Jona 4
4
Jona bandia ne Korowii tedoma
1A ɡɛ waa nɔ ta Jona som doe kwaraa. O baah diu 2asɛ o soŋe Korowii ŋɔ, “N Naa Korowii, waa maa lɔ n bwɛɛ dɛ bol la laa nɔ naa? A waa n fee chwa dɛɛ kaa Taases la. N jemɔ kɛ he dɛ na nɛn sum, he tea dɛ domɛ nɛn nɛ, he baah aa di warawara. Nɛnnyin ɡboo he bwa. He won he liire chara dɛ́ le nɛwɛnyina deŋne tɛra ta. 3N Naa Korowii, n poori den kpo mɛ. N sewɔ bɔ n be kɛŋɔ maa soɡe le.”
4Belaa Korowii ŋɔ, “He ɡe dɔ ŋwɛnɛ kɛŋɔ he baah di waa nɔ ta naa?”
5Ate, Jona le Niniwe bela dɛ kaa o wee leebɔr, dɛ ka do kuku, dɛ so o lɔɡa dɛɛ nyiŋi waa aa pu Niniwe tena. 6Belaa Korowii ɡel juɡ bɛl o papooni aa paɡa le, dɛ tɔ Jona nɛɛ dɛ tɛo chunchule, asɛ o bwara sɔɔhno kohona. Aa ba ɡɛ la, o sie lɛo. 7Tɔɔ aa pera chɔmbibi la, Korowii ɡelɔ dudul bɛl ba chwe juɡ waa ɡela o le dɛɛ tɛ Jona chunchule la, o sewɛ. 8Wee aa baa baŋɛ la, Korowii ɡelɔ peuwɔb bɛl ta le wee leebɔr, wee ɡe do nyɛɡre dɛɛ lɔ Jona nɛɛ kohona, o fe ɛɛ ba sewa dɛ ŋɔ, “N sewɔ bɔ kɛŋɔ maa soɡe le.”
9Anee Korowii ŋɔ Jona be ŋɔ, “He dɔ ŋwɛnɛ kɛŋɔ he baah di juɡ nɔ wa aa?”
Ate, Jona ŋɔ, “Ɔɔh. N baah diu kohona kɛŋɔ n sewɛ kwara.”
10Korowii ŋɔ, “Juɡ nɔ, jwaana beŋkpoŋii o le, he ta o ta koɛh, he laa ɡela o kpeɡ, dɛ o sewɔ jwaana beŋkpoŋ aa, ɡɛɛ o waa ɛɛ we he nɛ aa? 11Aah ɛrɛ waa Niniwe o nɛra aa ɡwaa kaɡboŋa lafa fifraanɛ, baa wola wedɛɛɡa ne wechɔɡa baah jemɛ, ba kondɛɛra ɡe aa wola nyoa dɔe nɔ, ba waa aa wola n nɛɛ weɔ?”
Currently Selected:
Jona 4: mzw
Highlight
Copy
Compare
Share
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
