Aesaya 63
63
Korowii yo harɛre nɛra dɛ pɔ ba nɛ
1“Umee le bwɛjen Bosra waa lɔ Edom harɛ ta
dɛɛ ba nɔɔ?
Umee ka dɛ ba dɛ tɔ
yaswɛɛma
dɛɛ ba kpeɡri
ne bokpeɡa ta ken?”
Anee Korowii ŋɔ,
“Menee, n dɔ kpeɡri
dɛ́ won lɛ heya
n dɛ ba dɛ́ ba bol yoi
maa yoa
dɛ pɔ wechɔɡa nɛɛ wa.”
2“Bɔkwaa ɡela he yal nɔ swɛɛ
kɛŋɔ nɛn waa tiɡri
ɡrepo nɔna ta nɔɔ?”
3Korowii ŋɔ, “N tiɡri harɛre
nɛra nɛɛ kɛŋɔ,
baa tiɡri ɡrepo nɔna ta ken,
nomɛlbwa ta men ba chae.
Bandia nee n tiɡri ba nɛ,
asɛ ba chal ɛ n yal bwa la.
4N liiro kɛŋɔ saŋ maa lɛ
n nɛra la telo,
kɛŋɔ n tɛr ba dɔma
deŋne bɔ kem.
5A ɛɛ mɛ nyokpoa kɛŋɔ,
maa nyiŋa n ta nomɛlbwa
nae ó ba cha mɛ.
N bandia ɡelɔ n dɔ bokpeɡa
dɛ won yo dɛ pɔ
n dɔma nɛ.
6Bandia nee n tiɡri harɛre
nɛra bwa nɛ,
dɛ fuɡe ba chal ta harɛ.”
Kpɛɛra ne wesoŋa
7Mɛɛ bol Korowii nyina
aa wola jaɡa dɔe la waa.
Mɛɛ kpɛɛro waa bwa waa ɛa
tɛ yaa la wa.
O nyina aa wola jaɡa dɔe
ne tedoma waa dɔa
nomanta,
o swee andɛɛɡa tɛ ya
Israel tena.
8Korowii ŋɔ, “N nɛraa ban,
baa men neɡre.”
A waa o lɛɛ ba le ba
wenaale ta la.
9Nyundua torome laa lɛɛ ba
le ba wahala ta,
Korowii ɡbabirii lɛɛ ba.
Nyina ne tedoma waa dɔa tɛɛ
ba waa o lɛɛ ba.
O nyiŋi ba nɛɛ le saŋ la
bwa.#Kaa 19:4
10Ba ɛ deŋnekpeɡ o nɛɛ
dɛ ɡel Korowii Domadɛɛɡe
tea bini chɔɡ.
Anomanta, Korowii berɛ ba
dɔm dɛ yoo ba.
11Anee ba berɛ lii waa aa
chiɡa,
Korowii bonɔɔ Mosis saŋ la,
asɛ dɛ bɔɔ ŋɔ,
“Leperaa Korowii waa lɛ o
nɛra ne ba sitɔɔla le mpo
ta la dɔɔ taraken nɔ?
Korowii waa kpɔ
o Doma tɛ Mosis la sɛ?#Kaa 14:21-22
12Korowii aa cheɡɛ o kpeɡri ta
dɛ ɡel Mosis ɛ wejena mpo
teŋe la,
o lɛ sɔn waa wola jaɡa dɔe.
13O nɛra kpɔ bela o fea luŋa
dɛ ɡale.
Mosis cheɡɛ Korowii nɛɛ
dɛ kpɔ ba ɡale kɛŋɔ jaɡre
a siwi aa beɡra aa chwa
aa wola naa lɔ la.”
14Gɛ ba yon teɡɛ nae kaa
deŋɡarere dor harɛ waa
chɔa kaa ta a yon
ka onɛ la,
ɡɛɛ Korowii tɛ o nɛra ona.
O tɔ o nɛra sie
o sɔn dɔ jirima.
15N Naa Korowii, ba sie ne
harɛ le nyundua boɡoroŋ
bela haa soɡa ne jirima
haa dɔa dɛ́ nyiŋi yaa.
Leperaa nyina he fa aa
dɛ nyin ya waa la dɔɔ?
Leperaa he kpeɡri la dɔɔ?
He nyina ne he tedoma
la sɛ?
Bɛ yaa ta.
16Dɛ ya nabaa Abraham
ne Jekɔb ŋɔ baa yaa
jemɛ kwaraa naa,
he te aa yaa ta,
henee ya mɛɛ.
17N Naa Korowii,
ɛrɛɛ he ɡel ya kpaŋe
ya laa sie kpɔ
he ŋwɛnɛre ta nɔɔ?
Ɛrɛɛ he ɡel ya ɛ deŋnekpeɡ,
dɛ berɛ habɔɔ kpoe nɔɔ?
Koh banɔ la baa dɛ tomɛ
ne banɔ la baa ɛ he nɛra
la waa dɛ́ ba ya be.
18He Dea waa do ɡoroŋ
fa ɛ he nɛra kon saŋ bɛl,
kɛ taraken ya dɔma kuuɡu,
dɛ tiɡru do harɛ.
19Ya do kɛŋɔ nɛra he fa aa
wola ya nɛɛ nyiŋe ka,
kɛɛ ya ta he nɛra ɛɛ ken.
Currently Selected:
Aesaya 63: mzw
Highlight
Share
Compare
Copy
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
