Lewi Dea Tena 27
27
Koŋkɛɛla kpɔe ba tɛ Korowii Mmarare
1Korowii ŋɔ Mosis be ja ŋɔ, 2“Kpɔ waa maa dɛ ba bola nɔ tɛ Israel tena. Dɛ nomɛl kpɔ nɛn tɛ Korowii dɛ́ kpɔ pur nyobaɡa aa, suuɡa aa chɛ kɛŋɔ bá bɔ o nyu ta ó dɔ o te laanee 3ɡɛ bɛlbwa baa sɛah kɛŋɔ bá bɔ. Baa waa di bene dɛ le fifraanɛ ka tel fifraanumɛl la, bá bɔ suuɡapoŋa fifraanue, ɡɛ baa maɡa bil Korowii Dea la. 4Hanomoa ɡe, suuɡapoŋa fifraatoroo chɛ kɛŋɔ bá bɔ. 5Ásɛ bibaa waa di bene dɛ le anue ka tel bene fifraanɛ la ɡe suuɡapoŋa fifraanɛ. Bihaahna ɡe suuɡapoŋa fi, 6ásɛ baala bechajeɡre ɡe baa wola bene anue dɔe mɔɔ la suuɡapoŋa anue. Bechale baa ɛ haahna la, suuɡapoŋa atoro. 7Banomonome ɡe baa ɡwaa bene fifraanumɛl la, suuɡapoŋa fi dɛ anue, ásɛ haahna baa ɡwaa bene fifraanumɛl la ɡe suuɡapoŋa fi. 8Dɛ nɛn waa baɡɛ nyoa la ɛ nomɛl waa wola won dɔ suuɡa dɛ́ bɔ ɡɛ baa teŋa bil nɔ naa, ó lawɛ o nɛn la ba sɔfo sie, ásɛ o nyiŋi suuɡa aa chɛ kɛ ó bɔ la ta tɛo ó bɔ.
9Dɛ naate nyobaɡa kon la ɛ kondɛɛre waa wera kɛ ba kpɔ ɛ saraha tɛ mɛ naa, a chɛ kɛ ɡɛ kondɛɛre la do ɡoroŋ. 10Ba bɛ ondoŋ kpɔ charɛ ondɛɛɡe kɛɛ dɛ́ kpɔ ondɛɛɡe charɛ ondoŋ. A ba ɡɛ naa, dɛ a bwa berɛ Korowii kwa dɛ do ɡoroŋ. 11Kɛ dɛ o ɛ kondɛɛre waa wola were kɛ ba kpɔ ɛ saraha tɛ mɛ naa, a chɛ kɛ naate kpɔ ka chaɡle sɔfo. 12Onee dɛ́ nyiŋi dɛ́ baɡle o wer ne o wer bɛ doe bwa dɛ́ baɡle o yoɡ. Gɛ bwa waa baɡle la, dɛ o yoɡii. 13Dɛ naate berɔ dɛɛ nyin kɛ ó yawɛ aa, a chɛ kɛ ó bɔ suuɡa la dɛ́ bɔne a bini bɔre anue dɛ́ bɔ bɔrbeŋkpoŋ ja a ta.
14Dɛ nɛn kpɔ o dem tɛ ŋɔ o ɛ men Korowii kon aa, sɔfoo chɛ kɛŋɔ ó baɡle o wer ne o wer bɛ doe bwa dɛ́ baɡle o yoɡ. Gɛ bwa waa baɡle la, dɛ o yoɡii. 15Naate waa kpɔ dem la tɛ mɛ la berɔ dɛɛ nyin o yawɛ aa, a chɛ kɛ ó bɔ yoɡ baa teŋa bil la, dɛ́ bɔne suuɡa la bini bɔre anue, dɛ́ bɔ bɔrbeŋkpoŋ ja a ta.
16Dɛ nɛn kpɔ o harɛ pera tɛ men Korowii aa, kondwee baa du harɛ la taa baa ba cheɡa, dɛ́ chaɡle harɛ la yoɡ. Mea kuruware fi bɛlbwa ɛ suuɡapoŋa fifraanue. 17Dɛ naate kpɔɔ tɛ mɛ a bena baa berɛ bɛlbwa kon dɛɛ tɛo la ta naa, a chɛ kɛ yoɡ la che ɡɛ. 18Kɛ dɛ a habɔɔ, o berɔ kpɔ tɛ mɛ naa, sɔfo la chɛ kɛ ó na bene aa kaa mɔɔ ba berɛ bɛlbwa kon dɛɛ tɛo o ta la, dɛ́ ɡel o yoɡ ba harɛ tama. 19Dɛ naate la berɔ dɛɛ nyin o kon aa, a chɛ kɛ ó bɔ yoɡ la, ásɛ dɛ bɔne yoɡ la bini bɔre anue, dɛ́ bɔ bɔrbeŋkpoŋ ja a ta dɛ́ berɛ lɛ. 20Kɛ dɛ o yoɡo tɛ nɛmpɛɛ dɛ men Korowii nɔn ta laa o do kpa aa, o ta ŋwɛnɛ dɔe dɛ́ yawɔ kpa. 21Benanyoa baa berɛ bɛlbwa kon dɛɛ tɛo la telo aa, wɛɛ do ɡoroŋee dɛ́ berɛ n kon dɛ́ do sɔfore la nɔn ta.
