Aesaya 66

Korowii ɛɛ bol harɛre nɛra waa dɛ́ pa bole

1Korowii ŋɔ,

“Nyunduaa n kara,

asɛ harɛ ɡee n natiɡribɔr.

Debesoo siwii hɛɛ ba wona ma

ń jo o ta nɔ?

Debesoo taa ń won jo

dɛ́ chɔ onɔɔ?#1Ko 8:27#Weɛ 7:49-50

2N ɡbaɡba laa ta ɡɛ

kwaa nɔ bwa kɛɛ?”

Korowiirii bola.

Korowii berɔ ŋɔ, “Nɛra baa

pwɛr ba te,

dɛ sɛh ba liire chara laanee

mɛɛ nyin kohona.

Banee dɛɛ ɔm mɛ dɛɛ no

n wa.#Yel 34:18

3Gɛ nɛra la dɛ ɛ

waa aa too ba tea.

Ba kpo nao ɛ saraha

tɛ mɛ naa, a do kɛŋɔ

baa kpo nɛn ken,

a do kɛŋɔ baa kpo nyoate.

Gɛɛ nomɛlbwa waa ɛ mea

saraha la, a do kɛŋɔ

parakoo chal,

bɛlbwa fuh daawiile ɡe aa,

a do kɛŋɔ waa dɛ tu voɡa.

Kwaa maa kia la taa

ba sie ɛɛ lɛ.

4Anomanta, mɛɛ kpɔ

wekpeɡaa ba ta ba nɛ,

waa baa dɛ ɔma kohona la.

Dɛkalkɛŋɔ n yer ba,

bɛlbwa ta chaŋɛ,

dɛ bol wa, bɛlbwa ta deŋne

cheɡɛ dɛ no.

Ba berɛ habɔɔ kpo mɛ,

dɛɛ ɛ waa maa wola nyin.”

5Hé no waa Korowii aa dɛ bol,

he nɛra haa dɛ ɔmɔ

dɛɛ no o deŋna waa la.

O ŋɔ, “He wa aa dɔ kasinteŋ

tɛ mɛ nomanta,

he bala bane hah heya,

dɛ vɛh heya.

Ba dɛ muɡli he baah ŋɔ,

‘He ɡel Korowii baɡle

o kpeɡri dɛ́ lɛ heya

ásɛ ya na he silɛɛ.’

Kɛ ba ɡbaɡbaa dɛɛ ba

sihiih dii kohona.

6Hɛɛ no moola kohona

aa dɛ le bwɛjen la bini,

dɛ́ no ɡbɔɡa aa

le Korowii Dea bela.

Korowii deŋnetɛra waa kpɔa

dɛɛ tɛ o dɔma moolaa.

7N bwɛjen waa do ɡoroŋ la

do kɛŋɔ haah waa lolɛ bie

waa wola weweele

bɛlbwa nae.

8Nomɛl noɔ kɛɛ

dɛ na waa nɔ dɔŋa ka aa?

Baa won vɔrɔwe harɛbir

tɔpebeŋkpoŋ aa?

Gɛɛ loltea aa wola

Saayɔnee lɔ biɡri

ó na weweele mɔɔ

dɛ́ lolɛ o bii.

9Mɛɛ pili haah lolee

dɛ́ berɛ vɔmɔ bie aa?

He bɛ lii kɛŋɔ saŋ telo kɛŋɔ

ba lolɛ n bii aa,

mɛɛ tɔ a ŋwɛnɛɛ.”

Korowiirii bola.

10He banɔ la haa dɛ nyin

Jerusalam waa la,

he ne ó pɛ lɛ sie.

Nɛra haa wia tɛo bwa ɡe

hɛɡre.

11Jerusalam ɛɛ dɛɛ heyaa

hé dɔ o kondɔɔh la ane

hé sie lɛ,

kɛŋɔ haah elne yon bu

o bie nɛɛ ó ɔr vaɡɛ la.

12Korowii berɔ ŋɔ,

“Jerusalam, mɛɛ ɡeloo

deŋnesɔɔhna ne harɛre

kondɔɔh bu he nɛɛ kɛŋɔ,

nee waa wola hweeh

bwa ken.

