛ la habɔɔ
Jekonia lolɛ Sealteɛl,
Sealteɛl lolɛ Sɛrobabɛl,
13Sɛrobabɛl lolɛ Abiud,
Abiud lolɛ Eliakim,
Eliakim lolɛ Asɔ,
14asɛ Asɔ lolɛ Sadɔk.
Sadɔk lolɛ Akim,
Akim lolɛ Eliud,
15asɛ Eliud lolɛ Eliasa,
Eliasa lolɛ Matan,
Matan lolɛ Jekɔb,
16Jekɔb ɡee lolɛ Josef. Gɛ Josef nɔɔ mo Mɛɛre waa lolɛ Yeesu baa dɛ yerɔ Kristo, Korowii aa ŋɔa ŋɔ wɛɛ tomɔɔ ó ba lɛ o nɛra la.
17Le Abraham bere saŋ ka tel Kooro Devid saŋ la, naanar la lɔ fi dɛ banaarɛ. Asɛ le Kooro Devid saŋ ka tel ɡɛ saŋ baa laɡ ba kaa Babelɔn harɛ la ɡe, naanar la lɔ fi dɛ banaarɛ. Asɛ dɛ berɛ le ɡɛ saŋ baa laɡ ba kaa Babelɔn harɛ la ba le Kristo#1:17 Grik tena wobol ta Kristo kɛɛ Hibru tena wobol ta Mɛsaya munii nɛn Korowii aa leo cheɡ tɛ o te. saŋ la, a ɡe jaɡɛ fi dɛ banaarɛ.
Yeesu Kristo lola wa
(Luk 2:1-7)
18Kenii Yeesu Kristo lola bini waa do. Josef ne Yeesu nya Mɛɛre nɛra sɛoh ŋɔ ó kpɔɔ mo. Baa wola chɔe mɔɔ la, dɛ Mɛɛre cheɡɛ Korowii Domadɛɛɡe kpeɡri ta dɛ kpoŋe tea. 19Dɛ o jaa Josef la ɛ nɛndɛɛɡe o wa ɛɛ su Korowii siwi. Dɛ o fe aa nyin kɛŋɔ ó do Mɛɛre sihiih nɛnfuuh baah ta, dɛ fe ɛɛ nyin kɛŋɔ ó sɔh dɛ́ vɛoh. 20Gɛ waa nɔ aa lɔ Josef liire bini la, belaa Korowii nyundua torome bɛl ba o be deera ta dɛ ba ŋɔ, “Devid naa Josef, dɛɛ berɛ ɔma kɛŋɔ hɛɛ mo Mɛɛree. Korowii Domadɛɛɡee ɡela o kpoŋe tea la. 21Wɛɛ lolɛ bibaalee, ásɛ he pa o sɔn Yeesu, o munii kɛŋɔ Lɛɛ, dɛkalkɛŋɔ on dɛɛ ba bala dɛ́ ba lɛ o nɛra ba wechɔɡa ta.”
22A ɡɛ waa nɔ bwa chiɡo dɛ ɡel waa Korowii aa ɡela o keame bol la ɛ kpela kɛŋɔ waa ŋɔa ŋɔ, 23“Bitolo waa wola baa jemɛ bwa ɛɛ kpoŋe teaa dɛ́ lolɛ bibaa, ásɛ ba yerɔ Imanoɛl.” O munii kɛŋɔ, “Korowii ne ya lole.”#Aes 7:14
24Josef aa ir dom ta la, o ɛ ɡɛ Korowii nyundua torome la aa ŋɔ o be la, dɛ kpɔ Mɛɛre ba o dem. 25Kɛ o ne o ta chɔe bwa dɛ ka tel kɛŋɔ waa lolɛ o bibaa la. Waa lolɔ la, Josef pa o sɔn Yeesu.

© International Bible Society, USA

© Ghana Institute of Linɡuistics, Literacy and Bible Translation

Learn More About mzwDBL