Aesaya 8
8
Korowii cheɡɛ Asiiria koojen nɛɛ ɛ o wa
1Korowii berɔ ŋɔ n be ja ŋɔ, “Nyin tɔnjen ásɛ dɛ chwerɛ waa maa dɛ́ ba bola nɔ do o ta. Chwera a do bare. Anee kɛŋɔ Mahɛr Salal Has Bas. O munii kɛŋɔ, ‘Bá ɛ warane dɛ́ ka kam anɔ la baa won, bá kpɔ chwae dɛ́ ka pa laala aa kaa.’ 2Mɛɛ ɡeloo n dea sɔfo Uria ne Sekaria baa dɛ yerɛ o mɛɛ Jɛbɛrkea ɛ n danseɛ tena. Ba waa dɔ kasinteŋ.”
3Aa la sie la, n haah kpoŋe tea dɛ lolɛ bibaa. Asɛ Korowii ŋɔ n be ŋɔ, “Pao Mahɛr Salal Has Bas. 4Bie la ne kpeɡa dɛ́ jemɛ ‘nya’ ne ‘mɛɛ’ yera la, dɛ Asiiria koojen baa pa Damaskɔs tena kondɔɔh ne Samaria tena laala laa ta kaa.”
5Korowii berɔ bol waa n be ja dɛ ŋɔ,
6“Jerusalam tena aa vɛh
nyiŋa maa dɛ nyiŋi
ba nɛɛ bɔeeh
kɛŋɔ Siloa nenabɔɔ
aa dɛ palɛ bɔeeh,
dɛ dɔ silɛɛ Kooro Resin
ne Kooro Pɛka nɛɛ
kɛŋɔ bá ba cha ba
nomanta,
7mɛɛ ɡeloo Asiiria koojen
ne o laa tena yoo ba.
Báa ba ba nɛɛ kɛŋɔ
Yufretis Moo aa sua bɔle
o diŋɡoŋni bwa ta,
8dɛ́ su kpɔ Juda harɛ bwa,
dɛ́ tel ba baŋa ta dɛ́ bɔle
komɛlbwa ta.
Imanoɛl, wɛɛ paɡri o kenaa
tɔ he harɛ la bwa.”
9Anomanta, harɛre nɛra,
hé lawɛ he te pɛ
dɛ́ so ɔmee ta!
Harɛre haa lɔ bojaŋa bwa
nɛra, hé no.
Hé kpɔ he te dɛ́ ka yo,
kɛ hɛɛ ɔmɛ!
Hé kpɔ he te dɛ́ ka yo,
kɛ hé ɔmɛ!
10He vɔrɔwe vɔrɔwa bɛlbwa
kwaraa naa, aa ɛ pɛɛpɛɛ.
He bol wobɛlbwa ɡɛ haa dɛ
nyin kwaraa noo,
aa ɛ wepuu,
dɛkalkɛŋɔ Korowii
ne ya lole.#Weɛ 5:39
Korowii ɔma
11Belaa Korowii kpɔ o kpeɡri kah mɛ ŋɔ n bɛ ŋwɛnɛ Juda tena aa dɛ kpɔ ta teŋɛ. O ŋɔ,
12“Bɛ vɔrɔwa bwa nɛra aa
bol a waa he be la ta no,
dɛ bɛ waa baa dɛ ɔma la
dɛɛ ɔmɛ.
13Jemɛ kɛŋɔ Men Nemenɛ
Korowii do ɡoroŋ.
Menee chɛ kɛŋɔ hɛɛ ɔmɛ.
14Menee boɡoroŋ haa jo
dɛ́ dɔ he nyu.
N berɔ do kɛŋɔ bwe Israel
tena ne Juda tena
aa lɔ naa dɛ choɡli,
dɛ berɛ do kɛŋɔ bel dɛ chɔ
kpa Jerusalam tena
dɛ́ laɡ ba.#Rom 9:33; 1Pi 2:8
15Ba ɡalɡa ɛɛ lɔ naa,
dɛ́ choɡli dɛ kuuɡi.
Belii dɛɛ ba ba lawa.”#Mat 21:44
16Pa waa Korowii aa kpɔa tɛ
mɛ la bwa pɛ.
Marɛ o nyoa dɛ́ kpɔ cheɡ n
habɔteŋra be.
17Mɛɛ kpa Korowii waa waa
bola la waa.
O laa sie kpɔ Jekɔb naanar
nɛɛ taraken,
kɛ mɛɛ kpɔ n hwɛɡaa do
Korowii nɛ.#Hib 2:13
18N ne bechale Korowii aa tɛ mɛ laanee la. Nemenɛ Korowii waa soɡe Saayɔn Bwejen ta la ɡelɔ ya che tɛ waa aa dɛ ba ɛɛ Israel tena bini.
19Nɛra ŋɔ he be ŋɔ hé la voɡra baa dɛ bol waa woroworo ne ajɔsaara be dɛ́ ka jemɛ waane bini naa, dɛ a dɔ mun aa? Bɔkwa waa chɛ kɛŋɔ yá ka bɔɔ lala dɛ́ jemɛ weera waa bini nɔ? Korowii yaa dɛ tomɔ laa chɛ kɛŋɔ yá kpɔ ya waa dɛɛ bil o sie naa?#1Sa 28:8 20Báa teŋɛ me Mmara ne n webaɡla la ta! Dɛ ba ta ɡɛ waa la aa dɛ baɡle la bolaa, amɔ te a do kɛŋɔ baa soɡe biro ta ken. 21Ba bwara ɛɛ hwaoh baa valɛ harɛ la ta, lɔr ɡe kpo ba, ba kpɔ bandia ha sie nyundua dɛ́ taah ba kooro ne Korowii baa dɛ tomɔ. 22Ásɛ dɛ berɛ nyiŋi harɛ, baa komɛlbwaa na ka ja wahala ne ɡɛ bɔr aa bira kpirkpir dɛ do ɔma, ásɛ ba ɡbɔɡ ba ta biro tenten la ta.
Currently Selected:
Aesaya 8: mzw
Highlight
Share
Compare
Copy
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
