Lewi Dea Tena 7

Bolchɔɡe dii saraha wa

1Korowii berɔ ŋɔ, “Ŋwɛnɛre aa chɔ le tɛ bolchɔɡe dii saraha ɡee nɔ. A do ɡoroŋ kɛrɛdɛ. 2A chɛ kɛ ba teŋe kon la baŋa bela baa dɛ teŋe saraha kwaa baŋa dɛɛ fuah la, ásɛ dɛ ɛ chal la ane merɛ saraha kon la baŋne anaarɛ la bwa ta. 3O noorare la bwa chɛ kɛ bá kpɔ tɛ mɛ. O muŋɡo noo la ne o noyal waa lɔ o tea bini bwa, 4ne o kporombie anɛ ne a noorare aa ja a ta, dɛ o pwɛ bela waa wera. Bá laa o pwɛ bela waa wera la ne o kporombie anɛ la laa kpɔ a pɛ dɔŋa nɛ. 5Sɔfo la fuh noorare la saraha kon la ta ɡɛ baa fuh saraha kwaa dɛɛ tɛ mɛ la. A ɛ bolchɔɡe dii saraha. 6Baa te bɛlbwa waa le sɔfore dea la te won a dii. Kɛ bɔr waa do ɡoroŋee chɛ a dii, a do ɡoroŋ kɛrɛdɛ.

7Webeŋkpoŋii lɔ bolchɔɡe dii ne wechɔɡa kpɔe dɛ kɛ saraha ta. Sɔfo waa kpɔ a ɡɛ kwaa la ka soŋe naate la wechɔɡa n be laanee dɔ a kar la. 8Kondɛɛre bɛlbwa sɔfo la aa kpɔ fuh ɛ saraha tɛ nomɛl la, o tɔn la ɛ sɔfo la kon. 9Mea saraha bɛlbwa baa wɔɔra kɛɛ dɛ daala, dɛ hala ɡee ba hala aa, a ɛ sɔfo la waa kpɔ ɛ saraha tɛ mɛ la kwa. 10Asɛ mea saraha te bɛlbwa aa ɛ men baa kpɔ noo koo a ta, kɛɛ dɛ noo toole a ta noo, a ɛ Arɔn bibaala baa ɛ sɔfore la bwa kwa, a chɛ kɛŋɔ bá bwa bɔna kɛrɛdɛ.

Deŋnesɔɔhna saraha wa

11Ŋwɛnɛre aa chɔ le tɛ deŋnesɔɔhna saraha aa chɛ kɛ ba kpɔ tɛ mɛ laanee nɔ.

12Dɛ jam sarahaa yaa, naate kpɔ men baa kpɔ noo koo a ta iisi aa wola toole a ta dɛ́ wɔɔra. Dɛ biskeeti ɡee yaa, bɛ iisi a ta do dɛ́ kpɔ noo fɔɡa, dɛ́ kpɔ men baa nama a kper kɛrɛdɛ noo koo a ta, dɛ́ charama kɛrɛdɛ dɛ́ kpɔ a bwa ba jam saraha kon la ta. 13Ó berɛ kpɔ paanoo baa do iisi a ta ja deŋnesɔɔhna saraha waa kpɔ ba jam mɛ la ta. 14Naate la kpɔ kwaa la bɛlbwa bini beŋkpoŋ aa chɛ kɛŋɔ ó kpɔ ba tɛ men Korowii la ba ɛ saraha tɛ mɛ. Sɔfo la waa kpɔ deŋnesɔɔhna saraha chal merɛ laanee dɔa. 15Deŋnesɔɔhna saraha ol la ta chɛ kɛ tɔɔ per o ta, bá diu awola tenten baa kpoo la.

16Kɛɛ dɛ saraha la ɛ nyobaɡa saraha kɛɛ o ɡbabir bambile ta saraha aa, bá dia awola tenten. Dɛ ane kao tɔɔ per a ta naa, ba won a dii. 17Deŋnesɔɔhna saraha ol bɛlbwa waa chɔ ka tel tɔpera atoro la te chɛ kɛ ba fuuh. 18Nomɛlbwa waa di ɡɛ saraha ol waa di tɔpera atoro nɔ la, maa o saraha waa baa ɛ la lɛɛ ba. Dɛ aa were dɛɛ su men Korowii siwi kpa. N kia. Waa naate aa koh a waa ba ɛ saraha la berɔ dawɛ o nɛ. Nomɛlbwa waa di ɡɛ ol nɔ la ɛɛ dɔ deŋnetɛraa.