Hɛɛ ɛo kɛŋɔ haah yon kpoŋe

o bie nɔn ta, dɛɛ nyinu,

dɛɛ dɛɛro la.

13Mɛɛ larawe Jerusalam tena

bwaraa,

ɡɛ haah yon dɛɛ ɛ o bie la.

14Dɛ he na ɡɛ waa nɔ a chiɡ aa,

he sie ɛɛ lɛo, a tɛɛ kpeɡri,

ásɛ he jemɛ kɛŋɔ

n dɛ cha nɛra

baa dɛ no n deŋna wa,

dɛɛ baɡle n bandia nɛra

baa ɛɛ mɛ dɔm nɛ.”

15He na, Korowii kpɔ

o torɔɡore dɛɛ ba nii ne

kɛŋɔ kawulewule.

O baah dɛ fuh kohona,

wɛɛ ba ó ba tɛr

nɛra deŋne.#2Te 1:7-8

16Nii ne laalee wɛɛ ba kpɔe

tɛr harɛ nɔ

nɛra bwa deŋne.

Nɛra waa kpoo

ba ɛɛ warɔɔ taeh.

17Korowii ŋɔ, “Saŋ telo kɛŋɔ n kpoo banɔ la baa laa doŋa kpɔ ba nɛɛ dɛɛ la voɡa ta daa mune, ne banɔ la baa dɛ chwe parakoo ne mari, dɛ kondikwaa bwa soo siwi maa kia la.

18Maa jemɛ ba liire ne ba we-ɛɛla nomanta, n dɛ ba ń yerɛ harɛre nɛra, ne wobol bɛlbwa tena bwa cheme, ásɛ ba na n jirima.

19Mɛɛ ɛ waane ba binii, dɛ́ tomɛ banɔ la baa le a nyoa la, ásɛ ba la bojaŋa harɛre nɛra baa wola n waa noɛ dɛ na n jirima ne n kpeɡri la be. Harɛre nɛra kɛŋɔ, Taases ne Lebya dɛ Lidia tena. Lidia tena nɔ jemɛ to tae taeh, ne Tubal ne Grik tena harɛ. Gɛ harɛre nɔ nɛra bee baa ba laŋa dɛ́ ka bol n kpeɡri maa dɔa la waa baɡ ba. 20Baa kpɔ he bala baa lɔ bela harɛre la ta laanee ba tɛ mɛ kɛŋɔ koŋkɛɛla ken. Jaɡre ne keeɡore ne nyoɡmare ne kwaa aa do kɛŋɔ torɔɡore, ne anɔ la aa dɔ tɔre baa taɡa nee baa ba koŋkɛɛla ne bala ba tɛ mɛ, n bwejen waa do ɡoroŋ ta Jerusalam. Baa ba a nee kɛŋɔ Israel tena yon kpɔ mea sarahare do kondɛɛɡa bini baa tɛ mɛ n Dea la ken. 21Mɛɛ le ba bini banee ɛ sɔfore ne Lewi dea tena.”

22Korowii ŋɔ, “Gɛ harɛfale la ne nyundufale maa dɛ́ ba tae a che n kpeɡri ta dɛ́ che kiŋkiŋ la, ɡɛɛ he ne he naanar sɔna ɛɛ ba cheɡa.#Aes 65:17 23Korobifale Tɔpejena dii ne Ona Tɔpere bɛlbwa ta la, nɛwɛnyina bwa ɛɛ ba tom mɛɛ Jerusalam bonɔ. 24Nɛra ɛɛ leo dɛ́ kaa nyiŋi banɔ la baa ɛɛ mɛ deŋnekpeɡ la lala kɛ baa serewa chɔ. Dudule aa dɛ di ba ola la aa sewɛ bwa, nii aa dɛ fuuh ba ɡe aa dime bwa, ásɛ ba waa pe nɛwɛnyina bwa.”#Mak 9:48

Currently Selected:

Aesaya 66: mzw

Highlight

Compare

Copy