Jeremia 30
30
Korowii berɔ lɛ o nɛra Israel tena
1Waa Korowii Israel tena aa dɛ tomɔ, 2ŋɔ men Jeremia be ŋɔ, “Chwerɛ waa maa bol he be la bwa do tɔn bini. 3Tɔpera ane dɛ ba, ásɛ n lawɛ n nɛra Israel ne Juda tena le harɛfala ta, dɛ́ berɛ kpɔ ba ba harɛ maa kpɔa tɛ ba naawa ŋɔ ba konee la ta. Men Korowiirii bola.”
4Waa Korowii aa bol n be, Israel ne Juda tena wa laanee nɔ.
5“N no lɔŋɔ waa do ɔma kohona,
hundam chole bobɛlbwa,
deŋnesɔɔhna
aa wola toole bela.
6Hé pɛɛ no!
Baa lɛɛ won kpoŋe tea
dɛ́ lolɛ bie aa?
Aah ɛrɛɛ mɛɛ na baala
ba bwara aa kpeɡa,
ba nɔɔra dawɛ ba teene ta
kɛŋɔ haah loltea
aa lɔɔ nɔɔ?
Nomɛlbwa siebɔr ɡwaŋɔ
kohona.
7Tɔpechɔɡe bɛl dɛ ba,
baa won kpɔ
tɔpere bɛlbwa maɡɔ.
Wɛɛ ɛ suna dii tɔperee tɛ
Jekɔb naanar,#30:7 Jekɔb naanar nɔ, ba berɔ che tɛ Israel tena ɡe.
kɛ ane a bwa,
baa le a nyoaa.”
8Koranar Bwa Kooro ŋɔ,
“Awola tɔpere la,
mɛɛ kuuɡi kon waa do
kɛŋɔ da,
ba yon kpɔ dawɛ nae nɛɛ
aa parɛ,
ba kpɔ dawɛ Jekɔb naanar
baŋa ta laanee,
dɛ́ kuuɡi jɔɡrɔre la ɡe bwa.
Ásɛ nɛŋhɔɔhra aa won
dɛɛ fiɡ ba kpa.
9Baa tomɛ men Korowii
baa dɛ tom mɛ laanee,
ne Kooro Devid
naa maa leo tɛɛ ba,
wɛɛ di kora ba nɛɛ la.
10Anomanta, n nɛra, he bɛ ɔmɛ,
Israel tena, he bɛ ɡel
he bambile chɔɡ.
Mɛɛ lɛ heyaa le
bojaŋ harɛre taa ba,
he naanar baa laɡ ba kaa
bojaŋ harɛfale ta la.
Ásɛ he berɛ dɔ deŋnesɔɔhna
ne bosɔɔhna,
nomɛlbwa aa
heyaa aah kpa.
11Mɛɛ ja he nɛɛ, ásɛ dɛ lɛ heya.
Mɛɛ chɔɡ harɛre nɛra
maa lɔ heyaa peɡre
ba bini bwaa,
kɛ he te, maa den chɔɡ
heyaa kwaraa.
Mɛɛ tɛr he deŋnee,
kɛ mɛɛ sune he nɛɛ
dɛ́ nyiŋi heya kɛrɛdɛ.
Men Korowiirii bola.”
12Korowii berɔ bol waa o nɛra be ŋɔ,
“He ŋwɛra aa won tonɛ,
he bola haa dɔa bwa
ɡe haa chaeh dɔ.
13Nomɛlbwa toole dɛ́ nyiŋi
he nɛ, tɛɛɡa toole
dɛ́ chah he ŋwɛra,
hwɛɡa bɛlbwa toole kɛ
baa chah heyaa.
14He daamanar bwa soh he wa,
bɛlbwa toole dɛɛ nyiŋi
heyaa kɛrɛdɛ kpa.
N baa yo heya kɛ he dɔm,
dɛ tɛr he deŋne kohona,
dɛkalkɛ he wechɔɡa
ne he nyubinikpeɡ kan
kɛrɛdɛ.
15He bɛ bola baa do
he yaa la waa dɛɛ wi,
baa won chah heya.
He wechɔɡa ne
he nyubinikpeɡ kan
kohona,
a waa n tɛr he deŋne.
16Kɛ taraken, nomɛlbwa waa
dɛ nyin he chɔɡa la
mɛɛ chɔɡoo,
ásɛ ba lawɛ he dɔma bwa
kaa harɛfala ta.
Nɛra baa dɛ fiiɡi heya la,
baa fiiɡi ba ɡee,
ba pa he laala kaa laa,
baa pa ba ɡe laalaa.
17Kɛ mɛɛ berɔ ɡel he dɔ
bokpeɡa
ásɛ dɛ chah he ŋwɛra,
a lole kɛŋɔ
he dɔma dɛ bol kɛŋɔ,
‘Ba vɛh Saayɔn,
nomɛlbwa
aa o waa dawɛ kpa.’
Men Korowiirii bola.”
18Korowii ŋɔ,
“Mɛɛ berɔ lawɛ n nɛra
ba ba harɛ ta,
dɛ́ dɔ tedoma tɛ bɛlbwa ne
o lolanar.
Baa berɔ kwaa ma
Jerusalam,
dɛ́ kwaa o koodem la cheɡ
o buɡ ta.
19Nɛra baa soɡe bela ɛɛ ɡo
kpɛɛra yelaa,
dɛ́ do lɔŋɔre dɛɛ hɛɡre.
Mɛɛ swee ba andɛɛɡaa,
dɛ́ ɡel ba mun ya,
ásɛ dɛ dɔ duure.
20Ba bii ɛɛ berɔ do kɛ saŋ la
ken,
ásɛ n lawɛ harɛ la nɛra
ba che kiŋkiŋ n sie,
dɛ́ tɛr nomɛlbwa
waa fiɡ ba la deŋne.
21Ba ɡbaɡba binii ba sitɔɔ
waa ɛ ba kooro ɛɛ ba lee.
Mɛɛ lawɛ ɡɛ nɛn laanee
ba n be ó bɛn mɛ.
Umee dɛ́ won ba n be
dɛ n laa ta nɔn yerɔ wɔ?
Men Korowiirii bola.
22Gɛɛ hɛɛ ba n nɛra ɛɛ,
ásɛ n ɡe ɛ Korowii
haa dɛɛ tom mɛ.”
23Hé na, Korowii bandia do
kɛŋɔ peukpeɡ,
dɛ́ ta kpɔ nyubinikpeɡ tena
nyuune ta.
24Korowii bandia waa do ɔma la
nyoa aa won sɔɔh,
atane o tonɛ
o bambile bini wa.
Tɔpera ane ta dɛ ba mɔɔ,
ásɛ n nɛra
won no waa nɔ mun.
Currently Selected:
Jeremia 30: mzw
Highlight
Copy
Compare
Share
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
