Jeremia 39
39
Jerusalam paɡra wa
1Waa aa cheɡɛ a ta Jerusalam paɡre laanee nɔ, Kooro Sedekia aa di kora Juda harɛ ta bene anuanaarɛ, korobie fi ta la, Babelɔn Kooro Nebukadnesa kpɔ o laa tena bwa kaa Jerusalam dɛ ka chɔ bar ba, dɛ yoo ba.#2Ko 25:1-12 2Kooro Sedekia aa di kora bene fi dɛ beŋkpoŋ ta, korobinaarɛ tɔpenuanaarɛ ta la, ba kuuɡi Jerusalam danjwɛjen la, dɛ jo ba be. 3Belaa Babelɔn kooro nomonome bwa kpɔ ba kane ba so Baah ta Doonyoa la ta. Banee Nɛrɡal Saresa waa le Samɡa, ne Nɛbo Sarsekim waa chɔ nomonome la nyoa, ne Nɛrɡal Saresa bɛl ɡe, dɛ nomonome baa kaa bwa. 4Juda Kooro Sedekia ne o laa tena bwa aa na ɡɛ la, ba chwao le bwɛjen la bini dɛ kpɔ doonyoa bɛl waa lɔ danjwɛɛre anɛ ane baah ta le, dɛ kpɔ sie chaɡɛ kaa Jɔɔdan Fɛlembɔjen ta jwaana.
5Babelɔn laa tena la ti ba dɛ ka lawɛ Kooro Sedekia Jeriko harɛ bɛl waa chɔa kaa ta. Ba lawɔ ka tɛ Babelɔn Kooro Nebukadnesa, ɡɛ saŋ dɛ o lɔ bwɛjen Ribla waa lɔ Hamat harɛ ta. Belaa Babelɔn Kooro Nebukadnesa ka bol o waa dɛ pao bolchɔɡe. 6Babelɔn kooro kpoo Kooro Sedekia bibaala o siwi ta Ribla bela, dɛ kpoo Juda nomonjena ɡe bwa, 7dɛ foromi Kooro Sedekia sibie dɛ doo ayaawa jɔɡrɔre, dɛ kpɔɔ kaa Babelɔn harɛ ta.
8Babelɔn tena la fuh koodem la ne nɛra la deene, dɛ kuuɡi Jerusalam danjwɛɛre bwa ɡe. 9Nebusaradan waa chɔ kooro laa tena baa dɛ daahno nyoa, lawɛ nɛra baa kaa dɛ do Jerusalam, dɛ banɔ la baa baa ja o nɛɛ la bwa kaa Babelɔn harɛ ta. 10Kɛ o ɡel nɛra baa nyaa dɛ do Juda harɛ ta bini bane baa wola komɛlbwa dɔe kwaraa la, asɛ dɛ kpɔ daa kooni ne kooni tɛɛ ba.
11Dɛ Babelɔn Kooro Nebukadnesa fa cheɡɛ men Jeremia nɛɛ dɛ do Nebusaradan waa chɔ laa tena baa dɛ daah kooro nyoa la ŋɔ, 12“Kpɔɔ kaa dɛ́ kaa nyiŋi o nɛ, dɛɛ berɛ on hɔhɔrɔwa bɛlbwa ɛɛ, kɛ wobɛlbwa waa dɛ nyin la, ɛ tɛo.” 13Anomanta, Nebusaradan waa chɔ nɛra baa dɛ daah kooro ne Nebusasban ne Nɛrɡal Saresa baa ɛ nomonjena, dɛ Babelɔn kooro nomonome la kabora 14tomɛ nɛra ŋɔ bá ka kpɔ mɛ le koodem dembaah bela ba. Ba kpɔ mɛ do Ahikam bibaa Gedalia, o ɡe mɛɛ aa ɛ Safan la nɔn ta, ŋɔ ó nyiŋi n nɛɛ kɛrɛdɛ dɛ́ tel n ne n bwɛ. Gɛɛ a do n berɛ ka so n nɛra bini.#2Ko 25:22-25
15Gɛ saŋ baa laɡ mɛ do dea dembaah bela baa dɛ daah la, Korowii bol waa men Jeremia be ŋɔ, 16“Ir la ka ŋɔ Itiopia te Ɛbɛd Mɛlɛk be ŋɔ men Koranar Bwa Kooro, Israel tena aa dɛ tomɔ la ŋɔ, ‘N dɛ ba ɡela wekpeɡa maa ŋɔa mɛɛ kpɔɔ ba ta bwɛjen nɔ nɛra nɛɛ la ba, wedɛɛɡa te laa. A ɡɛ saŋ telo aa, hɛɛ naa siwi nee.#Jer 38:7-13 17Kɛ men Korowii ɛɛ lɛɛ awola tɔpere, baa wola hen lawɛ tɛ nɛra haa dɛ ɔm ba la. 18Mɛɛ kpɔ nɔnee tɔ he nɛ, baa wola won kpoe. Hɛɛ chwao dɛ lɛ he nyu, dɛkalkɛ he kpɔ he te dawɛ n nɛ. Men Korowiirii bola.’ ”
Currently Selected:
Jeremia 39: mzw
Highlight
Copy
Compare
Share
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