19Dɛ ol la leɡe komɛlbwa waa kah doŋa aa, he bɛ di. A chɛ kɛ ba fuuh. Ol waa wola wera ne dii la, nomɛlbwa waa wola doŋa kaeh la te won dii. 20Kɛ dɛ nɛn kah doŋa dɛ di deŋnesɔɔhna saraha baa ɛa tɛ men Korowii nɔ naa, ba bɛ on kure ja o nɛra nɛɛ kpa. 21Nomɛlbwa berɔ leɡe doŋa kon bɛlbwa, dɛ nɛwɛnyini be pera doŋa bɛlbwaa kɛɛ ola aa wola were ne dii kɛɛ anɔ la baa kia dɛ ba di n deŋnesɔɔhna saraha ol la bɛl la, ba bɛ on kure ja o nɛra nɛɛ kpa.”

22Korowii ŋɔ Mosis be ja ŋɔ 23ó bol Israel tena be ŋɔ, “He bɛ nae, ne peera kɛɛ boohna noorare dɛɛ di. 24Ol bɛlbwa waa sewa ta baŋa kɛɛ kpɔɡ bini olchɔɡe aa kpoo la, baa won kpɔ o noo la ɛ wepɛɛ ane, kɛ he bɛ di. 25Nomɛlbwa waa di ol baa kpɔ ba ɛ saraha dɛ fuh tɛ mɛ noo la, bá pero le o nɛra bini. 26Bobɛlbwa haa ka so bwa, he bɛ jumbie kɛɛ ol bɛlbwa chal di. 27Nomɛlbwa waa di chal la chɛ kɛ bá pero le o nɛra bini.”

28Korowii berɔ ŋɔ Mosis be ŋɔ 29ó ŋɔ Israel tena be ŋɔ, “Nomɛlbwa dɛ ba deŋnesɔɔhna saraha ɛɛ tɛ mɛ naa, o bobɛla ɡboo dɛ́ ɛ n kwa. 30Naate ɡbaɡba kpɔ kon la noo ne o bambile ba tɛ mɛ. Ó kpɔ ba che saraha kon la sie, dɛ́ ɡɔɔ o bambile la dɛ́ viiɡu nyundua n sie. 31Sɔfo la fuh noo la saraha kon la ta, kɛ o bambile la te, Arɔn ne o bibaala konee. 32O nadiɡ hwii la ɛ sɔfo la dibɔr waa dɔa deŋnesɔɔhna saraha la ta. 33Sɔfo waa kpɔ chal la ne noo la ɛ saraha laanee chɛ kɛŋɔ o dɔ o diɡ hwii la. 34Deŋnesɔɔhna saraha Israel tena aa ɛ bwa la, n le o bambile maa ŋɔa baa ɡɔɔro nyundua dɛ viiɡu n sie, ne o hwii la cheɡ á ɛ Arɔn ne o bibaala dibɔr saŋ bɛlbwa dɛɛ la Israel tena saraha kwaa ta.”

35Gɛ bɔra nɔɔ ɛ Arɔn ne o bibaala dibɔra dɛ le saraha kwaa baa fuah tɛ Korowii, awola baa den fuɡe noo do ba nyuune ta dɛ́ do ba sɔfore ta. 36Awola tenten baa fuɡe noo do ba nyuune ta laanee Korowii ŋɔ Israel tena be ŋɔ bá kpɔ ɡɛ bɔra la dɛɛ tɛɛ ba. A ɛ waa aa chɛ kɛŋɔ á chɔ le saŋ bɛlbwa dɛɛ la, ba naanar baa ka ba te bwa bini.

37Waa aa chɔ le tɛ saraha kwaa baa dɛ fuah, ne mea saraha ne wechɔɡa kpɔe dɛ kɛ saraha, ne bolchɔɡe dii saraha, ne nɛn sɔfore ta doe saraha, dɛ deŋnesɔɔhna saraha laanee la. 38Sinai Bwejen pua hɛŋle ɡbo harɛ ta belaa Korowii kpɔ ɡɛ waa nɔ tɛ Mosis awola tenten waa do Israel tena ŋɔ bá kpɔ ba saraha kwaa baa tɛo la.

Currently Selected:

Lewi Dea Tena 7: mzw

Highlight

Copy