22Dɛ nɛn yawɛ harɛ waa wola ba dem kon pera ɛɛ dɛ kpɔ tɛ mɛ naa, 23sɔfo la chɛ kɛ ó na yoɡ waa chɛa dɛ́ teŋe, dɛ́ ka tel a bena baa berɛ bɛlbwa kon dɛɛ tɛo la ta, ásɛ naate la bɔ yoɡ baa teŋa la awola tɔpere la tenten. Suuɡa waa bɔ la ɛ men Korowii kwa. 24A ɡɛ benanyoa la ta la, a chɛ kɛ naate berɛ harɛ la tɛ kon te waa yawa dɛ le o be la.
25Gɛ baa maɡa bil Korowii Dea a ɛ suuɡa bwejeɡre fifraanɛ la taa baa ba nyiŋa, dɛ́ baɡle komɛlbwa yoɡ.
26Nomɛlbwa bɛ kondɛɛre biloɡle kpɔ ba tɛ mɛ, dɛkalkɛ a ɛ n kwaa wubwa. Dɛ nao kɛɛ peerii yoo, o ɛ n kon. 27Dɛ kondɛɛre waa wola were ne dii yaa, kon te la ɛɛ berɔɔ won yawɔ ɡɛ baa teŋe o yoɡ la, dɛ́ bɔne yoɡ baa teŋa bil la bini bɔre anue dɛ́ bɔ bɔrbeŋkpoŋ ja a ta. Dɛ kon te la ta berɛ won yawɛ aa, nɛnfale ɛɛ won yawɛ ɡɛ baa teŋe o yoɡ bil la.
28Nomɛlbwa ta chɛ kɛ ó yoɡ kɛɛ dɛ berɛ yawɛ kon waa kpɔa ba tɛ mɛ dɛ ku n nɔn la. Dɛ nɛnee kɛɛ kondɛɛre kɛɛ harɛɛ yoo, o do ɡoroŋ dɛ tɛ mɛ, dɛ ɛ n kon pi.
29Dɛ nɛn kwaraa ba kpɔ ba tɛ mɛ ɡɛ ŋwɛnɛ la ta naa, nɛn aa won berɛ yawɔ kpa. Kpoe dena chɛ kɛ bá kpoo.
30Kondikwaa bɛlbwa aa le harɛ la ta dɛ ɛ mea kɛɛ daa nɔna la, a chɛ kɛ he bɔne a bɛlbwa bini bɔre fi, dɛ́ kpɔ bɔrbeŋkpoŋa ba tɛ men Korowii. A ɛ kwaa aa do ɡoroŋ dɛ tɛ mɛ.#Mma 14:22 31Dɛ nomɛl dɛ nyin kɛŋɔ ó berɛ yawɛ a bini bɛlbwa naa, a chɛ kɛ ó bɔ yoɡ baa teŋa bil la, ásɛ dɛ bɔne yoɡ la bini bɔre anue, dɛ́ bɔ bɔrbeŋkpoŋ ja a ta. 32Kondɛɛre bɛlbwa bini onɔ la waa ja fi la do ɡoroŋ, dɛ ɛ men Korowii kon. Haa dɛɛ kura la, hé kpɔ konswɛm pe o bwara á chaɡle kɛ o ɛ n kon. 33A ta chɛ kɛ kondɛɛre te la chale a bini, dɛ́ kpɔ bɛl charɛ o dɔŋ. O ɛ ɡɛ naa, kondɛɛre anɛ la bwa ɛɛ berɔ ɛ men Korowii kwa dɛ́ do ɡoroŋ, ásɛ nomɛlbwa aa won berɛ yawa kpa.”
34Mmarare nɔɔ Korowii che Mosis nɛɛ Sinai Bwejen ta, dɛ kpɔ tɛ Israel tena.
Currently Selected:
Lewi Dea Tena 27: mzw
Highlight
Share
Copy
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
